“ TAPILEH INOENG BEKNA 4 BOEH PALEH “

   OLEH : SULAIMAN.A.GANI.

=======================================

Alhamdulillah, pujoe ilahon

Rahmat  neupeutroen, keunoe meulimpah

Ngoen Rahman Rahim, sifuet ilahon

Neubri keu uloen, pikirab beuglah

Hajat lam hate,  ca’e lon susoen

Peu ingat kawoem, mangat bek salah

Bak pileh inoeng, haba lon susoen

Supaya muphoem, han salah kaprah

Pileh sambinoe, kon bloe ija kroeng

Gantoe juet tiep thoen, wate ka beukah

Si umu hudep, tapakek meuthoen

Meu untoeng untoeng, seunang ngoen susah

Meupuet boh paleh, tilek hai kawoem

Sigolom langsoeng, gata meunikah

Meusalah saboeh, jiduek hai kawoem

Tatinggai langsoeng, bekle meunikah

Binasa dudoe, meupaloe  ujoeng

Nyan anuek kandoeng, dudoe yang susah

Gata ka meucre, geuruksah Hukoem

Nyan anuek kandoeng, meusoe yang papah

Meupuet boh paleh, jinoe lon susoen

Baca hai kawoem, ka lon seuleuah

Meuseun seun seun saboeh, beugoet tapuphoem

Takalon langsoen, tilek beugoet  pah

Yang keuphoen  paleh,  musang  meuturujoen

Muka  sabe coen,  bagoe  na  marah

Oh  jiwoe  lakoe,  bagoe  na  racoen

Nariet  meusinggoeng,  sabe  lam  babah

keu  dua  paleh, ceurape  lhoeh  mboen

lakoe  pih  jitroen,  dijih  pih  leupah

lakoe  pih  dijak,   ditinggai  gampoeng

dijih  jeut juroeng,  jak  ba fituenah/ ( Jak publoe capah

Yang  keu  lhee  paleh,  si  amak  ayoen

Hareuta  jitroen,  bagoe   geupinah

Bacut  tan  hemat,  sirimueng  guloeng

Pade   dalam  kroeng,  siat  ka  punah

Yang  keu  peut (paleh,  tikoeh  dalam  toeng

Inoeng  ceumakeun,  paleh   sileupah

Coek  hareuta  lakoe,  puwoe  u  gampoeng

Sabe  tiep tiep thoen,  han  sep  nafakah

Meunyan keu paleh, kalhueh lon susoen

Neutilek langsoeng, bak inoeng bekna

Bek juet peunyaket, meupaloe ujoeng

Nyan anuek kandoeng, dudoe binasa

( Tgk Diyueb Bruek ) Karangan jamuen

Tgl, 23/02/2010 =====000========