Pages


Selasa, 05 Maret 2013

LI-AN



Oleh : SULAIMAN.A.GANI
==================
Salam alaikoem,  warahmatullah
Alhamdulillah, pujoe rabbana
Seulaweut  saleum ,keu  rasulullah
Peusuruh  allah, keu ummat dumna

Samboet saleum loen, rakan meutuah
Hajat loen peugah, saboeh mustika
Hajat loen susoen, hukoem loen peugah
Hukoem  li-an  sah, uloen peunyata

Supaya muphoem, bahle  loen peugah
Mangat bek salah, hareutoe makna
Maksud  li-an, hukoem  po tollah
Inoeng tatukah, jipubuet  zina

Meunan meukeusud, li-an  geupeugah
Tungku meutuah, neupeuphoem  makna
Jinoe loen surat, seun –seun sipatah
Simak beu bagah ,bek salah makna

Takheun isteri, ka jimeu-ukah
Keupada allah , tapeudoeng  saksi
Aneuk  lam  kandoeng, yang mantoeng mirah
Di tungku ayah,  han geu akui

Hukoem  ureungnya, payah meusumpah
Ngoen nama  allah, lafai  peut (4) kali
Lafai keu limoeng(5) , ngoen laknat  allah
Geu lafai  beusah,  dan  geu akui

Kareuna seubab , payah  meusumpah
Inoeng geu tukah, hansep  bukeuti
Hukoem sidroe  droe, ureung  teumukah
Wajeb geuyue poeh, lapan ploeh (80) kali

Ngoen jalan  li-an , tapoeh  han payah
Kaseb ngoen sumpah, tacoek  bukeuti
Meunan keuh muphoem,tungku meutuah
Lam  ayat allah , sinan  na  dali

 Akibat  li-an , rakan meutuah
Na  peut(4) boeh surah, sinan terjadi
Pereuta maphoen, lakoe yang  tukah
Hana wajeb poeh, lapan ploeh (80) kali

Keu dua (2) inoeng, hukoem  meu mukah
Wajeb kalifah, geurajam  siti
Yang keu lhe (3) haroeh, tanyoe  meupisah
Hanjeut meusapat ,sekali kali

Teuma yang keupeut(4), aneuk yang mirah
Di tungku ayah, beu geu akui
Ban hukoem zina, aneuknyan  kasah
Lage peuneugah, kana bukeuti

Meunan meuteume, lam  kitab fikah
Gure meutuah, neukaloen dali
Wate na tempoe, jeut teungku peuhah
Meunyoe na salah, neuperbaiki.
( tgk diyueb bruek/sulaiman.a.gani.-25/12/2012)

0 komentar:

Posting Komentar

Komentar FB :