“ HIKAYAT UMAR BIN KHATAB ”

 =============================

1.      Umar Bin Khatab Tamoeng Islam

2.      Umar Bin Lhatab Geupoeh Anuek Droe

3.      Umar Bin Khatab Geupajoeh Tuhan

===========================

 Dengoen bismillah ,lon peu phon kalam
Bak sidroe Tuhan , lon mohon pinta
Bejeut keuh ulon , pegoet karangan
Saidina umar,  ulon calitra

Ahamdulillah , lon pujoe Tuhan
Ulon nak karang,  saboeh calitra
Saidina umar , geutamoeng islam
Menan keu rakan,  judul lon buka

Nibak si uroe , wahe e rakan
Saidina umar,  bengeh lagoina
Udarul arkam , hajat tujuan
Ngoen pedeung tajam,  meukilat mata

Hajat geunek poeh , Rasul janjongan
Sebab wate nyan , islam kageuba
Tengoeh geujak,  lam perjalanan
Nu’aim pih kenan ,  katroek geuteka

Laju geu tanyoeng,  nibak wate nyan
Meuhoe nyan umar , taneuk jak gata
Laju geu suoet,  nibak wate nyan
Udarus Arkam , ulon neuk  teka

Geupegah maksud,  dengoen tujuan
Ka ubak rakan , bandum calitra
Nu’aim bin abdillah,  siat terdiam
Teuma oeh lheh nyan,  menoe meuhaba

Pue hana male,  gata e rakan
Udarul  Arkam , keudeh tateuka
Jeh adek gata , ka itamoeng islam
Nyan peuselesai,   dile di gata

Oeh ban geudengoe , peuneugah menan
Saidina umar , bengeh lagoina
Tuboeh ka sueum,  ban saboeh badan
Laju wate nyan , seutoet adinda

Ubak Fatimah,  laju tujuan
Udarul  Arqam , han jadeh teuka
Urumoeh adoe , geujak le rijang
Pedeung lam regam,  meucahya cahya

Geuketoek pintoe,  laju le rijang
Tanyoeng ureung di dalam , meusoe dilua
Ulon nyoe umar,  menan jawaban
Ureung didalam , kayoe semua

Siti Fatimah,  nibak wate nyan
Teungoeh bet qur an,  ngoen suami tercinta
Habbab ibnul ‘arab , pihna disinan
Geu plueng di goepnyan , laju u lua

U likoet pintoe,  geumeusoem yoehnyan
Keupada umar,  temakoet raya
Baroe  dengoe sue, ka susah pikiran
Puelom hai rakan,  oeh geu e rupa..

Kiban keuh tema,  nyoe kejadian
Soe keuh hai rakan , takue geu puta
Meusoe keuh jaroe,  yang geukoeh lapan
Supoe keuh badan , yang geuplah dua

Tente  lon samboeng, oh lheuh iklan
Entreuk samboengan,  nepreh troek teka
Menyoe hana troek,  oh  lheuh iklan
Nepreh hai rakan , oeh lheh puasa

…

Alham dulillah , lon pujoe Tuhan
Jinoe sambungan , kalheh lon rika
Neubaca laju , wahe e rakan
Kisah di umar,  yoeh saboeh masa

Siti Fatimah , laju le nyoehnyan
Lembaran qur an , geusoem lam ija
Di likoet baje ,  laju geusimpan
Lembaran qur an , geu keubah sigra

Oeh lhe geukeubah,  lembaran qur an
Kepada abang , pintoe neubuka
Oeh ban neukalon,  ateuh cut abang
Meu toet toeh Badan, pucat ngoen muka

Umar bin khatab,  laju meukalam
Neutanyoeng rijang , ubak adinda
Pue beutoi Fatimah,  ka tamoeng islam
Beutoi hai abang , jaweub adinda

Ka geuboet jaroe , laju wate nyan
Saidina umar,  adoe geutampa
Meugoem bak aleu,  adoe tersayang
Darah hai rakan , jile u luwa

Sahih bin zayet , suami tersayang
Geubi bantuan , istri geubela
Tapi tan daya , wahe e rakan
Sahih buet umar , geubloeh bak dada

Fatimah bak aduen , laju mekalam
Pakoen hai abang , lage nyoe cara
Pakoen neujak poeh,  ureung meu iman
Keusidroe Tuhan,  ‘adza wajallah

Oeh ban geudengoe,  adoe kheun menan
Laju di umar , laen teurasa
Pakoen Keuh menoe , adoe meukalam
Teupike nyoeh nyan , didalam dada

Ngoen tiba tiba,  Geubri penjelasan
Lembaran qur an , teusuet uluwa
Laju neutanyoeng, meupue kreutah nyan
Suhuf hai abang , jaweb adinda

Putra suhuf nyan , tanyoeng lom rijang
Lembaran qur an , jaweub adinda
Mee  kenoe laju , lembaran suhufnyan
Bah ulon tuan , jinoe lon baca

Teuma di adoe,  laju meukalam
Hanjeut hai abang,  lon bi keugata
Peureulee baca,  aduen lon sayang
Peusuci badan , laju beusigra

Umar Bin khatab,  nibak wate nyan
Geu ikoet rijang , perintah adinda
Peusuci tuboeh , laju wate nyan
Geucoek le teuman,  suhuf geu baca

Surat TAHA , meutuleh sinan
Buka Alqur an , wahe syedara
Ayat yang phoen,  geu baca rijang
14 oeh lheh nyan , geusamboeng baca

Umar meutot toet , ban saboeh badan
Ka meunyoe kalam,  koen pura pura
Ka meunyoe ayat,  koen wayang wayang
Memang that benar,  pue yang lon baca

Ubak Fatimah , geutanyoeng rijang
Muhammad yoehnyan,  geutanyoeng sigra
Jaweub Fatimah, laju le nyoehnyan
Meunoe meukalam,  wahe syedara

Han ulon peugah , wahe e abang
Menyoe janjoengan, Tapoeh le gata
Tapeugah laju,  hai adoe sayang
Bek macam macam, gata ngoen kanda

Bukoen lon nak poeh , si Muhammad nyan
Bukoen lon tuan , lon  keuneuk siksa
Tapeugah laju , jinoe berijang
Yoeh goeh lon tuan , beungeh keu gata

Jaweb di adoe , laju masanyan
Udarul   Arqam , keudeh neuteka
Nabi Muhammad , tinggai disinan
Ngoen rakan rakan, bandum semua

Allah hurabbi , kisah ka panyang
Bah keuh laen jan , lon samboeng teuma
Kisah di umar , geutamoeng islam
Soe lom geu hantam , wahe e syara

Lage biasa , lhueh pesan peusan
Wate lheh iklan,  lon samboeng haba
Bah singoeh uroe , oeh abeh iklan
Baroe hai rakan , kisah ta puta….

(Episode III)

Dengoen bismillah , lon samboeng kalam
Kisah di umar,  bak saboeh masa
Saidina umar , geutamoeng islam
Baca hai rakan , ngat  meuhoe punca

Laju berangkat,  udarul Arqam
Saidina umar , setoet Baginda
Nabi Muhammad,  geusetoet rijang
Peudeng hai rakan , chiet sabe geuba

Oeh ban sare troeh , udarul Arqam
Umar  masanyan, geupiyoeh sigra
Bak teumpat nabi , laju tujuan
Pintoe hai rakan , geutoek toek sigra

Saleum tan geubi,  geuteuoh pih tan
Nibak wate nyan , meufoem pih hana
Laju neutanyoeng,  le ureung didalam
Meusoe keuh tuwan,  yang na dilua

Umar neujaweub,  cukoep That garang
Ulon nyoe umar,  yang na diluwa
Kabeh meutoet toet , ureung didalam
Pintoe hai rakan , han geujeut buka

Saidina hamzah,  nibak wate nyan
Geumaju kenan , laju meuhaba
Tabuka pintoe , laju hai rakan
Bah ngoen lon lawan,   yang mita peukara

Teuma meusabda,  Rasul janjoengan
Laju berijang,  pintoe tabuka
Seumoga hikmah,  neubi le Tuhan
Meunan janjongan , perintah sigra

Pintoe geu buka,  laju le rijang
Tamoeng udalam , saidina uma
Laju bak nabi , geupeutoe keunan
Geu uem le rijang , tuboeh saidina

Laju meungucap , nibak wate nyan
Saidina umar,  khen syahdat dua
Ashadu alla..ila..ha..illallah..
wa ashaduannaka yamuhammad rasulullah

Di sahbat nabi,  teukebi  le rijang
Allahu akbar , geukheun semua
Umar bin khatab,  geutamoeng islam
Bandum ka seunang , sahabat dumna

Oehnoe meumada, haba lon karang
Kisah di umar , bak saboeh masa
Na sit  lom kisah , seudeh ngoen senang
Saidina umar , wahe syedara

Menyoe na umu , Tuhan bie payang
Bah keuh laen jan,  lon samboeng haba
Menyoe na idin,  bak rakan rakan
Kisah di umar,  lon samboeng tema

Saidina umar , wate lheh islam
Teulheh seumbahyang,  geu klik meu ‘a’a
Teuma oeh lheh nyan,  saidina umar
Wahe e rakan , geukhem meu ha ha…

Kiban cerita , wahe e rakan
Kiban di umar,  geu poeh aneukda
Kiban cerita , geu pajoeh Tuhan
Saba hai rakan, dang dang lon rika

Top of Form

 “ UMAR  GEUPOEH ANEUK DROE”

==============================
Dengoen bismillah , uloen boet jaroe
Haba lon pasoe , lam donya maya
Umar bin khatab , bak saboe uroe
Kisah hareutoe , sbak donya nyata

Kisah di umar,  bak saboeh uroe
Geukhem ngoen geumoe,  ile ie mata
Tanyoeng sahabat , pakoen keuh neumoe
Peugah bak kamoe , wahe syedara

Pakoen keuh neukhem,  tema oeh dudoe
Aneh han bagoe,  lon kalon  gata
Umar bin khatab,  neujaweb meunoe
Baca aduen droe , ulon calitra

Wahe sahabat , bak saboeh uroe
Di ulon sidroe , keujam lagoina
Sit hobi meuprang , dengoen meulhoe
Sabe tiep uroe,  lawan lon mita

Meunuroet khabaran,  wahe aduen droe
Keu glah ie umar nyoe,  tangkurak manusia
Lam ule ureung,  ie ka geupasoe
Meunan keuh bagoe , yoeh saboeh masa

Lon samboeng haba,  bek le that rampoe
Euntruek han meuhoe , alur cerita
Kisah poeh aneuk , keunan tapuwoe
Mangat  Meusahoe,  uram ngoen punca

 

Wasiet di umar , bak peureumoeh droe
Wahe e adoe , hoe gata dinda
Di ulon tuan , keuneuk jak jinoe
Lam prang hai binoe,  lon keuneuk teuka

Gata lon tinggai,  wahe e adoe
Bek tajak sahoe,  wahe adinda
Kandongan gata,  wahe e adoe
Boeh hate geutanyoe , karap lahe udonya

Ka meunyoe agam , lahe hai  adoe
Beugoet tahiroe , deungoen ta jaga
Meunyoe roh  inoeng , wahe e adoe
Peudeung bak jaroe , tamat le gata

Geulantoe ulon , wahe e adoe
Dengoen peudeung nyoe,  jih takoeh dua
Bek sampe ‘aib,  hudep lam nanggroe
Bah pih aneuk droe , han jeut tabela

Ie mata jitroen , dengoe sue lakoe
Hate karangoe , seudeh lagoina
Umar beurangkat,  geutinggai meuligoe
Lam prang geupeutoe,  ngoen bala tentra

Kana paduem trep , umar tan geuwoe
Peurumoeh di nanggroe,  katroek bak masa
Aneuk ka lahe,  ceudah han bagoe
Keuhendak poe . sit  sidroe dara

Ie mata ile,  bak mieng poma droe
Wasiet di lakoe,  leumah bak mata
Oh geungieng peudeung , hate meutampoe
Oeh ngieng aneuk droe , hate sang luka

Ombak di laot , jijak ngoen jiwoe
Riyeuk meutampoe,  bak mieng kuala
Sang duroeh jantoeng , geugieng aneuk droe
Peudeung bak jaroe,  geu mat le sigra

Kiban keuh kisah,  tema oeh dudoe
Puekeuh aneuk nyoe , jadeh  koeh dua
Kiban keuh kisah , oeh umar geuwoe
Saba aduen droe,  lon samboeng sigra

 

Hanatrep lon samboeng , wahe rakan droe
Sit padum uroe , katroek ulon ba
Oh wate seutang,  ka tamat keudroe
Wate aceh nyoe , ka jijoek merdeka

Alhamdulillah , Tuhan lon pujoe
Nibak uroe nyoe , lon samboeng haba
Umar bin Khatab,  geupoeh aneuk droe
Bak saboeh uroe,  keujam lagoina

Geucoek le peudeng , geurhoem lam sagoe
Geu uem aneuk droe , sibijeh mata
Ie mata jitroen , meutaloe taloe
Seudeh han bagoe , wahe syedara

Oh na padum thoen , umu aneuk droe
Meumacam bagoe , geu peugoet cara
Geupeusoek lewue , ban dara jinoe
Takalon bagoe,  sang aneuk muda

Padahai dara , wahe aduen droe
Meunan keuh bagoe,  ka geupeu rupa
Meu oek bak ule , tuet han bagoe
Keubiet that paloe , keubiet that gura

K isah lon puta , umar ka geuwoe
Seunang han bagoe , geukalon rupa
Geu kalon aneuk,  ganteung han bagoe
Laju geu peutoe , kenan geusapa

Peu haba gata , wahe aneuk droe
Ganteung that lagoe,  gata aneuknda
Aneuk di jaweub,  wahe ayah droe
Ayah kaneuwoe , seunang lon raya

Ka geuba umoen,  geupakat manoe
Baje bak asoe , geupinah sigra
Oeh ban geukalon,  ka laen bagoe
Geu eu anek droe , hana senjata

Ka hana AK , bude meutaloe
Tapi rakan droe , ploek munyeuk ata
Umar ka bengeh,  kalon aneuk droe
Suem ngoen asoe, mirah ngoen mata

Na sit  cerita,  laen lom bagoe
Geucoek aneuk nyoe,  geuba uluwa
Geu peurenoe keurate , meuprang ngoen meulhoe
Supaya aneuk droe,  gagah perkasa

Oeh ban ji sipak,  uleh aneuk droe
Luweu  bak asoe , ka teplah dua
Ka lemah bingkang , kuweh lhee sagoe
Ka leumah tumpoe,  ngoen asoe kaya

Astaurfirullah , ulon bet jaroe
Wahe aduen droe , ulon toep muka
Pakoen cerita,  sampoe lage nyoe
Male han bagoe,  bak ulon rika

Ka geucoek le lham,  geumat bak jaroe
Geu coek aneuk droe,  geu peu ek guda
Laju berangkat,  wahe aduen droe
Geucoek aneuk nyoe,  laju le geuba

Oh troek bak teumpat,  geucoek lham bunoe
Uruek hai adoe , geukueh le sigra
Reuoeh jitubiet,  hana geupakoe
Beudoeh aneuk droe , sampoeh ngoen ija

Jikheun  le aneuk,  wahe ayah droe
Keupue uruek nyoe,  wahe ayahnda
Sira ji sampoeh , reuoeh bak asoe
Seudeh han bagoe , wahe syedara

Umar geusuoet,  geu jaweub meunoe
Lon kueh uruek nyoe,  wahe aneuknda
Euntreuk na bade , jiteuka kenoe
Dalam urhuek nyoe , taloep le gata

Oh ban ka siap,  uruek selesoe
Aneuk geu pasoe , laju le sigra
Geurhoen ngoen tanoeh,  ka laju geudhoe
Tema aneuk droe,  laju meuhaba

Wahe ayah lon, pakoen jeut meunoe
Pakoen ka neudoe , urhuek silangka
Lon kameukemat,  wahe ayah droe
Saket han bagoe,  bak ulon rasa

Tapi di umar,  hana geupakoe
Geu tamah geudoe , uruek silingka
Katroek bak takue,  tanoeh geupasoe
Siram ngoen jimoe,  aneuk mehaba

Wahe e ayah,  sayang keulon nyoe
Saket ayah droe , tuboeh lon rasa
Neusayang keulon,  wahe ayah droe
Yoeh ngon poma droe,  hantoem lon rasa

Ie mata ile tijoeh , bak bumoe
Aneuk ka jimoe , jimohon pinta
Wahe e ayah , lon mohon jinoe
Neutulong lon nyoe,  bek neu elanya

Ulon keunek ngieng , wajah bunda droe
Neugaseh lon nyoe , wahe ayahnda
Poma di ulon , get that geuhiroe
Pakoen ayah droe,  lon neu elanya

Puetra salah long , pakoen jeut meunoe
Lam ureuk neupasoe , lon neu elanya
Sayang that bunda , wahe ayah droe
Menyoe tan lon nyoe,  sedeh geurasa

Umar bin khatab,  hana geupakoe
Geutamah geudhoe , ban sike lingka
Ka hana le sue , aneuk geudengoe
Kaleupah jiwoe,  ubak Rabbana

Meunan keuh sahbat , makajih lon moe
Seudeh han bagoe , bak ulon rasa
Sabe ulon klik , sabe ulon moe
Teu ingat aneuk droe,  si bijeh mata

Teuma ulon khem,  wahe sahbat droe
Lucu han bagoe,  bak saboeh masa
Tuhan lon pajoeh , bak saboeh uroe
Seubagoe geulantoe , makanan di ateuh meja

Kiban keuh kisah,  aduen ngoen adoe
Nemita keudroe , laju le sigra
Bak ulon tuan , meumada oeh noe
Meuah keulon nyoe , bak salah haba

“ UMAR BIN KHATAB GEU PAJOEH TUHAN “
=========================================
Dengoen bismillah, lon peuphoen kalam
Kisah sambungan,  ulon calitra
Umar bin khatab, geupajoeh tuhan
Baca hai rakan,  bek salah makna

Kisah that seudeh,  kalheuh uroenyan
Jinoe hai rakan,  kisah ceria
Umar teukhem,  oh lheh seumbahyang
Teu ingat saboeh jan,  lucu terasa

Bak saboeh uroe,  dalam khabaran
Umar watenyan , tengoeh meumuja
 Nyan aneuk bate, peugoet keu tuhan
 Bak teumpat pengistirahatan,  dalam istana

Teungoeh geu eh eh,  umar wate nyan
Katroek le kenan , saboeh berita
Umar bin khatab , katroek undangan
Untuk jak meuprang,  u dalam gaza

Geuberangkat laju,  ubak udangan
Dengoen pasukan,  dum bala tentra
Tuhan geutinggai , geukeubah sinan
Bak teumpat pengistirahatan,  hana soe jaga

Meuka meuthon thoen , umar jak meuprang
Teuma oeh lhehnyan,  laju geu bungka
Geuwoe bak teumpat,  laju le rijang
Oh ban troek keunan,  tekejoet raya

Geukalon teumpat,  ka berantakan
Geukalon tuhan,  meutamah raya
Ka jipoek tampoeng,  gaseue ji hantam
Bara meutimphan,  ka patah dua

Laju tepike,  umar watenyan
Pakoen di tuhan , cukoep that teuga
Istana ulon , kabeh geuhantam
Teumpat pengistirahatan,  hancoe semua

Meunyoe lagenyoe , tuhan hana can
Hana geusayang , kepada hamba
Kahek ta puja , menoe balasan
Leubeh goet tuhan , jinoe lon tuka

Kageuhoi utoeh,  laju le rijang
Bak teumpat kenan , ka geuyue teka
Geupeugah hajat,  bandum tujuan
Nak gantoe tuhan , ngoen laen teuma

Gantoe ngoen kayee , wahe e rakan
Utoeh watenyan,  laju keurija
Kaye geu ukee,  laju le rijang
Oh takalon ban , indah lagoina

Cukoep that mahir,  keupala tukang
Bak pegoet tuhan , chiet ka biasa
Nyan koen utoeh , yang seumbarangan
Jithe hai rakan , chiet ka lemboi sa

Teumpat geupeugoet,  laju lerijang
Geurehap lheh nyan,  teupat berhala
Teumpat ka siap , geupeuduek tuhan
Hate di umar,  cukoep that lega

Jak tapajoeh bu , wahe e rakan
Sayang keu bandan,  bek menderita
Neu eu jaroem jeum,  wahe e rakan
Tuet ngoen panyang,  meusapat dua

Tanda coet uroe , ka troek jidatang
Teuma oh lheh nyan,  leuhoe jiteka
Euntreuk ta samboeng,  baca karangan
Oh lheh seumbahyang,  pujoe rabbana

Oh ban kalheuh bu,  hate ka senang
Oh lheuh seumbahyang,  hate bahgia
Jinoe lon peutroek,  janji ngoen rakan
Kisah pajoeh tuhan , lon samboeng tema

Ka geu istirahat , laju malam nyan
Geu eh di umar , dalam istana
Di dalam hate,  hana le beuban
Seuban tuhan,  kalheuh geutuka

Oh singoeh uroe ,laen lon macam
Na keupentingan , umar di lua
Laju beurangkat,  dengoen rombongan
Geuba ajudan,  bandum semua

Meulikoet geopnyan,  katroek rombongan
Hueng saboeh kawan,  keunan troek teka
Laju ka jipoe,  tamoeng udalam
Bak tuhan umar , jidoeng le sigra

Lam ruheung idoeng,  jipegoet sarang
Ladoem bak badan, ladoem bak muka
Ladoem bak ule,  perehueng sinan
Hueng saboeh,  kawan ka jikeurija

Ban saboeh tuboeh,  jipeugoet lobang
Ban saboeh badan,  ruhueng ji peuna
Bak jaroe ngoen gaki , pih meunan macam
Tuhan di umar,  ka ji elanya..

Oh wate seupoet,  umar geuriwang
Geutamoeng udalam,  laju le sigra
Hajat lam hate , neuk seumah tuhan
Teukejoet yoehnyan,  hana geusangka

Teukejoet umar,  geukalon tuhan
Ban saboeh badan,  bandum ka luka
Di aneuk mata , peujeut ka lapan
Bak ule tuhan , ruhueng meubanja

Ka gemetutoe,  umar watenyan
Alah hai tuhan , pakoen tan daya
Han ek jaga droe,  buet hueng tereujang
Kiban keuh tuhan,  nak jaga hamba

Cukoep that rugoe,  menyoe nyoe tuhan
Manfaat pih tan,  oh lheuh ta puja
Sang hana cocok,  kayee keutuhan
Jinoe pakiban , lon pegoet cara

Geuhoi lom utoeh,  laju le rijang
Lake bantuan,  ide geumita
Oh ban na na siat , utoeh ka datang
Umar wate nyan , laju meuhaba

Wahe e utoeh , ulon ka mumang
Jeh kalon tuhan , kabeh dum luka
Meunyoe lagenyan , tuhan hana can
Jinoe pakiban,  ta pegoet cara

Ka geujoek , ide laju le rijang
Kepala tukang , laju meuhaba
Jinoe ngoen tupoeng , tapegoet tuhan
Wahe e umar,  jampu ngoen saka

Talawoek ngoen ie,  pegoet keu tuhan
Lage ban timphan,  menan umpama
Oh wate kathoe , rayeuk jih pih han
Hueng pih kenan,  jitem jak teuka

Geubloe le tupoeng,  ngoen pegoet tuhan
Saka hai rakan,  laju geupena
Laju mulai , geupegoet tuhan
Bit di utoeh nyan,  caroeng lagoina

Oh kalhueh siap , geupegoet tuhan
Dalam uroe trang,  geupeuduek sigra
Supaya nyak thoek , wahe e rakan
Teuma oh lheh nyan,  peutamoeng istana

Alhamdulillah , lon pujoe tuhan
Uroe nyoe rakan,  katroek lon gisa
Lon jak peusempurna , haba karangan
Ulon ngoen rakan , ngat bek meudausa

Oh kalhueh siap , dum persiapan
Geucoek patoeng nyan , geupeuduek sigra
Patoeng  yang keu lhee , wahe e rakan
Wate goeh islam,  sahbat saidina

Oh singoeh uroe,  geukalon rijang
Hana perubahan , lage biasa
Ka geuberangkat lom,  laju wate nyan
Seubab undangan,  katroek lom teka

Umar bin khatab , chiet hobi meuprang
di le saboeh jan,  sabe juara
Ek geupetaloe,  u bena lawan
Hebat that goepnyan , wahe syedara

Dari phoen begoeh, sampoe troek malam
Di dalam seuh prang , wahe syedara
Oh lheuhnyan tema,  baroe geuriwang
Oh tengoeh malam , baroe geugisa

Laju u teumpat,  keudeh tujuan
Istirahat hai rakan , malam ka jula
Seubab bunoe koen , hek that bak meuprang
Ban saboeh badan,  saket terasa

Han jitem teunget,  nibak malam nyan
Glang ka ji meulawan , eumpeun jimita
Umar watenyan,  hate ka bimbang
Deuk that hai rakan,  luar biasa

Geutubiet u luwa,  han mangat bandan
Geutamoeng u dalam,  pih menan rasa
Geutebiet tamoeng , ule kamumang
Teu  ingat yoehnyan,  kepada berhala

Teu  ingat keupatoeng,  yang  geu anggap tuhan
Geupengoet  hai rakan,  tupoeng ngoen saka
Bahle kuci tes,  hate kheun meunan
Laju le yoehnyan , keunan geuteuka

Laju geupetoe,  bak berhalanyan
Hajat tujuan,  geuneuk ci rasa
Laju ka geumat , bak punyueng tuhan
Geutarek rijang , geupajoeh sigra

Teurasa lazat,  wahe e rakan
Siblah rhoet kanan,  geutarek teuma
Meutamah mangat,  bak perasaan
Laju geuhantam , geupajoeh keupala

Dua krek jaroe , geutarek nyoeh nyan
Geupajoeh hai rakan,  laju bandua
Hana geuthe roeh,  geumat bak badan
Geutarek rijang , geupajoeh sigra

Mangat that lagoe,  meunyuem tuhan
Lam perasaan , hate berkata
Katinggai gaki,  hana le badan
Nyan pih hai rakan,  geupajoeh sigra

Baroe teu ingat,  umar wate nyan
Hana le tuhan , wahe syedara
Kabeh geupajoeh,  hana le tinggai
Oh noe keuh rakan,  abeh cerita..

Meuah lon lake , bak bandum rakan
Seubab karangan,  menoe that haba
Kadang chiet salah,  menuroet rakan
Meuah berijang,  wahe syedara

Laen teumpat,  geutanyoe tinggai
Laen piasan,  laen cerita
Laen pendapat,  kilaf ngoen paham
Bandum nyan rakan , bek jeut keu dawa

Bek jeut keupake,  geutanyoe insan
Bek jeut keuprang , ngoen sikrek haba
Bek jeut keumusoeh,  jiteka dendam
Beu saleng meu maafkan , sesama syedara..

.........................Selamat Menikmati.....