TUENG MANFAAT NGON FACEBOOK

 Oleh : Akhbar Al-Mutawassila,

==================================================
Pujoe keu Tuhan, haba mulaan
Nyang peujeut 'Alam, Maha Kuasa
Seulaweut Saleum, keu Nabi Khatam

Teuma 'Ohlheun nyan, sahbat dan keluarga

Assalamu'alaikum, saleum lon layang
Jamak sapaan, keu sahbat maya
Lon ilah daya, nazam lon karang
Gantoe hai rakan, ta tatap muka

That maju jinoe, dalam pergaulan
Pulom hai taulan, jeut deungon maya
Sidroe di Aceh, laen di Batam
Atawa jerman, kajeut meuhaba

Tuka informasi, kana kemudahan
Seubab jaringan, rata-rata kana
Khusus keu FB, tanyoe bahaskan
Tatueng beurijang, nyang jeut keuguna

Baci ta useuha, nyan kegunaan
Bek kerugian, ta lomba-lomba
Status meuguna, tanyoe postingkan
Kau handai taulan, jeut dicok makna

Ladoem ureung, maen eFBiyan
Lale disinan, dum sia-sia
Meulang-lang buana, uroe ngon malam
Hana tujuan, meutan pahala

Nyang lee disinan, tuleh keluhan
Laju tulehkan, nibak beuranda
Jareng that taduek, taklik bak Tuhan
Lakee kebaikan, ateuh mushalla

Nachit disinan, gadoh pacaran
Mita pasangan, ka abeh gura
Ladoem mengaku, bak adek sayang
Mantong lajang, padahai duda

Lodoem lam FB, urueng meudagang
Geupe ek sinan, chiet iklan saja
Cuma ladoem, nyang tasayangkan
Keupu jipeudagang, nyang aneuk dara

Didalam FB, kajai keujahatan
Modus peranan, masalah a-susila
Beuteugoh-teugoh, meunyoe kenalan
Bek laju "mumang", meung jikheun cinta

Iskandar Muda, wahee e rakan
Nama mulaan, Dharma Wangsa
Tameu en FB, beuna kebaikan
Tamah wawasan, baci useuha

Lon pada ohnoe, nazam peringatan
Keu handai taulan, mandum syedara
Meupat nyang salah, neupeugah rijang
Nak ulon tuan, ubah sigra
( Akhbar Al-Mutawassila, 5-12-2012 )