RATU GOYANG/ LEDY GAGA

Oleh : Tgk Diyueb Bruek

================================
Alhamdulillah, lon puphoen kalam

Lon pujoe Tuhan, Azawajalla

Yang bri raseuki, yang peuna peutan

Makluk lam alam, ban sigoem donya

Seulawuet saleum, teuma oh lhuehnyan

Pang ule alam, rasul Mustafa

Yang ba risalah, keu bandum insan

Utusan Tuhan, khatam  Ambiya

Lhuehnyan saleum lon, keu badum rakan

Inoeng ngoen Agam, tuha ngoen muda

Hajat lon kisah, keu ratu gonyang

Ulon seuboet nan, nyan lady Gaga

Pakriban kisah, keunoe troek datang

Jijak hibur Fans, Indonesia

Lagu ngoen baje, cukop sipadan

Ka lage syetan, hantu lam rimba

Bungoeng ie mawoe, di dalam taman
Timoh di sinan , ban siseulingka
Nyan ledy gaga, keunoe troek datang
Ineng ngoen agam,  meusuka ria

Di  Amerika, keunoe  teureubang
Dijak hibur Fans, Indonesia
Dikeunuek peugoet, saboeh hiburan
Ngoen ratu,  goyang nyan  Ledy Gaga

Meuphoen tadeungoe, baca bak koran
Dumna  siaran , dalam ngoen lua
Keunoe akan troek, si ratu goyang
Nama Sinoeng nyan, si  ledy Gaga

Cocoek that ngoen nan. ratu goyang.
Peureuseh  syetan , meunyan si gaga
Asoe lam lagu, jihina tuhan
Ka keebebasan , bandum jieh peuna

Memang that beutoi , ngoen kenyataan.
Meu si Lady nyan, goet that di puja
Tuha ngoen muda,  ineng ngoen agam
Ka  laroet keunan , lam haro hara

Wate takaloen, deungoen pakaian
Bandum  ikotan , Kajuet  idola.

Ban urueng pugo, jisoek pakaian

Peureuseh syetan, hantu beulaga

Si ledy Gaga , peureuseh syetan
Kontrak that meuhai, meureutoh juta
Deungon  geutanyoe , jijak peusaban.
Peurusak moral, nyan  aneuk bansa

Maka FPI, beudoeh jak larang
 Hana sesuai, deungoen agama.
Beudoeh jak Demo ,jijak gagalkan..
Bek rusak moral, dum anuek bangsa

Yang leupah gura, di  keamanan
Meupakon plinplan, tegas ji hana
Yoeh phoen ditulak, izin jih pih tan
Pakon ohlhuehnyan, izin jih kana

Meunyoe pribadi , di uloen tuan
Beu ek keu batal , konser si Gaga
Bek sampoe hanco, teupeuroe  iman
Rusak ngoen moral , dum anuek bangsa

Bacut nibak lon, haba peuneusan

Untuk bandum Fans, si ledy gaga
Bek juet idola, si inoeng  jalang

Bek juet ikutan, sidarohaka

Idola geutanyoe, urueng  iseulam

Nabi janjongan, Rasul Mustafa

Meunyan keuh contoh, suri teuladan

Umat iseulam, ban sigoem donya

Meumada ohnoe, haba lon karang

Keu ratu gonyang, si ledy gaga

Meunyoe na salah, peumeuah rijang

Geutanyoe han saban, pikiran sama

===================================