LIMOENG THOEN TSUNAMI

Oleh : SULAIMAN.A.GANI

=====================================

Deungoen Bisminlah, loen puphoen rawi

Loen pujoe Rabbi, sidroe Hadharat

Seulaweut saleum, Pang ule Nabi

Keu bandum ahli, para sahabat

Neubri Tuhanku, beutroek hajati

Hajat loen rawi, haba peu ingat

Peu ingat kawoem, ayah ngoen ummi

Muda ngoen mudi,  umat Muhammad

Katroek limoeng thoen, bala Tsunami

Nanggroe Seurambi, beuna neu ingat

Sidumnan kalheuh, bala Tsunami

Matoeng buet keuji, goeh loem ta Taubat

Hanpue talake , bala bak Rabbi

Oh wate geubri, deungoen sikeujap

Meumantoeng maksiet, tapubuet keuji

Hana pue neuci, deungoen Hadharat

Miseu umpama, contoh uloen bri

Muda ngoen mudi, soek luwue keutat

Rawoen ngoen honda, ka ula  ili

Peutang ngoen pagi, peuleumah aurat

Duek bineh jalan, pajoeh kentaki

Bak teumpat sunyi, sinan meusapat

Seumbahyang meugreb, bak waroeng kupi

Muda ngoen mudi, lage sangkilat

Dikawoem ayah, ngoen kawoem ummi

Nyan pih saboeh kri, uloen riwayat

Oh tanle geumpa, kalheuh tsunami

Tanle geuturi, toeh arah kiblat

Seumbahyang tanle, oh lheuh tsunami

Ayah ngoen ummi, meutamah bangsat

Geusoek jeuleubab, di kawoem ummi

Baje yukensi, peuleumah pusat

Meumantoeng meunan, nanggroe seurambi

Bala bak Rabbi, mantoeng neuharap

Mantoeng neulake, undang tsunami

Neupreh dang geubri,  ban padang meuhat

Tasikmalaya,  neukaloen  pakri

Yogja loem lagi, pakriban dahsyat

Seubab salah droe , tuwoe keu Rabbi

Tapubuet keuji, sabe tiep saat

Fireuman Tuhan, lam kitab  suci

Allah han neubri, bala keu umat

Meukoen salah droe, tuwoe keu Rabbi

Tapubuet keuji, hana ta taubat

Meunyoe tasyukur, keu nikmat Rabbi

Meulipat kali ,neutamah meuhat

Meunyoe ta ingkar, peurintah Rabbi

Azeub Allah bri, keubit peudeh that

Meumada ohnoe, haba loen rawi

Limoeng thoen tsunami,  uloen riwayat

Haba peu ingat, keu umat Nabi

Ayah ngoen ummi, neutueng  ibarat,

Banda Aceh, 15 Desember 2009