PERGAULAN BEBAS

Oleh : SULAIMAN.A.GANI

======================================

 Salam alaikoem,warahmatullah

Alhamdulillah,kisah loen puphoen

Seugala pujoe,muwoe keu Allah

Yangka neulimpah ,nikmat neupeutroen

Seulaweut saleum ,keu Rasulullah

Yangba risalah,keu bandum kowoem

Lheuhnyan saleum loen,  sion keureutah

Saboeh naseukah, hajat loen susoen

Geulantoe loen bri, kupi saboeh glah

kirem naseukah, banda ngoen dusoen

haba peu ingat, ummi ngoen  ayah

Bek roeh buet salah, nyan aneuk kandoeng

Uloen peu ingat , ummi ngoen ayah

Neujaga beupah,  si aneuk kandoeng

Jinoe remaja, pergaulan  bebas

Rata daerah, banda ngoen dusoen

Lheuh neubloe Honda, neuyue kuliah

Supaya mudah, mangat meutuloeng

Hana neutupue, meutamah susah

Ummi ngoen ayah, sideh di gampoeng

Aneuk di kota, oh woe kuliah

Meusapat bagah , cape teurapoeng

Ladoem rumoeh kost, keunan di langkah

Jak peugoet tugas, geuyue le Dosen

Oh ka  meusapat, han pue loen peugah

Ummi ngoen ayah, leubeh that muphoem

Inoeng ngoen agam,  sapue that tingkah

Dimusyawarah, pogram di susoen

Keu uroe minggu, haba jipeugah

Tamasya indah,  bak ie teureujoen

Gunoeng gurute, atau seulawah

Sinan cukoep pah, tapeulheuh rihoen

Oh supoet uroe, pih paloe leupah

Pergaulan  bebas,  sira meurawoen

Sang lakoe binoe, takaloen ulah

Ban lheuh menikah, sideh digampoeng

 

Muda ngoen mudi, pergaulan  bebas

Sidumnan caprah, lage kafiroen

Bek awai mume, dudoe menikah

Nyan baroe susah, oh ka meungandoeng

Hai kawoem ummi, ngoen kawoem Ayah

Keu Aneuk lidah,  sihate jantoeng

Beuna neujaga, deungoen neupapah

Bek roeh buet salah, meulanggar hukoem

Meunyoe lagenyan, ummi ngoen ayah

Laknat bak Allah, bala neupeutroen

Bek gara gara, pergaulan bebas

Seuramoe meukah, bala geusithoeng

Meumada ohnoe, haba loen peugah

Ummi ngoen ayah, Supaya muphoem

Sulaiman Gani, tuleh  naseukah

Bandum Daerah, Kota ngoen gampoeng

A Banda Aceh, 7 Januari  2010