================================
Bismillahirrahmanir rahimAkhbarul karim , lon calitra
Awai wajeb bak, mukallaf
Meungucap syahadat, kalimah dua
Syahadat tawhid, syahadat Rasul
Dalam usul , lahe nyata
Asyhadu an la ilaha illa llah
Wa asyhadu anna Muhammada r-rasulu l-lah
Kuek saksi Poku Tuhan
Hana laen seubagoenya
Zat ngon sifeuet na bak Tuhan
Hana saban miseue hamba
Hana jaroe hana gaki
Maha suci Allah Ta'ala
Kuek saksi Nabi Muhammad
Peusuroh jeuep alam donya
Suroh Tuhan bak jen ensan
Troh bak ikan nyang me donya
Bak binatang kayee bate
Troh pangulee keupadanya
Nabi Muhammad aneuk Abdullah
Di nanggroe Makah asai mula
Kusyik geuhei Abdul mutalleb
Bangsa Arab Nabi mulia
Maneuh geuhei Siti Aminah
Siti Halimah nyang peulara
Nyan nyang pumom Rasulullah
Meunan peuneugah dum ulama
Rupa Nabi sangat indah
Siulah-ulah buleuen purnama
Soe nyang pandang mata ladat
Pangsan rakyat jieu rupa
Kuletneuh puteh meujampu mirah
Siulah-ulah ban bungong jeumpa
Lama peuet ploh thon neudong di Makah
U Madinah teuma neubungka
Teutap Nabi di Madinah
Peurintah Allah Azzawajalla
Neu 'ibadat hana khali
Neuprang kafe hana reuda
Nabi nyang laen meulaksa ribee
Leubeh pangulee Nabi kita
Nyang awai phon Nabi Adam
Keusudahan Nabi Mustafa
Kubu Nabi di Madinah
Ureueng diarah meuribee laksa
Allah bri beureukat bak geutanyoe
Seubab dua droe ureueng mulia
Abeh haba makna syahadat
Ma'rifat jinoe takira
Jinoe Ion boh maseng pasai
Mangat takeunai maseng tangga
Geunap siploh pasai di sinoe
Tadeungo adoe Ion calitra
Pashal nyan phon wahai sahbat
Makrifat loen peunyata
Makrifat keu Tuhan ngon keu Nabi
Na teulee bagi bak meuhingga
Wajeb mustahel teulee ngon jaiz
Bandum beuhabeh ta keunal nyata
Soe han keunal Sifeut Tuhan
Pagee zaman lam neuraka
Sifeut wajeb le bak Tuhan
Hana insan nyan ek kira
Hana wajeb beutatok thee
Tafashalee tapeunyata
Seubab hana tatumee dali
Hana neubri, brat ubak hamba
Sifeut dua ploeh wajeb tathee
Seubab tatumee dalil jih na
Toh dua ploeh wahia toulan
Jinoe loen kheun ban tabileung sa
Sifeut nyan phoen nama jih Wujud
Makna lanjut hanku bawa
Hartoe Wujud na zat Tuhan
Sifeut jih meunan Nafsi nama
Wujud Tuhan han ek kheun kri
Hansoe turi asai mula
Dua Qadim sifeut Tuhan
Makna toulan loen calitra
Hartoe Qadim na dilee kon
Hana mophoen han meumasa
Nabi dan Wali hantroeh makrifat
Ubak kheun Zat Allah Taala
Akal hatroeh pikee han meukri
Ilmee teurhenti keupadaNya
Keuteulee Baqa sifeut Allah
Makna loen peugah ubak gata
Hartoe Baqa hana ubah
Keukal Allah ruk-ruk masa
Ban nyan awai meunan ciet akhee
Hantroeh pikee ngon bicara
Bicara seusat pikiran singkat
`Aqal dahsyat pungoe gila
Sifeut nyan peut Mukhalafatuh
Makna loen peugah ku calitra
Hartoe mukhalafah bersalahan
Hana saban Tuhan ngoon Hamba
Hana saban neumeutuboeh
Han sapeu roeh mee tapeusa
Misal pihtan teuladan pih han
Wujud Tuhan ku yang Esa
Limong sifeut Qiamuhu
Loen kheun laku hartoe makna
Qiamuhu loen kheun hartoe
Neudong keudroe Allah Taala
Han neukeundak nyan keuteumpat
Tuhan nyan that amat kaya
Han neukeundak nyan keu paeil
Hana sabee Allah Taala
Nam Wahdaniah sifeut Tuhan
Makna toulan ku calitra
Hartoe Wahdaniyah sidroe Tuhan
Han bilangan sa ngon dua
Han sikutu Tuhan sibagi
Maha suci Allah Taala
Daiem Qaiem nyan cit sidroe
Hana sapeu nyan na seurta
`Arasy goh na kursi golom
Qaiem Tuhan cit Kalama
Nyan limong nyan sifeut Salbi
Ngat taturi hai saudara
Hartoe salbi tulak lawan
Sifeut nyan tan bak Allah Taala
Jinoe loen peugah sifeut maani
Soe nyang turi bahagia
Hartoe maani nyan doeng bak zat
Deungoe sahbat loen calitra
Tujoeh sifeut nan jih Hayyat
Deungoe sahbat loen boh makna
Hartoe Hayyat hudeb Tuhan
Hana badan hana nyawa
Adak hudeb badan ngon nyawong
Ka sibandeng manusia
Hana layak neumeusifeut
Meunan wujud Tuhan yang Esa
Lapan sifeut nan ileumee
Deungoe lagee loen boh makna
Hartoe ileumee neutumuban
Dum seukalian habeh nyata
Neutumuban han ngon akal
Hana sagai ngon bicara
Neutumuban cit ngon ileumee
Meunan nyan mee tapeucaya
Adak neutumuban nyan ngon akal
Kakeuh jawai saboh masa
Sikureung sifeut nan iradat
Taklok meuhat bak mungken na
Hartoe Iradat keumeukeundak
Ban nyan layak neukaroenya
Neumeukeundak han ngon nafsu
Han seukutu manusia
Neumeukeundak ngon iradah
Meuna sahbat tapeucaya
Adak neumeukeundak ban ngon nafsu
Kasikutu manusia
Siploeh sifeut nan jih Qudrah
Takluk meuhat misee nyangka
Hartoe Qudrah kuasa Tuhan
Peuna neupeutan dum mungkin na
Han ngon tuleung han ngon urat
Kuasa that Allah Taala
Adak kuasa tuleung ngon urat
Leumah lumboet akhee masa
Siblah sama` sifeut Tuhan
Takluk jinoe bak maujuda
Hartoe Sama` neumeudeungoe
Got nyan meusu got nyan hana
Wujud nyan na dum sekalian
Dengue Tuhan senantiasa
Wujud Allah hana geulinyueng
Dum seubarang deungoe suara
Neumeudeungoe cit ngon Sama`
Meunan ijmak dum ulama
Dua blas Bashar sifeut Tuhan
Takluk jinoe misee nyangka
Hartoe Bashar neukeumalon
Kalon cit kon deungon mata
Hana bacut neumeusilee
Han ban lagee kalon mata
Karna mata tan bak Tuhan
Neuthee sekalian dum ngon basher
Keuleblah Kalam sifeut Tuhan
Takluk jinoe misee nyangka
Hartoe Kalam Mariet allah
Hana huruf Ngon suara
Adak neumariet deungon lidah
Kameu huruf Kalam Esa
Suci Tuhan nibak meunan
Beugot tapham tapeucaya
Nyan tujoeh nyan na taturi
Sifeutr Ma`ani hai syedara
Hartoe Ma`ani nyang dong bak Zat
Misee Hayyat ynag mulia
Ma`nawiyah jinoe loen peugah
Gaseh allah soe peucaya
Peutblah sifeut nan jih Hayyon
Meu atoe turoen lon calitra
Hartoe Hayyon zat yang Hudep
Meunan sabet tapeucaya
Pakri neuhudep Tuhan sidroe
Ngon hudepdroe seulama-lama
Laen bandum seukalian
Jen ngon insan hudep ngon nyawa
Bayang-bayang hudep Tuhan
Bak nyawong seukalian alam dumna
Meungka hudep dum geutanyoe
Geunap nanggroe seugala donya
Habeh hudep gadoh kuat
Muwoe Hayyat Allah Taala
Sifeut alimon geunap limong blah
Makna loen peugah loen calitra
Hartoe alimon nyang tumuban
Dum seukalian padok hana
Pakri tmuban Tuhan sidroe
Ngon Tuban droe seulam-lama
Jen ngon insane neubri ileumee
Kaneubri thee seugala donya
Bayang-bayang ileumee Tuhan
Neubri tumuban dum na Hamba
Hingga tatuban dum geutanyoe
Geunap naggroe seugala donya
Habeh tumuban gadoh laku
Muwoe ilmu Allah Taala
Sifeut Muridon geunap enam blah
Meunoe syiah neuboh makna
Hartoe Muridon nyan berkeundak
Peu nyan layak neukaronya
Pakri neukeundak Tuhan sidroe
Ngon keundak droe seulama-lama
La-en bandum seukalian
Neubri keudak seugala dumna
Bayang-bayang keundak Tuhan
Neubri seukalian dumna hamba
Habeh keundak gadoh `ibarat
Muwoe Iradat Allah Taala
Tujoeh blah sifeut nan jih Qadiroen
Meu atoe turoen loen calitra
Hartoe Qadiroen Zat nyang kuat
Kuasa that Allah Taala
Pakrie kuasa Tuhan siddroe
Ngon kuasa droe seunantiasa
La-en bandum seukalian
Nabak Tuhan brie kuasa
Bayang-bayang kuasa Tuhan
Neubrie seukalian dum manusia
Habeh kuasa gadoh hareukat
Muwoe Qudrat Allah Taala
Sipfeut Sami`on geunap lapan blah
muawfaqah syeh dum sineuna
Hartoe Sami`on yang meudeungoe
Han meulamoe dum suara
Pakrie neudeugoe Tuhan sidroe
Ngon deungoe droe ruk-ruk masa
La-en bandum pendengaran
Karoenya Tuhan dum keuhamba
Bayang -bayang pendengaran di teuka tuloe
Sami`on muwoe bak Allah Taala
Sifeut bashiroen kureunsa dua ploeh
Deungoe uloen boeh jinoe makna
Harto Bashiroen nyang keumalon
Dum seukalian padok hana
Pakrie neukalon Tuhan sidroe
Ngon kalon droe seulama-lama
La-en bandum seukalian
Karoenya Tuhan kalon mata
Bayang-bayang keumalon Tuhan
neuhantarkan bedum teurata
Meungka keumalon dum geutanyoe
geunab nanggroe seugala donya
Habeh keumalon dum seukalian
muwoe bashar bak Allah Taala
Dua ploeh sifeut Mutakallimon
deungoe beukenong uloen boh makna
Hartoe Mutakallimon Tuhan mariet
Beuthat keubiet tapareksa
Pakrie neumariet Tuhan sidroe
Ngon nariet droe seunantiasa
La-en bandum seukalian
Karoenya Tuhan juru bahsa
Habeh nariet gadoh faham
Muwoe Kalam Allah Taala
Troeh ngon ajai sampoe ngon tanggoeh
Pinjaman tujoeh geucok bak gata
Habeh muwoe pinjaman tujoeh
Tinggai tuboh hansakon guna
Kateuduek-duek misee bateung
Meusigupang tanlee hareuga
Teuka wareh asoe gampoeng
Jak keumunjoen manyet gata
Teuma geukueh lom liyang lahat
Dalam jierat sidroe gata
Adak han amai nyan keubajikan
Sidroe toulam lam keureunda
Seuphoet pih that kubu pih arat
Leumah teumpat dalam neuraka
Teuka `Azeub meubagoe-bago
Yuem tajakwoe dalam donya
Yoeh nyan teulah Taseusal droe
Taduek tamoe lam keureunda
Lailahaillallah
Kubu luwah soetem baca
Ohnoe habeh saboh tambeh
La-en bareh jinoe takira
Sifeut nyan wajeb ka taturi
Nyang mustahiel pakrie rupa
Hartoe mustaheil hana patoet
Tutoe karoet han meutula
Nyang mustaheil wahai thaleb
Lawan wajeb tapareksa
Misee hana neukeun Tuhan
Ngon baharu takheun ciet sa
Misee muphoen takheu dudoe
Sang geutanyoe takheun rupa
Misee neudong ngon soe la-en
Di bilangan takheun dua
Misee keulu takheun Tuhan
Han neutuban dum peurkara
Miseu beunci keumakhluqat
Leumoh Qudrah Allah Taala
Han neumariet ngon keumalon
Ngon keulu Tuhan buta mata
Nyan keuh toulan nyang Mustaheil
Buta pikee dum peukara
Nyang MustaheilKakeuh habeh
Jinoe Jaiz loen calitra
Hartoe jaiz nabak Tuhan
Neupeujeut alam dum barang na
Misee neubrie kaya gasien
Saket badan mangat pih na
Misee mokmin neuboh lam Jannah
Mee neupinah lam Nuraka
Misee kaphee neubrie lam `azeub
Mee lam nikmat neukaroenya
Meunan toulan bak `aqali
Bak syari`i pakrie rupa
Bak syari`i wajeb meuhat
Mokmin teumpat lam Syiruga
Misee kaphee pagee dudoe
Wajeb geupasoe lam Nuraka
Jaiz Syari`i ngon `aqali
Misee `ashie daroehaka
Harus neuamphoen gon han toubat
riyang umat daroehaka
Meunan toulan bak `aqali
Ngon syari`i saban dua
Nyan keuh misee Jaiz bak Tuhan
Keusimpulan teulee peukara
Ohnoe habeh saboh pangkat
Makrifat saboh tangga
============================
0 komentar:
Posting Komentar