TASELAN DONYA"

 Oleh : AGAM SIDROE
=========================================

Deungoen Bismillah, loen peu phoen kalam,,
Hate yang khadam, babah yang baca,,
Haba  lam rika, diteungoeh malam,,
Saboh peuneusan, seun seun sibanja,,

Wate neu baca, beunakeuh neu pham,,
Asoe didalam, tamse loen rika,,
Na sidroe hamba, hudep lam 'alam,,
Uroe ngoen malam, sideh lam rimba,,

Teungoeh goet lazzat, hate didalam,,
Istirahat badan, kahek keurija
Teuka le singa, cukoep that keujam,,
Keuneuk jak terkam, insan lam rimba,,

Meutoet meutoet teuboeh, asoe didalam,,
Karap rhoet pitam, geu kaloen singa
Geubeudoeh sigra, reu oeh meu bram bram
Geuplueng sep tajam, arah tan le na,,

Kahek anggota, uroe ngoen malam,,
Lam rimba Tuhan, geuplueng that teuga,,
Geupiyoeh sigra, bak saboeh kulam,,
Geusadue badan, bak kayee raya,,

Geukaloen taloe, meutueng meutueng sinan
Meulhoek that kulam, ngoen ie pih hana
Laju geumeumat, tamoeng lam kulam,,
Geumeusom reujang, bek deuh bak singa

Teungoeh meugantung, bak taloe panyang,,
Mata teurangsang, kaloen buya
Dineuk kap Gobnyan , meunyan binatang,,
Dipeuhah rahang, gigoe meucula,,

Diteuka gundah, seureuta bimbang
Bantuan datang, tikoeh seureuta,
Dikap le sigra, taloen yang panyang,,
Dang bak kadang, dua keurija,

Puteh ngoen hitam, hudep meupasang,
Tikoeh geurangsang, taloe diseuba,,
Katroe yang puteh, dijih ka teunang,,
Teuka yang hitam, gantoe keureuja,,

Sinan lam kulam, hamba meulang meulang
Hana teubayang, lagee nyan rupa,,
Mata meukaca, hate ka bimbang,,
Meutan soe datang, yang tuloeng hamba,

Teungoeh geulisah, seureuta bimbang,,
Teuka meupasang, unoe seureuta,,
Diba keuluarga, dipeuget rangkang,,
Ateuh goe batang, cabeung yang raya,,

Dititep madu, leumak koen wayang,,
Cukoep seuteuntang, lam babah hamba,,
Hate yang sugra, diteuka seunang,,
Tan le teubayang, jeut umpeun buya,

Meunan teujadi, masa yang panyang,,
Sampe teureupang, taloe yang raya,,
Meupisah dua, taloe yang panyang,,
Tuboeh yang malang, jeut umpeun buya,,

Ceurita ka habeh, rika loen karang,,
Cukoep that sayang, tuboeh nyan hamba,,
Hana treb masa, susah ngoen seunang,,
Pasti troeh datang, tamat ceurita,,

Bacut loen surah, Haba tamselan
Bek sampe teubayang, donya simata
Meutan treb masa, Allah coek pulang,,
Barang pinjaman, bak teuboeh hamba,,

Singa yang juah, malaikat tamselan
Keuneuk coek pulang, nyawoeng bak hamba,,
Dua boeh buya, meunyan preh reujang,,
Malaikat yang garang, pareksa hamba,,

Kulam Meuyang lhoek, loen tamse rangkang,,
Teumpat preh datang, akhirat teuka,,
Meunyan istana, yang tan teubayang,,
Sosah ngoen seunang, sinan keuh nyata,,

Loen tamse masa, taloe yang panyang,,
Tikoeh meupasang, masa meuputa,,
Madu dirasa, donya peu ayang,,
Mangat jeut seunang, bak sang han le bla,

Ban putoeh taloe, nyawoeng troeh datang,,
Nikmat seunang, leukang bak hamba,,
Baroe teurasa, sosah koen wayang,,
Meutan teubayang, janji troeh teuka,,

وَ سَّلاَمُ عَلَيْكُم وَرَحْمَةُ اللهِ وَبَرَكَاتُهُ

( Agam Sidroe 29 juli 2012M / 9 ramadhan 1433H 02 : 00 WIB )