Pages


Senin, 11 Maret 2013

“ PANTON KEU RAKAN “



  OLEH: SULAIMAN.A.GANI.
===================================================
Aneuk leuek meusu , ateueh bak sukôn.
Di aneuk tiyôeng , dicông bak ara.
Keu sidroe rakan,  lôn kirém pantôn.
Haté that rihôn,  sabé di mata.

Toe binèh pasi , riyeuek meususôn.
Kayèe ijô ôn , lam uteuen raya.
Rakan seutia , kaji ôh ngön lôn.
Meubuleuen meuthô , hana geugisa.

Bungöng lahori , tari ngon cidah.
Bungöng meu ulah,  harôm lagoe na.
Wahé Sahbat lôn , nyang that meutuah.
Hoka neulangkah , hana berita.

Riyôh dalam glé,  meupaké reungkah.
Gaki kapatah,  di klik  that raya.
Lôn deungo angèn , meurèn-rèn leupah.
Ka gadôh reupah , kawé tan mata.

Sayang boh mancang,  leukang bak tangké.
Ateueh bak tanlé,  lurôh meukeuba.
Wahé Cut Bang lôn , Ampôn boh haté.
Bèk turôt hate,  peuseutot dônya.

Ureueng jak meugoe , dalam blang toe glé.
Ureueng keu mawé , lam lubôk paya.
Bèk lé peuseutoet , meurot rata bé.
Beuna tapiké,  keu masa tuha.

Sayang boh mamprèe,  meuseubèe lurôh.
Sayang boh sawôh , angèn peudôda.
Peuturôt haté , kareulé tubôh.
Peuturôt sa ôh , han trôh tagisa.

Geu kawé eungkôt,  di la-ôt teudôh.
Dikap geureupôh , deungon jeunara.
Kajeuet neupiké,  bèk lé meugadôh.
Kajeuet neupiyôh , bak buet tan guna.

Bintang dilangèt,  meunblèt-blèt ijô.
Cahya meuhambô , keunoe udônya.
Neuwoe beurijang,  wahé abang e.
Bèk lé neutajô , ho-ho nyang hawa.

Takoh bak panah,  tarah keu bapeuen.
Ta adèe bak leuen , teungoh uroe kha.
Wahé sahabat rakan,  lôn jameuen.
Kajeuet peureumeun , bak buet nyang beuna.

Tajak u sabang , jeumeurang la-ôt.
Payah taék bôt , lèwat krueng raya.
Bubayang dônya,  bèk lé peuturôt.
Bèk lé meulimbôt,  ngon ija ruja.

Gunöng gurutèe , singkèe ula-ôt.
Timoh bak rambôt,  blah lamno jaya.
Bèk lé Bang ingat,  nyang ka ulikôt.
Kajeuet peu seupôt,  buet-buet tan guna.
(  Tgk. Diyueb Bruek  2010 )


0 komentar:

Posting Komentar

Komentar FB :