HASIL PILKADA

HASIL PILKADA

Oleh : Sulaiman.A.Gani/Tgk Diyueb Bruek

ALHAMDULILLAH, TAPUJOE RABBI

SEULAWEUT KEU NABI,PANG ULE  ALAM

TASUJUD SYUKUR,  KEUPADA RABBI

YA  ALLAH NEUBRI, PILKADA AMAN

BANDUM TIM SUKSES, YA  ALLAH NEUBRI

ULE BEULEUPIE,  HATE  BEULAPANG

WATE  PILKADA , YA  ALLAH NEUBRI

 BEKNA  TERJADI,  SAMPAOE  BICAH PRANG

SOE MEUNANG MANTOENG,  WAJIEB AKUI

DUKUNGAN TABRI, ACEH NGAT AMAN

BEKLE JEUT DAKWA, BAK WAROENG KUPI

BAHAS  IRWANDI, TALOE  NGOEN MEUNANG

OH HABEH  HABEH NAZAR, PEUGAH  KEU ABI

 KEU  P.A  LAGI,  GEUTAMAH BAHAN

 KEUNOE NGOEN KEUDEH, HABA GEURAWI

 KEU PAK TARMIZI , HAN KEUTINGGALAN

KUPI SABOEH GLAH, KA MEUYUEM BASI

GADOEH DISKUSI, TALOE NGOEN MEUNANG

GADOEH MEUDAWA, BAK WAROENG KUPI

PEUGAH BUPATI,  CALON  DARI  GAM

JINOE  SAUDARA,  BEKLE  TERJADI

BAK WAROENG KUPI, NEUJAK  MEU DAKWA

BANDUM GEUTANYOE,  NA  HAK  ASASI

SUARA  NEUBRI, WATE UROE  HA

JINOE  BEURANGKAT, MITA  RASEUKI

BAK KEUDE  KUPI, BEKLE  MEUDAKWA

GEUTANYOE  RAKYAT. NIKMAT  TUHAN BRI

OH  LHEUH TSUNAMI, KA  DENGOEN GEUMPA

LE  THAT HIKEUMAH, YANG KA  ALLAH BRI

OHLHEUH TSUNAMI, KA DEUNGOEN GEUMPA

PHOEN PERDAMAIAN, SIDEH HELSINKI

LHEUHNYAN KA JIBRI,  NYAN  U U P A

WATE  PILKADA, MOHON  BAK  RABBI

BEK NA   TERJADI, DAKWI NGOEN DAKWA

OLEH  SEUBABNYAN , WASIET ULOEN BRI

WAJEB AKUI , HASIL PILKADA

JINOE  BERSATU , DUKUNGAN TABRI

AYAH NGOEN UMMI, MEUHOE YANG SUKA

TABANGUN  ACEH, PASCA  TSUNAMI

BEKLE  ALLAH BRI,  ACEH  LAM  BALA

SEURAMOE MAKKAH, BANGUN KEUMBALI

LAGI YOEH LAWI,  ISKANDAR MUDA

PEUDOENG SYARIAT, HUKOEM ISLAMI

BANGKET KEUMBALI, ADAT BUDAYA

NGOEN KRU SEUMANGAT,RAHMAT TUHAN BRI

TANYOE  MEU JANJI ,  PEU  SAPUE  HABA

PEUSAHOE  LANGKAH ,  BANTU BARANGRI

BANGUN KEUMBALI,  ACEH MULIA

ACEH LHE  SAGOE, PUWOE  KEUMBALI

BEKLE TERJADI , JEUT PRANG  SAUDARA

BEKLE MEUPAKE, SABE ISLAMI

BEKLE SU BUDE, SABAN KUTIKA

 BEKLE  MEU POEH-POEH, SABE KEUDROE DROE

BEKLE  MEU EUNGKHOE,  SABE  SAUDARA

JINOE BERSATU,  BANDUM GEUTANYOE

ACEH TAPUWOE, PUSAKA  LAMA

TABANGUN ACEH, LAGE SABOEH ROE

ACEH TAPUWOE  , LAGE YANG KA-KA

TAPUWOE TUWAH, ACEH LHE SAGOE

BAK TUHAN SIDROE,  TAMOHON DOA

SABDA JANJOENGAN, NABI GEUTANYOE

NEUPEUGAH MEUNOE, RASUL MUSTAFA

TA ATOE DONYA, TABANGUN NANGGROE

NABI HAREUTOE, NGOEN PEUT PERKARA

YANG PHOEN BEU ADE, PEUMIMPIN NANGGROE

DUA ELEUME,  PARA  ULAMA

ULAMA YANGNA , DI DALAM  NANGGROE

BEUGEUTEM PUGOE,  KAWOEM JUHALA

KAWOEM YANG JAHE,  BEUGEUPEURUNOE

YANG MAKROEH GEUYUE, GEUTHAM YANG MUNGKAR

ULEH PEMIMPIN , YANG ADE BUNOE

DI DALAM HAL NYOE, IKOET SEUREUTA

GEUPEUDOENG ADAT, HUKOEM LAM NANGGROE

GEU IKAT BUET,  NGOEN BIJAKSANA

UREUNG YANG LANGGAR, BEUTHAT BEURANGSOE

BAGI UREUNGNYOE, GANJARAN BEUNA

GEUHAPUS JUDI, KROPSI LAM NANGGROE

RAKYAT HAN PHANG PHOE, AMAN SEUJAHTRA

TEUMA YANG KEULHE, NABI HAREUTOE

NGOEM  MURAH  JAROE, URUENG YANG KAYA

DUENGOEN MURAHAN , URUENG KAYA NYOE

HASE  JROEH NANGGROE, RAKYAT BAHGIA

HASE TABANGUN, MEUMACAM  BAGOE

DUM RAKYAT NANGGROE, AMAN SENTOSA

TEUMA YANG KEUPEUT, NABI HAREUTOE

DOA  SINAROE,  BADUM FUKHARA

HAN GEULHOEM KUTOEK, LE TUHAN SIDROE

SEUBAB  FAKIR NYOE, SABE MEU DOA

MEUNAN MUPHOEM LOEN, HADIST SAIDINA

BAN PEUT PERKARA,  ULOEN HAREUTOE

TABANGUN ACEH, MEUNAN KEUH CARA

HASIL PILKADA,  SOE YANG MAT  NANGGROE

 Banda Aceh,  22  Pebuari 2012