“ JAWABAN CALON AYAH TUAN ”

   OLEH : TGK DIYUEB BRUEK

======================================

Assalammua’laikom, Rahmat keukatoe

Allah lon pujoe, sinoe ngoen sideh

Yang peuna peutan, raseuki  geutanyoe

Sit  Allah sidroe, yang peutroen sideh

Seulawuet  saleum, teuma lom dudoe

Nabi geutanyoe, yang that geumaseh

Yang bri syafaat, komdian dudoe

Bandum geutanyoe, blang padang sideh

Samboet saleum lon, rakan sinaroe

Agam ngoen binoe, sinoe ngoen sideh

Jawaban yah tuan, uloen hareutoe

Nasib ulonnyoe, cukop that peudeh

,Ie krueng peusangan, mirah ngoen cikau,

 Ie krueng geureutoe, jeureuneh puteh,

 Koen han seutuju , Anuek   na lakoe,

 Bukoen Anuek  droe , Ulon  boeh Ampeh,

Bukoen loen lintueng, kawat meuduroe,

 Bukoen anuek  droe, loen pileh gaseh,

 Seubab kuliah, gohloem seuleusoe,

 Bek sampe rugoe, sinyak puteh gleh,

 Oh lheuh kuliah,  ka teuma dudoe,

 Meuri galak droe, lakoe cut puteh,

 Izin bak uloen, siri galak droe,

 jitueng keu lakoe, sinyak puteh gleh,

 Hanle halangan, pageu meuduroe,

 Loen pulang bak droe, silakan pileh,

 Gasen ngoen kaya, buta ngoen tuloe,

 Teuseurah bak droe, bungoeng seulaseh,

 Langkah raseuki, judo aneuk droe,

 Loen pulang bak po,  Maha peungaseh,

 Meunyoe loen pike, metamah rangoe,

Wahe anuek  droe, pakri loen peuceh,

  Toeh siri jalan, tabri  anuek   droe

 Yoh goeh mupaloe, bintang peureuseh,

 Kalheuh mupakat,  kamoe sinaroe,

 Kapadu uroe  uroe,  ngoen nyak puteh gleh,

 Fokus kuliah ,sampoe seuleusoe,

 S 2 Dudoe hajat,  peuhabeh,

 meu nan meukalam , Jawueb cut putroe,

 Seunang that kamoe,  teurimoeng gaseh,

Calon yah tuan, meunan hareutoe

Geutulak tanyoe, keutroem lam binteh

Haloeh that cara, haba geumeuproe

Meunan keuh bagoe, geupeugah rinteh

Na sit yang ladoem, haba geumeuproe

Geupeugah lumpoe, meunoe ngoen meudeh

Alah hai anuek, leupah that paloe

Leumah lam lumpoe, Malam baroe jeh

Ujuen ngoen kilat, angen lom dudoe

 Rumoeh  jitampoe, buboeng ngoen binteh

 Saboeh peu tanda,  isyarat lumpoe

Gata anuek droe, hanjuet lon gaseh

Cara geutulak, geupeugah lumpoe

Geukhuen anuek droe, ka goeb boeh ampeh

Ka goeb boeh pague, kawat meuduroe

Sabe tiep uroe, sibu ngoen peugleh

Ladoem geutulah, laen ban bagoe

Haba geumuproe, meunoe ban rinteh
Gobnyan meukawen, dile saboeh roe

Ngoen ma cut  putroe, masa baroe jeh

Akan jeuname, tanoeh lhe taloe

Payah geupubloe, tanoeh sinaleh

Keu asoe kama, deungoen peuneuwoe

Keu mak cut putroe, masa baroe jeh

Gata pih meunan, wahe sam lakoe

Jeuname cut putroe, meunyoe tagaseh

Cara geutulak, meumacam bagoe

Meunyoe geutanyoe, hana geugaseh

( Tgk. Diyueb Bruek , 11/03/2013)