HIKAYAT TSUNAMI
Oleh : Tgk Diyueb Bruek/Sulaiman.A.Gani
ASSALAMUALAIKUM WARAHMATULLAH
JAROE DUA BLAH ATEUH ULE
LOEN
RANUB KUNENG ON TAWOE KA PATAH
PINENG SIULAH RAMPAGOE PUNTOENG
NYOE RANUB SIPRIEK DENGOEN PINENG
KRANG
KIREM KEU RAKAN BANDA NGON DUSOEN
GANTOE LOEN JAK DROE LON BRI UTUSAN
GEUNANTOE BADAN HABA LON SUSOEN
GEULANTOE LOEN
BRI KUPI SICAWAN
RUKOK KISARAN NA
MUDAH BAK LOEN
SAMBOET RAKAN
DROE SABOEH KARANGAN
PEU INGAT RAKAN
BANDA NGON DUSOEN
GEUMPA TSUNAMI HAJAT LOEN BAYANG
BALA BAK TUHAN TANYOE GEU HUKOEM
SEUBAB SALAH DROE TUWOE KEU TUHAN
ACEH NAYUM SANG NEU KEUMEUK GULOENG
SANG-SANG HAN EK LEE
ULOEN KEUMARANG
LEUMOEH THAT
BADAN NGOEN PRUET KA BUSOENG
SEUBAB TSUNAMI
KARU PIKIRAN
RUMOEH DILOEN TAN
BAKAT PEUGULOENG
JINOE MEUNGUNGSI BARAK TAMPUNGAN
MEUJANJAN KADANG BANTUAN HANA
HANA BANTUAN BARANG MAKANAN
KARU PIKIRAN NAFAKAH HANA
BAK PI EE NASIB
CUKOEP THAT MALANG
QADA BAK TUHAN
HANJEUT TALANGGA (R)
GEUMPA TSUNAMI
RUMOH LOEN KARAM
SAPEU TAN TINGGAI
HAREUTA BEUNDA
BAK PI EE HAJAT TULEH KARANGAN
PEU INGAT RAKAN DUSOEN NGOEN BANDA
GEUMPA TSUNAMI HAJAT LOEN KARANG
TEUGURAN TUHAN TANYOE GEUCUBA
NEUCOEK KEU
CONTOH HABA LOEN KARANG
IROT NGOEN IRANG
KUWING NGOEN TEUPAT
SALAH NGOEN BEUTOI
BEUGOET NEUTIMANG
HABA LOEN NAZAM
KADANG NA SILAP
MEUAH LOEN LAKE
MEURIBEE KALAM
ULOEN KEUMARANG
GOHLOEM GOET TEUPAT
BUHU NGOEN BAREH
GOHLOEM GOET REUMBANG
BAK PUE KHOEK
NAZAM KADANG NA SILAP
RANUB SIGAPU OHNOE LOEN KARANG
SINGO OH LAEN JAN KARANG HIKAYAT
GEUMPA TSUNAMI KALHEUH LOEN HIDANG
NEU BACA RAKAN JEUT KEU PEU INGAT
BANDA ACEH, 25 Agustus 2005
ASSALAMUALAIKOEM
WARAHMATULLAH
ALHAMDULILLAH
KISAH LOEN PUPHOEN
SEULAWEUT SALEUM
KEU RASULULLAH
NYANG BA RISALAH
KEU BANDUM KAWOEM
GUREE NGOEN POMA SEUREUTA AYAH
JAROE DUA BLAH LOEN LAKEE AMPOEN
BEULAM SYURUGA NEUBRI LE ALLAH
NIKMAT NEUTAMAH OLEH ILAHOEN
YA ALLAH NEUBRI
PIKIRAN BEUGLAH
HAJAT LOEN KISAH
BALA AKHE THOEN
GEUMPA TSUNAMI
NEUBRI LE ALLAH
SEURAMOE MEKKAH
BALA NEUPEUTROEN
BAK BEUNGOEH MINGGU MATA UROE CRAH
BULUEN DUA BLAH KARAB GANTOE THOEN
TANGGAI DUA NAM JEUT KEU SEUJARAH
RAYA MEULEUPAH BALA NEUPEUTROEN
DUA RIBEE PEUT
NGOEN THOEN GEUPEUGAH
SEURAMOE MEUKAH
GEUMPA PEU AYOEN
KUASA TUHAN KA
NEUPEULEUMAH
IE LAOT ALLAH
JITROEN U GAMPOENG
BAK JEUM POEH LAPAN KUREUNG LIMOENG BLAH
MEUNYOE HAN SALAH BAK JEUM JAROE LOEN
GEUMPA TSUNAMI NEUBRI LE ALLAH
BANGUNAN REUBAH HABEH MEUSINTHOENG
SANG-SANG KIAMAT NA
NYUM BAN ULAH
SEURAMOE MEUKKAH
SANGKA GEUGULOENG
JI EK IE LAOT
MAYANG MEULEUPAH
BANGUNAN PATAH
BAKAT PEUGULOENG
RUNTOH BANGUNAN MEUTINGKAT MEUGAH
TAMEH KA PATAH KEUREUBAH BUBOENG
KAJAB NGOEN TANOEH GEUMPA PEUREUBAH
BUET IE JISAMPOH BAKAT PEUGULOENG
MATE NGOEN URUENG
SUBHANALLAH
HANJEUT LOEN
PEUGAH HAN EK TA HITOENG
TEUTIEK-TIEK
MANYET HANSOE SEULEUAH
FARDHU KIFAYAH KA
TINGGAI HUKOEM
PADUM YANG MATEE TIVI DIPEUGAH
OH TAKALI SAH JIOEH THAT BEDA
MEURETOEH RIBE TIEP-TIEP DAERAH
OH TAJEUMEULAH MEURIBEE LAKSA
NGOEN MOTO
JUNGKAT ANGKOET JEUNAZAH
PINTOE JI PEUHAH
MANYET DI SINTHOENG
LAGEE JIBOEH BROEH
MEUNAN KEUH ULAH
HANJEUT LOEN
PEUGAH SEUDEH HATE LOEN
LADOEM NGOEN BEKO MANYET JIPEUGLAH
NYANG LADOEM PATAH TAKUE KA PUNTOENG
KUBURAN MASA LAJU JIPEUHAH
TANSOE SEULEU AH MEUNUROET HUKOEM
TANSOE PEUDULI
FARDHU KIFAYAH
LALOE NGOEN BOEBAH
JAK SEUTOET KAWOEM
SETOET SAUDARA
WALI KAROENG BAH
PAT PAT YANG
MEUGAH RATA JEUT GAMPOENG
MANYET DI BALEK MUKA JIPEUHAH
YANG KOEN KAROENG BAH DI TINGGAI LANGSOENG
YANG KOEN SAUDARA WALI MA NGOEN AYAH
HANSOE SEULEUAH HANASOE TULOENG
YANG NYOE SAUDARA
SABOH MA NGOEN YAH
SABOEH AKIDAH
HANLE JI TULOENG
MEUKOEN WALI DROE
SABOEH MA NGOEN YAH
MANYET JI KEUBAH
LAM UROE TUTOENG
OLEH PMI ANGGOTA JIKRAH
DIJAK SEULEUAH RATA JEUT GAMPOENG
PEUSAPAT MANYET RATA DAERAH
HANA JIKEUBAH BEUTHAT KAPUNTOENG
YANG TINGGAI
RUNGKA PEUSAPAT BAGAH
RATA DAERAH KOTA
NGOEN GAMPOENG
KUBURAN MASA LAJU
DIPEUHAH
MEUNAN KEUH ULAH
RAKYAT DITULOENG
SEUBAB DITAKOET BALA BAK ALLAH
MEUNYOE JEUNAZAH MANTOENG LAM GAMPOENG
TAKOET PEUNYAKET JITEUKA WABAH
MEUNYAN PIH LEUBEH HAN EK SOE TULOENG
BUKOEN THAT
SAYANG ENGKOET KHAN KAPAH
KA ALOEH ALAH
DALAM IE RACOEN
BUHU LOEN TUKA
MEU OENG DENGOEN ANG
SUPAYA REUMBANG
HABA LOEN SUSOEN
YANG LEUPAH
SUEDEH HANJEUT LOEN BAYANG
MANYET TEULANJANG
BAK JALAN TEU EH
MEUSIKRAK BEUNEUNG
HANA MEUJANTANG
SINAN BAK JALAN
LAM UROE TEU EH
LADOEM MEUGINTOEN KAYEE MEULABANG
KA PUTOEH SIKHAN TAKUE KA HABEH
PUTOEH KEUNOENG SENG KA TINGGAI SIKHAN
YANG LADOEM RAKAN LAMPAREK TEU EH
LADOEM METE MA
LADOEM MATE YAH
YANG LADOEM SUSAH
KEU ANEUK KANDOENG
JIKLIEK JIBA EE
JI HEI MA NGOEN YAH
SUBRA MEULEUPAH
JILAKEE TULOENG
E YAH NEUBANTU ULOEN NEUPEUGLAH
BUET IE JISAMPOEH BAKAT PEUGULOENG
YANG MATE INOENG SUBRA MEULEUPAH
HANALE CAPAH TEUMPAT TOEP TEUPOENG
INOENG BAK JAROE
BUET IE JIREUPAH
NGOEN ANEUK LIDAH
BAKAT PEUGULOENG
SEULAMAT TINGGAI
E BANG MEUTUAH
LOEN WOE BAK
ALLAH KATROEK AJAI LOEN
YANG MATE LAKOE YANG PALOE LEUPAH
TANLE NAFAKAH ALEE TOEP TEUPOENG
PAYAH DUEK JANDA UDEP LAM SUSAH
MITA NAFAKAH KEUDROE YANG TANGGOENG
HANYOET NGOEN
RUMOEH BAKAT PEUGULOENG
NGOEN ANEUK KANDOENG
JISAMPOEH HABEH
INOENG BAK JAROE
DI RAMPAH LANGSOENG
BAKAT PEUGULOENG
SIDUMNAN SEUDEIH
ANEUK LAM PANGKE POE BUNGOENG SUKOEN
UMU KA PEUT THOEN KURUENG NGOEN LEUBEH
JIMOE JIBAE JILAKE TULOENG
MEU APOENG-APOENG ATEUH TEUMPAT EH
ALLAH HAI ANEUK
HANJEUT YAH TULOENG
KAKI KA PUNTOENG
KAYEE MEUTINDEH
SAMPOE AN JINOE
TEUGOE-GOE BAK LOEN
POE BUNGOENG SUKOEN
SANG GOHLOEM HABEH
JEURAT TAN MEUPAT YANG THAT SEUDEH LOEN
NIBAK ILAHOM LOEN PULANG KEUDEH
LAEN NIBAK NYAN HANPEU LOEN SUSOEN
LEUBEH GOET LANGSOENG NEUKALOEN SIDEH
PHOEN PHOEN
KRUENG RAYA NEU EU HAI KAWOEM
HANALE GAMPOENG
KA SAFAN SAFA
SYEH RIEH KRUENG
RAYA DISINAN GAMPOENG
UREUNG YANG SUSOEN
HIKAYAT LAMA
KEUDEH U LHOKNGA SAMPOE U LEUPOENG
HANALEE GAMPOENG LAGEE BIASA
KAJAB NGOEN TANOEH BAKAT PEUGULOENG
HANALE GAMPOENG JINOE KA RATA
PANTE CEUREMEN
SAMPOE BAK UJOENG
JINOE HAI KAWOEM
JEUT LAOET RAYA
KOEN SINOE MANTOENG
BALA HAI KAWOEM
RATA JEUT GAMPOENG
WILAYAH DISTA
SIBLAH ROET BARAT DILEU LOEN PUPHOEN
SIDEH HAI KAWOEM YANG THAT SEUNGSARA
PUTOEH HUBUNGAN HANJEUT DI TULOENG
SEUBAB HAI KAWOEM LEWAT UDARA
SAMPOE MEU ULAT
MANYET LAM GAMPOENG
LADOEM HAI KAWOEM
KATINGGAI RUNGKA
MISEU MEULABOH
HABA LOEN SUSOEN
SINAN HAI KAWOEM
LEE THAT BINASA
PEU LOM SEUMEULU TEUNTE HAI KAWOEM
NANGGROE BAK UJOENG LAM LOET RAYA
KASIPLOEH UROE HANA SOE TULOENG
MANYET LAM GAMPOENG MEURIBE LAKSA
LADOEM KAMUBEE
PAYAH TOEP IDOENG
NA SIT YANG
LADOEM LAGEE BIASA
TUBOEH HANA BROEK
TUHAN PEULINDOENG
TEUNTE HAI KAWOEM
HANA MEUDOSA
JINOE DICALANG HABA LOEN SUSOEN
SINAN HAI KAWOEM LEUPAH SENSARA
BAK BINEH JALAN MANYET MEUSUSOEN
SIDEH LAM GAMPOENG MANYET MEUSEUBA
JAK BRI BANTUAN
HANJEUT JITULOENG
JALAN KA PUNTOENG
TUTUE KA HANA
SEUBAB TSUNAMI
TUTUE DIGULOENG
MANYET LAM
GAMPOENG EUMPEUN MEURUWA
SINOE DILAMNO YANG THAT SEUDEH
LOEN
SAMPOE GAMPOENG LHOENG HANJEUT
TAKIRA
KA MEUPLOEH RIBEE WATEE TAHITOENG
LADOEM HAI KAWOEM KA ASEE SEUBA
KABEEH MEU ULAT
MANYET LAM GAMPOENG
NASIT HAI KAWOEM
KATINGGAI RUNGKA
JINOE U TIMU
BACUT LOEN SUSOEN
BIREUEN LHOK
SUKOEN TROEK SAMALANGA
SAMPOE U SIGLI BAKAT PEUGULOENG
BALA AKHEE THOEN LEUPAH THAT RAYA
TAPI BLAH TIMU BAGAH SOE TULOENG
SEUBAB LAM GAMPOENG JALAN MANTOENG NA
RAB SABOEH ACEH
BALA NEUPEUTROEN
TSUNAMI GULOENG
ACEH MULIA
HANA KEUNOENG
DROE KA KENOENG KAWOEM
GEUTANYOE BANDOEM
BEUROEH LAM SABA
GUNOENG GEURUETE SINGKEE GAMPOENG LHOENG
TITIE MEUBUBOENG NANGGROE PEUDADA
SOAL TSUNAMI TAPUWOE UJOENG
DEUNGOE HAI KAWOEM SISEUN SI BANJA
YANG MATE ANEUK
SEUDIH THAT LEUPAH
IE MATA JROEH
JRAH MEUGULOENG-GULOENG
TEUDUK TEUSIPOEK
MATA KA MIRAH
E ANEUK LIDAH
PAKOEN TINGGAI LOEN
PAKOEN TINGGAI LOEN ANEUK MEUTUAH
GATA NGOEN AYAH TAWOE BAK RABBOEN
TAWOE BAK TUHAN POMA TEUKEUBAH
MEUSOE YANG PAPAH WATEE TUHA LOEN
LOEN SANGKA ANEUK
GATA YANG MAT LHAM
KUTIKA PAJAN OH
MATE PO MA
LOEN SANGKA
TABEUET BAK BATE NISAN
BACA QURAN DOA
KEU PO MA
ASTAQFIRULLAH LIDAH KA SALAH
KAROEH LOEN KISAH MEUTUKA UJOENG
KARU PIKIRAN KAREUNA SUSAH
HANA NAFAKAH NGOEN BLOE RUKOEK ON
HANA BEULANJA
KUPI SABOEH GLAH
SI DUMNAN SUSAH
NASIB DI ULOEN
KEUNOENG TSUNAMI
PAKRI LOEN PABAH
RUMOEH LOEN GADOEH
BAKAT PEUGULOENG
GEUMPA TSUNAMI TAPUWOE KISAH
BALA BAK ALLAH TANYOE GEUHUKOEM
SEUBAB SALAH DROE TUWOE KE ALLAH
TAPUBUET SALAH MEUNURUT HUKOEM
RUGOE TAPEUDOENG
SYARIAT ALLAH
SEURAMOE MEKKAH
KA TEUHAH TAMPOENG
DEURI NGOEN BARA
KAHABEH PATAH
SYARIAT ALLAH
HANLE SOE DUKOENG
NANGGROE ACEH NYOE SEURAMOE MEKKAH
HAN JI THEUN CAPRAH ALA KAFIROEN
HAN JI THEUN MAKSEIT YANG LARANG ALLAH
AURAT TAPEUHAH TAPEUGOET LUTOENG
MAKA LAGE NYOE
BALA BAK ALLAH
SEURAMOE MEKKAH
NEUKEUMEUK GULOENG
KAROEH LAM MAKSEIT
SEURAMOE MEKKAH
RATA DAERAH
DIPUBUET SIROENG
GEUMPA TSUNAMI NAMA JIPEUGAH
DILEE JAMEUN SAH GEUKHEUM IE BEUNA
TANDA QIAMAT ULAMA PEUGAH
SIPLOEH BOEH SAHAH GEUPEUGAH TANDA
ANTARA SIPLOEH
TANDA GEUPEUGAH
IE LAOET ALLAH
YUE TROEN U GAMPOENG
JAK SAMPOEH
MAKSEIT LAM BUMOE ALLAH
SUPAYA UBAH AKAI
HAMBA LOEN
NYAN KEUH IE BEUNA MAYANG THAT DAHSYAT
REUBAH U DARAT KA JIGOEM KUTA
HABEH DI SAMPOEH TIMU NGOEN BARAT
MATE DUM RAKYAT HABEH HAREUTA
DARAT NGOEN GAMPOENG
KUTA NGOEN PANTE
MANYET MEUGULE
SOE KUBU HANA
UREUNG DUM JIKLEK
JIEPLUNG KA CRE BRE
LINTOE JIH TANLE
ANEUK PIH TAN LEINA
UREUNG DUM JIKLIK KA JIKHEUN MEUNOE
SALEH UROE NYOE QIAMAT DONYA
UROE SEUNEULHEUH MEU MAT MAT JAROE
PEU MEUAH KAMOE WAHE SAUDARA
ACEH KA GEUBRI
LAGEE GEUPEUGAH
SEURAMOE MEKKAH
GEUKEUMEUNG GULOENG
GEU KEUNEUK SAMPOEH
SEURAMOE MEUKKAH
MEUNAN KEUH ULAH
NIBAK PEUNYUM LOEN
KUASA TUHAN KA NEUPEU LEUMAH
IE LAOET ALLAH YUE TROEN U GAMPOENG
UNTUK TEUGURAN KEU URUENG SALAH
BEK CANGKLAK LEUPAH ATEUH BUMOE LOEN
KUBRI RASEUKI
NIKMAT KUTAMAH
KU YUE IBADAH
SYUKOER KEU ULOEN
BEK PUBUET CURANG
YANG LARANG ALLAH
BEK PUBUET SALAH
MEULANGGAR HUKOEM
GEUMPA TSUNAMI TEUGURAN ALLAH
ACEH KA CAPRAH JIPEUGOET LUTOENG
KEUNOENG BALA AM SIKSA BAK ALLAH
SIDROE YANG SALAH BANDOEM GEUHUKOEM
MEUHOKA CAROENG PANGKAT YANG MEUGAH
TACUBA SANGGAH
BAKAT PEUGULOENG
BUMOE LOEN
YOK-YOK BANGUNAN REUBAH
NGOEN IE KU SAMPOEH
RATA JEUT GAMPOENG
DIDALAM PINE TEUMPAT BOEH KUWAH
DIDALAM CAPAH TEUMPAT BOEH ASOE
GEUMPA TSUNAMI LOEN PUWOE KISAH
UJIAN ALLAH ATEUH GEUTANYOE
ACEH KA MAKSEIT
TUWOE KEU ALLAH
PUBUET YANG SALAH
SABE TIEP UROE
ACEH KA GADOH
HUKOEM MEU ADAT
QANUN HAN MEUPAT
REUSAM HAN MEU HOE
KAREUNA ACEH SEURAMOE MEUKAH
RUMOEH YANG MEUGAH LOEN BOEH UMPAMA
BINTEH MEUKILAT MEUCULEK INDAH
PAGEU LINGKA SAH PINTOE GAPURA
JINOE KAREULOEH
GOEYANG BUET GEUMPA
DEURI NGOEN BARA
MEUJUNGKAT JUNGKAT
NIBAH WATEE NYOE
ACEH MULIA
KAJEUT SAUDARA
TAMEUDUEK PAKAT
TAGANTOE DEURI KA DEUNGOEN BARA
TAMPOENG YANG HANA KAJEUT TAPEUDAP
SEURAMOE MEUKKAH JINOE LAM BALA
TSUNAMI GEUMPA KALHEUH TALIHAT
DAHSYAT TSUNAMI
KA DENGOEN GEUMPA
KALHEUH TARASA
PAKRIBAN HEBAT
NYAN BAROE BACUT
ALLAH PEURASA
KA PANIK GATA
LAGEE QIAMAT
TIONG MENDODA ATEUH BAK LANGSAT
JIPAJOEH ULAT ATEUH BAK SUTRA
LOEN GANTOE BAREH MEU AH DEUNGOEN AT
SUPAYA MANGAT WATEE TA BACA
SIDUMNAN BALA
KANEUPEU LEUMAH
HANA SIET UBAH
TATHEE KEU UNTOENG
MANTOENG
CEUMEUCUE DENGOEN MEUJARAH
JAROE JEUNAZAH
KAKOEH KA PUNTOENG
KACOEK HAREUTA MANYET KA KEUBAH
JAROE DUA BLAH KATIEK LAM UROENG
KA BUKA RUMOEH BARANG KA JARAH
UREUNG MUSIBAH KOEN KAJAK TULOENG
MEUNYOE LAGEE
NYAN AKAI GOEH UBAH
KAPREIH ATEUH KAH
BALA KUPEUTROEN
HANALOEM SADAR
DUMNAN MUSIBAH
KUTOEK BAK ALLAH
BALA JEUT GAMPOENG
MEUAH LOEN LAKE BAK MAK NGOEN AYAH
KALAM SIPATAH MEUTUKA UJOENG
UNTUK NASEHAT HABA LOEN PEUGAH
SUPAYA UBAH BEK PEUGOET LUTOENG.
GEUMPA TSUNAMI NEUBRI LE ALLAH
SEURAMOE MEUKKAH KA SAFAN-SAFA
SANG-SANG KIAMAT SEURAMOE MEUKKAH
RAYA MEULEUPAH NEUPEUTROEN BALA
UREUNG YANG MATE SUBAHANALLAH
LUKA NGOEN PATAH HANPUE TAKIRA
BANGUNAN REULOEH GEUMPA PEUREUBAH
BUET IE JISAMPOE HAREUTA BENDA
YANG MANTOENG UDEP MEULEUPAH SUSAH
LUKA NGOEN PATAH BANTUAN HANA
PUTOEH HUBUNGAN LUAR DAERAH
TUTUE KAPUTOEH LISTREK HANA
TEUMA OH DUDOE KANA HUBUNGAN
KANA SIARAN DALAM NGOEN LUA
KA UDEP TIVI JIBRI SIARAN
ACEH KA KARAM TSUNAMI TEUKA
NGOEN SIKLEP-SIKLAP ACEH KAKARAM
SEUBAB GEULUMBANG TSUNAMI TEUKA
NYAN BAROE SIBOEK LUA NGOEN DALAM
GEUBRI BANTUAN ACEH MULIA
SEKJEN PBB KEUNOE TROEK LANGKAH
HAN PUE LOEN PEUGAH YANG DUTA-DUTA
SEUBAB TSUNAMI ACEH NYOE MEUGAH
KHEUNDAK BAK ALLAH NEUPEUTROEN BALA
PAK KOFFI ANNAN DUDOE PEURINTAH
BADUM WILAYAH BAN SIGOEM DONYA
GEUYUE JAK BANTU ACEH MUSIBAH
BANDUM DAERAH BANTUAN YUE BA
BAN SIGOEM DONYA KA GEUPEURINTAH
UNI EROPAH DENGAN ASIA
BANDUM ANGGOTA PBB MEUGAH
KEUNOE YUE LANGKAH BANTUAN YUE BA
TEUMA OH DUDOE KATROEK BANTUAN
LUA NGOEN DALAM HAN PUE TAKIRA
HAN EK TAPIKE DEUNGOEN PIKIRAN
SIT SIDROE TUHAN YANG MAHA KAYA
RATA JEUT NANGGROE KIREM BANTUAN
YANG KOEN ISLAM IKOET SEUREUTA
KEUNOE DUM TEUKA SUKARELAWAN
JIBA BANTUAN MEUMACAM RUPA
JIBUKA POSKO RATA JEUT SIMPANG
BANTU MAKANAN BAJE NGOEN IJA
BANTU SUPERMIE GANTOE MAKANAN
BANTU PAKAIAN NGOEN BAJE MONJA
UREUNG YANG SAKET PEU UBAT RIJANG
SUKARELAWAN UBAT DUM JIBA
BANTU MEUBANTU SUKARELAWAN
MEUMACAM RAGAM MEUMACAM RUPA
PEUSAPAT MANYET JAK KUBU RIJANG
JAK PEUGLEH JALAN JAK PEUGOET TENDA
MANYET DITANOEM HANA LEE GAFAN
INOENG NGOEN AGAM HAN LEE KEUREUNDA
YANG LUKA PARAH JIBA U MEDAN
LADOEM HAI RAKAN SAMPOE JAKARTA
YANG MANTOENG UDEP PEU UBAT RIJANG
SUKA RELAWAN BANDUM KEURIJA
LAM KAPAI INDUK LADOEM HAI RAKAN
OPERASI SINAN YANG RINGAN SAJA
UREUNG YANG PATAH BEUSOE JIPASANG
TUNGKAT OH LHEUH NYAN JIBAGI RATA
UNTUK ANEUK MIET PIH MEUNAN MACAM
TENDA DIPASANG GANTOE SIKULA
NGAT BEK TEUROEMA INGAT BAYANGAN
DIJOEK MAINAN YUE MEUEN BOLA
MEU YANG TROEK KEUNOE SUKARELAWAN
DARI BERBAGAI ASAI NEGARA
DI DALAM NANGGROE PIH LE BANTUAN
SUKARELAWAN KEUNOE TROEK TEUKA
RATA DAERAH KIREM BANTUAN
LAM KESATUAN INDONESIA
HANA DAERAH YANG KETINGGALAN
MULAI SABANG TROEK JAYA PURA
BANTUAN SAMPOE UROE NGOEN MALAM
LADOEM ROET JALAN LADOEM UDARA
BANDUM DAERAH LUA NGOEN DALAM
JIBRI BANTUAN U ACEH RAYA
BANDUM PROPINSI KIREM BANTUAN
HANA HAI RAKAN ULOEN CALITRA
SEUBAB LOEN ANGGAP NYAN KEWAJIBAN
JAK BANTU RAKAN SABOEH NEGARA
KEU AWAK LUA JINOE LOEN PEUGAH
TENDA NGOEN KEMAH DI PEUGOET LANGSOENG
BANTU PEUNGUNGSI RATA DAERAH
POSKO JIPEUHAH RAKYAT DITULOENG
PEUSAPAT MANYET JAK TANOEM BAGAH
DIJAK SEULEUAH PEUGLEH LAM GAMPOENG
JAK PEUGLEH JALAN SUPAYA MUDAH
BANTUAN BAGAH SAMPOE LAM GAMPOENG
KIREM ALAT BRAT SUPAYA MUDAH
MANYET JIPEUGLAH DI MINYUB GEUDOENG
YANG MANTOENG UDEP PEU UBAT BAGAH
MEUNAN KEUH ULAH RAKYAT JITULOENG
DI AWAK INGGREH JIBA MAKANAN
AWAK JEURMAN UBAT PEUPULEH
UREUNG YANG SAKET JIBRI BANTUAN
MEUNAN KEUH MACAM TANYOE DIGASEH
DI AMIRIKA PIH SABOEH MACAM
JIBRI BANTUAN KEUNOE NGOEN KEUDEH
SOAL POLITIK PIH NA DI DALAM
DENGAN AWAK GAM PEURIKSA HABEH
SOAL AGAMA PIH NA DI DALAM
MISI BERJALAN KEUNOE NGOEN KEUDEH
AWAK TURUKI YANG HANA MEUNAN
JIBRI BANTUAN NGOEN HATE KHALEH
DI MALASIA HAN JITHEUN SINGET
PEUSAPAT MANYET KUBURAN MASA
HANA DIKIRA KEU SOAL BEE KHEP
YANG PENTENG MANYET KA JI USAHA
DI AWAK CINA NGOEN AWAK THAILAN
JIBA RAMUAN ON KAYEE RIMBA
NGOEN AKUPUNTUR REFPLEKSI SAJAN
PEUPULEH BADAN LUKI NGOEN LUKA
AWAK BEULANDA PIH MEUNAN MACAM
JIBRI BANTUAN MEU MACAM RUPA
AWAK AUSTRALI JI PEUGOET IE PAM
BAK BINEH JALAN DI SAMBOENG PIPA
AWAK KOREA DENGOEN KANADA
BANTUAN JIBA SAMPOE ALAT BRAT
BANTU PENGUNGSI MEUMACAM CARA
AWAK KOREA CACA NGOEN HEBAT
DI AWAK JEPANG UBAT DIBAGI
UNTUK PEUNGUNGSI DI PEUGOET TENDA
JI PEUGOET RUMOEH UNTUK DI BAGI
NGOEN AWAK BELGI KEURIJA SAMA
JIPEUGOET BARAK TAMPOENG PENGUNGSI
TENDA JIBAGI PEUGOET SIKULA
TUTUE YANG REULOEH DIPERBAIKI
BANTU PEUNGUNGSI JIBRI BEULANJA
DIJOEK KEU MODAL USAHA TANI
LADOEM DIBAGI MODAL USAHA
DIPEUGOET RUMOEH KORBAN TSUNAMI
BAK TEUMPAT LAWI BAK ASAI MULA
BAK BINEH LAOET MEUYANG HAN JIBRI
SEUBAB DINEUK CI PULA BAK BANGKA
JIPEUGOET TANGGUL PEUTHEUN TSUNAMI
BAK BINEH PASI PEUGOET PEUNYANGGA
UREUNG MEULAOET PUKAT BOET JIBRI
UREUNG PEUNGUNGSI BIT ISTIMEWA
RAME GOB TULOENG KORBAN TSUNAMI
NIBAK ILAHI TASYUKUR BEUNA
GEUTANYOE BEK DOEK BANTUAN GOB
BRI
MITA RASEUKI LAGE BIASA
BEK JEUT KEU BEU OE MITA RASEUKI
ALLAH NEUBEUNCI LAGENYAN CARA
SOAL BANTUAN OHNOE LON RAWI
JINOE MULAI HOE LAEN HABA
PAKOEN LE TUHAN NEUBRI TSUNAMI
BAHLE ULOEN BRI SEUBAB KAREUNA
KISAH TSUNAMI KALHEUH LOEN PEUGAH
JINOE LOEN KISAH SEUBAB KAREUNA
SEUBAB NEUPEUTROEN BALA LE ALLAH
TANYOE KA SALAH KAROEH LAM DOSA
NANGGROE ACEH NYOE SEURAMOE MEKKAH
HAN DI THEUN CAPRAH ALA EROPA
HAN DI THEUN MAKSEIT ACEH MEUTUAH
MEU MACAM ULAH TANYOE KEURIJA
GEUMPA TSUNAMI NEBRI LE ALLAH
SABOEH MUSIBAH GATA GEUCUBA
SEUBAB SALAH DROE TUWOE KEU ALLAH
TAPUBUET SALAH ATEUH RHUENG DONYA
TUTOE ULAMA
WATEE GEUPEUGAH
NASEHAT KEU JIEH HAN DI PEUDULI
JITOEP GEULIYUENG HOE LAEN LANGKAH
LOEN JI PEUJAEH NGON TUTOE KEUJI
ADAK TAPATEH YANG GOB NYAN PEUGAH
HANA SIT TIMOEH IJA KUPANJI
OLEH SEUBAB NYAN BAH LOEN CI PEUGAH
PAKOEN DI ALLAH NEUBRI TSUNAMI
SALAH YANG KEUPHOEN SURAMOE MEKKAH
PEURINTAH ALLAH PEUDULI HANA
HANSOE LE PUBEUT PERINTAH ALLAH
YANG LARANG TEUGAH MALAH KEURIJA
SABE KEUDROE DROE TAMEUROE DARAH
TAMEUPOEH MEUPOEH SABE SAUDARA
TIMBAK MEUNIMBAK TIEP UROE ALLAH
MANYET TAKEUBAH TANSOE USAHA
TABOEH LAN GUNI LAMLUENG TA KEUBAH
TANSOE SEULEUAH HUKOEM AGAMA
HANASOE PUBEUT FARDHU KIFAYAH
DITAKOET SALAH NGOEN UREUNG DONYA
MAKA JEUT SEUBAB BUNUH GEULARANG
TEUNTE MEU DAM-DAM BAK AKHE DUDOE
DIJAK TUENG BILA DI MITA JALAN
NGOEN KEUSATUAN KAWOEM WALI DROE
HANJEUT OH UROE DIJAK OH MALAM
TANLE PIKIRAN LABA NGOEN RUGOE
ROTNOE PIH MEUNAN DIPERTAHANKAN
SEUHINGGA JEUT PRANG KARU LAM NANGGROE
MAKA TSUNAMI NEUBRI LE ALLAH
NEU PEUGLEH DARAH SINOE LAM DONYA
UNTUK TEUGURAN UREUNG YANG SALAH
BEK CANGKLAK LEUPAH BANNA SEUNJATA
SALAH KEDUA SEURAMOE MEKKAH
ULAMA PEUGAH HAN DIPEUDULI
GEUYUE SEUMBAHYANG PEUDOENG JAMAAH
JIDEUNGOE KASAH AZAN BERBUNYI
KADEUH JIDEUNGOE SERUAN ALLAH
JIPOEH BEURAKAH HAN JIPEUDULI
U BAK JAMAAH HAN JIMEULANGKAH
NGON SEUBAB NYAN KEUH BALA ALLAH BRI
NENBRI TSUNAMI SEURAMOE MEKKAH
ASOE KA
CAPRAH SEUMBAHYANG HANA
LALOE PEUTIMANG ACI SIKUPAN
TUWOE SEUMBAHYANG LUHOE NGON ASA
KAGADOEH LALOE BAK MEUEN BATE
BAK CARI ULE KAGADOH ASA
KAGADOEH MEUGREB SYETAN PEULALE
KA MATE EK LHE KATUWOE INSYA
JIPIKE KIBAN HUKOEM SEUMBAHYANG
JEUT MEUNA MEUTAN KIBAN YANG HAJAT
TUHAN GEULAKNAT UREUNG LAGE NYAN
NURAKA JAHANAM GEUKEUBAH TEMPAT
SALAH YANG KEULHEE SEURAMOE MEKKAH
ULAMA PEUGAH PEUDULI HANA
GEUYUE TOEP AURAT DI PEREMPUAN
PEUGAH ALASAN YANG HANA – HANA
NYAN HAK ASASI PEUGAH ALASAN
HENJEUT BARANG BAN NYAN HAK PRIBADI
HAK BERNEGARA LAEN LOM MACAM
KON HANA SABAN NGON HAK PRIBADI
NYAN HAK ASASI NEUBRI LE TUHAN
KONJEUT BARANG BAN TANYOE PEUNARI
KONJEUT BARANG HOE ATOE BARANG BAN
KONJEUT BAN SEUNANG TANYOE PEUGOET KRI
BAK PUBEUT MAKSEIT TUHAN GEULARANG
BEKNA PIKIRAN NYAN HAK ASASI
HANA TOEP ULE DI PEREMPUAN
BUKAN HAI INTAN NYAN HAK PRIBADI
KON INOENG MATOENG YANG MEUNAN MACAM
DI UREUNG AGAM
PIH SABOEH GURA
SOK LUWEU PUNTOENG DENGAN OK PAYANG
LIKAK BAK JALAN RAWOEN LAM KOTA
MAKA TSUNAMI NEUBRI LE TUHAN
UNTUK TEUNGORAN KEUPADA HAMBA
MAKA YANG MATE LEE YANG TEULANJANG
TACOK PEUDOMAN SABOEH KEU TANDA
SEUBAB SALAH DROE GEUTANYOE INSAN
BUKA – BUKAAN AURAT U LUA
NEUJOK TSUNAMI YUE TROEN GEULOMBANG
YUE SUT PAKAIAN BANDUM BAK HAMBA
GEUPEUTROEN KUTOK GEUTAMAH BALA
MANYOE DI GATA SEUMBAHYANG HANA
KEUNOENG BALA AM NABI MEUSABDA
KALHEUH TARASA PAKIBAN HEBAT
DAHSYAT TSUNAMI KA DENGOEN GEUMPA
PUE LOM SAUDARA WATE KIAMAT
BEK SEUBAB SI DROE MEUPALOE RAKAN
BEK SI DROE YANG PLANG LAEN MEULALAT
SIDROE YANG PALEH HABEH GOEB KARAM
SIDROE YANG CURANG HABEH GOEB CACAT
BEK GARA SIDROE HANA SEUMBAHYANG
BALA BAK TUHAN BANDUM TARASA
BEK GARA SIDROE UREUNG PUBUET BROEK
OH GEULHOEM KUTOEK BANDUM TARASA
WATE TROEK BALA BAROE MUETUMPOEK
NYAN BARO SIBOEK PUJOE RABBANA
KAGADOEH LALOE BAK JAMBOE MADAT
PUBUET IBADAT KA MEUHAT HANA
LALOE LAM MAKSEIT TUWOE IBADAT
LAGE SANGKILAT HANA AGAMA
KA JIMEUDO’A MENYOE NA SAKET
KA JIMEURATEB MENYOE NA GEUMPA
SEUMBAHYANG WAJEB UROE JUM’AT
SEUMBAHYANG SUNAT OH UROE RAYA
MEUHANA BALA SEUMBAHYANG TANLE
DI ADEE PADE TIKA MUSHALLA
IJA SELEUKOEM SIMPAN U SANDENG
SELAMA KAYEM MEUTANLE GEUMPA
SALAH YANG KEUPEUT SEURAMOE MEKKAH
RAME MEULEPAH DUM UREUNG KAYA
MEULOMBA – LOMBA HARTA JI KEUBAH
ZAKEUT NGOEN FITRAH TAPI HANTOEM NA
HAN JIBOEH ZAKEUT JITAKOET SUSAH
HARTA JIKEUBAH HASIL PENG RIBA
YATIM PIATU NGON UREUNG SUSAH
MITA SEUDEUKAH SOE BANTU HANA
MAKA TSUNAMI NEUBRI LE ALLAH
HARTA JIKEUBAH GEUYUE PEUPHANA
GEUYUE COEK PULANG HAK MILEK ALLAH
BEK CANGKLAK LEUPAH OH LE HAREUTA
SALAH KEULIMOENG SEURAMOE MEKKAH
ULEH PO TALLAH NEUPEUTROEN BALA
SALAH PEUMIMPIN HANA AMANAH
JIMAT PEURINTAH KIBAN YANG SUKA
KIBAN YANG HAJAT MENAN PEURINTAH
BEUTOEI NGON SALAH HANA JI KIRA
HANA LE ADE JIMAT PEURINTAH
BEUNA NGON SALAH HANLE MEUBEDA
PEUMEMPIN ZALEM YANG MAT PEURINTAH
RAKYAT DI TINDAS MEUMACAM CARA
MAKA DI RAKYAT YANG KA TERTINDAS
LAKE BAK ALLAH DI MOHON DO’A
LAKE PEULINDOENG KEUDEH BAK ALLAH
HANLE PAT PEUGAH SINOE BAK HAMBA
KARNA PEUMIMPIN ZALEM MEULEPAH
MAKA DI ALLAH NEUPEUTROEN BALA
BALA TSUNAMI NEUBRI LE ALLAH
NEUKEUNEUK PINAH ZALEM LAM DONYA
BEKLE NA KROPSI LAM BUMOE ALLAH
ZALEM NEUPINAH SINOE LAM DONYA
KUASA TUHAN KA NEUPEULEUMAH
IE LAOET ALLAH YUE TROEN LAM GAMPOENG
JAK SAMPOEH MAKSEIT LAM BUMOE ALLAH
BEK CANGKLAK LEUPAH ATEUH BUMOE LOEN
SALAH YANG KEUNAM SERAMOE MEKKAH
ASOE KA CAPRAH ARAK NGON JUDI
MABOK NGON JUDI HANLE SOE TEUGAH
RATA DAERAH NEUCI KOMISI
SEUBAB GEULARANG ARAK NGON JUDI
SINAN MULAI NAKAL PIKIRAN
WATE KA MABOEK HAN SADAR DIRI
SINAN TERJADI DUM KEURUSUHAN
WATE KA TALOE BAK LAPAK JUDI
SINAN MULAI RUSAK PIKIRAN
PUBLOE PU YANGNA NGON YUM TAN MEUKRI
KEUPANGKAI JUDI BAK HARAP MEUNANG
MEUNYOE KA TALOE RIWANG KEUMBALI
NIBAK ISTRI LAKE PINJAMAN
LADOEM SAMPE CREE DENGON ISTRI
LADOEM TROEK SAMPE BAK KEUMISKINAN
YANG LANDOEM SAMPE JEUT KEUPANCURI
AKIBAT JUDI RUSAK PIKIRAN
MEUNYAN KEUH SEUBAB NEUBRI TSUNAMI
NEU YUE BASMI YANG MEUNAN MACAM
SALAH KE TUJOEH SEURAMOE MEKKAH
ASOE KASALAH KALE MEULANGGA (R)
KALE BUET ZINA RATA JEUT SAGOE
KALE LAM NANGGROE DUM ANEUK ZINA
SEUBAB AKIBAT ZINA GEULARANG
BAK PERZINAAN WAHE RAKAN DROE
KA GADOEH NASAB ASAI TURUNAN
OLEH SEUBABNYAN GEULARANG ZINA
OH LAHE ANEUK BAK PEZINAAN
BANGSA ANEUK NYAN KEUMA DILANGSOENG
MEUBALEK NASAB ASAI TURUNAN
ANEUK JAHANAM JIKHEUN LAM GAMPOENG
MAKA DI ALLAH BALA NEUPEUTROEN
TSUNAMI GULOENG SI HIDOENG BELANG
NEUKEUNEUK SAMPOEH ANEUK JAHANAM
BEK JEUT PIMPINAN ACEH NYOE KARAM
MEUNYOE OH DUDOE JIH YANG MAT HUKOEM
TEUNTE HAI KAWOEM TANYOE MEUPALOE
TEUNTE HAN BEUTOE ADAK BARANG BAN
MEUNAN JUNJUNGAN KA NEUPEURUNOE
SALAH KEULAPAN SEURAMOE MEKKAH
MAKA DI ALLAH MEUPEUTROEN BALA
BALA TSUNAMI NEUBRI LE ALLAH
DAHSYAT MEULEUPAH KALHEUH TARASA
SIDUMNAN BALA ALLAH KA NEUBRI
MANTOENG PANCURI MEURAJALELA
SEUBAB CEUMEUCUE PEUGOET PANCURI
OLEH ILAHI BEUNCI LEUPAH NA
SEUBAB AKIBAT DARI PANCURI
DIDALAM NEGERI JEUT KERUSUHAN
HAN AMAN RUMOEH JIRAN NGON WALI
PAYAH AWASI UROE NGON MALAM
SAMPOE WEU LEMOE PAYAH BOEH GUNCI
NGON WEU KEBIRI PAYAH EH MALAM
KOEN YANG CEUMEUCUE SAGAI PANCURI
TAPI YANG KROPSI SABAN SIT NGON NYAN
SALAH SIKUREUNG SEURAMOE MEKKAH
PERGAULAN BEBAS AGAM NGON DARA
SANG – SANG OH TA’EU KALHEUH MEUNIKAH
MEUNAN KEU ULAH BAK JIDUEK HONDA
JIKEUMPUL KEUBOE MENAN ISTILAH
DUEK SABOEH RUMOEH DISEWA KAMA
MANGAT JEUT HEMAT MEUNAN JIPEUGAH
SAMBIL KULIAH HEMAT BEULANJA
HANA JITUPUE RAYA THAT SALAH
GOHLOEM MEUNIKAH AWAK NYAN DUA
SALAH BAK ADAT NGON HUKUM ALLAH
SALAH MA NGON YAH HANA GEUJAGA
MAKA TSUNAMI NEUBRI LE ALLAH
NEUKENEUK SAMPOEH LAGENYAN CARA
NEUKENEUK PEUNGLEH SEURAMOE MEKKAH
MAKA DI ALLAH NEUPEUTROEN BALA
SALAH KEUSIPLOEH SERAMOE MEKKAH
HANSOE LE TEUGAH YANG PUBUET DOSA
YANG PUBUET KAROET HANASOE TEUGAH
PEUDOENG SYARIAH BAK BABAH SAJA
SYARIAT ISEULAM SECARA KAFFAH
HAFAI BAK BABAH DENGAN BAK MIMBA (R)
HANA JIPUBUET LAGE JI PEUGAH
HANASOE TEUGAH YANG PAJOEH RIBA
JUDI NGON BUNTUT HANASOE TEUGAH
PUELOM TAPEUGAH SOAL NARKOBA
ARAK NGON TUAK HANPUE TAPEUGAH
JIPUBLOE BEBAS DUSOEN NGON KOTA
PUE LOM BAK HOTEL BERBINTANG MEUGAH
SINAM DI KEUBAH INOENG DALUPA
TUNA SUSILA NAMA JIPEUGAH
MITA NAFAKAH LAGENYAN CARA
MAKA NEUPEUTROEN BALA LE ALLAH
SIHARAM JADAH NEUKEUMEUK GULOENG
GEUMPA TSUNAMI NEUBRI LE ALLAH
CARA NEUTEUGAH KEUDROE NEUH LANGSOENG
MEUNYOE SIDUMNAN HANA SIT UBAH
TAPREH BUET ALLAH DONYA GEUGULOENG
BANDUM SIT MUNGKEN MENYOE BUET ALLAH
SEP NGON GEUPEUGAH NGON KUN PAYAKUN
SEUBAB NEUPEUTROEN BALA LE ALLAH
KALHEUH LOEN PEUGAH MEUNUROET ULOEN
ATRA NYAN BANDUM RASIA ALLAH
JINOE LOEN PEUGAH DO’A NGAT AMPOEN
TANYOE
MEULAKEE KANI BAK ALLAH
SEURAMOE
MEKKAH BEUNEU PEULINDOENG
BERKAT SYUFAAT
DI RASULLAH
BEUNEU
PEUSIBLAH ACEH NEU TULOENG
NAUZUBILLAH LINDOENG BAK TUHAN
BEUTEUTAP IMAN DIDALAM DADA
BEK ROEH TAPUBUET YANG KA GEULARANG
ACEH BEUDALAM TAUBAT NASUHA
SEULAWEUT SALEUM AKAN JANJOENGAN
KEUMUHAMMADAN SAIDIL AMBIYA
BERKAT SYUFAAT PANG ULEE ALAM
ACEH BEU AMAN DAMAI SENTOSA
BALA TSUNAMI BEKLE MEU ULANG
ACEH BEU AMAN BEKLE LAM BALA
UREUNG YANG JAHE NEUTUNYOEK JALAN
MANGAT DI RIWANG PUJOE RABBANA
ALLAHU ALLAH KHALIKUL MANNAN
YANG GASEH SAYANG KEUPADA HAMBA
KAMOE MEULAKE BAK DROE YA RAHMAN
ACEH BEU AMAN DALAM SEJAHTRA
BALA YANG NEUBRI JEUT KEUPODAMAN
SABOEH COBAAN U ATEUH HAMBA
BEUROEH LAM SABA ATEUH COBAAN
BEUTEUGOEH IMAN DI ATEUH BALA
ALLAH HU ALLAH ALLAH HU RAHMAN
NEUBRI BEU AMAN ACEH SENTOSA
ACEH BEK KARUE LUA NGON DALAM
SUPAYA AMAN TA BANGUN BANGSA
KEU UREUNG KORBAN DALAM TSUNAMI
YA ALLAH NEUBRI TAMOENG SYURGA
KUBU BEU LUAH TUHANKU NEUBRI
KORBAN TSUNAMI PANGKAT SYUHADA
SAJAN FATIMAH NGON ANEUK NABI
DI KAWOEM UMMI BLANG PADANG MASYA
BEUSABOEH PAYOENG KA DEUNGON NABI
DI KAWOEM ABI TAMOENG SYURUGA
YANG HANA KUBU JEURAT TUHAN BRI
KORBAN TSUNAMI HUKOEM RABBANA
TANYOE MEUDO’A TEUMPAT BARANG RI
HANA MESEUTI NIBAK PUSARA
ALLAH HU ALLAH HU ALLAH HU RABBON
ALLAH KADIRON SIDROE YANG ESA
BEK LE TSUNAMI KEUNOE NEUPETROEN
KAMOE NEU APOEN MENYOE MEUDOSA
NEUBRI PEUTUNYOEK E YA ILAHON
BEKLE NA KAWOEM YANG PUBUET DOSA
KASEB TSUNAMI KAMOE NEUHUKOEM
DOSA NEU AMPON E YA RABBANA
DOSA MA NGON YAH BEU NEUPEU AMPON
ALLAH YA RABBON NEUKABUL DOA
UNTUK PEMIMPIN RAHMAT NEUPEUTROEN
BEKLE NEUHUKOEM E YA RABBANA
BEK NGON TSUNAMI KAMOE NEU HUKOEM
BEU NEUPEU AMPON SIGALA DOSA
BEKLE NEU AZEUB BALA NEUPEUTROEN
E YA ILAHON KASEP BE YANG KA
NEUBRI ACEH NYOE ISLAM BEUJAYA
LAGE YOEH MULA JAMEUN AWAI PHOEN
NANGGROE PEUREULAK SINAN PHOEN
MULA
DUDOE SAMUDRA WILAYAH GEUDOENG
HINGGA
BERKEMBANG SAMPOE MALAKA
ISEULAM JAYA
SAMPOE REUTOEH THOEN
POE
TEUMEUREUHOM ISKANDAR MUDA
YANG MAT
NEURACA ACEH JAYA PHOEN
YANG ATOE NANGGROE ISKANDAR MUDA
KAWOEM ULAMA BANDUM YANG SUSOEN
RAYEUK THAT PEURAN KAWOEM ULAMA
SAMA NGON RAJA GEUPIMPIN KAWOEM
ISEULAM DI ACEH JAMEUN KOEN KANA
KAWOM ULAMA PEUDOENG AWAI PHOEN
NA KADHI AGOENG SIDROE ULAMA
YANG BRI FATWA SYARIAT HUKOEM
E YA TUHANKU KAMOE NEUTULOENG
KAMOE NEULINDOENG E YA HADHARAT
SIPLOH BOEH SALAH KALHEUH LOEN SUSOEN
KAMOE NEU AMPON BEKLE NEU AZAB
BEULEUPIE HATE SIJUK LAM JANTOENG
KEU BANDUM KAWOEM YANG NA IBADAT
INOENG NGON AGAM KUTA NGON GAMPOENG
PUJOE ILAHON SYUKUR KEU NIKMAT
BAK BUET YANG SALAH TUHAN NEULINDOENG
BEKLE NEUHUKOEM UROE KIAMAT
BEKLE TSUNAMI BALA NEUPEUTROEN
BEKLE NEUHUKOEM UROE AKHIRAT
KEUBANDUM KAMOE DOSA NEU AMPON
BEUSABOEH PAYOENG DENGON MUHAMMAD
BAK ULE TITI KAMOE NEUTULOENG
BEULEUPAH LANGSOENG SYURGA TEMPAT
ALLAH HU ALLAH RAHMAT MUKATOE
SIT TUHAN SIDROE YANG THAT KUASA
YANG MANTOENG UMU AJAI GOEH SAMPOE
GEULOEMBANG TAMPOE TSUNAMI HEBAT
YANG KA TROEK AJAI UMU KA SAMPOE
KALEUPAH GEUWOE NIBAK HADHARAT
DOA LOEN LAKE BAK TUHAN SIDROE
BADUM UREUNG NYOE SYURGA TEMPAT
YANG MANTOENG UDEP DALAM DONYA NYOE
BAK TUHAN SI DROE U LOEN MUNAJAT
BEU DALAM IMAN OH WATE GEUWOE
DALAM DONYA NYOE IMAN SEULAMAT
ALLAH HU ALLAH YA RABBOL KADE
ACEH BEKNALE NEUBRI LAM BALA
ACEH BEKKARU BEKLE SU BUDE
ACEH BEK PAKE SABE SAUDARA
DAME HELSENKI YA RABBUL KADE
NEUBRI BEUSAMPE BAN HAJAT PINTA
BEUJEUT KEUDAME NGAT BEKLE PAKE
GAM DENGAN RI BEUJEUT SAUDARA
NEUBRI ACEH NYOE BEKROEH LAM JAHE
JISEUTOET KAFE BUDAYA LUA
NEUBRI SEULAMAT BATHEN NGON LAHE
OH UROE PAGE NEUBRI SYURGA
PINTOE SYURGA NEUGUNCI BEKLE
YA RABBOL KADE NEUKABUL DOA
BEU DALAM IMAN OH WATE MATE
PAREKSA BEKLE NEUCEING AMALAN
NABI MUHAMMAD RASUL YANG AKHE
SEULAWEUT SABE SEUPANJANG MASA
BERKAT SYUFAAT RASUL YANG AKHE
ACEH BEKNA LE NEUBRI LAM BALA
ALHAMDULLIAH SYUKUR ILLAHI
SEULAWEUT KEU NABI PANG ULEE ALAM
KATAMAT NAZAM HABA LOEN RAWI
GEUMPA TSUNAMI KATAMAT KALAM
DENGAN TULOENG POO ILAHON RABBI
GEUMPA TSUNAMI KALHEUH LOEN KARANG
JINOE LOEN PULANG KEUYAH NGON UMMI
MUDA DAN MUDI COK KEUPEUDOMAN
NEUCOK KECONTOE HABA LON RAWI
GEUMPA TSUNAMI JEUT KEUPEUDOMAN
SALAH NGON BEUTOE BEUGOT TEULITI
HABA LOEN RAWI KADANG HAN TIMANG
KADANG HAN SANTOK BAK PEUKHOK RAWI
MAKLUM HAI AKHI BANJEUT TEUMULEH
BANJEUT KEUMARANG BARO ULOEN CI
BAN LHEUH TSUNAMI BARO BEUDOEH EH
MEUAH LOEN LAKEE BAK YAH NGON UMMI
SULAIMAN GANI UREUENG YANG TULEH
DISAMALANGA NYAN GAMPOENG UMMI
KORBAN TSUNAMI RUMOEH KAHABEH
ANEUK PEURUMOEH MANTOENG ALLAH BRI
KAROENG NGON WALI BANDUM KAHABEH
SIT SIDROE JATOE BLAH KAWOEM UMMI
BLAH KAWOEM ABI BANDUM HABEH GLEH
BAK PIHAK NAFSU LOEN SUSOEN RAWI
GEUMPA TSUNAMI HAJAT LOEN TULEH
TUOT KEU MEJA TUNGOE KURUSI
TULEH TSUNAMI SEUN-SEUN SIBAREH
NEUBRI YA ALLAH BAN KADA HAJAT
JEUT KEU IBADAH HABA LOEN TULEH
NEUTUENG KEU AMAI OLEH HADHARAT
UROE AKHIRAT NEUPULANG SIDEH
Banda Aceh, 25 Agustus 2005
WASSALAM
Oleh : Tgk Diyueb Bruek/Sulaiman.A.Gani
0 komentar:
Posting Komentar