~ JAGA LIDAH ~

   Oleh  : Akhbar Al-Mutawassila

=========================
Assalamu'alaikum, Warahmatullah
Tapujoe pujoe Allah, Azza wa jalla
Seulaweut Saleum, keu Rasulullah

Nyang ba Risalah, ateuh rhueng donya

Meuheut diulon, karang Mau'idhah
Untuk Nasehah,keu wareh lingka
Judul uroe nyoe, Tajaga lidah
Meunyoe sinan salah, lee nyang cilaka

Peuteubit nariet, bek leupah-leupah
Bek raya beurakah, oh peugah haba
Asoe haba, bek jeut keu fitnah
Sunggoh wap lidah, gob jeut binasa

Meuhan tatupu, meubek tapeugah
Bek jeut masalah, gara-gara gata
Ingat hai rakan, keu hukom Allah
Meunyan keuh Fitnah, Raya that dausa

Hana lee guna, meunyoe ka salah
Digob ka singgah, dalam peunjara
Hana lee arti, neukata teulah
Pikee beubagah, wahee syedara

Bek sabee sibok, peugah gop salah
Aib droe teuhah, hana takira
Bek ka mangat, sabee meubantah
Atra gop peugah, sabee tahina

Meunyoe yang beutoi, bek peugah salah
Meupalet lidah, hana geot rupa
Hana meu arti, geutanyoe gagah
Meunyoe but salah, hana tajaga

Tapeuteubit haba, beuna ikheulah
Haba beujelah, meunyang meuguna
Uroe ngoen malam, ingat keu Allah
Bek tapeugah, nyang hana-hana

Masa saboh jan, ie Awe geutah
Lee nyang wasilah, jeut keu peunawa
Lon pada ohnoe, Nazam ta surah
Neubri ya Allah, beuna keuh guna

(  Akhbar Al-Mutawassila )