SYARI’AT ISEULAM – 2

OLEH : SULAIMAN.A.GANI

================================

ASSALAMU’ALAIKUM,  WARAHMATULLAH

ALHAMDULILAH , KISAH LOEN PU PHOEM

SEULAWEUT SALEUM , KEU RASULULLAH

YANG BA RISALAH , KEU BANDUM KAWOM

SAMBOET SALEUM LOEN,  KALAM  SIPATAH

SYARI’AT  ALLAH , KISAH LOEN SUSOEN

SYARI’AT ISLAM , HAJAT LOEN PEUGAH

SEURAMOE MEKKAH,  KEU DASAR HUKOEM

TEUNTANG PAKAIAN,  HAJAT LOEN PEUGAH

AURAT TAPEUHAH,  PAKRIBAN HUKOEM

DALAM SURAT NUR , FIREUMAN ALLAH

QUR’AN NEUPEUHAH , NEUCUBA PUPHOEM

AYAT LHEE PLOEH SA,  KIBAN PEURINTAH

AURAT GATA SAH,  YUE TOEP KEURUDOENG

MUKA NGOEN GAKI , MEUNYANG JEUT LEUMAH

SUAMI NGOEN YAH , YANG RUKSAH HUKOEM

NYAN HAK ASASI,  NEUBRI LE TUHAN

KOEN JEUT BEURANG BAN , TANYOE PEUNARI

KOEN JEUT BEURANG HOE,  ATOE BARANG BAN

KOEN JEUT BAN SEUNANG , TANYOE PEUGOET KRI

BAK PUBUET MAKSIET , TUHAN GEULARANG

BEKNA PIKIRAN , NYAN HAK ASASI

HANA TOEP ULEE , DI PEREMPUAN

BUKAN HAI INTAN , NYAN HAK PRIBADI

BALA TUHAN BRI , SIT NA HUBUNGAN

DEUNGOEN BUET INSAN,  SINOE LAM DONYA

HABA PEU INGAT , BACUT PEUNEUSAN

DEUNGOE HAI RAKAN , U LOEN PEUNYATA

MEUNYOE PEUREULE , ACEH NYOE AMAN

WOE BAK AJARAN,  HUKOEM AGAMA

QUR’AN YANG SUCI,  COEK PEUDOMAN

SYARI’AT  ISLAM,  ACEH NGAT JAYA

 NGOEN UNDANG UNDANG,  SYARI’AT ISEULAM

ACEH TAKEUMBANG,  KIBAN YANG HAJAT

TAPEUEDOENG HUKOEM , SYARI’AT  TUHAN

BEKNA HALANGAN,  E YA HADHARAT

SYARI’AT ISLAM , TAPEUDOENG MAYANG

HUKOEM  ISEULAM , ACEH BEUJAYA

BEK ROEK TAPUBUET,  YANGKA GEULARANG

ACEH BEUDALAM , TAUBAT NASUHA

UREUENG YANG SALAH , NEUTUNYOEK JALAN

RIWANG BAK TUHAN,  PUBUET  IBADAH

BEUROEH LAM SABA , ATEUH CUBAAN

BEUDALAM  IMAN , DI ATEUH BLA

HAI KAWOEM  INOENG , DARA MUSLIMAT

NEUJAGA AURAT,  BEK DEUH U LUA

MEUNAN GEULARANG,  OLEH HADHARAT

LAM SABOEH AYAT,  QUR’AN MULIA

BEK LE NEUGALAK , KEU OBLONG KETAT

UKURAN SINGKAT,  PUSAT  U LUA

NEUSOEK SILEUWEU,  MEUBEK  LIPEIH THAT

BUDAYA  SEUSAT,  ALA  EROPA

MEUNYOE NEUTUROET,  BUDAYA  SEUSAT

JATOEH MARTABAT,  REULOEH AGAMA

IBADAT RUGOE,  AMALAN CACAT

U BAK HADHARAT,  HAN  SAKOEN GUNA

WAHE KAWOEM LOEN,  DARA MUSLIMAT

KAMOE PEU INGAT,  KEU BANDUM  GATA

NEUSOEK PAKAIAN,  BEUSOPAN THAT THAT

ULEE BEURAPAT , NEUTOEP NGOEN  IJA

MEUNYOE NEUTIEM TOEP , TEUNTEE SEULAMAT

DONYA AKHIRAT,  HAN KEUNOENG  BALA

SEURAMOE MEUKKAH,  GEUKHEUN NANGGROE  NAD

BEUKOENG SYARI’AT,  ACEH MULIA

DI PEUMEURINTAH,  GEUDUKOENG THAT THAT

POLISI SYARI’AT,  DI ACEH KANA

BAPAK ILYASAK , PIMPINAN MEUHAT

GOBNYAN KEUH YANG MAT , ATURAN YANG NA

KEU HUKOEM  ALLAH , BEUNA NEU INGAT

MEUBEK LALOE THAT THAT , DEUNGOEN BUET JAHEE

DI UREUNG KAFE , PEUGOET  SIASAT

SUPAYA MANGAT,  ISLAM  BEU JAHE

LE THAT TAKALOEN , PEUMUDI  ISLAM

PAKEK PAKAIAN,  HAN MEUKRI  SAKRI

BAJE NA JISOEK,  SANG SANG LAGEE TAN

KOEN BAN  AJARAN , MUHAMMAD NABI

DI ANEUK DARA,  ULEE HAN  JITOEP

HANA JITAKOET,  ADEUB  NURAKA

WATE TAKALOEN,  LEUPAH TEUGROEP GROEP

PUSAT NGOEN TU OT,  KADEUH U LUA

( Tgk Diyueb Bruek/sulaiman,A,)