"SEUBAB LEUMOEH AGAMA"

"SEUBAB LEUMOEH AGAMA"

Oleh :Tgk Diyueb Bruek/Sulaiman.A.Gani
=============================================

ALHAMDULILLAH , KISAH LOEN MULA
PUJOE RABBANA, ILAHON KADE
SEULAWEUT SALEUM, OH LHEUHNYAN TEUMA
AKAN SAIDINA, RASUL YANG AKHE

SALAM ALAIKOM, KAWOEM SAUDARA
TUHA NGOEN MUDA, BANDUM BEUSARE
SAMBOET SALEUM LOEN, TANDA MULIA
HAJAT LOEN RIKA, NA SABOEH SYA E

HAJAT LOEN PEUGAH, SABOEH MUSTIKA
PEU INGAT BANGSA, BANDA DEUNGOEN GLE
MEUPUE KEUH SEUBAB, LEUMOEH AGAMA
MEUPUE KAREUNA, NEUCUBA PIKE

DILE KOEN MEUGAH, ACEH MULIA
SEUBAB AGAMA, MEUCEUHU KOENLE
MEUPAKOEN JINOE, ATRANYAN HANA
ACEH MULIA, KAROEH LAM JAHE

DI ACEH MEUGAH, SYIAH KUALA
YOEH SABOEH MASA, MEUSYUHU KOEN LE
PO TEUMEUREUHOEM, ISKANDAR MUDA
YANG MAT KUASA, LEUPAH THAT ADE

RAKYAT DUM SEUNAN, AMAN SEUNTOSA
ADAK AGAMA, KUAT BUKOENLE
SEURAMOE MEKKAH, MEUGAH U LUA
MEUSYUHU NAMA , SAMPOE U MEUSE

DUDOE DIJAJAH ,OLEH BEULANDA
OHLHEUHNYAN NICA , PEUTAMOENG KAFE
ACEHNYOE JIPRANG, JINEUK KUASA
RAKYAT SEUNSARA ,RATA LUNGKEK GLE

BEUDOEH PAHLAWAN, YANG TEUGA –TEUGA
MEUPRANG GERLIYA, GEULAWAN KAFE
TEUDOENG NGOEN NANGGROE, INDONESIA
GEUMAT KUASA , SABANG MAROKE

 JINOE TARIWANG, BAK ASAI MULA
HADIS SAIDINA, U LOEN TAPEUSE
NGOEN LHEE BOEH SEUBAB, LEUMOEH AGAMA
WAHE SAUDARA ,BEUNA TAPIKE

PHOEN URUENG ALEM ,YANG DAROEHAKA
BAK BUET YANG HINA , GALAK BUKOEN LE
GALAK GEU IKOET ,URUSAN DONYA
TEUGAH RABBANA, HANA GEUPIKE

DUA PEUMIMPIN , ATAWA RAJA
GEUMAT KUASA , HANALE ADE
RAKYAT MEULARAT, HANA GEUKIRA
KEUNOENG ILAYA ,RATA SAGOE BE

KEU LHE MUSTAHID , TOKOEH AGAMA
ELEUME HANA , ROEH URUENG JAHE
MUSTAHID BODOH, MEUKHEUN SAIDINA
ELEUME HANA, DI DALAM HATE

LHE BOIEH MACAMNYAN, LEUMOEH AGAMA
WAHE SAUDARA, BEUNA TAPIKE
MEUNAN KEUH MUPHOEM, DILOEN SAUDARA
HADIS SAIDINA ,ULOEN TAPEUSE
(Tgk.Diyueb Bruek/Sulaiman.A.Gani) 26 –oktober  2012