IE BEUNA NYAN KEUH TSUNAMI

Olrh : SULAIMAN.A.GANI

==================================

Geumpa tsunami , bala bak allah

Dilee jameun sah ,geukheum ie beuna

Tanda qiamat ,ulama peugah

Siploeh boeh sahah, geupeugah tanda

Antara siploeh ,tanda geupeugah

Ie laoet allah, yue troen u  gampoeng

Jak sampoeh makseit ,lam bumoe allah

Supaya ubah , peuragui  kawoem

Nyan keuh ie beuna, mayang that dahsyat

Reubah u darat, ka  jigoem  kuta

Habeh di sampoeh ,timu ngoen barat

Mate dum rakyat, habeh hareuta

Darat ngoen gampoeng, kuta ngoen pante

Manyet meugule ,  soe kubu hana

Ureung dum jiklek ,jieplung   ka cre bre

Lintoe jih tanle ,aneuk  tan le na

Ureung dum jiklik ,ka jikheun meunoe

Saleh uroe nyoe, qiamat donya

Uroe seuneulheuh , meu mat mat   jaroe

Peu meuah kamoe , wahe  saudara

Aceh ka geubri ,lagee geupeugah

Seuramoe  mekkah , geukeumeung guloeng

Geu keuneuk sampoeh ,seuramoe  meukkah

Meunan keuh ulah ,nibak peunyum  loen

Kuasa tuhan ka , neupeu leumah

Ie  laoet  allah , yue troen u  gampoeng

Untuk teuguran ,keu urueng salah

Bek cangklak  leupah , ateuh bumoe loen

Kubri raseuki ,nikmat kutamah

Ku yue ibadah ,syukoer   keu uloen

Bek pubuet curang, yang larang allah

Bek pubuet salah , meulanggar hukoem

Geumpa tsunami ,teuguran allah

Aceh ka caprah , jipeugoet   lutoeng

Keunoeng  bala  am,  siksa  bak  allah

Sidroe yang salah ,bandoem  geuhukoem

Meuhoka  caroeng ,pangkat  yang  meugah

Tacuba  sanggah , bakat  peuguloeng

Bumoe  loen   yok-yok , bangunan reubah

Ngoen  ie  ku sampoeh , rata  jeut  gampoeng

Aceh  ka  makseit, tuwoe  keu  allah

Pubuet yang salah , meulanggar  hukoem

Rugoe tapeudoeng,  syariat  allah

Asoe  ka  caprah , jipeugoet  lutoeng

Nanggroe  aceh  nyoe , seuramoe  mekkah

Han  ji  theun  caprah,  ala  kafiroen

Han ji theun  makseit  ,yang larang allah

Aurat  tapeuhah , tapeugoet lutoeng

Maka  lage  nyoe,  bala  bak  allah

Seuramoe  mekkah,  neukeumeuk  guloeng

Karoeh  lam  makseit , seuramoe  mekkah

Rata  daerah  ,dipubuet  siroeng

Dahsyat  tsunami, ka dengoen geumpa

Kalheuh  tarasa,  pakriban   hebat

Nyan  baroe  bacut,  allah  peurasa

Ka   panik  gata , lagee  qiamat

Sidumnan  bala , kaneu peu  leumah

Hana  siet  ubah,  tathee  keu  untoeng

Soek  baje  keutat ,  aurat tapeuhah

Ta  ikoet ulah ,  ala  kafiroen  

Meunyoe  lagee , nyan  akai  goeh  ubah

Kapreih  ateuh  kah , bala  kupeutroen

Hana loem  sadar , dumnan  musibah

Kutoek bak allah, bala  jeut  gampoeng

Meunyoe  sit  mantoeng , gohloem  meu  ubah

Preh  bala  allah  , puteing beuliong

 banda aceh,  31  juli    2006