HIKAYAT SYARIAT ISLAM

ASSALAM MUALAIKOEM WARAHMATULLAH

JAROE DUA BLAH ATEUH ULEE LOEN

RANUB KUNENG ON TAWOE KA PATAH

PINEUNG SI ULAH RAMPAGOE PUNTOENG

NYOE RANUB SI PRIEK DENGOEN PINEUNG KRANG

KIREM KEU RAKAN BANDA NGOEN DUSOEN

GANTOE LOEN JAK DROE LOEN BRI UTUSAN

GEUNANTOE BADAN HABA LOEN SUSOEN

GEULANTOE LOEN BRI KUPI SICAWAN

NGOEN RUTI BANTAI  YANG MUDAH BAK LOEN

SAMBOET RAKAN DROE SABOH KARANGAN

SYARIAT ISLAM HABA LOEN SUSOEN

HAJAT LOEN PEUGAH SYARIAT ISLAM

JALAN YANG LEUPANG WAHE E KAWOEM

DALAM SYARIAT DUEM PERATURAN

DALAM QURUAN KEUNAN GEUHIMPOEN

RUKOEN IMAN NGOEN RUKOEN ISLAM

BANDUEM AMALAN KEUNAN MEU PUNCA

OLEH SEUBABNYAN KA WAHAI RAKAN

HUKOEM ISLAM TA’AT LE GATA

TANYOE MEULAKE  KA NIBAH TUHAN

UROE NGOEN MALAM NIBAK HADHARAT

NEUBRI YA ALLAH ACEH BEU AMAN

SYARIAT ISEULAM BEU MAJU PEUSAT

BEK LE TSUNAMI ACEH MEU ULANG

NEUBRI YA TUHAN BAN KAMOE HAJAT

DENGOEN SAFAAT PANG ULE ALAM

ACEH BEU AMAN  BEKLE KARU THAT

DAME HELSINKI SABOH LANDASAN

R.I. DENGOEN GAM   E YA HADHARAT

BEUSIJUEK HATEE DUA AWAK NYAN

SUPAYA AMAN PEUDOENG SYARIAT

NGOEN UNDANG-UNDANG SYARIAT ISLAM

ACEH TAKEUMBANG KIBAN YANG HAJAT

BAPAK ILYASSAK BEUSEHAT BADAN

YANG MAT PIMPINAN DINAS SYARIAT

 PAK DIAUDDIN WAKIL DI GOEBNYAN

BEUSEHAT BADAN TANYOE MUNAJAT

BEU SAPUE PAKAT DUA AWAK NYAN

UREUNG MAT GAYAM DINAS SYARIAT

KEU UREUNG KARANG HARAP MAAFKAN

BAK KARANG NAZAM KADANG NA SILAP

BAK PEUKHOEK RAWI KADANG HAN TIMANG

MAKLUN HAI RAKAN BAN JEUT SEUMURAT

MEUAH LOEN LAKEE MEURIBE KALAM

ULOEN KEUMARANG GOHLOEM GOET TEUPAT

SEUBAB TSUNAMI KARU PIKIRAN

RUMOH JILOEN TAN GULOENG LE BAKAT

BAK PI EE NAFSU TULEH KARANGAN

SYARIAT ISEULAM HAJAT LOEN SURAT

SALAH NGOEN BETOI BEUGOET NEUTIMANG

ULOEN KEUMARANG MEUTIK TIK PUSAT

SULAIMAN GANI UREUNG YANG KARANG

NGOEN TULOENG TUHAN KATROEK BAN HAJAT

JEUT KEU IBADAT HABA LOEN KARANG

NEUTEUNG KEU AMAI E YA HADHARAT

KEU GUNCI PINTOE SYURUGA LAPAN

UROE KEMUDIAN SYURUGA TEUMPAT

LOEN JAK BAK TITI BAGOE TEUREUBANG

MEUNAN YA TUHAN ULOEN MUNAJAT

RANUB SIGAPU OHNOE LOEN KARANG

PEUPANEUK KALAM  BEK PAYANG RIKA

PAYANG TALIPAT SINGKAT TALINGKA

MEU CUET CUET PUNCA HANSEP PIKIRAN

Pengarang

SULAIMAN A. GANI

ASSALAMMUALAIKOEM WARAH MATULLAH

ALHAMDULILLAH KISAH LOEN PUPHOEN

SEULAWET SALEUM KEU RASULULLAH

YANG BA RISALAH KE BANDUEM KAWOEM

SAMBOET SALEUM LOEN KALAM SIPATAH

SYARIAT ALLAH KISAH LOEN SUSOEN

SYARIAT ISEULAM HAJAT LOEN PEUGAH

UMMI NGOEN AYAH BANDA NGOEN DUSOEN

LHEUH TAPEUJUANG OTONOMI DAERAH

LHEUH NYAN SYARIAT QANUN GEUSUSON

SYARIAT ISEULAM SEURAMOE MEKKAH

ACEH DAERAH LAHE AWAI PHOEN

PHOEN-PHOEN GEUTUNTUT OTONOMI DAERAH

BAK PEMERINTAH U PUSAT LANGSOENG

MEUNYOE HAN JIBRI OTONOMI DAERAH

ACEH BERPISAH TALEUK LHEE LANGSOENG

DUDOE SEUTUJU LE PEMERINTAH

GEUPEUGOET BAGAH LANDASAN HUKOEM

NOMOR 44 LAJU GEUYUE SAH

NGOEN THOEN GEUPEUGAH TEUNTE HAI KAWOEN (1999)

HAK ISTIMEWA GEUPEUGOET BAGAH

ACEH DAERAH ISLAM HAI KAWOEM

SYARIAT ISEULAM MEUNAN GEUPEUGAH

ADAT DAERAH QANUN YUE SUSOEN

NGOEN UNDANG-UNDANG DUDOE GEUYUE SAH

NOMOR LAPAN BLAH BACA HAI KAWOEM

NGOEN QANUN NAGGROE DUDOE GEUTAMAH

NOMOR LIMOENG BLAH KALHEUH GEUSUSOEN

SYARIAT ISLAM DASAR FALSAFAH

ACEH DAERAH KEU DASAR HUKOEM

HUKOEM ISLAM AGAMA ALLAH

TUNDUK PEURINTAH HUKOEM ILLAHON

KAREUNA ACEH SEURAMOE MEKKAH

ACEH DAERAH ISLAM HAI KAWOEM

ISLAM DI ACEH ZAMEUN KOEN KANA

ACEH MULIA PEUDOENG AWAI PHOEN

NANGGROE PEUREULAK SINAN PHOEN MULA

DUDOE SAMUDRA WILAYAH GEUDOENG

HINGGA BERKEMBANG SAMPOE MALAKA

ISEULAM JAYA SAMPOE REUTOH THOEN

PO TEUMEUREUHOEM ISKANDAR MUDA

YANG MAT KUASA ACEH JAYA PHOEN

NANGGROE MEU ADAT KUAT AGAMA

KAWOEM ULAMA BANDUM YANG SUSOEN

YANG ATOE NANGGROE BAK SI DROE RAJA

KAWOEM ULAMA BANDUM YANG SUSOEN

RAYEUK THAT PEURAN KAWOEM ULAMA

SAMA NGOEN RAJA GEUPIMPIN KAWOEN

ISEULAM DI ACEH JAMEUN KOEN KANA

KAWOEM ULAMA PEUDOENG AWAI PHOEN

NA QADHI AGOENG SIDROE ULAMA

YANG BRI FATWA SYARIAT HUKOEM

MEU PAKOEN JINOE ATRANYAN HANA

MEUBALEK CARA MEUTUKA UJOENG

PADAHAI ACEH HAK ISTIMEWA

KA TINGGAI RUNGKA SYARIAT HUKOEM

HANA LE MUPAT ADAT NGOEN REUSAM

KA GADOEH PERAN KAWOEM ULAMA

PADAHAI ACEH LEUBEH MEUGAHAN

LHEE BOH LANDASAN AWAI KALHEUHNA

PEUREUTA MAPHOEN HAK PENDIDIKAN

DUA HAI TAULAN HAK BER AGAMA

BEBAS AGAMA HANA SOE SANGGANG

SYARIAT ISEULAM DAERAH DISTA

ADAT YANG KEULHE KA WAHAI RAKAN

BEBAS KEUMBANGKAN ADAT BUDAYA

HAK ISTIMEWA LHE BOH ATRANYAN

TAPI JINOE THAN TAKALOEN RUPA

YOEH MASA DILE ACEH MEUGAHAN

YOEH MASA SULTAN ISKANDAR  MUDA

ADAT NGOEN HUKOEM KANUN NGOEN REUSAM

DENGOE HAI RAKAN BACUET LOEN SUSOEN

GEUBOEH NGOEN ADAT GEUNANTOE PAGEU

NGAT BEK JILINGKEU SIAPA SAJA

GEUBOEH HUKOEM KEU AQIDAH

NGAT BEK SALAH NIBAK AGAMA

GEUBOEH REUSAM MANGAT MEUKEUNOENG

AGAM INOENG MANGAT BEDA

GEUBOEH KANUN SUPAYA JROEH

BEK MEUROEH ROEH JEUT PEUKARA

MEUKOENG ADAT SEULAMAT HUKOEM

REUSAM KANUN TEUPELIHARA

RAKYAT SEUNANG AMAN GAMPOENG

HAN MEUROEN ROEN JEUT PEUKARA

MEUNYOE MEUSAPAT ADAT NGOEN HUKOEM

MISEU NYAWOENG NGOEN ANGGOTA

UMPAMA REUSAM DENGOEN KANUN

MISEU REUBEUNG DENGOEN TIKA

YOEH MASA JAMEUN NEUNAN HAI KAWOEM

ACEH GEUSUSOEN ULEH ULAMA

GEUPEUDOENG ADAT SYARIAT HUKOEM

REUSAM NGOEN KANUN GEUYUE PEULARA

SUPAYA AMAN RAKYAT LAM GAMPOENG

HANA MEUROEN ROEN BANDUM PEUKARA

KANA ATURAN MEUNURUT HUKOEM

MAKA LAM GAMPOENG AMAN SEUJAHTERA

MEUROEK DENGOEN TOI KEU ASOE NANGGROE

RUHUNG NGOEN BAJOE KEU PEUTUA

TAMEH NGOEN PUTENG KEU ULE BALANG

BEUNEU NGOEN ADANG KEU ULAMA

KAREUNA ACEH SEURAMOE MEUKAH

RUMOEH YANG MEUGAH LOEN BOEH UMPAMA

BINTEH MEUKILAT MEUCULEK INDAH

PAGEU LINGKA SAH PINTOE GAPURA

JINOE KAREULOEH GOEYANG BUET GEUMPA

DEURI NGOEN BARA MEUJUNGKAT JUNGKAT

NIBAH WATEE NYOE ACEH MULIA

KAJEUT SAUDARA TAMEUDUEK PAKAT

TAGANTOE DEURI KA DEUNGOEN BARA

TAMPOENG YANG HANA KAJEUT TAPEUDAP

SEURAMOE MEUKKAH JINOE LAM BALA

TSUNAMI GEUMPA KALHEUH TALIHAT

DAHSYAT TSUNAMI KA DENGOEN GEUMPA

KALHEUH TARASA PAKRIBAN HEBAT

NYAN BAROE BACUT ALLAH PEURASA

KA PANIK GATA LAGEE QIAMAT

JINOE BERSATU BANDUM GEUTANYOE

ACEH LHEE SAGOE BEU EK SEUJAHTRA

KEUBANG AGAMA RATA JEUT SAGOE

ACEH TAPUWOE LAGE YANG KA-KA

NANGGROE ACEH NYOE TAPUWOE TUWAH

LAGEE SEUJARAH RIWAYAT LAMA

TATUENG SYARIAT ULAMA PEUGAH

JAGA DAERAH BEK TABRI CUPA

AGAMA ISEULAM JAK DAKWAH RIJANG

BEK TUWOE HAI BANG TANYOE MEUDOA

TANYOE MEULAKEE KA NIBAK TUHAN

HUKOEM ISEULAM ACEH BERJAYA

ISEULAM DI ACEH JINOE KA LAYEE

HANA LE MALEE DUM ANEUK DARA

ADAP KA KUREUNG PO BUNGOENG KEUMBEE

DAK JISOEK BAJEE SOPAN JIEH HANA

BEK JEUT ACEHNYOE NANGGROE SANGKILAT

JAGA MARTABAT MARUAH YANG KANA

BEK RAYA HABA NGOEN PERBUATAN

TA KHEUN ISEULAM SEUMBAHNYANG HANA

TA EU NIBAK BUET DENGOEN PAKAIAN

IKOT-IKOTAN GAYA EROPA

DI ANEUK DARA PIH SABOEH MACAM

DISOEK PAKAIAN LAGEE KHOENG-KHOENGWA

DI UREUNG INOENG KAJEUT KEU REUSAM

DI SOEK PAKAIAN AURAT U LUA

IKOET MODEREN PEUGAH ALASAN

DISANGKA KIBAN PEURINTAH AGAMA

HAN JITOEP ULEE DENGOEN JEULEUBAB

NGOEN BEK DEUH AURAT MEU OK DI ULEE

IKOET PEURINTAH FIRMAN HADHARAT

DIDALAM KITAB SABDA PANG ULEE

OH WATEE DIJAK DIDALAM PEUKAN

GEUTANYOENG PANDANG HANA LEE BEDA

NGOEN BAJE KAWOEH MEUBUNGKOEH ASAM

SILEWEU  PAYANG KEUTAT URAM PHA

YANG LEUBEH LUCU HAI TUNGKU APA

YANG LEUBEH GURA WAHE TUNGKU BEN

JISOEK JEULEUBAB DADA TEUBUKA

LEUMAH U LUA PUTIEK BOH MAKEN

SOK BAJEE OBLONG KEUTAT BAK BADAN

SOK LUWEU PAYANG MEUBUNGKOH BOEH PHA

SOK BAJEE LIPEUH KALEUMAH KUTANG

SOK LUWEU PAYANG MEUBUNGKOH ATRA

TUHAN NEU BENCI PAKAIAN MEUNAN

UREUNG ISEULAM KOEN MEUNAN CARA

NA SOPAN SANTOEN NIBAK PAKAIAN

TAJAK LAM PEUKAN DENGOEN LAM KAMBA

PAKEEK KEURUDOENG IJA SEULENDANG

NGOEN BAJEE PAYANG SAMPOE U GAKI

GEUYUE NGUI BAJEE BEUTOEP LEUNGAN

TAJAK LAM PEUKAN AURAT BEK MEURI

YANG NA JEUT LEUMAH MUKA NGOEN TANGAN

MEUNAN BIMBINGAN NIBAK ILAHI

TUHAN SEUSEUBOT DALAM QURUAN

BACA HAI RAKAN NEUBOEH AREUTI

DARI SURAT NUR DALAM QURUAN

LHEE PLOEH SA INTAN AYAT KA MEURI

MEUNAN PEURINTAH KHALIKUL MANAN

MEUNAN ATURAN UREUNG ISEULAMI

TUHAN NEUYUE TOEP AURAT PEREMPUAN

SEUBAB NEUPANDANG DEURAJAT TINGGI

BEK SOEMPOE ROH JEUT BARANG ROEMBENGAN

HANA MEUSIMPAN DALAM LEMARI

HUKOEM ISEULAM CUKOEP THAT LEUNGKAP

FIRMAN HADHARAT NGOEN HADIS NABI

BANDUM ATURAN KEUNAN GEULIHAT

PUNCA MEUSAPAT DALAM QUR-ANI

NGOEN UNDANG-UNDANG UREUNG ISEULAM

DUMNA ATURAN UDEUP INSANI

HAK BER NEGARA LAEN LOEM MACAM

KA HANA SABAN NGOEN HAK PRIBADI

NYAN HAK ASASI NEUBRI LE TUHAN

KOEN JEUT BARANG BAN TANYOE PEUNARI

KOEN JEUT BARANGHOE ATOE BARANG BAN

KOEN JEUT BAN SEUNANG TANYOE PEUGOET KRI

BAK PUBUET MAKSIET TUHAN GEULARANG

BEKNA PIKERAN NYAN HAK ASASI

HANA TOEP ULEE DI PEREMPUAN

BUKON HAI INTAN NYAN HAK PRIBADI

TAPI MEUSALAH NGOEN HUKOEM TUHAN

NGOEN UNDANG-UNDANG SYARIAT ISLAMI

MEUNYOE ROEH MEUNAN GATA HAI INTAN

UROE KEMUDIAN NEURAKA GEUBRI

DAN LAEN-LAEN MEUNAN SIT MACAM

DALAM ISEULAM LEUBEUH THAT RINCI

TUNGKU PANCURI GEUYOE KOEH TANGAN

YANG PAJOEH APAM RAJAM GEUYOE BRI

TAPI BEK TAKHEUN KEUJAM ISEULAM

NA PEURATURAN PANDUM DROE SAKSI

NA KEUTENTUAN JUMLAH CURIAN

KOEN JAK KOEH TANGAN BANDUM PANCURI

KAREUNA CEUMEUCUE PEUGOET PENCURI

ULEH ILAHI SANGAT GEULARANG

SEUBAB AKIBAT DARI PANCURI

DIDALAM NEGERI JEUT  KEURUSUHAN

HAN AMAN RUMOEH JIRAN NGOEN WALI

PAYAH AWASI UROE NGOEN MALAM

SAMPOE WEU LEUMOE PAYAH BOH GUNCI

NGOEN WEU KEUBIRI PAYAH EH MALAM

PANCURI INOENG PANCURI AGAM

GEUYOE LE TUHAN HUKOEM KOEH JAROE

BEKLE DI GISA BAK BUET YANG MEUNAN

SUPAYA AMAN DIDALAM NANGGROE

NGAT JEUT KE CONTOH SABOEH TEULADAN

NGAT KEUTAKUTAN SIBARANG KASOE

BEK LE MEU ULANG BAK BUET LAGEE NYAN

SUPAYA AMAN HAN KARUE NANGGROE

MISEU PEMBUNUH QISAS HUKOEMAN

GEUYUE POEH RIJANG MEUNAN KHEUN RABBI

SOE YANG PEUMEUAH NA NA BACUT RINGAN

TAPI ATURAN DIYAT BEU JIBRI

KARENA SEUBAB BUNUH GEULARANG

TEUNTE MEUDAM-DAM AKHE DUDOE

DIJAK TUENG BILA DIMITA JALAN

NGOEN KEUSATUAN KAWOEM WALI DROE

HANJEUT OH UROE DIJAK OH MALAM

TANLEE PIKIRAN LABA NGOEN RUGOE

ROETNOE PIH MEUNAN JIE PERTAHANKAN

SEUHINGGA JEUT PRANG KARU LAM NANGGROE

CUKOP SEMPURNA SYARIAT ISEULAM

NGOEN UNDANG-UNDANG TUHANKU RABBI

SEGALA HUKOEM BANDUM NA SINAN

HUKOEM TIMBANGAN BAK JUAL BELI

CUKOEP THAT LEUNGKAP SAMA SEKALI

DALAM QUR’ANI GEUHIMPOEN KEUNAN

HUKOEM MEUKSAWEIN TALEUK PIH MEURI

TALEUK RAJI’I NGON TALEUK TIGA

PASAH NGOEN RUJU’K SYARAT KEUMBALI

HUKOEM WARISI ATAU PUSAKA

HUKOEM CEUMEUCUE  DENGOEN TEUMAKI

KARONG NGOEN WALI HAN HABE KADA

HUKOEM BLOE PUBLOE NIAGA DAGANG

DALAM ISEULAM MANDUM HABEH NA

MASALAH TANI NGOEN PENDIDIKAN

MEUNAN SIT HAI BANG BAH ANTARIKSA

UREUNG GEUTANYOE YANG SALAH PAHAM

DALAM ISEULAM GEUSANGKA HANA

KA SALAH SANGKA TEUNTANG ISEULAM

CUMA SEMBAHYANG DENGOEN PUASA

PADAHAI LENGKAP DALAM ISEULAM

DUM PEURATURAN UDEP LAM DONYA

SOAL POLOTIK PILEH PIMPINAN

SOAL PEPERANGAN BELA NEGARA

SOAL IBADAH SYARAT SAH NGOEN HAN

SOAL BALASAN SYURGA NERAKA

OLEH SEUBABNYAN KA WAHAI RAKAN

SYARIAT ISEULAM PILEH LE GATA

TEUMPAT BERPIJAK UNTUK LANDASAN

GEUJOK PEDOMAN QUR’AN YANG SUCI

GEUJOK KEUMUDOE GEUPEULHEUH GAYAM

GEUJOK PILIHAN SYURGA NURAKA

TUGAS  DIKAMOE MEMPERINGATKAN

YANG LEUBEH REUMBANG TA INGAT KEUDROE

MEUHAN TATAKOET KEU AZEUB TUHAN

PUBUET BEURIJANG PUE-PUE GALAK DROE

DIDALAM PINEE TEUMPAT BOEH KUWAH

DIDALAM CAPAH TEUMPAT BOEH ASOE

HABA PEU INGAT KALAM SIPATAH

NEUBRI YA ALLAH HAJAT BEUSAMPOE

LINCAH COT UROE BOEH PANJOE PATEUN

ASAM BOEH KIYUEN CAMPLI NGOEN SIRA

JIKALA MATEE SIDROE-DROE UREUNG

PEUT HOE GEUBULUNG HARTA PUSAKA

DI ULAT ASOE DI BUMOE TULEUNG

TEUMA DI UREUNG GEUTUNG PUSAKA

NYAWOENG GEUPULANG MILEK POTOLLAH

MEU DI GATA SAH HANA SAPUE NA

MALINGKAN YANG NA AMAI IBADAH

TAAT KEU ALLAH MASA LAM DONYA

TAPUBUET SUROEH PEUJEU OH TEUNGAH

YANG LARANG ALLAH BEK TAKEURIJA

KON LAGEE JINOE LEUMAH TAPANDANG

MEURUPAH JALAN TIYEUB NURAKA

KON INOENG SAJA YANG MEUNAN MACAM

DI UREUNG AGAM PIH SABOH GURA

SOK LUWEU PUNTOENG DENGOEN OK PAYANG

LIKAK BAK JALAN RAWOEN LAM KOTA

DISANGKA PA KRI ADAP PAKAIAN

DALAM ISEULAM DISANGKA HANA

YANG LADOEM MACAM NABAN KEULIDEE

YANG SABOH LAGEE NABAN BEULAGA

LADOEM BAN KAMENG DIKAP LEE ASEE

LUWEU NGOEN BAJEE  AURAT U LUWA

TEUMAN YANG LAEN PIH SABOH MACAM…………

BAK GELEK EK NAM MATEE EK DUA

LALOE PEUTIMANG ACI SIKUPAN

TUWOE SEUMBAHYANG  LUHOE NGOEN ASA

KA GADOH LALOE BAK MEUEN BATEE

BAK CARI ULEE KA GADOH ASA

KA GADOH MEUGREB SYETAN PEULALE

KA MATEE EK LHEE KATUWOE INSYA

DIPIKE KIBAN HUKOEM SEUMBAHYANG

JEUT MEUNAN MEUTAN KIBAN YANG HAJAT

TUHAN GEULAKNAT UREUNG LAGEE NYAN

NURAKA JAHANAM GEUKEUBAH TEUMPAT

GEU PEUTROEN KUTOK GEUTAMAH BALA

UREUNG DILINGKA PIH MEUNAN ULAH

KEUNOENG BALA AM NABI MEUSABDA

MENYOE DIGATA HANA TACEUGAH

GUE YUE TOET RUMOH NABI NEU PEUSAN

TINGGAI SEUMBAHYANG SIDROE-DROE HAMBA

OLEH SEUBABYAN  KA WAHAI RAKAN

JAGA SEUMBAHYANG WATEE DI GATA

BEK SEUBAB SIDROE MEUPALOE RAKAN

BEK SIDROE YANG PLANG LAEN MEULALAT

SIDROE YANG PALEH HABEH GOB KARAM

SIDROE YANG CURANG HABEH GOB CACAT

BAK GARA SIDROE UREUNG PUEBUET BROEK

OH GEULHOEM KUTOK BANDUM TARASA

WATE TROEH BALA BARO MEUTUMPOK

NYAN BAN BARO SIBOK PUJOE RABBANA

MISEU TSUNAMI CONTOH LOEN PEUGAH

BALA BAK ALLAH TANYOE GEUHUKOEM

SEUBAB SALAH DROE TUWOE KEU ALLAH

TA PUBUET SALAH MEUNURUT HUKOEM

RUGOE TAPEUDOENG SYARIAT ALLAH

SEURAMOE MEKKAH KA TEUHAH TAMPOENG

DEURI NGOEN BARA KAHABEH PATAH

SYARIAT ALLAH HANLE SOE DUKOENG

NANGGROE ACEH NYOE SEURAMOE MEKKAH

HAN JI THEUN CAPRAH ALA KAFIROEN

HAN JI THEUN MAKSEIT YANG LARANG ALLAH

AURAT TAPEUHAH TAPEUGOET LUTOENG

MAKA LAGE NYOE BALA BAK ALLAH

SEURAMOE MEKKAH NEUKEUMEUK GULOENG

KAROEH LAM MAKSEIT SEURAMOE MEKKAH

RATA DAERAH DIPUBUET SIROENG

GEUMPA TSUNAMI NAMA JIPEUGAH

DILEE JAMEUN SAH GEUKHEUM IE BEUNA

TANDA QIAMAT ULAMA PEUGAH

SIPLOEH BOEH SAHAH GEUPEUGAH TANDA

ANTARA SIPLOEH TANDA GEUPEUGAH

IE LAOET ALLAH YUE TROEN U GAMPOENG

JAK SAMPOEH MAKSEIT LAM BUMOE ALLAH

SUPAYA UBAH AKAI HAMBA LOEN

NYAN KEUH IE BEUNA MAYANG THAT DAHSYAT

REUBAH U DARAT KA JIGOEM KUTA

HABEH DI SAMPOEH TIMU NGOEN BARAT

MATE DUM RAKYAT HABEH HAREUTA

DARAT NGOEN GAMPOENG KUTA NGOEN PANTE

MANYET MEUGULE SOE KUBU HANA

UREUNG DUM JIKLEK JIEPLUNG KA CRE BRE

LINTOE JIH TANLE ANEUK PIH TAN LEINA

UREUNG DUM JIKLIK KA JIKHEUN MEUNOE

SALEH UROE NYOE QIAMAT DONYA

UROE SEUNEULHEUH MEU MAT MAT JAROE

PEU MEUAH KAMOE WAHE SAUDARA

ACEH KA GEUBRI LAGEE GEUPEUGAH

SEURAMOE MEKKAH GEUKEUMEUNG GULOENG

GEU KEUNEUK SAMPOEH SEURAMOE MEUKKAH

MEUNAN KEUH ULAH NIBAK PEUNYUM LOEN

KUASA TUHAN KA NEUPEU LEUMAH

IE LAOET ALLAH YUE TROEN U GAMPOENG

UNTUK TEUGURAN KEU URUENG SALAH

BEK CANGKLAK LEUPAH ATEUH BUMOE LOEN

KUBRI RASEUKI NIKMAT KUTAMAH

KU YUE IBADAH SYUKOER KEU ULOEN

BEK PUBUET CURANG YANG LARANG ALLAH

BEK PUBUET SALAH MEULANGGAR HUKOEM

GEUMPA TSUNAMI TEUGURAN ALLAH

ACEH KA CAPRAH JIPEUGOET LUTOENG

KEUNOENG BALA AM SIKSA BAK ALLAH

SIDROE YANG SALAH BANDOEM GEUHUKOEM

MEUHOKA CAROENG PANGKAT YANG MEUGAH

TACUBA SANGGAH BAKAT PEUGULOENG

BUMOE LOEN YOK-YOK BANGUNAN REUBAH

NGOEN IE KU SAMPOEH RATA JEUT GAMPOENG

ASTAUFIRULLAH LIDAH KASALAH

KAROEH LOEN PEUGAH MEUTUKA UJOENG

SYARIAT ISEULAM TAPUWOE KISAH

JINOE LOEN PEUGAH SYARIAT HUKOEM

DISANGKA PA KRI HUKOEM SEUMBAHNYANG

TAK KALA TINGGAI MEUSIKUTIKA

BANDUM LAT BATEE LAM BUMOE TUHAN

KEU GATA RAKAN SUMPAH SEURAPA

YANG PUBUET MAKSIET KUTOK LE TUHAN

HANA SEUMBAHYANG DEUNGOEN PUASA

HANA DIPATEIH OH TROEH SERUAN

LALOE NGOEN BOKBANG PEUSEUTOT DONYA

NA’UZUBILLAH LINDOENG BAK TUHAN

BEUTEUTAP IMAN DIDALAM DADA

BEKROEH TAPUBUET YANGKA GEULARANG

BEUDOEH BEURIJANG TAUBAT NASUHA

WAHE KAWOEM LON UMMAT ISEULAM

TAPOEJOE TUHAN AZAWAJALLA

LIMOENG BOEH WATEE PUBUET SEUMBAHYANG

DALAM QURU’AN TUHAN PEUNYATA

TAPUBUET SUROEH PEUJIOH LARANG

SUPAYA TIMANG MENGAKU DIRI

KUPUE GUNA DROE TAKHEUN ISEULAM

MEUTAN SEUMBAHYANG HANA AREUTI

KAPUE RUPA GLEH PUTEH MEUKILAT

KUPUE DAK PANGKAT MASA LAM DONYA

OH TROEK LAM KUBU TANYOE GEUSEUTRAP

LE MALAIKAT KA HANA REUDA

KUPUE GUNA MEUH LAM PEUTOE BEUSOE

MOTO BAK JAROE HANALE GUNA

MEUNYOE TAN AMAI KEU TUHAN SIDROE

DUDOE GEUPASOE DALAM NERAKA

PANGKAI GEUTANYOE TAWOE BAK TUHAN

PUBUET SURUHAN LAGEE YUE NABI

MEUNYOE KA MATE HANA LE JALAN

TANYOE GEUSIMPAN DALAM PRUET BUMI

IJA YANG PUTEH LHEE LAPEH TABA

PEPEUN KEURENDA LABANG LHEE INCI

MEU SIKRAM INTAN SAJAN TEUH HANA

TINGGAI DI DONYA SAMA SEKALI

TINGGAI BERLIAN INTAN PERMATA

TINGGAI HAREUTA DI COEK LE WALI

TANYOE KA MATE HANLE MEUGISA

MANGKARON SIKSA HANA BERHENTI

TIMPLAK NGOEN SU EU HANPOE TAKIRA

MEUGANDA GANDA AZEUB BAK RABBI

WAHE RAKAN LON KAWOEM SAUDARA

BEUDOH NEUGISA YANG UMAT NABI

BEUDOH SEUMBAHYANG SABAN KUTIKA

PUJOE RABBANA PEUTANG NGOEN PAGI

PANGKAI NGOEN TAWOE NANGGROE KALBAKA

NGOEN PEUGLAH BAYA TAJAK BAK TITI

HAROEH TA UDEP WAJEB TA FANA

NYAWOENG GEUHILA SUROEH ILAHI

NYAWOENG  LAM BADAN GEUTRAN U LUA

BEUTHAT BEU RAJA HANA PEUDOLI

BEU THAT BEUTAPLUENG U DALAM RIMBA

NYAWOENG GEUHILA SUROEH ILAHI

WALAUPUN TALOEP LAM PEUTOE KACA

NYAWOENG KEULUA KATROEK BAK JANJI

BANDUM GEUTAYOE MEUHAT TA MATEE

KA HANA SABEE UDEP LAM DONYA

BEUDOEH TATAUBAT BEK THAT LALOE LE

BEK WATEE MATEE AMALAN HANA

BEUDOH SEUMBAHYANG OH TROEK BAK WATEE

TAPIYOEH DILEE BEKLE KEURIJA

BAK TAPUASA PIH MEUNAN LAGEE

OH TROEK WATEE BULEUN PUASA

FITRAH NGOEN ZAKEUT KAWAJEB TA BRI

TAEK U HAJI MEUNYOE KUASA

SUROEH NGOEN TEUNGAH BEK TAMEU UNGKI

KEU SABDA NABI BEUTA PEUCAYA

SOE YANG PEUCAYA KEU SABDA NABI

TEUMPAT TUHAN BRI DALAM SYURUGA

AZEUB SEKSA MEUYANG MEU UNGKI

SITKA MEUDALI YOEH PHOEN DI DONYA

PUBUET PUE YANG ROEH PAJOEH PUE YANG KRI

YANG SUROEH RABBI HAN DIKEURIJA

MEUYOE TAPAKAT PUBUET SEUMBAHYANG

PEUGAH ALASAN KA KUTO IJA

SEUMBAHYANG HANA PUASA PIH TAN

SOEPOE PAKAIAN TACUBA KIRA

BAK PUBUET MAKSIET YANGKA GEULARANG

MEUBEK HAI RAKAN MEULOMBA LOMBA

UREUNG YANG HANTEM PUBUET SEUMBAHYANG

BANDUM URUSAN HANJEUT PEUCAYA

SEUDANGKAN TUHAN YANG PEUJEUT GOBYAN

TUHAN GEULARANG DIJIH KEURIJA

ALHAMDULILLAH KADEUH TAPANDANG

DAN LOM BAK KORAN KALHEUH TABACA

SEURAMOE MEUKAH KANA HARAPAN

SYARIAT ISEULAM DEUYUT JIH KANA

KEU UREUNG SALAH KANA HUKUMAN

GEU CAMBOEK RIJANG DIKEU RAKYAT BA

WALAU PANCURI GOH GEUKOEH TANGAN

DALAM BINAAN BARU GEUCOBA

UNTUK PENZINA MEUNAN SIT MACAM

GOH LOM HAI RAKAN RAJAM GEUPEUNA

GOH LOM GEUKISAS GEUBRI HUKUMAN

SUEBAB HAI RAKAN MANTOENG GEUBINA

MEUNYOE KA KAFFAH TAYOE JALANKAN

QISAS NGOEN RAJAM HUKOEM AGAMA

TAPI BEK PEUGAH KEUJAM ISEULAM

ZINA HAI RAKAN AKIBAT RAYA

RAYA AKIBAT  BAK PERZINAAN

MAKA HUKUMAN GEUBRI SEUTIMPA

JEU OH PEUNGAROEH NASAB TURUNAN

MAKA SEUBAB NYAN GEULARANG ZINA

SEUBAB AKIBAT ZINA GEULARANG

BAK PERZINAAN WAHE RAKAN DROE

KA GADOEH NASAB ASAI TURUNAN

OLEH SEUBABNYAN LARANG ILAHON

OH LAHE ANEUK BAK PERZINAAN

BANGSA ANEUK NYAN KEUMA JIH LANGSOENG

MEUBALEK NASAB ASAI TURUNAN

ANEUK JAHANNAM JIKKHEUN LAM GAMPOENG

WATEE JITUPUE YANG MEUNAN MACAM

LAJU NGOEN PARANG TANYOE DI HUKOEM

AKIBAT SINAN JEUT KEUKACAUAN

JEUT PERMUSUHAN DI DALAM GAMPOENG

SEUBAB GEULARANG ARAK NGOEN JUDI

SINAN MULAI NAKAL PIKIRAN

WATEE KA MABOK HAN SADAR DIRI

SINAN TERJADI DUM KEURUSUHAN

WATEE KA TALO BAK LAPAK JUDI

SINAN MULAI RUSAK PIKIRAN

PUBLOE PUE YANGNA NGOEN YUM TAN MEUKRI

KEU PANGKAI JUDI BAK HARAP MEUNANG

MEUNYOE YANG TALO RIWANG KEUMBALI

NIBAK ISTERI LAKEE PINJAMAN

LAKEE GLEUNG JAROE DEUNGOEN GLEUNG GAKI

MEUNYOE HAN JIBRI JIH JIH DI ANCAM

LADOEM SAMPOE CREE DEUNGOEN ISTERI

LADOEM TROEK SAMPOE BAK KEMISKINAN

YANG LADOEM SAMPOE JEUT KEU PANCURI

AKIBAT JUDI RUSAK PIKIRAN

MEUNYOE TAPUBUET YANG MEUNAN MACAM

PREEH AZEUB TUHAN U ATEUH GATA

OH UROE DUDOE TUHAN NEUPEUCEP

NGOEN ULEU HAREH GEU AZEUB GATA

ULEU NEURAKA GEUPEUNAN HAREH

IKU JIH KEUDEH U MIYUB DONYA

TUHAN PEURINTAH BAK ULEU HAREH

LIMOENG DROE MEUCEH RASEUKI GATA

PEUREUTA MAPHOEN YANG THAN SEUMBAHYANG

LALOE NGOEN BOKBANG PEUSEUTOT DONYA

KEUDUA KAWOEM WAHAI SAUDARA

YANG TAN PUASA BULEUN RAMADHAN

YANG KEU LHEE KAWOEM PEUMINUM ARAK

UREUNG YANG GALAK JUDI NGOEN ZINA

KAWOEM YANG KEU PEUT TUHAN PEUTURI

ZAKEUT HAN JIBRI HAREUTA JIH NA

KEU LIMOENG KAWOEM KA WAHAI TEUNGKU

KEU MA DENGOENG DU DIDAROHAKA

SIDUMNAN SAKET AZEUB TUHANKU

GOEH AZEUB KUBU ULON CERITA

NA KEUJADIAN LAEN SEUJARAH

MASA KHALIFAH ABU BAKARI

OH KALEUH WAFEUT DI RASULULLAH

NEUMAT PEURINTAH GEUNANTOE NABI

NIBAK SI UROE GOBNYAN MEULANGKAH

DENGOEN JAMAAH BAK UREUNG MATE E

OH BAN SARE TROEK NGOEN CARA RINGKAS

SEUMANOE BAGAH GAFAN KA HASE

YOHNYAN GEUPEUTROEN AKAN JEUNAZAH

UBAK LEUN RUMOEH LE WAREH AHLI

UNTUK GEUPUBUET SHALAT JEUNAZAH

ULEH JAMAAH SAHABAT NABI

BAK WATEE GEUDOENG LAM SEUH JAMAAH

GEUKALON LEUMAH NIBAK SIMATE

GAFAN MEUGRAK GRAK GEUNTA SILEUPAH

PAREKSA BAGAH NGOEN GUNDAH HATEE

OH GEUPEURIKSA GEUKALON LEUMAH

ULEU NA SABOH HEBAT BUKON LE

JIGRUEB BAK TAGUE MANYET  SYAKUWAH

ASOE JIPAJOH DARAH KA ILE

YOHNYAN SAHABAT KHALIFATULLAH

GEU KEUNEUK BUNUH ULEU BEUMATE

MAKA DI ULEU JI  CUNGGOK BAGAH

UCAP SYAHADAH FASEH BUKONLE

OH LHEUH DI UCAP KALIMAH SYAHADAH

UBAK KHALIFAH MEUNOE JIKHEUN KRI

KEU PEU NEUPOH LOEN WAHAI KHALIFAH

ULOEN TAN SALAH WAHAI HABIBI

NEUBANGKET ULOEN KEUNOE LE ALLAH

AZEUB YANG PEUDEH KEUJIH GEUYOE BRI

MULAI JINOE SAMPOE KIAMAT

JIH GEUYYUE LAKNAT OLEH ILAHI

KAREUNA DIJIH RAYA THAT SALAH

DISISI ALLAH TUHANKU RABBI

SALAH PERTAMA MANYET SYAHKUWAH

JIDEUNGOE KASAH AZAN BERBUNYI

KADEUH DIDEUNGOE SERUAN ALLAH

JIPOEH BEURAKAH HAN DIPEUDULI

UBAK JAMAAH HAN JIMEULANGKAH

NGOEN SEUBAB NYANKEUH AZEUB GERUYUE BRI

SALAH KEU DUA MANYET SYAHKUWAH

ZAKEUT HAN JIBOH FITRAH HAN JIBRI

SALAH YANG KEU LHEE YANG THAT AZIMAH

DISISI ALLAH TUHANKU RABBI

TUTOE ULAMA WATEE GEUPEUGAH

NASEHAT KEUJIH HAN JIPEUDULI

JITOEP GEULIYUENG HO LAEN LANGKAH

LOM DIPEUJAEH NGOEN TUTOE KEUJI

ADAK JIPATEIH BAN GOBYAN PEUGAH

HAN SIT DITIMOH IJA PUPANJI

MEUNAN DI ULEU HABA JIPEUGAH

UBAK KHALIFAH ABU BAKARI

OH NOE KATAMAT HABA SEUJARAH

NEUCOK NEUKEUBAH PASOE LAM HATE

SUPAYA TANYOE BEULE LAM TABAH

TAPUJOE ALLAH BEK SYOEK SYOEK SANGKA

OLEH SEUBABNYAN HAI KAWOEM SABAT

PUBUET IBADAT UROE NGOEN MALAM

TACOK DONYA NYOE SIKADA HAJAT

BEK SAMPOE LEWAT BINASA BADAN

BEK SAMPOE LALOE BAK JAMBO MADAT

PUBUET IBADAT DIGATA HANA

LALOE NGOEN MAKSIET TUWOE IBADAT

LAGEE SANGKILAT HANA AGAMA

KA JIMEUDOA MENYOE NA SAKET

KA JIMEURATEB MENYOE NA GEUMPA

SEUMBAHYANG WAJEB UROE JEUMEUAT

SEUMBAHYANG SUNAT OH UROE RAYA

MEUHANA GEUMPA SEUMBAHYANG TANLE

DI ADEE PADEE TIKA MUSALLA

IJA SEULEUKOEM SIMPAN U SANDENG

SEULAMA KAYEM MEUTANLE GEUMPA

DALAM LAMPOH U NA NALEUENG AWE

SIDEH DALAM GLE LEE NALEUENG LAKOE

HABA PEU INGAT LAM BENTUK SYA’E

LEUBEH MEUSAMPE TA INGAT KEUDROE

SEUBAB GEUTANYOE WAJEB TA MATEE

OH UROE PAGE AZEUB BRAT TULOE

SEJAK LAM DONNYA YOEH PHOEN TAMATEE

SINAN BOH HATE KAPHOEN MUPALOE

TEUMA LAM KUBU AZEUB BUKONLE

SAMPOE OH PAGE TROEK UROE DUDOE

BLANG PADANG MASYA LUAH MEUHALAK

LHEE RIBE THOEN JAK TA PASANG GUDA

SINAN PIH AZEUB RAYA BUKOEN LE

HAI CEUDIENG PADE SABDA SAIDINA

DI PHOEN BAK SUKREUT WATE TA MATEE

BAH LE BOH HATE BAK LOEN CI RIKA

NYAWOENG DI WASIET WATE TA MATEE

DENGOE BOH HATE NABI MEUSABDA

COK KEUPEDOMAN HABA LOEN PEUGAH

MEUNOE BAN ULAH HADIS MUSTAFA

SABDA JANJONGAN RASUL POTAULLAH

RAWI AINSYAH NYAN ASOE LEUMUNG

NIBAK SI UROE DI RASULULLAH

NEUDUEK DIRUMOEH DENGOEN CUT MEUGLEUNG

NEU KEUNEUK BEUDOH SITI AINSYAH

NABI NEUPEUGAH YUE PIYOEH SISEUM

PIYOEH DISAMPENG NYAN RASULULLAH

NABI PEUREUBAH ULEI LAM LEUMUNG

NIBAK WATEE NYAN SITI AINSYAH

MEURAWOEN LEUMAH LAM HATE JIKHEUN

HANTOEM YANG KAKA LAGEE NYOE ULAH

DI RASULULLAH GEU EIH LAM LEUMUNG

SALEH GEUNEUWOE U BAK POTAULLAH

SAYANG AINSYAH KEU UMMAT BANDUM

MEURAWE RAWE HATE KA GUNDAH

MEUNAN KEUH LEUMAH LAM HATE JIKHEUN

TROEK WEUH NGOEN INSEUH SITI AINSYAH

IE MATA BOEH BAH ILEI LAM LEUMUNG

JATOH BAK JASAD DI RASULULLAH

NABI NEUBEUDOH NEUKHEM TEUSEUNYUM

NIBAK WATEE NYAN SITI AINSYAH

JI PEU EK SEUMAH KEPADA RASUL

LEUHNYAN MEUSABDA SITI AINSYAH

PAKRIBAN ULAH OH MATEE UREUNG

OH WATEE MATEE HAMBA DI ALLAH

U BAK AINSYAH NABI PEUMAKLUM

LHEUH NEUCOK NYAWOENG ULEH POTAULLAH

HARUS TAPINAH PAKAIAN BANDUM

TAPLOEH SEUREUBAN SUET BAJEE JUBBAH

BEK BAGAH BAGAH DI MAYET JIKHEUN

ULEE LOEN HANCOE NANYUM SANG BICAH

BEUGOET NEUPEUGLAH BEULEUHEUN LEUHEUN

BAK TASEUMANOE MEUNAN SIT ULAH

MANYET SUEMEUGAH MEUNOE LOEM JIKHEUN

BEK NGOEN IE TUTOENG TUBOH LON NEURAH

TUTOENG MEULEUPAH NYAWOENG LOEN GEUTUENG

DENGOEN IE LEUPIE NEUPLE BEU BAGAH

MUKA LOEN NEURAH BEK ROH LAM HIDONG

WATEE TABALOT MANYET LAM GAFAN

SIPATAH KALAM MEUNOE LOM JIKHEUN

BEK AWAI MUKA NEUBOH LAM GAFAN

LOEN KEUNEUK PANDANG ADOE NGOEN ADUEN

AYAH NGOEN BUNDA KEURABAT JIRAN

HO JUDO BANDUM PAT ANEUK KANDOENG

GATA LOEN TINGGAI SINOE DI ALAM

ULON, LOEN RIWANG NIBAK ILAHON

SEUMBAHYANG LIMOENG MEUBEK TATINGGAI

BEK PUBUET CURANG YANG TEUNGAH RABBON

HINGGA TROEK ULEUN MANYET GEUGULAM

TUNGKU SEUMBAHYANG PEU SAMPOE HUKOEM

GEUCOEK KEURENDA NIBAK MASANYAN

UBAK KUBURAN GEUBA LE LANGSOENG

NIBAK MASANYAN MANYET MEUHABA

WAHE SAUDARA YANG BAWA ULOEN

BEK BAGAH-BAGAH ULOEN NYOE NEUBA

LOEN NEUK NGIENG RUPA SAUDARA KAWOEM

ULOEN AMANAH SIPATAH HABA

TAPEUTROEK SIGRA UBAK ANEUK ULOEN

TANYUE IBADAT BEK SAGAI LUPA

MEUNYESAI TEUMA BEK LAGEE ULOEN

OH LAGEE LOEN NYOE HANLE MEUGUNA

INGAT SAUDARA HAI WAREH KAWOEM

MENYET MEUHABA MEUNAN KEUH MACAM

SIT JEN NGOEN INSAN YANG HANA MUFOEM

LAEN NIBAKNYAN DUM ASOE ALAM

SAMPOE BINATANG HABEH JIMAKLUM

OLEH SEUBABNYAN KA WAHAI RAKAN

BEUDOH BEURIJANG TAUBAT NASUHA

WASIET SI MANYET KALEUH LOEN PEUGAH

SYARIAT ALLAH TAPUWOE UJOENG

SYARIAT ISEULAM TAPUWOE KISAH

BAHLE LOEN PEUGAH BACUT HAI KAWOEM

JINOE DI ACEH SAYANG MEULEPAH

SYARIAT ALLAH HANLE SOE DUKUNG

MISEU UMPAMA HABA LOEN PEUGAH

SABOEH NASABAH NEUCUBA PUPHOEM

SYARIAT ISEULAM SECARA KAFFAH

HAFAI BAK BABAH DENGAN BAK MIMBA (R)

HANA JIPUBUET LAGE JI PEUGAH

HANASOE TEUGAH YANG PAJOEH RIBA

JUDI NGON BUNTUT HANASOE TEUGAH

PUELOM TAPEUGAH SOAL NARKOBA

ARAK NGON TUAK HANPUE TAPEUGAH

JIPUBLOE BEBAS DUSOEN NGON KOTA

PUE LOM BAK HOTEL BERBINTANG MEUGAH

SINAM DI KEUBAH INOENG DALUPA

TUNA SUSILA NAMA JIPEUGAH

MITA NAFAKAH LAGENYAN CARA

TEUMA YANG LAEN HANPUE LOEN PEUGAH

PERGAULAN BEBAS AGAM NGON DARA

SANG – SANG OH TA’EU KALHEUH MEUNIKAH

MEUNAN KEU ULAH BAK JIDUEK HONDA

JIKEUMPUL KEUBOE MENAN ISTILAH 

DUEK SABOEH RUMOEH DISEWA KAMA

MANGAT JEUT HEMAT MEUNAN JIPEUGAH

SAMBIL KULIAH HEMAT BEULANJA

HANA JITUPUE RAYA THAT SALAH

GOHLOEM MEUNIKAH AWAK NYAN DUA

SALAH BAK ADAT NGON HUKUM ALLAH

SALAH MA NGON YAH HANA GEUJAGA

MAKA NEUPEUTROEN BALA LE ALLAH

SIHARAM JADAH NEUKEUMEUK GULOENG

GEUMPA TSUNAMI NEUBRI LE ALLAH

CARA NEUTEUGAH KEUDROE NEUH LANGSOENG

MEUNYOE SIDUMNAN HANA SIT UBAH

TAPREH BUET ALLAH DONYA GEUGULOENG

BANDUM SIT MUNGKEN MENYOE BUET ALLAH

SEP NGON GEUPEUGAH NGON KUN PAYAKUN

SEUBAB NEUPEUTROEN BALA LE ALLAH

KALHEUH LOEN PEUGAH MEUNUROET ULOEN

ATRA NYAN BANDUM RASIA ALLAH

JINOE LOEN PEUGAH  DO’A NGAT AMPOEN

TANYOE MEULAKEE KANI BAK ALLAH

SEURAMOE MEKKAH BEUNEU PEULINDOENG

BERKAT SYUFAAT DI RASULLAH

BEUNEU PEUSIBLAH ACEH NEU TULOENG

DEUNGOEN BISMILLAH LOEN PUJOE  RABBI

YA ALLAH NEUBRI BEULAM SEUJAHTRA

ALHAMDULILLAH RABBUL IZZATI

YANG MAHA SUCI  AZAWALJALLA  ......................................................................      Amin

SEULAWEUT SALEUM LHEUHNYAN KEU NABI

RASUL YANG AKHE  SAIDIL AMBIYA

BEUREUKAT SUFAAT PANG ULE NABI

YA ALLAH NEUBRI  BAN HAJAT PINTA  .......................................      Amin

BALA TSUNAMI BEKLE ALLAH BRI

BEKLE TERJADI MALA PETAKA

YANGKA MUSIBAH  DALAM TSUNAMI

YA ALLAH NEUBRI PANGKAT  SYUHADA  ..........................................................      Amin

ALLAH HU ALLAH  ALLAH HU RABBI

DAME HELSINKI BEUJEUT PEUNAWA

BEUSIJUEK HATE  GAM DEUNGOEN R.I.

BEKLE TERJADI DAKWI NGOEN DAKWA  ...................................      Amin

BEUJEUT KEU DAME GAM DEUNGOEN R.I.

BEUJEUT ABADI KARU BEKLE NA

BEUJEUT KEU PATOEK SABOEH PONDASI

BEKLE TERJADI MUPRANG SAUDARA  ................................................................      Amin

ALLAH HU ALLAH ALLAH HU RAHMAN

NEUBRI BEU AMAN  ACEH SENTOSA

ACEH BEK KARU  LUA NGOEN DALAM

SUPAYA AMAN TABANGUN BANGSA  ..........................................      Amin

DOA LOEN LAKE BAK DROE NEUH ALLAH

JAROE DUA BLAH LOEN LAKE  DOA

ACEH NYOE JINOE NEUBRI BEU MEUGAH

DEUNGAN AFUAH ALEM ULAMA  .........................................................................      Amin

YA ALLAH NEUBRI BAGI KEU RAKYAT

BEU JI IBADAT PUJOE RABBANA

ACEH LHEE SAGOE  BEUROEH  LAM TAUBAT

PEUDOENG SYARIAT  HUKOEM AGAMA  ....................................      Amin

NEUBRI YA ALLAH TEUHAH  PIKIRAN

BANDUM PIMPINAN  ACEH MULIA

SEURAMOE MEKKAH SYARIAT TUHAN

BANDUM ATURAN KEUNAN MEUPUNCA  ..........................................................      Amin

NEUBRI YA ALLAH LIMPAH MEUKATOE

PEUMIMPIN NANGGROE NEUBRI BAHAGIA

GEUPIMPIN RAKYAT ACEH LHEE SAGOE

TANNYOE GEUHIMBAU PUBUET AGAMA  ..........................................................      Amin

JINOE BERSATU BANDUM GEUTANYOE

ACEH LHEE SAGOE BEU EK SEUJAHTERA

KEUMBANG AGAMA RATA JEUT SAGOE

ACEH TAPUWOE LAGE YANG KAKA  ............................................      Amin

ALLAH HU ALLAH  A LLAH HU RABBOEN

ALLAH KADIROEN   SIDROE YANG ESA

SYARIAT ISLAM ACEH NEULINDOENG

BEUJEUT KEU PAYOENG  DASAR NEGARA  .......................................................      Amin

A LLAH HU ALLAH ALLAH HU RAHMAN

UROE NGOEN MALAM KAMOE MUNAJAT

NEUBRI YA ALLAH  ACEH BEU AMAN

SYARIAT ISLAM BEUMAJU  PEUSAT  ............................................      Amin

NGOEN UNDANG UNDANG  SYARIAT ISLAM

ACEH TAKEUMBANG KIBAN YANG HAJAT

TAPEUDOENG HUKOEM SYARIAT TUHAN

BEKNA  TANTANGAN  E YA HADHARAT  .............................................................      Amin

UREUNG YANG SALAH NEUTUNYOEK JALAN

RIWANG BAK TUHAN  PUBUET IBADAT

BEUROEH LAM SABA  ATEUH COBAAN

BEUTEUGOEH IMAN DI ATEUH BALA  ..........................................      Amin

ALLAH HU ALLAH  TUHAN DI KAMOE

BAK TUHAN SIDROE KAMOE MUNAJAT

BEU DALAM IMAN OH WATE MEUWOW

DALAM DONYA NYOE IMAN SEULAMAT  ...........................................................      Amin

ALLAH HU ALLAH HU RABBI

PEUTROEK HAJATI NEUKABUL DOA

DOSA NEU AMPOEN  SALAHAN KAMI

SYARIAT ISLAMI  NEUPEUSEULAMAT  .........................................      Amin

DOSA YANG KAKA  BANDUM AMPONI

KEU BANDUM KAMI  YANGKA MEUDOSA

BEUSABOEH PAYOENG  KAMOE NGOEN N ABI

BAK ULE TITI NEUPEUGLAH BAHYA  ...................................................................      Amin

ALLAH HU ALLAH  YA RABBUL KADE

ACEH BEKNA LE  MUPRANG SAUDARA

ACEH BEK KARU  BEKLE SU BUDE

ACEH BEK PAKE  SABE SAUDARA  ........................................................................      Amin

NA UZUBILLAH LINDOENG BAK TUHAN

BEUTEUTAP IMAN DI DALAM DADA

BEKROEH TAPUBUET YANGKA GEULARANG

ACEH BEUDALAM TAUBAT NASUHA  ...........................................      Amin

ALLAH HU ALLAH KHALIKUL MANNAN

YANG GASEH SAYANG KEUPADA HAMBA

NEUBRI ACEHNYOE NANGGROE BEU AMAN

NGAT JEUT TAKEUMBANG BUDAYA BANGSA  ..................................................      Amin

SYARIAT ALLAH TEPEUDOENG MAYANG

HUKOEM ISEULAM ACEH BEUJAYA

BEU EK TAPUWOE  NANGGROE ISEULAM

LAGE YOEH JAMEUN  ISKANDAR MUDA  ...................................      Amin

NEUBRI ACEHNYOE ISLAM BEUJAYA

LAGE YOEH MASA JAMEUN AWAI PHOEN

NANGGROE PEUREULAH SINAN PHOEN MULA

DUDOE SAMUDRA WILAYAH GEUDOENG  .........................................................      Amin

HINGGA BERKEMBANG SAMPOE MALAKA

ISLAM JAYA SAMPOE REUTOEH  THOEN

PO TEUMEUREUHOM ISKANDAR MUDA

YANG MAT NEURACA ACEH JAYA PHOEN  .................................      Amin

NEUBRI PEUTUNYOEK E YA  ILAHOEN

BEKLE NA KAWOEM YANG PUBUET DOSA

KAS EB BE YANGKA  KAMOE NEUHUKOEM

DOSA NEU AMPOEN  E YA RABBANA  ..................................................................      Amin

DOSA MA NGOEN YAH BEUNEU PEU AMPOEN

ALLAH YA RABBOEN NEUKABUL DOA

UNTUK PEUMIMPIN RAHMAT NEUPEUTROEN

BEKLE NEU  HUKOEM  E YA HADHARAT  ...................................      Amin

BEK LE NEU AZEUB  BALA NEUPEUTROEN

E YA ILAHOEN KAS EN BE YANGKA

E YA TUHANKU  KAMOE NEUTULOENG

KAMOE NEULINDOENG E YA  HADHARAT  ........................................................      Amin

BEU LEUPIE HATE BEUSIJUEK JANTOENG

KEU BANDUM KAWOEM DI ACEH MEUHAT

INOENG NGOEN AGAM KUTA NGOEN GAMPOENG

PUJOE ILAHOEN SYUKUR KEU NIKMAT  ............................................................      Amin

BAK BUET YANG SALAH TUHAN NEULINDOENG

BEKLE NEUHUKOEM  UROE KIAMAT

KEU BANDUM KAMOE DOSA NEU AMPOEN

BEKLE NEU HUKOEM UROE AKHIRAT  .......................................      Amin

ACEH LHEE SAGOE BEU NEUPEULINDOENG

BEUSABOEH PAYOENG DEUNGOEN MUHAMMAD

BAK ULEE TITI  KAMOE NEUTULOENG

BEULEUPAH LANGSOENG  SYURUGA TEUMPAT  ............................................      Amin

PINTOE SYURUGA  NEUGUNCI BEKLE

YA RABBUL KADE NEUKABUL DOA

BEU DALAM IMAN OH WATE MATE

PAREKSA BEKLE  NEUCEING AMALAN  ......................................      Amin

NABI MUHAMMAD RASUL YANG AKHE

SEULAWEUT SABE SEUPANJANG MASA

BERKAT SYUFAAT RASUL YANG AKHE

ACEH BEU NEUBRI ISLAM BEU JAYA  ..................................................................      Amin

ALHAMDULILLAH SYUKUR KEU TUHAN

KA TAMAT NAZAM HABA LOEN TULEH

TAMAT KARANGAN HABA LOEN KARANG

SYARIAT ISEULAM KALHEUH LOEN PEUCEH

DEUNGOEN TULOENG PO KHALIKUL MANAN

PEUSEHAT BADAN PIKIRAN LOEN GLEH

JINOE LOEN PULANG KEU BANDUM RAKAN

COK KEU PEUDOMAN KEU BANDUM WAREH

NEUCOK KEUCONTOH HABA LOEN KARANG

DAKWAH ISEULAM CARA TEUMULEH

SALAH NGOEN BETOI BEUGOET NEUTIMANG

HABA LOEN NAZAM KADANG SEULISEH

KADANG NA SALAH BAK PEUKHOEK NAZAM

KEURITIK SARAN RIJANG NEUTULEH

BUHU NGOEN BAREH GOHLOEM GOET REUBANG

MAKLUM HAI RAKAN BANJEU TEUMULEH

BAK PIHAK NABSU TULEH KARANGAN

SYARIAT ISEULAM PEU INGAT WAREH

TU OT KEU MEJA BAK TEUNGOH PADANG

TULEH KARANGAN SEUN SEUN SIBAREH

BAK PI’E NASIB CUKOP THAT MALANG

KADA BAK TUHAN HANJEUT TALANGGEH

MEU BU LOEN PAJOEH MEU ENGKOET PIH TAN

KADANG MEUJAN JAN BOH SUNTI LOEN PE’H

BAK EH COT UROE BAK TEUNGOEH PADANG

BAK DUEK CONG RANGKANG NAZAM LOEN TULEH

KADA NGOEN QADA SYUKUR KEU TUHAN

BANDUM ATRANYAN PUTUSAN SIDEH

SULAIMAN GANI UREUNG YANG KARANG

RUMOEH JINOE TAN BANDUM KAHABEH

SEUBAB TSUNAMI RUMOEH LOEN KARAM

JINOE HAI RAKAN NASIB THAT PEUDEH

KAROENG NGOEN WALI KAHABEH KARAM

SIDROE TAN TINGGAI BANDUM HABEH GLEH

ANEUK PEURUMOEH MANTOENG BRI TUHAN

YANG LAEN SIT TAN BANDUM KAHABEH

DISAMALANGA GAMPOENG HALAMAN

JINOE HAI RAKAN PERUMNAS SIDEH

PERUMNAS LINGKE TEUMPAT LOEN TINGGAI

DIYUB RUNTUHAN TSUNAMI PEUGLEH

TEMPAT LOEN MATEE WALALLAH WUALAM

BAK SIDROE TUHAN LOEN PULANG KEUDEH

NEUBRI  TUHANKU UMU BEUPANYANG

BEUDALAM IMAN OH LOEN WOE KEUDEH

BEUNEBRI TEUMPAT SYURUGA LAPAN

UROE KEUMUDIAN NEUPULANG SIDEH

BUDIYA DARI KEU UREUNG KADAM

DIDALAM TAMAN SYURUGA MEUCEH

TEURIMOENG GASEH BAK LOEN PEUNGARANG

SYARIAT ISEULAM  DINAS LOEN PEUCEH

ATAS BANTUAN CETAK KARANGAN

SEUBAR KEU RAKAN KAWOEM NGOEN WAREH

NEUBRI YA ALLAH BAN KADA HAJAT

JEUT KEU IBADAT HABA LON TULEH

NEUTUENG KEU AMAI OLEH HADHARAT

UROE AKHIRAT NEUPULANG KEUDEH

NEUPEUTROEN NIKMAT SEUJAK LAM JEURAT

DINAS SYARIAT NGOEN UREUNG TULEH

UREUNG YANG BACA PAHLA RAYA THAT

YANG DEUNGOEN MEUHAT NASIT U BE PHEH

Pengarang

SULAIMAN A. GANI