PEUT PEUKARA WASIET NABI

 Oleh : SULAIMAN.A.GANI

===================================

NABI NEUWASIET,  BACUT LOEN PEUGAH

SUPAYA LEUPAH,  BAK AZEUB SIKSA

NA PEUT PEUKARA , NABI NEUPEUGAH

BAK HAMBA ALLAH,  HANJEUT HAN HANA

PEUREUTA MAPHOEN ,NANGGROE YANG LUAH

KANDRAN YANG BAGAH,  MEU YANG KEUDUA

TEUMA YANG KEU LHEE , PAKAIAN INDAH

LAMPU YANG PEUNGOEH , KEUPEUT PEUKARA

NANGGROE YANG LUAH , BEU TUNGKU PIKE

MEUNYAN KEUH HATE,  WAHE SAUDARA

HATE YANG SUCI, DEUNGOEN IKEULAS

TA`AT KEU ALLAH , UDEP LAM DONYA

KANDRAN YANG BAGAH , JINOE LOEN CAREH

AMAI YANG SALEH , YANG TAKEURIJA

TAPUBUET AMAI , NGOEN HATE KHALEH

SEUNANG BAK TA`EH , DALAM KEUREUNDA

PAKAIAN INDAH , HAI TUNGKU SAMPE

BEUNA TAMALE ,  AKAN RABBANA

HUDEP LAM DONYA,  MEUNYOE NA MALE

SIT KA MEUTEUNTE,  IMAN TEUH KANA

URUENG NA IMAN ,  TANDA NA MALE

RASUL PANG ULE , MEUNAN MEUSABDA

UROE AKHIRAT , SYURUGA TEUNTE

WASIET PANG ULE , TA INGAT BEUNA

LAMPU YANG PEUNGUEH,  WAHE E TUNGKU

BEUNA ILEUMU , DI DALAM DADA

DEUNGOEN ILEUMU , PUBUET IBADAT

TANYOE HAN SISAT,  HUDEP LAM DONYA

 BAK SU EU KUBU, TAJAWEUB MANGAT

LE MALAIKAT,  HANA GEU SIKSA

SU EU TAJAWEUB , NGOEN MANGAT LEUGAT

TUHAN BRI NIKMAT,  NGOEN BRI SYURUGA

BLANG PADANG MASYA , UROE TUTOENG THAT

TUHAN BRI NEKMAT , U ATUEH GATA

LIWA UL HAMDI,   PAYOENG HADHARAT

UROE AKHIRAT,  PEULINDOENG GATA

TAJAK BAK TITI , NGOEN PANTAS LEUGAT

LAGE BAN KILAT,  KHEUNDAK RABBANA

BUDIYA DARI ,  CEUDAH CEUDAH THAT

TUHAN HADHARAT,  GEUBRI KEU GATA

MEUNAN KEUH WASIET , RASUL HADHARAT

GEUTANYOE UMAT,  TA INGAT BEUNA

YANG PEUT PEUKARA , NABI AMANAT

BAK TANYOE  UMAT, HANJEUT HAN HANA

(Tgk Diyueb Bruek/Sulaiman gani)17 Sep 2012