" MAULID NABI "

" MAULID NABI "

Oleh : Tgk Diyueb Bruek/Sulaiman.A.Gani

Alhamdulillah, lon puphoen kalam

Lon pujoe Tuhan, Sidroe yang Esa

Yang  peujuet langet, hana  meutiang

Yang peuna  peutan, Raseuki  Haba

Seulawuet saleum, akan janjongan

Pang  ule Alam, Ban Sigoem  Donya

Yang bri syafaat, uroe komdian

Peubtat  timbangan, serban  Maulana

Samboet saleum lon, keu bandum rakan

Dalam  Grup Muprang, Panton meurika

Tuha ngoen Muda, Inoeng ngoen Agam

Hana bedaan,  Bandum lon sapa

Hajat lon rika, lahe  janjongan

Pang  ule Alam, Rasul  Mustafa

Dua blah hari, Rabiul  Awal

Lahe janjongan, neupandang Donya

Bak malam lahe, utusan Tuhan

Le  keujadian, Tuhan  yang Esa

Neubuka kitab, Tareh  Iseulam
Abrahah kiban, jiseurang  kuta

Ngoen teuntra  Gajah, Ka’bah jiseurang

Sit Sidroe Tuhan, yang that  kuasa

Thairal  Ababil, Neubri  bantuan

Batee jahannam, Apui  Nuraka

Teuntra Abrahah, mate meutimphan

Gajah pih meunan, mate  meukeuba

Ngoen tuah Nabi, janjongan Alam

Nibak malamnyan, le that pristiwa

Kutika suboeh, beungoeh  seunanyan

Caya peungueh trang, ban saboeh donya

Leumah seumeulhoh, seuluroh Alam

Nanggroe Rom ngoen Syam, benderang cahya

Dum Pintoe langet, neubuka palang

Meunan keuh macam, lahe maulana

Dum  Malaikat, Sujud bak Tuhan

Lake  Ampunan, keu umat  dumna

Siti Asiah, deungan  mariyam

Peurintah  Tuhan, yue u donya

Neuba ngoen ija, ngoen peusalinan

Tumpe janjongan, ija  syuruga

Bandum Binatang, yangna lam alam

Samboet janjongan, lahe  u donya

Seubab Muhammad, Rahmat keu  Alam

Jen deungan insane, Binatang dumna

Bak malam lahe, janjongan  Alam

Iblis ngoen Syetan, jimoe meu a’ a’

Patoeng lam ka’bah, patah meukhan khan

Apui pih padam, kaglap gulita

Meunan lam kisah, tareh  iseulam
lahe janjongan, keunoe  u donya

Tanyoe khanduri, keunang janjongan

Tapeuringatkan, lahe  saidina

(Tgk Diyueb Bruek/Sulaiman.A.Gani)19/01/2013