“ TAPAKOE BAHASA DROE “

===============================

Salama’laikom, Tengku ngon Tjut Njak.
Beuranghoe  tajak , bèk ta boih basa.
Basa geutanjoë , saboh amanat.
Sinan keuh ummat,  djituri bansa

Meungnyoe  basa,  hana ta pakoë.
Pané hai adoë,  tanyoë mulia.
Hana jituri,  lé ureuëng nanggroë.
Pané jipakoë , lé bansa dônja

Beuthat ka tajak,  u luwa nanggroë.
Sagai bèk tuwo , keu basa Poma.
Peureunoë bagaih , keu aneuk droë.
Bèk sampoë laloë,  ngon bansa luwa

Ta eu di cina,  ka tréb meuranto.
Meu aneuk  cucoe,  ban saboh dônja.
Meungnyoe  di marit , deungon kawôm droë.
Han sagai tuwo basa,  chèng-chong-wa

Di Tengku Atjèh,  laén lom bagoë
Barô meuranto e, 'èt kuta Langsa
Keu basa Acèh , hana lé pakoë
Laju ka tuwoe,  keu basa Poma

Peureunoë aneuk , basa meulaju
Ladôm dijampu , ngon basa  jawa.
'Oh woë u gampông , meusangak-sangak.
Lèh panè sinjak,  modèrèn raya

Watèë geumarit , basa meulaju
Peuleumah bak Du , na rasa bangga.
Keu basa Acèh, sit hana muphôm.
Ka tréb meuthôn-thôn,  di kuta Langsa

Bak watèë ta eu, gli dalam haté
Sang goeb hana lé , yang jeuët mu-basa.
Sang gobnyan mantong, carong peulaku.
Habéh ngon-ngon buë,  ka basa  jawa

Wahé e cut kak , lôn peugah mantong.
jinoë ta peukong , basa ibunda.
Peureunoë aneuk,  nyan basa Acèh.
Sinan that leubèh,  kaya budaja

Basa Acèh tréb that , ka meugah
Abad keu namblaih,  ka dithèë lé dônja.
jeuët ta kalon , dalam seujarah.
Get meukeubah lam,  museum Beulanda

'Èt noë keuh , dilèë wahé e rakan
Bacut bahasan, keu hai basa
Beuthat di ulôn,  hanjeuët keumarang.
Lôn cuba rakan , rangkaian kata

Alèh na beutôi , alèh pih salah
Narit lôn peugah,  asai meukana
Meu'ah rakan droë,  keu ulôntuan
Alèh panè jan , ta sambông teuma

==============================