Pages


Kamis, 07 Maret 2013

TROEK THOEN TSUNAMI



Oleh : SULAIMAN.A.GANI
====================================
Pujoe ngoen syukur, meuwoe keu Rabbi
Yang Maha Suci, Sidroe Hadharat
Lheuhnyan seulawuet, Pang ule Nabi
Seureuta  ahli,  para  sahabat

Neubri Tuhanku, beutroek hajati
Hajat loen rawi , saboeh hikayat
Hajat loen peugah , kisah tsunami
Limoeng thoen lawi, katroek nibak hat

Katroek limoeng thoen, bala tsunami
Nanggroe seurambi, goeh jeut keu ingat
Mantoeng  talake, undang tsunami
Mantoeng buet keuji, sabe tiep saat

Mantoeng tiep uroe, talawan Rabbi
Muda ngoen mudi, soek luwue keutat
Po ma ngoen ayah, hana  peuduli
Oh lheuh tsunami, meutamah bangsat

Seubahyang tanle, oh lheuh tsunami
Lam waroeng kupi, teungoeh jeumeuat
Lam keude cina, teungoeh  jep  kupi
Hana peuduli, wate  jeumeuat

Laen loem bagoe, dikawoem ummi
Hanjeut  tsunami, saboeh  peu ingat
Jeuleubab songkoek, baje yukensi
Siluwue jeungki, peuleumah pusat

Geujak beulanja, u pasar pagi
Deungoen suami, jak pamer aurat
Soek luwue puntoeng, di kawoem abi
Di kawoem ummi, baje sangkilat

Peuleumah salang,  karang boeh  giri
Apam seurabi, bungkoeh raya that
Bungkoeh bu kulah , asam boeh sunti
Geujak peunari, peuleumah hebat

Contoh yang laen, keu muda mudi
Putra ngoen putri, sapue that pakat
Agam payang ok, inoeng soek  begi
Lam waroeng kupi, sinan meusapat

Duek saboeh meja, sira jep kupi
Putra ngoen putri, disinan curhat
Keu uroe minggu, jipeugoet janji
Hajat peureugi, tamasya meuhat

Sang lakoe binoe, wate ta eu hi
Oh lheuh tsunami, meutamah bangsat
Teuma peujabat, peugawe negeri
Sinan le kropsi, jipeunguet rakyat

Wate tamuproe, keu dosa kropsi
Alasan jibri, kajeut keu adat
Male hanale , oh jidroep kropsi
Azeub bak Rabbi, pih tan di ingat

Meumantoeng meunan , nanggroe seurambi
Hana pue neuci, deungoen hadharat
Geupeutroen bala, geubri tsunami
Azeub bak Rabbi, keubiet peudeh that

Tasikmalaya, neukaloen pakri
Yogja loem lagi, pakriban dahsyat
Pakriban padang, geumpa Tuhan bri
Azeub bak Rabbi, meunyoe maksiet that

Seuramoe meukkah, bala bek neubri
Kaseb tsunami, bekle neulaknat
Meumada ohnoe, haba loen rawi
Kisah tsunami, beujeut peu ingat
Banda Aceh,16 Desember 2009

0 komentar:

Posting Komentar

Komentar FB :