IE BEUNA 26 Des 2004

Oleh : Agam Sidroe.
=================================
Tanggai dua nam, beuleun dua blah,,
Atjeh meutuah, musibah teuka,,
Aneuk deungoen ma, seureuta ayah,,
Sare meupisah, dalam IE BEUNA,,

Meuribei nyawoeng, meugunoeng ie bah,,
Hana pat ilah, mandum binasa,,
Ka saban safa, rata wilayah,,
Seuramoe Makkah, meugah ubena,,

Tuha ngoen muda, aneuk miet birah,,
Ma deungoen yah, meupisah dua,,
Adoe deungoen A, ka beda arah,,
Diguloeng ie bah, Allah bri bala,,

Toko meubanja, Istana ceudah,,
Bangunan meugah, teuplah ubena,,
Han soe ek sangka, kuasa Allah,,
Hana treb sa'ah, mandum ka fana,,

Ureung moe ba'e, sare meunasah,,
Jeut-jeut wilayah, taubat nasuha,,
Ingat keu dosa, Bala bak Allah,,
Han soe ek ilah, peuglah bak mara,,

Lam mesjid raya, mandum meuruah,,
Beurokoen tan leumah, keunan ka teuka,,
Na yang hoi poma, didalam ie bah,,
Ladom hoi ayah, arah tanle na,,

Aneuk bak jaroe, ka_woe bak Allah,,
Putroe yang ceudah, ajai troeh teuka,,
Na yang putoeh pha, kaca meureupah,,
Badan teupisah, deungoen keupala,,

Sinan keuh nyata, mata teupeuhah,,
Sigoe ngoen babah, hana suara,,
Ladom ka trauma, sapeu han leupah,,
Tuboeh yang gagah, hana meu daya,,

Ta roe ie mata, pinta bak Allah,,
Bek le musibah, ie bah meugisa,,
Taubat nasuha, meukoen dibabah,,
Cuba ta ilah, beutroeh lam dada,,

Meunyan keuh tanda, fakta ka leumah,,
Nanggroe kiamah, karap troeh teuka,,
Ingat adoe A, ummi ngoen ayah,,
Leuh Rasulullah, tan treb le masa,,

كُلُّ نَفْسٍ ذائِقَةُ الْمَوْتِ وَ نَبْلُوكُمْ بِالشَّرِّ وَ الْخَيْرِ فِتْنَةً وَ إِلَيْنا تُرْجَعُونَ (35)

Tiap- tiap yang berjiwa akan merasakan mati. Kami akan menguji kamu dengan keburukan dan kebaikan sebagai cobaan ( yang sebenar- benarnya ). Dan hanya kepada Kami lah kamu dikembalikan.( Al-Anbiyaa' :35)
Kuta Radja : 26 Des 2012M / 13 Safar 1434