“ SURAT ASYSYURAA “

===========================

Alhamdulillah, lon pujoe Tuhan

Lon puphoen kalam, pujoe Rabbana

Sigala pujoe, sit milek Tuhan

Yang peujuet alam, dum asoe  donya

 

Lhuehnyan seulawuet, akan janjongan

Pang ule  alam, Rasul Mustafa

Meunyan keu Nabi, Akhirul  Zaman

Utusan  Tuhan, ban sigoem donya

 

Jinoe saleum lon, keu bandum rakan

Inoeng ngoen Agam, tuha ngoen muda

Nyoe pat mudah, saboeh karangan

Kirem keu rakan, ubat  peunawa

 

Surat Asysyuraa, tuleh lam Nazam

Ngat mudah neupham, hareutoe makna

Neucoek meukeusud, asoe lon nazam

Juet keu peudoman, hudep lam donya

Jinoe ulon tuleh, nyan kalam Tuhan
Ayat Quru’an, surat Asysyuraa
Ayat meuteuntee, bak lhee ploh lapan
Neucoek Quruan, neusimak  makna

Wa amruhum, syuraa bainahum

Meunoe meukeusud, muphoem disinan

Dalam ayatnyan, hareutoe makna
Beurangkapeue buet,  yang ta kerjakan

Bek roeh hai rakan , H’am H’um juet dakwa

Lam  surah ayat , meunoe  juet tapham
Ureueng Islam, hanjeut meudawa
Kadang terjadi , na salah paham
Tanyoe ba rijang, bak ureueng tuha

Tayue peutimang, kiban nyang reumbang
Meubek hai rakan, juet prang saudara
Bek peurayoek buet,sit ube jeundrang
Oh dudoe alang, telah jiteuka

  

Oh teuka teulah, dudoe komdian
Seubab pakon  han, tajak bak tuha
Pakon hana tayue, bah goeb peutimang
Oh ka bicah prang, kepueue  lom guna

Oleh seubabnyan, geutanyoe rakan

Urueng Iseulam, bek peudoeng  dakwa

Meunyoe terjadi, lagenyan macam

Neubeudoeh rijang, mita ulama

Neutanyoeng hukom, kiban yang reubang

Bek juet bicah prang, sabe  saudara

Seubab geutanyoe, umat iseulam

Yang saboeh iman, bandum saudara

===============000===========