“ ABU LAHAB “

=================================

Lon peuphoen kalam,  degoen Bismillah.
Lon pujoe Allah, yang that kuasa

Neubri Tuhanku, Pikiran lon glah

Hajat lon kisah, saboeh Mustika

 

Seulawuet saleum, keu Rasulullah

Utusan Allah, atueh rhueng donya

Deungoen beureukat, ka’bah Baitullah

Beureukat syiah, Bandum  Ulama

Salam 'alaikum , rakan meutuah

Saleum sipatah, bandum lon sapa

Geulantoe lon bri, kupi saboeh glah

Kirem naseukah, Ubat peunawa

Neucoek neupuwoe, beugoet neukeubah

Haba lob kisah, pasoe lam dada

Keu Abu lahap, jinoe lon peugah

Di Rasulullah, meunyan pamanda

 

Paman di Nabi, keubiet that juah.
Sabe geu ilah, Nabi binasa.
Nyan Abu lahab, biet  cangklak leupah.
Sampoe keu Allah , geutakoet hana

Nibak si uroe,  lahab meu olah
Nyan Rasulullah , dipeucelaka
Geuyue kueh uruek, saboeh yang  luah
Beu lhoek meuleupah, ka  geuyue buka

Di dalam rumoh, uruek geupeuhah
Dikeu peuratah, si taet buta
oh kalhueh hase, uruek  yang luah
Geutoep le bagah, lage semula

 

Geu keunuek jeubak, nyan Rasulullah

Lam uruek luah, ka geuthuen suda

Mangat ceulaka, di Rasulullah

Meunan keuh leumah, lahab durjana

Bak aneuk buah, lahab amanah..
Geujak yue peugah, nibak maulana
Sabe Lon hoe  jih, nazue’a leupah
Kayu jak bagah,  bak  ulon sigra

Di anuek buah, beurangkat  bagah
Bak rasulullah, jijak bri  haba
Beuta duka, ya ..habibullah..
Droe geuyue langkah, lahab meuhaba

Saket  nazeu'a , lahab jipeugah
Ya  rasulullah, sabe hoe  gata
Oh ban  geudeungoe,  haba ji peugah
Di rasulullah,  geujak  le sigra

Bak abu  lahab,  laju geulangkah
Di rasulullah,  hana syuriga
Ban geuneuk tamoeng,  gaki geulangkah.
Wahyu Allah, laju troek teuka.

Jibrail datang , suruhan  Allah
Bak  Rasulullah, jibril berkata
Meubek talangkah,  ya habibullah
Peurangkap jeulah, nyan  dikeu gata..

Uruek cukop lhoek , ka lhueh seuleuah
Bekle ta langkah , laju  jak  gisa
Meuban geudeungoe,  jibrail peugah
Di rasulullah,  langkah geugisa

Abi lahab kaloen , hate ka susah
Nabi meulangkah , arah geigisa
Laju geukawoet, sira melangkah.
Uruek  geu olah, goebnyan ka lupa

Laju lam uruek, lahab reubah
Yue tuloeng bagah, geumoe that raya
Ka keunoeng sudah, Tuboeh meudara

Taloe le bagah, yue surueng sigra

Ji surueng taloe, panyangmeuploeh hah
Kuasa Allah,  hantroek  geuraba
di Abi lahab , hate that gundah
Bak  aneuk buah , peurintah sigra

Kahoi Muhammad,  kayu jak bagah
Laju kapeugah,  yan g ulon rasa
Lon singkat haba,  nabi geulangkah..
Geuseunyueng bagah , jaroe di baginda

Ka geujoek jaroe , lam  uruek luah..
Mu'jizat rasulullah, meutroek geu raba
Meulheh geutuloeng,  si lahab juah
Bak Rasul Allah,  lahab berkata

Keubiet Muhammad,  hayue sihe kah
Cukoep that jelah, sihe leumboy sa
Meunan khuen lahab, tutoe jipeugah
Musibah kaleupah,  jasa geulupa

 

Meu goet geupubuet, juehuet meunalah

Si  laknat Allah, sidaruhaka

Han pue tahiruen, si laknattullah

Le laen kisah, Qur’an neubuka

Bacut peu ingat, rakan meutuah.
Karma bak Allah,  meubek ta lupa
Maka bek broek niet, rakan meutuah
Meu ulang kisah , teuma keu gata..

Akan jasa goet, ta ingah  balah
Yoeh  masa susah, soe tuloeng gata
Bek ngoen ie tuba , madu ta balah
Bek saban kisah, lahab durhaka

Meumada ohnoe,  haba lon kisah
Lon lake meuah, sibarang dosa
Meupat na salah, haba lon kisah
Peu beutoi bagah, bek juet keu dosa
.Wassalam. *ALhadi Andika selangor
25-03-2013#