IDHUL FITRI

Oleh  : SULAIMAN.A.GANI

===============================

Alhamdulillah  Loen Pujoe Rabbi

Yang  Maha  Suci,  Azawajalla

Seulaweut Saleum akan Rasuli

Pang Ule Nabi Khatam Ambiya

Neubri Ya Allah, Beutroek Hajati

Keu Idhul Fitri, u loen boeh makna

Makna Hareutoe,  Nyan Idhul Fitri

Tanyoe Keumbali, Suci Bak Dosa

Kalheuh sibuluen, Meunahan Diri

Tanyoe  Geu Uji, Dengan  Puasa

 Jinoe Ka Menang ,Troek Idhul Fitri

Tanyoe Ka Suci, Ampoen Bak Dosa

Dosa ngoen Tuhan, Ampoen Ka Neubri

Sit Tinggai lagi, Dosa Ngoen Hamba

Geuyue boeh Fitrah, Teuma loem lagi...

Supaya Suci, Ban lahe Bak Ma

Fitrah pih Taboeh , Tuboeh pih Suci

Oh Lheuh Geubagi, Untuk Fukhara

Fakir Miskin  Geuyue Santuni

Lam Idhul Fitri, Bek Menderita

Keu Aneuk Yatim Bantuan yue bri

Meunan yue Nabi, Bak Uroe Raya

Bek Keu Aneuk Droe, Sagai Peuduli

Laen han Asi,  Beuthat  Fukhara

Bak Uroe Raya, Peusan  Le  Nabi

Kunjoeng Family,  Sanak Saudara

Po  Ma ngoen Ayah , Sujud Bak Gaki

Dan Keu Suami , di kawoem Nisa

Meu`ah  Meumeu`ah, Dosa yang lawi

Supaya Suci, Dosa ngoen Hamba

Meunyoe Ka Meunan, Neukheun le Nabi

Syuruga Tinggi,  Neubri Keu Gata

Meunan Muphoem loen, Keu Idhul Fitri

Koen Geuyue Ganti, Gorden Jendela

Koen Baje Baroe, Gantoe  Kurusi

Koen Gantoe Peci, Teuluk Beulaga

Koen Gantoe Moto, Merek Itali

Koen Peugoet Ruti, Cane Hindia

Koen Peugoet Kueh  Meuguni-guni

Apam Seurabi Kueh Mentega

 Banda Aceh,     12   Oktober    2007 M

                            30   Ramadhan 1428 H