“ HASIL PILKADA

   Oleh : SULAIMAN.A.GANI

==================================

ALHAMDULILLAH, TAPUJOE RABBI

SEULAWEUT KEU NABI,PANG ULE  ALAM

TASUJUD SYUKUR,  KEUPADA RABBI

YANGKA ALLAH BRI, PILKADA AMAN

BANDUM TIM SUKSES, YA ALLAH NEUBRI

ULE BEULEUPIE,  HATE  BEULAPANG

HASIL PILKADA , YANG KA  ALLAH BRI

HANA TERJADI,  SAMPAOE BICAH PRANG

SOE MEUNANG MANTOENG,  WAJIEB AKUI

DUKUNGAN TABRI, ACEH NGAT AMAN

BEKLE JEUT DAKWA, BAK WAROENG KUPI

BAHAS  IRWANDI,  KA TALOE HUMAM

OH HABEH  MALEK, PEUGAH  GHAZALI

TAMLICHA ALI,  GEUTAMAH BAHAN

ISKANDAR HUSEN, DEUNGOEN PAK DJALI

AZWAR LAGI, HAN KEUTINGGALAN

KUPI SABOEH GLAH, KA MEUYUEM BASI

GADOEH DISKUSI, TALOE NGOEN MEUNANG

GADOEH MEUDAWA, BAK WAROENG KUPI

PEUGAH BUPATI,  BANDUM AWAK GAM

JINOE SAUDARA,  BEKLE TERJADI

BAK WAROENG KUPI, NEUPEUDOENG DAKWA

BANDUM GEUTANYOE,  WAJEB AKUI

UNTUK IRWANDI, NGOEN NAZAR SIRA

LE THAT HIKEUMAH, YANG KA ALLAH BRI

OHLHEUH TSUNAMI, KA DEUNGOEN GEUMPA

PHOEN PERDAMAIAN, SIDEH HELSINKI

LHEUHNYAN KA JIBRI,  NYAN  U U P A

JINOE  PILKADA,  PIH  KA  ALLAH  BRI

HANA  TERJADI, DAKWI NGOEN DAKWA

OLEH  SEUBABNYAN , WASIET ULOEN BRI

WAJEB AKUI , HASIL PILKADA

JINOE  BERSATU , DUKUNGAN TABRI

BANTU IRWANDI, NGOEN NAZAR SIRA

TABANGUN ACEH, PASCA TSUNAMI

BEKLE  ALLAH BRI,  ACEH LAM  BALA

SEURAMOE MAKKAH, BANGUN KEUMBALI

LAGI YOEH LAWI,  ISKANDAR MUDA

PEUDOENG SYARIAT, HUKOEM ISLAMI

BANGKET KEUMBALI, ADAT BUDAYA

NGOEN KRU SEUMANGAT,RAHMAT TUHAN BRI

PEUSAPAT  JANJI ,  PEU  SAPUE  HABA

PEUSAHOE LANGKAH ,  BANTU IRWANDI

BANGUN KEUMBALI,  ACEH MULIA

ACEH LHE SAGOE PUWOE KEUMBALI

BEKLE TERJADI , JEUT PRANG  SAUDARA

BEKLE MEUPAKE, SABE ISLAMI

BEKLE SU BUDE, SABAN KUTIKA

BEKLE  MEU POEH-POEH, SABE KEUDROE DROE

BEKLE MEU EUNGKHOE,  SABE SAUDARA

JINOE BERSATU BANDUM, GEUTANYOE

ACEH TAPUWOE, PUSAKA  LAMA

TABANGUN ACEH, LAGE SABOEH ROE

ACEH TAPUWOE  , LAGE YANG KA-KA

TAPUWOE TUWAH, ACEH LHE SAGOE

BAK TUHAN SIDROE,  TAMOHON DOA

SABDA JANJOENGAN, NABI GEUTANYOE

NEUPEUGAH MEUNOE, RASUL MUSTAFA

TA ATOE DONYA, TABANGUN NANGGROE

NABI HAREUTOE, NGOEN PEUT PERKARA

YANG PHOEN BEU ADE, PEUMIMPIN NANGGROE

DUA ELEUME,  PARA  ULAMA

ULAMA YANGNA , DI DALAM NANGGROE

BEUGEUTEM PUGOE,  KAWOEM JUHALA

KAWOEM YANG JAHE,  BEUGEUPEURUNOE

YANG MAKROEH GEUYUE, GEUTHAM YANG MUNGKAR

ULEH PEMIMPIN , YANG ADE BUNOE

DI DALAM HAL NYOE, IKOET SEUREUTA

GEUPEUDOENG ADAT, HUKOEM LAM NANGGROE

GEU IKAT BUET,  NGOEN BIJAKSANA

UREUNG YANG LANGGAR, BEUTHAT BEURANGSOE

BAGI UREUNGNYOE, GANJARAN BEUNA

GEUHAPUS JUDI, KROPSI LAM NANGGROE

RAKYAT HAN PHANG PHOE, AMAN SEUJAHTRA

TEUMA YANG KEULHE, NABI HAREUTOE

NGOEM MURAH JAROE URUENG YANG KAYA

DUENGOEN MURAHAN , URUENG KAYA NYOE

HASE JROEH NANGGROE, RAKYAT BAHGIA

HASE TABANGUN, MEUMACAM BAGOE

DUM RAKYAT NANGGROE, AMAN SENTOSA

TEUMA YANG KEUPEUT, NABI HAREUTOE

DOA  SINAROE,  BADUM FUKHARA

HAN GEULHOEM KUTOEK, LE TUHAN SIDROE

SEUBAB FAKIR NYOE, SABE MEU DOA

MEUNAN MUPHOEM LOEN, HADIST SAIDINA

BAN PEUT PERKARA,  ULOEN HAREUTOE

TABANGUN ACEH, MEUNAN KEUH CARA

HASIL PILKADA,  SOE YANG MAT  NANGGROE

 Banda Aceh, 15 Desember 2006