“HABA NASEHA KEU ANUEK DARA “

  Oleh : SULAIMAN.A.GANI

===========================================

Assalammua’laikom, kawoem saudara

Tuha ngoen muda, keu bandum  wareh

Bacut peu ingat, keu  Anuek Dara

Beugoet jaga, gata  maruah dek  puteh

Gata dek  puteh , Muda Bahlia

Lagak that rupa, sinyak  puteh  gleh

Beugoet  jaga  droe, sigoloem  mala

Kumbang  jiteuka, madu  peu  habeh

Meunyan peuneusan, bak  aduen gata

Hai  Anuek dara , beuna  tapateh

Meutan le madu, hana  soe  hawa

Ditinggai gata, jitiek  lam binteh

Sit sifuet kumbang, lagenyan  cara

Meugoeh troek hawa, bandum  jipateh

Bandum jitem bri, pue  gata  hawa

Hana  meudakwa, dengan  meulanggeh

Tapi  meutroek, mupue  jihawa

Jitinggai gata, hanyak  puteh  gleh

Kupue  lom guna, bungoeng  ka  mala

Kalhueh  gob  cuca, madu  ka habeh

Oleh seubabnya, hai  anuek dara

Beugoet  ta jaga, madu  goeh  habeh

Bungoeng ka laye, hana  soe  hawa

Kalhueh  goeb cuca, kajak boeh keudeh

Meubu  ka basi, pane  soe  hawa

Meunan  umpama, hai  nyak puteh  gleh

Tanda  lon sayang, keu  gata dara

Nasehat maja,  beuna tapateh,

Trks.

Tamahan bacut keu mau'idhah
~HABA PEU INGAT~
==================
Wahe nyak dara, kadeungoe ulon,
Nazam lon suson, peuingat gata,
beuneutem baca, he syedara lon,
haba lon peutron, sibareh dua.

Tasoek bajee, bek nyang singkat,
Rhoeh gob upat, ateuh gata,
anggota tuboh, kon barang meuneukat
wahe sahbat, beujroeh tajaga

Seubab hina, tansoe minat,
Beuthat cacat, Capiek buta,
Beuthat budok, peunyaket mat,
Tansoe minat, keubrok nama.

Kanceng bajee, beu tapeukab,
tasok jilbab, ceudah rupa,
Ngui peukayan, beuna adab,
leumah aurat, gata goeb ceula.

=============================