“ RUMBOEK HILSENKI “

========================

Assalammua’laikom, Tangloeng meuble ble

Rakan boeh hate, saleum lon layang

Tuha ngoen muda, kuta deungoen gle

Ban bandum sare, inoeng ngoen Agam

Geunantoe kupi, lam glah meutangke

Nyoe pat na rawe, saboeh lon karang

Yoeh masa komplik, sabe su  bude

Jinoe hanale, kabeh dicang  cang

Meuprang baroe jeh, jimeusu bude

Jinoe hanale, ka atueh meja

Meuprang politik, urueng tan mate

Utak yang caye, tapike cara

Rugoe tamuprang, jamuen dalam gle

Rakyat dum mate, Syahid Syuhada

Daud Beureueh, masa dalam gle

Pakriban Akhe, jitipe  daya

Meunyoe pih meunan, sang bak lon pike

Meutipe Akhe, meucuet cuet  punca

Kupue sit guna, tagulam bude

Sideh dalam gle, tathuen deurita

Kupue sit dame, sideh Hilsenke

Takoeh koeh bude, kupue sit guna

Meunyoe keu pruet droe, saja tapike

Kupue Hilsenke, duek saboeh meja

Bak tanggai 16,  Agustus akhe
Rumbok Helsingke,  hanjeut le muprang
Ban dua pihak,  seureuntak sare
Meu jroh jroh hate,  hanjeut le dendam

Geutanda jaroe , mentro ngon toke
Kateuhah hate , RI dengon  GAM
Hase M O U,  nanggroe Helsingke
Di Aceh beude,  sare ji reupang

Alif Ba goh jeut , neuk buet Tapeuse
Rimueng goh mate,  sare ka ta bang
Laba ngon rugo , hana soe pike
Peuturot hate , ngon nafsu syaitan

Jaloe  goh leupah, beulahdeh ji ile
Goeh troh u pante , tanyoe jeu meurang
Ka laen macam , ragam seu mike
Neuk duek keu toke , dalam pikeran

Sumpah ngon janji,  ka ji peureule
Tanle meu pike,  keu rakan rakan
Penteng bak jaroe , moto B M W
Oh wate mate , aleh pakiban

Tamah Bacut :

============

Assalammu’alaikom, Rahmat meukatoe
Keu Allah sidroe, puji ngoen puja
Seulawuet saleum, ohlhuehnyan dudoe
Rasul geutanyoe, khatam Ambiya

Neubri Tuhanku, hajat beusampoe
Rasia lumpoe, hajat lon buka
Nibak lon eh eh, bak saboeh uroe
Leumah lampoe, saboeh rasia

Ale pue tabi, rasia lumpoe
Allah peusampoe, geujoek keu hamba
Loen lumpo aceh, karab seureuloe
Sabe keudroe droe, jeut prang saudara

Kareuna sumpah, biat saboeh roe
Jinoe ka tuwoe, kale beulanja
Dak aneuk yatim, hanle soe pakoe
Hanle soe hiroe, darah syuhada

Adak keuteutra, pih meunan bagoe
Hana soe pakoe, jibri keurija
Janda ngoen pateing, pih tan soe pakoe
Jinoe ka laloe, atoe duek raja

Miseu DPR , bacut lon muproe
Ka laloe keudroe, mita beulanja
Dana Aspirasi, peuduek juet sagoe
Yang peuteng keudroe, tamoeng beulaja

Sampoe juet pake, sabe keudroe droe
Seurambi bunoe, neucuba baca
Gugat meugugat, peugah beutoi droe
Tanle soe pakoe, rakyat jeulata

Yoeh masa lam gle, mantoeng duek ngoen troe
Mantoeng geutanyoe, sapue bahasa
Jinoe ka aman, ka maseng keudroe
Sumpah saboeh roe, bandum ka lupa

Bak pemerintah , hanjeut peutoe droe
Meupakoen jinoe, lake duek raja
Neubri Ya Allah, bek troek ban lumpoe
Aceh lhe sagoe, neubri seujahtra

pilkada kalhueh, Gubernur ka meusoe
Aceh lhe sagoe, meuhoe taneuk ba
Hoe taneuk intah, nanggroe seuramoe
Bak Allah sidroe, tamohon doa

Neubri Tuhanku, hajat beusampoe
Nanggroe seuramoe, neubri bahgia
Neubri beu aman, bek sampe kasyoe
Bek troen ban lumpoe, e ya Rabbana.
(Tgk Diyueb Bruek )tgl.24-01-2013A-