TAPAK TILAS WALI NANGGROE SAWEU GAMPONG MA

=============================

Oleh : SULAIMAN.A.GANI.

==============================

SALEUM  PEU INTAT

Ngoen Kru Seumangat, Rahmat Tuhan bri

Kalam mulai, loen puphoen haba

Seugala pujoe, muwoe keu Rabbi

Yang Maha Suci, Azawajalla

Yang peujuet bumoe , seureuta isi

Bandum buet Rabbi, Yang po Kuasa

Lheuhnyan Seulawuet, Keupada Nabi

Rasul yang akhe, Khatam Ambiya

Yang bri Syafaat, Dum Umat Nabi

Liwa Ul Hamdi, Payoeng Maulana

Lheuh nyan saluem loen, yang susoen rawi

Keu yah ngoen ummi, dusoen ngoen kota

Sion karangan ,hajat u loen bri

Teuntang hai wali, keunoe geugisa

Oh kalhueh dame, Sideh hilsinki

Keunoe woe wali, Sawue syedara

Neujak peukeukai, dame hilsenki

Bekle terjadi, juet prang saudara

Beusijuek hate, leupie ban pati

Deungki ngoen iri, Deundam bekle na

Neubri Tuhanku, sampoe hajati

Beutroek woe wali, Aceh mulia

Dum Rakyat Aceh, jipreh woe wali

Mangat abadi, Dame seujahtra

Beujeut pondasi, Dame hilsenki

Oh geuwoe wali, bek haro hara

Aceh bek karu, wate woe wali

Bekna terjadi, jeut prang saudara

Aceh beu aman, wate woe wali

Dame hilsenki, beugoet tajaga

Bek sampoe karu,seubab woe wali

Dame hilsenki, bek sampe cidra

Hai rakyat Aceh, ayah ngoen ummi

Seureuta lagi, nyan kawoem muda

Beurayeuk saba,peuthuen emosi

Seureuta lagi, bek hoga hoga

Kaseb nyangka ka,Dakwa ngoen dakwi

Seubab woe wali, jeut prang saudara

Bekjeut alasan punca neucari

Iri ngoen deungki, Dak jeut bekle na

Jinoe bersatu bangket keumbali

Marwah lawi, Aceh tapuga

Tabangun Aceh,Pasca tsunami

Bekle Allah bri, Aceh lam bala

E Ya Tuhanku, Ya Rabbul gani

Aceh Beuneubri, Aman sentosa

Beu dalam makmu, karu bek neubri

E Ya Ilahi, neukabul Doa

Peumilu ukeu, Aceh beuneubri

Bekna terjadi, paksa meumaksa

Bek gara seubab, reuboet kurusi

Sinan mulai ,sungkap jiteuka

Saleum peu intat, ohnoe loen rawi

Teutang woe wali, u loen calitra

Beutoi ngoen salah, beugoet teuliti

Yang susoen rawi, Aneuk barosa

=========000=========

 WALI NANGGROE

SAWEU GAMPONG MA

===========================

Alhamdulilah, loen pujoe Rabbi

Hanjeut berhenti, meusi kutika

Sabe Tiep saat, Ingat keu Rabbi

Yang Maha Sucu, Azawajalla

Seulaweut saleum, oh lheuhnyan lagi

Pang ulee Nabi, khatam Ambiya

Yang ba risalah ateuh rhueng bumi

Umat islami,ban sigoem donya

 Lheuhnyan saleum loen, yang susoen rawi

Keu yah ngoen ummi, Dusoen ngoen kota

Samboet saleum loen, tangloeng kudangdi

Hajat loen rawi, wali geugisa.

Tgk Hasan Ditro geupeunan wali

Goebnyan peutinggi, Aceh Merdeka

Hajat geuneuk woe, U nanggroe  ummi

Koran serambi, sinan loen baca

Seuramoe Muekkah, keunoek woe wali

Nanggroe serambi, keunoek woe raja

Untuk bukeuti, rakyat bek sangsi

Jipeugah wali. meninggai donya

Jak saweu gampoeng , u nanggroe ummi

Bak tempat wali, geulahe le ma

Bak teumpat geurhah, ek mirah jadi

Bak teumpat wali, geudoe doe le ma

Bak teumpat ma blien, Koeh pusat wali

Bak tempat abi, pulang pusaka

Bak ikat ayoen, geudo da idi

Bak teumpat wali, phoen beut aleh ba

Jak sujud Syukur, u nanggroe ummi

Kunjoeng famili, saweu gampoeng ma

Kunjoeng syedara. ayah ngoen ummi

Ka padum lawi, hantoem neugisa

Jazirah kubu, ayah ngoen ummi

Seureuta lagi, jeurat syuhada

Syahit lam konflik,  deungoen tsunami

Keunoe woe wali, saweu wareh  ma

Seujak tujoeh nam, hantoem woe wali

 Seujak mulai, tuntoet merdeka

Seujak di Aceh,  konflik terjadi

Seujak GAM RI, kontak senjata

Lheuh perdamaian,  sideh helsinki

Lheuh gam ngoen RI, duek saboeh meja

Jinoe meuhajat,  keuneuk woe wali

Di Aceh pakri, keuneuk pareksa

  

Roet nanggroe pahang, jalan woe wali

Ngoen delegasi, Aceh merdeka

Nanggroe jajahan, Aceh yoeh lawi

Yoeh masa multi, Iskandar Muda

Neupuwoe meuntroe, ka deungoen waki

Neupuwoe meuntri, ajudan dumna

Puwoe peungawal, kanan ngoen kiri

Seureuta lagi , juru bicara

Sinoe di Aceh,  laen terjadi

Rakyat preh wali, meuribee laksa

Rata jeut gampoeng, jitroen preh wali

Sang – sang nayumhi, prang donya tiga

Pesawat carter, ngoen geuwoe wali

U nanggroe ummi, tanoeh pusaka

Saboeh rombongan. Ngoen kapai wali

Gubernur Irwandi, ikoet seureuta

Yang meuntroe malik, ngoen doktor zaini

Yang apet wali, sahbat setia

Peungawal khusus,  kanan ngoen kiri

Yang atoe wali , saban kutika

Dan laen laen, yang ireng wali

Para petinggi, uni eropa

Dan juru rundeng, dame helsinki

Rombongan wali, watee neugis

Nyan Amir mahmud, yang troen mulai

Disangka wali, wajah rab sama

Ka salah samboet, hana jituri

Rab salah jibri, kalongan bunga

Dudoe nibaknyan, baroe troen wali

Gubernur Irwandi, bri aba – aba

Samboet ngoen Azan, wate troen wali

Geuma takeubi, samboet paduka

Sujud u bumoe, dudoe le wali

Syukur ke Rabbi, katroeh neugisa

Katroeh neuriwang, gampoeng yah ngoen mi

Katroeh keumbali, saweu syedara

 Yang Peujah puwoe, meuhat buet Rabbi

Meuhan pat wali, keunoe troek gisa

Dame helsinki, deungan tsunami

Meunyan tuhan bri, seubab kareuna

Meukoen buet  Tuhan, pane terjadi

Sampoe troeh wali, keunoe geugisa

Rahmat nyan keu phoen, neubri tsunami

Dame helsinki, Rahmat keudua

Astaghfirullah, lidah meuputie

Ka salah rawi, hoe laen haba

Tapuwai kisah, tentang woe wali

Ya Allah neubri,  beu ek sampoerna

Lheuh di bandara, peusijuek wali

Oh kalheuh jibri, kalongan bunga

Ngoen payoeng kuneng,  batee ceuradi

Rapa i Pase, Jipreh meubura

Rakyat meubareh, jidoeng meuriti

Jilambai wali, tanda mulia

Beudoeh di sinan, rombongan wali

Moto meuriti, kawai di lingka

Bendera PA, yang ireng wali

Keudeuh geu ili, meuseujid raya

Rakyat meuribee, ka jipreh wali

Jikeumeuk eu hi, pakriban rupa

Lheuhnyan pidato, samboetan wali

Nasehat geubri, duli paduka

Aceh beu aman, harapan wali

Bekle terjadi, dakwin goen dakwa

Seubab kadame, sideh helsinki

Gam dengan RI, duek saboeh meja

Kalheuh beurundeng, sabe Peutingi

Marthi Ansari, yang Jeut keutua

Jinoe bersatu, bangun kembali

Pasca tsunami, Aceh seuruepha

Aceh ka hancoe, seubab tsunami

Komplek terjadi, ka padum lama

 Peusahoe langkah, bangun kembali

Peusahoe diri, peusapue haba

Peusapue pakat, misi ngoen visi

Acehnyoe pakri, tapeugeut cara

Meunan Pidato, Harapan Wali

Yang geuwakili, bak Meuntroe donya

Aceh bek karu, oh lhueh Hilsinki

Aceh han geubri, Kontak senjata

Serta geuharap, Nibak Irwandi

Seureuta lagi, ngoen Nazar sira

Pasca MoU, sideh Hilsinki

Bangun kembali, Aceh mulia

Keu Pemerintah ,Negara R.I.

Saleum bak Wali, Cukup that raya

Teurimoeng gaseh, ka nibak wali

Peujabat tinggi, Indonesia

Keu Presiden, ka deungoen waki

Jasa gobnyan bri, Jinoe dame ka

Keu juru rundeng, Marthin Ansari

Mister Pit Lagi,  Uni Eropa

Dan loem keu rakyat, yang samboet wali

Serta petinggi, Unsur KPA

Keu unsur Pemda, dengan ABRI

Yang kawai wali, keunoe neugisa

Nibak pendopo, neuriwang wali

Gubernur Irwandi, Jamu paduka

Hingga Troek Malam, disinan wali

Pajoeh khanduri, jamuan pemda

Pemda peujame, Kunjungan wali

Sambutan geubri, le Nazar Sira

Gantoe Gubernur, Pidato waki

Pidato geubri, dua bahasa

Bahas Aceh,  Meulayu lagi

Harapan geubri, dame yue jaga

Meunan harapan, pak Nazar geubri

Dame Hilsinki, beugoet yue jaga

  

Lheuhnyan sambutan ,Pidato wali

Geuyue wakili, bak meuntroe donya

Hana neuteubiet, malamnyan wali

Karna kondisi, lelah anggota

Jeu oh that neuwoe, nanggroe Swedi

Kondisi wali, gobnyan ka tuha

Neutitip saleum, bandum neuyue bri

Harapan wali, cukop bahgia

Aceh bek karu, komplik terjadi

Pasca Hilsinki, Jinoe dame ka

Beugoet tajaga, dame hilsinki

Peuneusan wali, bak tanyoe dumna

Uroe keudua, di Aceh wali

Geujak kunjungi bandum pusara

Habeh neusawue, Raja ngoen kadhi

Horuemat geubri, bandum Syuhada

Phoen jak jazirah, ka uleh wali

Bak kubu multi, Iskandar muda

Bak kubu Raja, Aceh yoeh lawi

Keunan jak wali,  nibak pusara

Oh lheuh nibaknyan, kunjungan wali

Bak kubu kadhi, Syiah kuala

Kubu ulama, syeh Arraniri

Disinan wali,  tijoeh ie mata

Kubu ulama, pahlawan lagi

Seureuta Mufti, Iskandar Muda

Syahid dalam prang,lawan kompeni

Aceh han geubri, kafe jak cuca

Lheuhnyan bak kubu korban tsunami

Keunan jak wali, bak kubu masa

Kubu syuhada, korban Tsunami

Disinan wali, neulake doa

Kubu beu luah, Tuhanku neubri

Korban Tsunami, pangkat syuhada

Oh uroe dudoe,Syafaat neubri

Liwa Ul-Hamdi, Payoeng Maulana

 Lheuhnyan  u miruek, di indrapuri

Endatu wali, sinan pusara

Tgk chik di tiro, silsilah Wali

Roet siblah ummi, neutueng pusaka

Gelar pahlawan,keu gobnyan geubri

Urueng Gob turi, Suke ulama

Gobnyan yang tuleh, Hikayat prang sabi.........?

Yoeh masa lawi, lawan beulanda

Tgk, Chik saman, nama aseuli

Turunan wali, siblah  kawoem ma

Sinan meu doa, rombongan wali

Suereuta lagi, deungoen rakyat ba

Uroe nyan keu lhee,kunjungan wali

Keudeh u sigli, saweu gampoeng ma

Jazirah kubu, Ayah ngoen ummi

Seureuta lagi,  kubu panglima

Bak wate neuwoe, wali u sigli

Rakyat meuriti, bak jalan raya

Samboet paduka, horuemat jibri

Kanan ngoen kiri, punoeh rakyat ba

Koen meuhat rakyat,meuyang preh wali

Gajah meuriti, jipreh paduka

Jibri horuemat, meuhat keu wali

Beurale tinggi, jiboet  keu raja

Teuma wate troek, wali u saigli

Pendopo Bupati, peutamoeng sigra

Bak Aloen Aloen, Peundopo sigil

Rakyat preh wali, ngoen hate suka

Ngoen payoeng kuneng, disamboet wali

Rakyat meuriti, meuribe laksa

Pasang teuratak, atoe kurusi

Tempat duek wali, jok singgahsana

U desa cubo, dudoe jak wali

Abdullah Syafii, sinan pusara

Sinan kuburan, panglima tinggi

Syahid ka lawi, masa gerliya

  

Komando pusat, Abdullah syafii

Gagah beurani, beuhe ngoen teuga

Maka jeut geuboeh, panglima tinggi

Abdullah Syafii, sidroe ulama

Oh troek  bak kubu , Abdullah syafii

Disinan wali tijoeh ie mata

Kubu meugandeng, lhee boh sijoli,

 Fatimah siti, inoeng panglima

Kubu pahlawan, sajan Syafii

Kubu Isteri,  Kubu Aneukda

Bandum meusapat, saboeh lokasi

Sinan meuriti, lam saboeh banja

Dudoe u Garut, sawue famili

Keunan jak wali, sawue syedara

Sampoe merumpoeh, sinyak putehdi

Tunangan wali, masa yoeh muda

Peuduek megandengg, ateuh kurusi

Jipeuduek wali ngoen cewek lama

Masa di gampoeng, yoeh goeh peureugi

Gobnyan ngoen nyak ti tunangan lama

Nanggroe peusangan, pih neujak wali

Yoeh masa lawi, meugaboeng dua

Yoeh masa Bireuen, goeh jeut Bupati

Keunan jak wali, u nanggroe jeumpa

U kota juang, Hingga troek wali

Horeumat jibri, Akan paduka

Samboet ngoen Adat,Bate ceuradi

Peusijuek wali, peu teupoeng tawa

Deungoen brueh pade, disamboet wali

Ateuh kurusi, tabeng dilingka

Ngoen kulah kama,bak ule wali

Wate ta ue hi, laksana Raja

Dudoe lhue simpang, kunjungan wali

Bak teumpat lawi, masa gerliya

Masa neusoem droe, nibak TNI

Yoeh goeh neutiti, U Nanggroe lua

  

Sian di jeunib, na padum lawi

Meusoem di wali,yoeh goeh neubungka

Kubu peut ploeh peut, matoeng jeut saksi

Neumeusoem wali, masa gerliya

Kuala jeunib, beurangkat wali

Ngoen boet sikoci, ngoen meusen tuha

Bak teungoeh laot riboet terjadi

Mate sikoci, lam supoet buta

Meu apoeng apoeng, angen peudodi

Meusarueng wali, u Malasia

Matoeng na umu, seulamat wali

Mantoeng Allah bri, hana binasa

Kana padum treb, ka padum lawi

Disinan wali, nanggroe Malaka

Dudoe beurangkat, persiap diri

Neugisa wali, u Amerika

Sinan meuneutap, Suaka jibri

Sampoe jeut wali, warga negara

Dudoe meukawen, teuma di wali

Ngoen nyak puteh di,  Dora jroeh rupa

Sinan na saboeh, aneuk Tuhan bri

Nama geurasi, Nyak Karim muda

Sit meuhat saboeh, Aneuk di wali

Lheuhnyan Tuhan bri, meupisah ngoen ma

Dudoe neuminah, nanggroe swedi

Neutuka wali, warga negara

Maka jeut jinoe, warga swedi

Disinan wali, duek masa tuha

Nanggroe peureurak, troek neujak wali

Neujak kunjungi, Tugu Monisa

Pusat Islam, Masa yoeh lawi

Keunan troe wali, neujak pareksa

Lheuh Aceh timu, u tamiang lagi

Kunjungan wali, Sawue syedara

Habeh di Tamiang, gisa u Sigli

Bak teumat ummi, sawue Adinda

  

Adek Silumueng,saboeh yah ngoen mi

Mantoeng Allah bri, lanjut usia

Di pak Koncoro, neupreh di sigli

Meurumpoek wali, deungoen peut mata

Jak lapor rekon, rumoeh jibagi

Pasca Tsunami,  Aceh Mulia

Dodoe Jakarta , ka neujak wali

Neujak permisi, bak Yusuf Kala

Wakil Presiden, Jak pamit Diuri

Hajat keumbali, U Swedia

Bak pak SBY, Presiden R.I.

Seureuta waki , Pak yusuf kala

Teurimoeng gaseh, meuribe kali

Ateuh ka geubri, Wali jeut gisa

Seureuta ka dame, Gam deungoen R.I

Aceh Tuhan bri ,Jinoe Dame ka

Berkat MoU, Dame Hilsenki

Gam Deungan R.I, Duek saboeh Meja

Bak Yusuf kala, harapan wali

Dame Hilsenki, beugoet yue jaga

Aceh ka aman, yue tingkat lagi

Aceh yue bangun, pasca tsunami

Seureuta lagi, Dame yue jaga

Hasil MoU, Dame hilsenki

Aceh Allah bri,  Aman sentosa

Serta geupeugah, tujuan  wali

Hajat keumbali, Aceh Mulia

Hajat meuneutap, di nanggroe ummi

Lake permisi, bak yusuf kala

Dang dang neujeumput, Ajai le Rabbi

Di Aceh wali, duek masa Tuha

Sira ibadat, neupujoe Rabbi

U Aceh wali, Hajat neugisa

Adak neukheundak, Neuwope bak Rabbi

Beusajan ummi, sapat pusara

Beusapat kubu, Ayah ngoen ummi

Geutanoem wali, nanggroe pusaka

Neulake izin , bak nanggroe R.I.

Kareuna wali, Wareuga lua

Seumeunjak Aceh, Komplik terjadi

Seujak nyan wali, Neuplueng u lua

Jak peusiblah droe, Seulamat diri

Ka neuplueng wali, U Amerika

Dudoe hijrah nanggroe swedi

Disinan wali, lake suaka

Nibak nanggroe nyan, suaka jibri

Sampoe jeut wali, warga negara

Sinan meuneutap, nanggroe swedi

Hingga woe wali, keunoe geugisa

( Tgk Diyueb Bruek )