“ TIONG MEUHABA- 2

    Oleh : SULAIMAN.A.GANI

================================

Manyang Meuhayak ,Pucak Geureudoeng

Yang leubeh lamboeng, Seulawah Dara

Ulon bri saleum, Assalamua’lakom

Keu bandum kawoem, Tuha ngoen muda

Hajat lon peugah, meuhaba  tioeng

Marit deungoen lon, didalam  cintra

Meunoe  jipeugah, haba  jisusoen

Jikhuen nibak lon, meunoe ban haba

Tiong ji meusu,  meu aloen aloen
Ka ji khen pantoen,  di dalam cintra
Dengoe lon pegah,  tiong meupantoen
Ka ji kheun bak lon,  manoe  ie  mata

Si kaye jatoe , manyang that lamboeng
Cabeung meu susoen,  peurelui donya
karab  na lhe thoen,  ulon  neukuroeng
pajan keuh di lon , teubiet  u luwa

Pakoen penjara,  putra salah lon
Pakoen ngoen kawoem,  hanle  meu jumpa
Rindu lam hate , ji teuka rihoen
Lon neuk jak rawoen,  keulileng donya

Hawa keu ulat,  jibri bu jagoeng
Hawa ie kuntoem , ji bie ie paya
Troek bak unibis,  ijak joek keu lon
Buet sigam bakoeng,  bangai lagoe  na

Chiet ka ji teupue , ulon nyoe tiong
Nyan ie boeh jantoeng,  dilon han hawa
Kupue ie suprit , seutroep cam patoeng
Koen makanan lon,  hai  apa  ta 'a

Tiong  Jiklik, jimoe  meuranggoeng
Pakri nasib lon,  O ..ya  Rabbana
Di  manusia , ulon ji kuroeng
Seudeh  that di lon,  dalam penjara

Adak dari meuh,  cintra di ulon

Badan Meukuroeng, meukeupue guna

Nafakah  lahe, leubeh bri keu lon

Bathen soe tanggoeng, cuba  neukira

Oh uroe akhirat,  O  ya Tuhan lon
Neubalah kuroeng,  O  ya Rabbana
Mangat ji rasa , hudep teu kuroeng
Eumpeun jih ngoen lon, singoeh neutuka

Mengat  ji rasa , nyuem ulat bakoeng
Makanan di lon , masa lam donya

Alah ka keuh hom, Nasib  di  ulon

Kheudak ilahon,  Binatang  rimba

Meumangat mangat, kuwah boh jantoeng

Mangat lom reuboeng, ngoen eungkoet paya

Menan keuh rakan, Meuhaba tiong

Di Dalam panton, lon susoen  haba
(  Tgk Diyueb bruek/11/03/2012