Pages

Rabu, 06 Maret 2013

HIKAYAT MEUSIUM ACEH


RANUB SIGAPU
Alhamdulillah loen pujoe Tuhan
Yang peujeut alam, ban sigom donya
Seulaweut saleum, akan janjongan
Pangulee alam, rasul mustafa

Salam’alaikom, jaroe loen layang
Keu bandum rakan, tuha ngon muda
Sambot saleuem lon, si on karangan
Hajat lon peutrang, saboh calitra.

Gantoe lon jak droe, lon bi utusan
Geulantoe badan, jak saweu kawom
Gantoe uloen bi, kupi sicawan
Sambot hai rakan, haba lon suson

Museum aceh, saheh lon peutrang
Asoe di dalam, hajat loen suson
Pue –pue naseukah, asoe di dalam
Yoh masa pajan, peudong awai phon

Ngoen rumoh aceh, syareh lon bayang
Pakon jeut meunan geupeugoet tampoeng
Pakon di riyeun, ganje bilangan
Keupeu peu manyang, bak jiduek anjong

Pakon kiblat, haroi beutimang
Pakon geuboh nyan, nyan cakradonya
Dimeusu keudro, dilee saboh jan
Lageuem jih meunan, meunyo bahaya

Sulaiman gani, tuleh karangan
Gampong halaman, di samalanga
Salah ngon beutoi, beugot neutimang
Irot ngon irang, kuwieng ngon teupat

Maklum rakan droe, banjeued keumarang
Bak peukhok nazam, goh lom ahli that
Meu’ah lon lakee, meuribee kalam
Haba lon nazam, kadang na silap

Neubi ya Allah, ban kada hajat
Jeuet keu ibadat, haba lon tuleh
Neutueng keu amai, oleh Hadharat
Uroe akhirat, neupulang sideh

Neu peutron nikmat, seujak lam jeurat
Iman seulamat, oh lon woe keudeh
Keupala museum, meunan sit meuhat
Ureueng po teumpat, haba lon tuleh

Neubi tuhanku, beutrok ban hajat
Museum meuhat, teurimong gaseh
Keu pak Nurdin Abdurrahman, badan beu sehat
Asoe beumangat, pikeran beugleh

Keu pak hamid rasyid, meunan sit meuhat
Doa lon intat ngon hate khaleh
Neubi seujahtera, dua ureueng nyan
Yang mat pimpinan, museum meuceh

Beusapue pakat, bulat pikeran
Dua ureueng nyan, pikeran beugleh
Museum aceh, aweuek bak gob nyan
Geumita jalan, peumaju habeh

Miseue lagenyoe, peugot karangan
Bak ulon tuan, ka geutanyoe tuleh
Peugot hikayat, asoe di dalam
Mangat jeuet jipham, le bandum wareh

Bukon le sayang, keu bungong macang
Luroeh lam karang, oh ujeun leubat
Ranup sigapu, ohnoe lon karang
Alaikomsalam, saleum peuintat

MUSEUM ACEH
Dengan bismillah, lon puephon kalam
Lon pujoe tuhan, azza wajalla
Seulaweut saleum, akan janjongan
Pangulee alam, saidil ambiya

Po ma ngon ayah, guree lon sayang
Jaroe lon sayang, do’a lon pinta
Neubi Tuhanku, pangkat yang manyang
Ban lhee ureung nyan, tamong syuruga

Keu ulon neubi, beugleh pikiran
Lon keuneuk karang, saboh hikayat
Museum aceh, saheh lon peutrang
Asoe di dalam, lon neuk riwayat
Asai mula phon, dilee lon peutrang
Yoh masa pajan, museum meuhat
Masa belanda, dilee saboh that
Peugot pameran, dilee saboh hat

Di jawa teungoh, kota seumarang
Sinan hai rakan, pameran meuhat
Peudeuh koleksi, pusaka moyang
Peugot tarian, budaya adat

Habeh pameran, peusapat barang
Yue bawa pulang, u aceh meuhat
Siblah rot timu, toe ngon blang padang
Sinan hai rakan, na rumoh adat

Na rumoh aceh, nyan peninggalan
Peusapat keunan, dum barang adat
Jiwoe belanda, jiteungoh jepang
Dudo nibaknyan, merdeka leugat

Le teuku hamzah, yue pinah rijang
Bek le balang padang, hana soe rawat
Komplek BAPERIS, yue pinah barang
Bak saboh bidang keulola meuhat

Iskandar muda, rumpun geupeunan
Nibak badan nyan, yue uroih meuhat
Dudoe geupulang, keu pendidikan
Nibak masanyan, geupeugot surat

Na lhee thon tempoe, dudoe keumudian
Resmi oh lheuh nyan, jeut milek P.K
Le daoed yusoep, meuntri wateenyan
Geuresmikan, nibak tanggai sa ( 1 september 1980)

Keu hai sejarah, meumada oh nan
Soay bangunan, lon neuk calitra
Didalm komplek, museum sinan
Na peuet bangunan, lon seubot nama

Phon rumoh aceh, saheh geupeunan
Asoe di dalam, meumacam rupa
Geudong pameran, kedua lheuh nyan
Keu lhee hai rakan, nyan cakradonya

Keupeut pustaka, lengkap hanaban
Bandum na sinan, seujarah bangsa
Seujarah aceh, leungkap di sinan
Masa keurajeun,  iskandar  muda

Nasihat jameun, endatu keubah
Miseue seujarah, iskandar muda
Miseue hikayat, tambeh tujoh blaih
Do’a akasyah, hikayat musa

Ujeun pih jitoh, guroh ngon kilat
Jiteubiet asap, lam bate sira
Keumeurah puteh, tuleh hikayat
Baca beutamat wahe saudara

Namiseue pinto, ulon peugah ban
Pakon jeut meunan, diyup selasa
Pakon rinyeun, peugot di sinan
Meupakon sit han, pat laen saja

Beurangkasoe ek, dalam rumoh nyan
Adat jih meunan, tundok kepala
Meunyan isyarat, saboh keulambang
Meunyo han meunan, sopan jih hana

Kameunyo sombong, teugak ngon badan
Di aceh pih han, teurimong gata
Miseue di pinto, ubit hana ban
Nyan pih hai rakan, saboh peutanda

Pakon seuramoe, luah hana ban
Neu coba rakan neu peuphoem makna
Pakon di riyeun, ganje bilangan
Pakon jeuet meunan, meupue kareuna

Kupue pue mayang, bak jiduek juree
Kupue bagi lhee, ruweung yang raya
Kupue di rambat, bak teungoh juree
Kupue peurelee seuramoe muka

 Di rumoh inong, pakon rot barat
Rot timu meuhat , anjong lon teuma
Kupue bak tungoh, geu peugot rambat
Kupue ngoen kiblat, peuseutot  bara

Pakon rumbia , geuboh keu bubong
Pakon taloe rhueng, ngon jok teuputa
Keupue ngoen bajoe, geupasak tiang
Meusineuk labang, meupakon hana

Keupue geulapek, ija bak puteng
Ija beuneu rheing, lhee boh wareuna
Bulukat tumpoe, geulhat bak puteng
Keupue tungku lem, peusijuek reungka

Pakon bak binteh, geuculek sipot
Lagee leuek meulot, ngon cicem pala
Bak tulak angen , bak puta taloe
Geurok ban putroe, bungong keumenda

Cempala paki , nari cong tingkap
Dalam breueh leukat, ulat meusarang
Baca tungku droe, jinoe beuleugat
Ngat meu ho takat, ujong ngon uram

Gunong gurutee, singke gampong lhong
Tute meububong, nanggroe peudada
Bangunan museum, jinoe ta sambong
Kisah ta puphon, keu cakradonya.

Na lonceng raya, nan cakradonya
Bak raja cina, hadiah jih nyan
Di meusu keudroe, meunyo bahaya
Lageuem keu tanda, isyarat meunan

Hadiah jibi, le raja cina
Pertanda mata, hubungan kompak
Miseue turki, jibi alat prang
Jibi meuriam, lada sicupak

Keu rumoh aceh , jinoe lon syareh
Peuet ploh peuet tameh, yang peutheun rangka
Baro geupeunan, nyan rumoh aceh
Tujoh boh syareh, meuseuti beuna

Yng keuphon riyeun, neupham beusaheh
Kedua syareh, geukheun seulasa
Yang keu lhee pinto, beuna neuteupue
Nyan seuramoe keue, meupeuet boh kana

Keu limong juree, yang keu nam rambat
Keu tujoh meuhat, neucoba kira
Seuramoe likot, ka geukheun dapu
Bileueng hai teungku, ka seumpurna

Ka tiep –tiep saboh dalam bahagian
Meuna di sinan, kamuphom makna
Kana meukeusud, pakon jeuet meunan
Singoh laen jari, ulon calitra

Culek bak bineh, bungong geureutoe
Culek bak sagoe, bungong ceurupa
Culek jeundela, kiban galak droe
Culek ban bagoe, taloe meusingkla

Keu tameh teungoh, nyan kayee jatoe
Keu tameh sagoe, nyan meudang ara
Bak tameh teungoh, geuboh ukiran
Meu culek buleuen, limpeuen ngon kala

Bukon le sayang, pisang teupeungat
Teumon bu leukat, ka basi santan
Keu rumoh aceh, oh noe tasambat
Jinoe tasurat, asoe di dalam.

ASOE MUSEUM PAMERAN TEUTAP
Alhamdulillah , katroek meukeusud
Ngon tulong makbul, sidroe yang esa
Asoe museum, jinoe lon seubot
Siseun-seun bacut, ulon neuk rika

Pameran teutap, asoelon seubot
Beungoh ngon seupot sabe ji buka
Keu uereueng keunjong, keunan habeh trok
Jak kalon beitroih, beunda pusaka

Museum aceh ha n ek soe boh yum
Samoe peng jameun, koleksi  jih na
Miseu deureuham, ngon cap sikureueng
Ngon alam peudeung, pusaka raja




Meu macam bagoe, pusaka jameun
Han ek soe boh yum, nilai hareuga
Barang koleksi, jameuen keureuen
Miseue ulon kheun, keu peng samudra

Samudra pase yoh masa jameun
Masa keu rajeuen mantong na raja
Yoh masa jaya, aceh saboh seun
Sampoe troek jameun, iskandar muda

Aceh na peng droe, meu bloe yoh jameun
Deureuhm siseun, le that hareuga
Peugot dari meuh, deureuham jameun
Geuboh nan ureueng , yang mat kuasa

Geuboh nan raja yang mat keurajaan
Hana soe maklum, kiban hareuga
Kiban nilai peng, padum geuboh yum
Dua boh jameuen masa meubeda

Samudra pase ngon darussalam
Dua masa nyan deureuham kana
Blah keu ngon likot, geuboh tulesan
Geulantoe lambang, geuboh nan raja

Azzahir dikeu, geuboh tulesan
Siblah beulakang, al adil nam
Trok u lua nanggroe, sampoe muangthai
Deureuham berkembang, trok malaysia

Dan lom lon kalon, asoe museum
Ngon cap sikureueng , seutempel raja
Watee lon baca, arah jarom jeum
Raja si keureueng geuseubot nama

Aceh geu peunan, ngon alam peudeung
Ngon cap sikureueng, lam jaroe raja
Keu bit aceh nyie, leupah that useung
Nibak museum neuci periksa

Phon –phon di aceh sampoe u pahang
Hana soe teuntang, iskandar muda
Ngon cap sikureueg di dalam reugam
Aceh that aman makmu seuntosa

Keu cap sikureueng, bacut lon bayang
Keu halilintar, lon neuk calitra
Raja sikureueng geu seubut sinan
Sebagoe lambang, keu cap negara

Saboh diteungoh, disampeng lapan
Lagee lingkaran, seutempel  raja
Watee neu baca, arah jarom jam
Meuseuson sinan, nan raja-raja

Raja diteungoh, yang mat pimpinan
Laen sampeng nyan, raja yang lama
Raja meuchu, nyoh geumat gayam
Geuboh disinan, tanda mulia

Dan laen lon kalon, kupiah meukeutop
Tampok meusalop, tangkulok sutera
Limong boh tingkat, syarta jih geurok
Bak ujung tampoek, hiasan jih na

Rincong meu pucoek, tangkulok meudrat
Pakaian adat, pusaka raja
Pakaian aceh, rincong beugeulhat
Meuhan goh leungkap, meunyo jih hana

Dalam museum, koleksi  rincong
Sinan hai kaom, meumacam rupa
Rincoeng meupucoek, deungon meuunggek
Pusak bak nek, endatu gata

Rincoeng meupucoek. Tampok suasa
Atra pusaka, ureueng chi keubah
Alat jak meu prang, deungon beulanda
Nyoh saboh masa, dikeuneuk jajah

Rincong meukure, ngon rincong pudoi
Jak eu hai kawom, pakriban beda
Kiban bismillah bak arah rincong
Deungo hai kawom ulon calitra

Nibak likok go, sudut jih teuba
Sinan hai rakan, lambang huruf ba
Lambang huruf sin, nibak bujuran
Nibak peugangan, dua boh kana

Nibak uram go, beusoe meukuwieng
Lagee huruf mim, neu ci pareksa
Tincu bak ujong, ngon pruet jih rata
Lagee huruf ha, watee geusambong

Guna di rincong, beunda pusaka
Gantoe seunjata, bahya geu peuglah
Untuk lindong droe, oh trok bahaya
Miseue umpama, harta jirampaeh

Guna di rincong, meunyang keu dua
Pusaka maja, untuk kawom yah
Pakaian adat, seuni budaya
Rincong pusaka , geutueng keu tuah

Guna yang keu lhee, rincong meutatah
Untuk peukakah, alat keurija
Maka aceh nyoe, nama geupeugah
Aceh daerah, rincong pusaka

Oh lheuh nyan peudeueng, ulee meutampok
Ngon peudeueng on jok, endatu gata
Aceh geumeucang, yoh prang meukasyok
Aceh bek jithok, uleh beulanda

Teuma keu siwaih, lon singgong be ok
Bak ulee tampok, geuboh suasa
Ngon bungong reubong, sarong geupeurok
Museum beutrok, neujak pareksa

Pat beda siwaih, rincong meu pucok
Bak go ngon tampok, neuci pariksa
Siwaih go teupat, rincong na bungkok
Meubeda be ok, fungsi ngon guna

Lheuhnyan cupeng meueh, ngon top atranya
Top keumaluan dahulu kala
Keu aneuk inong, pakek barangnyan
Keu aneuk agam, hana sapeuena

Aneuk miet cucut , meunan keuh macam
Dilee saboh jan, pakaian goh na
Geupakek cupeng, kada tingkatan
Meunurot bahan, gasien ngoen kaya

Miseue cupeng meueh, keu ureung kaya
Cupeng suasa, kada diyub nyan
Di cupeng perak, ureueng biasa
Di ureueng papa, cupeng bruek nama

Keu teumpat ranup, geu peunan karah
Ladom geupeugah, bate cerana
Pasoe ngon gapu, ngon pineung teuplah
Pasoe lam karah, ngon plok jeumuju

Geucok ngon ranup, pasoe u dalam
Ngon bungong lawang, pateng meuriti
Geusambot jamee, deungon tarian
Ranup lampuan, keu jamee geubri

Geuboh ranup, surang sareng
Bungong reubeng, papeuen beutra
Bungong lawang dum ji pateng
Ka ji puseng, ngon bakong puta

Bukon sayang, minyeuk simplah
Di dalam klah, ka ro u lua
Sang sang han ek le, u lon sumurah
Seubab that susah, hana beulanja

Karu pikeran kareuna susah
Hana nafakah, peudeh that euntong
Keunong tsunami, pakri lon paban
Rumoh lon gadoh, bakat peugulong

Astagfirullah, lidah tan tuleueng
Karoh u loen kheun, ho laen haba
Jinoe ta puwoe, asoe museum
Neu deungo lon kheun, siseun si banja

Peuneurah u, nyoe uloen peugah
Keu minyak simplah, ulon calitra
Lam seneupet, geu pasoe klah
Minyeuk geu prah, theun di lua

Pasak bajoe, lam peuneurah
Geuseupeut klah, deungon paksa
Teubet minyeuk di dalam klah
Baro peuneurah, jeut geu buka

Keu weng teubee, han pue peugah
Ngon peuneurah, fungsi sama
Saboh teubee yang saboh klah
Weng peneurah, buet meu paksa

Nyoe keu lagai, uloen peugah
Siploh syarah, syarat beuna
Yang keu phon go, yang keudua klah
Lhee lon peugah, geu kheun mata

Yang keu peuet eh ngon boh lagai
Lam hitungan, limong kana
Yok yang keu nam taloe linggang
Tujoh lapan, aneuk yo kana

Keu sikurueng, taloe lihe
Siploh akhe, taloe sintak
Neuci bileueng hanjeut ganje
Ngat meu sampe, peunan bajak

Sayang u dadeh, habeh tupee kap
Geu cok keu ubat, kayab babah
Asoe pusaka, habeh lon peugah
Jinoe ta surah, laen riwayat

Keu perhiasan, bacut lon rampoe
Miseue patam dhoe, ulon riwayat
Wate peukawen sinyak cut putroe
Pakek patam dhoe, pakaian adat

Geu boh ngon gaca, pake patam dhoe
Kaween cut putroe, po bungong riwat
Meunyo ka geu lhat, geuboh patam dhoe
Meunan keuh bagoe, putroe geu nobat

Han le tanggungan, ayah keu putroe
Kaputoh taloe, bah tanggong jawab
Ka na soe tanggong sinyak cut putroe
Seubab na lakoe, po bungong takat

Subang meucintra, cap mata uroe
Deungon gleueng jaroe, bungong kupula
Gleueng bungong reubong, ngon gleueng meusagoe
Sawek jeuem jaroe mata delima

Sawek meurantee, teusok bak jaroe
Kasab meurumboe, ngon ija suta
Ija beuludu, asoe peunowoe
Deungon patam hoe, blet blot hu caya

Ngon simplah dada manek meukarang
Laen lom patam, timah ateueh dhoe
Deungon euncien meueh punoh bak tangan
Bagoe ban intan, indah han bagoe

Ngon gleueng keurucong, patam meubirab
Euncien ngon subang, deungon boh dokma
Ngon taloe keu-ieng, geu boh geureusang
Bandum barangnya pusaka lama

Ngoen taloe takue, keutat lhee lapeh
Culok ok meuceh, bungong cempala
Bungong ie mawo, culok ok puteh
Ladum hai wareh seupoh suasa

Deungon klah takue, being meueh meulapeh
Yang ladom meuceh, ajeumat nama
Eunteuek malakat, keutab lhee lapeh
Ranub selaseh bungong kupula

Ngon bungong uengkot, euncien cut puteh
Bajee meulapeh, aneuk boh dok ma
Ngon taloe keu-ieng, ceukam meulapeh
Langoi cut puteh, meulapeh dua

Keureusang bajee, meutatah intan
Deungon pakaian, indah hana sa
Landak gleueng gaki, meucaneh intan
Ngon ija pinggang, kasab hindia

Geu boh ngon boh ru, meu tangke intan
Geuboh beebeewan, minyeuk cendana
Geuboh gaharu, seulanga pandan
Ji ek geurangsang, tuha ngon muda

Takoh jeuneurob, nyang get geureudong
Taplah trieng beutong, rambu ta tarek
Untuk perhiasan, oh noe laen puentong
Jinoe lon sambong, arah lon balek

Astagfirullah, lidah tan tuleueng
Lethat reueng mareueng, tuleh hikayat
Keu perhiasan, kalheuh lon bayeueng
Jinoe ulon kheun, alat drop seupat

Alat drop uengkot, bacut lon ratoh
Deungo tungku beh, ulon calitra
Laen daerah, beda nan geuboh
Meukeusud saboh, tujuan sama

Di pasi reuhat, pukat geulaboh
Pasi lhok susoh, geu kawe buya
Untung ngon puncong, ulaya geuboh
Jak kalon beutroh, pakriban beuda

Pakon di pukat, taloe jak geuboh
Pakon geu le aboh, lam laot raya
Pakon di pelong, jalo geusa-oh
Pakon han geuboh, untung ngon laya

Pakon di bubee geu boh dua jab
Pakon seureukab, dua boh muka
Pakon bak bubee, ka geupeunan jab
Pakon seureukab, geu peunan muka

Keupue ni bak jeue, geujak boh kandet
Keupue bak aret,  geujak boh raja
Keupue bak jareng lampong geupalet
Keupue bak aseit, geuboh le mata

Di laot hijo , na jalo kawe
Ateueh pucak gle, urueng meurusa
Alat drop uengkot, oh noe lon rawe
Jino ta cae, ho laen haba

Top tupong breueh bit, karoh breueh leukat
Ulon seumurat, meusimpang arah
Meu’ah lon lakee, meuribee harap
Jaroe lon angkat, meunyo na salah

Bukon le sayang, pucok pisang klat
Habeh ulat kab, sama seukali
Keu alat dapu, lon ci riwayat
Museum meuhat, neu jak kumisi

Jeuet neujak kalon, museum jeh pat
Pameran teutap, museum negeri
Sabe tiep uroe, buka keu rakyat
Jeuet neujak lihat, neu kalon isi

Keu kanot tanoh, deungon bulangong
Tugas ma sinong, taguen bu gata
Jitaguen kuah, kanot beulangong
Cukop meukunong , peusaneut gata

Ngon asam keueng, kuah belangong
Beut ureueng inong, taguen keu gata
Peuleumak kuah, tumeh on lingong
Han pue tatanyong, kuah dalica

Pine keu teumpat, asam teucicah
Teumpat geuulah, teumon bu gata
Asam boh sunti, sinan geubicah
Udeueng teucicah, boh limeng tuha

Ngon batee neupeh, bumbu geubicah
Yang ladom peugah, ngon batee lada
Geugileng campli, ngon bawang mirah
Geutaguen kuah, beungoh ngon sinja

Untuk geunuku, han pue lon peugah
Kowom ma ngon yah, neuturi rata
Alat ngon ku u, geutaguen kuah
Santan geu prah, taguen dalica

Cinu ngon aweuek, meunan sit ulah
Han pue lon peugah, seubab biasa
Rata jeuet gampong, deungon daerah
Mungken istilah, meunyo meubeda

Reungkah ngon salang, bacut lon kisah
Laen daerah, meungke na beda
Salang keu gantung, teumpat keumeubah
Reungkan geupeugah, lapek beulanga

Takoh bak mane, tarah keu jeungki
Alee bak giri, leusong bak jeumpa
Reunkan ngon salang, oh noe lon rawi
Keu alat seuni, jinoe tarika

Keu alat seni, lon keuneuk rawi
Museum negeri, neujak pareksa
Jeuet neujak kalon, piasan seni
Aceh kiban hi, seni budaya

Miseue biola, deungon rapai
Suleng ngon bansi, pakriban beda
Seurune kale, deungon nafiri
Canang lom lagi, geunderang pih sama

Pat beda tambo, deungon rapai
Beda seudati, deungon biola
Seurune kale, geu ireng tari
Geuyub nafiri, oh prang geu puga

Rapai uroh, rapai daboeh
Jak kalon beutroeh, meupat keuh beda
Beda rapai,meuhat bak baloh
Kulet jih geuboh, ka meuhat sama

Jipeh rapai, jitop ngoen daboeh
Hana jipajoh, tuboh han luka
Keubit khalifah, leupah that utoh
Do’a kageuboh, beusoe meulila

Seurune kale, tarean ratoh
Irama geuboh, geutuka-tuka
Geupeh ngon canang, kisah geuratoh
Umpama lon boh, meunoe ban haba

Seulamat datang, jamee baro troh
Neudok neupiyoh, tika ka lon leueng
Pajoh saudara, sion ranub tho
Ranub tan tuwo, ji’eue lam naleueng

Meumacam bagoe, alat bak seuni
Geu ireng tari, budaya bangsa
Sinoe han habeh, lon tuan rawi
Badan ka seu-i, malam kajula

Banjan-jan laen, lon tuan rawi
Meunyo allah bi, umu mantong na
Sehat ngon tubuh, ngat trok hajati
Sulaiman gani, neulake do’a

Pakaian aceh leungkap hana ban
Deungo hai rakan, u lon calitra
Meumacam bagoe, reumboe geurancang
Miseue seulendang, bungong kupula

Miseue seulam meueh, ngon awan-awan
Miseue keurawang, meu rumboe sutra
Miseue iaja krong, meusulam intan
Seulawue panyang, katon hindia

Ngon geutop ulee, waruna hijo
Ngon geutop baho, ngon ija sutra
Tangkulok meudarat, seureuban baro
Pakaian tungku , alem ulama

Miseue di bajee deungon seureuban
Ngon ija panyang, tangkulok sutra
Silueweu kasab ngon ija pinggang
Laen sibarang, meumacam rupa

Ngon ija sawak, meu pucuk reubong
Deungon ija krong, teupah hindia
Ngon ija bajee, meusulam katon
Bungong kasab mbon, le that wareuna

Ngon ija panyang, ka dua blah haih
Bungong kalimah, meurumboe ija
Meuuruek, ragoe jih leumah
Meumacam ulah, keu bungong ija

Ngon ayu ayu, geuikat tabeng
Ija beuneu rheing, keuleumbu sutra
Untuk sangkutan , geusalop tabeng
Teubit tungku lem, uroe ka faja


NASKAH KUNO ASOE PUSTAKA
Asoe museum, jinoe lon peugah
Pue-pue naseukah, asoe pustaka
Naseukah jameun, sinan geukeubah
Got that geupapah, ngon geu usaha



Hasil kumpulan, rata daerah
Bandum naseukah, budaya lama
Hasil teuliti, cara ilmiah
Bukti seujarah, adat budaya

Rata jeuet gampong, seutot naseukah
Geujak seuleu’ah sampoe u belanda
Troek nanggroe jeupang, jak cok naseukah
Nanggroe eropah, manca neugara

Bandum naseukah, kumpoy keumbali
Museum negeri, yang po keurija
Museum aceh, susah han sakri
Bak geu urusi, naseukah lama

Ladom ribee thon, umu ka lawi
Rab hanle meuri, watee tabaca
Bahasa aceh, ngon arab jawi
Le ureueng ahli, baro jeuet baca

Yang jeuet keu susah, museum negeri
Ngon arab jawi, tulesan laman
Kabrok keureutaih, hana le meuri
Ejaan lagi, han meuphom makna

Geuyue teula’ah, suson keumbali
Geuyue teuliti, pakriban makna
Tulesan gadoh, hana meuri le
Ilah geucari, beujeuet geubaca

Tanle halaman, ngon judul asli
Hanale meuri, ka kamue seuba
Yang mantong tinggai, yue foto copy
Tenaga ahli, bandum keurija

Geumita cara, baca keumbali
Sampoe yue beli, kaca peumbesa
Meunan keuh bagoe, museum negeri
Neusangka pakri,  cara usaha

Ngon susah payah, simpan keumbali
Untuk bukti, seujarah bangsa
Keu aneuk cuco, keubah bukti
Bek jimeu-ungki han jipeucaya

Mantong meulindong, museum negri
Goh lom allah bi, mala petaka
Laen kareuloeh, gadoh ngon isi
Seubab tsunami, ie raya teuka

Keu PDIA, contoh ulon bi
Koraban tsunami, hanle mehoka
Geudong jih hanle, tinggai pondasi
Pue lom ngon isi, asoe pustaka

Alhamdulillah , mantong allah bie
Museum negeri, mantong seujarah
Mantong na geudong, peunoh ngon isi
Jinoe lon rawi, asoe pustaka

Asoe pustaka, museum negeri
Jinoe ulon ci, keuneuk calitra
Soal naseukah, jinoe lon rawi
Ya allah neubi, ban hajat pinta

Tamudek u gle, takoh bak bili
Peutron u pasi, taloe jeureungkha
Meunyo na hajat, naseukah lawi
Museum negeri, keudeh jak baca

Meunyo tan alee, keupue teuh jeungki
Meunyo tanle ie, keupue lom tima
Asoe pustaka, museum negeri
Deungo lon rawi, siseun – sibanja

Siblah rot barat, kilat tan reudoh
Ujeun ka jitoeh, siblah rot tunong
Nazam biasa, sangka hanle roh
Bahle u lon boh, laen ban bangon

Naseukah jameun, endatu keubah
Miseue seujarah, iskandar muda
Miseue hikayat, tambeh tujoeh blaih
Doa akasyah, qatrun nidaat

Na tajumolok, kitab meu ubat
Ngon mujarabat, kumpulan do’a
Fathul qarib, dalail khairat
Dan lom hikayat, keu nabi musa

Sirathul mustaqim, umu katreb that
Kitab geudapat, di lamno jaya
Karab ribee thon, nyan umu kitab
Meunyoe meuhajat, jeut neujak baca

Akbarul karim, ngon nazam arab
Geubahas sifat, azza wajalla
Seujarah nabi, seucara singkat
Isra’mi’raj, pihna calitra

Keu tabi’ lidan, pihna riwayat
Ka geumeusahabat, ngon jen islam
Sampoe jibantu, lamprang ji intat
Sedum na sahbat, meugaseh sayang

Astagfirullah, leupah that ganje
Sang –sang mustahe, narit doseuta
Panena mungken, lageenyan ganje
Meuduroe bace, meulungke guda

Meunyoe buet allah, pane mustahe
Panenaganje, sit be ok saja
Miseue ie laot, yue surot u gle
Yang kalheuh lahe, tsunami teuka

Ngon kun fayakun, mantong ka hase
Sit rabbon kade, bandum yang cipta
Meunyo tatuntut, bandum pih hase
Islam ngon kafe bandum neuridha

Ihwanul mubtadi, lagi nan kitab
Bak tanya jawab, hukom islam
Pakriban muphom, kalimah syahdat
Kiban makrifat, cara meu-iman

Sifeuet du ploh, na saboh kitab
Hana le leungkap, sayang han sakri
Tanle halaman, habeh keumeuekab
Lam bahasa arab, ngon bahasa jawi

Bustanussalatin, kitab seujarah
Yang mat perintah, yang jeuet keu raja
Dari raja phon, bandum na kisah
Hanjeuet lon peugah, goh lom lon baca

Kitab alqur’an, umu ribee thon
Mushaf geususon, tulesan jaroe
Nama han geuboh, ureueng nyag susonn
Sidroe ilahon, meu nyang na tusoe

Hikayat musa deungon fir’un
Yoh masa jameuen, watee jeut dakwa
Watee geumeuprang, deungon fir’un
Tuhan neupeutron, mukjizat musa

Asmaul husna, dalail khairat
Tanyoe seubot zat, azza wajalla
Seubot nan tuhan,  sidroe yang ahad
Jeuet keu ibadat, ureueng yang  baca

Dan laen –laen, leu that dum kitab
Tapi sayang that, judul jih hana
Dan lom halaman, hanale leungkap
Habeh kamue kab, hanjeuet le baca

Meuribe judul, sinan na kitab
Dan lom hikayat, meuribee laksa
Kumpulan do’a, ngon mu’arifat
Tuntunan shalat, kitab pusaka

Kitab faraidh, ngon babun nikah
Seureut hikayah, keu balukia
Kitab barzanji, ngon jarumiyah
Nahu’ ngon fikah, karangan lama

Meumacam bagoe, buku seujarah
Sampoe silsilah, nyan raja-raja
Museum aceh, gudang seujarah
Sinan geukeubah, naskah lama

Museum aceh, keubit leubeh that
Meuribee kitab, naseukah lama
Karangan jameun, ribee thon meuhat
Jeuet neujak lihat, neuci pareksa

Dalam pustaka, di sinan teumpat
Siblah rot barat, bak lantai dua
Goet that geusimpan, deungon geurawat
Geuta kot that-that, pancuri teuka

Meunyo roh gadoh, nyan saboh kitab
Hanle geudapat, hanpat geumita
Hana guna peng, meujuta lipat
Geunantoe kitab, hana ngon peusa

Astagfirullah, lidah ka salah
Karoh lon kisah, meutuka banja
Jinoe nan kitab, tapeuwoe kisah
Alhamdulilah, jinoe tamula

Masailai muhtadi, ulon peugah kri
Soal nur nbi, bah tanya jawab
Hana neupejeuet, laen le rabbi
Illa nur nabi, mula away that

Sit nur muhammad, mula phon jadi
Rupa nanyum hi, nur yang hibat
Nuri tiep uroe, di pujoe rabbi
Han tom berhenti, sabe tiep saat

Nyan keuh phon that-that, peuneujeuet rabbi
Beutayakini, geutanyoe umat
Hadis saidinan, meuno ban bunyi.
Neuci kumisi, di dalam kitab

“awwalu ma khalaqallaha ta’ala nuri”

Silsilah syathairiah, syair kasidah
Sinan geubahas, meu macam rupa
Keu nur muhammad, kiban seujarah
Dan lom geupeugah, keu zat yang esa

Keu nabi adam, pih na geukisah
Dan lom silsilah, rasul mustafa
Keu soal iblis, ngon malaikat
Dan lom hai sahbat, syair ulama

Nazam nasehat, pihna naseukah
Asoe geu bahas, teuntang etika
Teuntang akhlak, bandum geupeugah
Taat perintah, ayah ngon bunda




Wajeb meununtut, eleumee allah
Beuteue deungo sah, pakriban beda
Haleuengon hareum, meukroh ngon mubah
Dalam naseukah, neucuba baca

Adam ngon hawa, kiban seujarah
Keu jen geupeugah, sidarohaka
Keu malaikat, pihna geubahas
Bak awaliyah, yoh phon geucipta

Tafsir as-shalah, do’a seumbahyang
Makna jih kiban, do’a tabaca
Sunat ngon wajeb, dalam seumbahyang
Qamat ngon azan, pakriban do’a

Safinatul hukkam, peudoman qadhi
Naseukah lawi, perintah raja
Raja yue tuleh, peudoman qadhi
Syarat jih pakri, yang jeuet keu raja

Yang jeuet keu wadhir, perdana meuntri
Keu hakim tinggi, pembantu rja
Keu ulee balang, syarat jih pakri
Koen jeuet beurangri, keusoe yang suka

Hukoem pidana, adat pih meunan
Hukoem timbangan, bak jual beli
Hukoem ceumucue deungon teumaki
Hukoem meujudi, deungon meuzina

Hukoem seumbahyang, cara meusuci
Hukom ek haji, zakeuet ngon riba
Untuk peutunjok, hakim ngon qadhi
Yoh masa lawi, toh mantong raja

Meusyuhu aceh, masa kong adat
Yoh masa kuat, qanun ngon reusam
Safinatul hakkam, ohnoe riwayat
Yang laen kitab, jinoe lon bayang

Syifaul qulub, kitab tarikat
Geubahas sifat, azza wajalla
Hamzah fansuri, tuleh tarikat
Sumber lam kitab, qur’an mulia

Dan lom geupeugah, keu ubat – ubat
Deungon ajimat, peunangkal do’a
Keu batok isak, geupeugah ubat
Pakriban syarat, yang makbul do’a

Hikayat syeh ahmad, aulia tujoh
Jak kalon beutroh, sideh neubaca
Museum neugri, neuci jak beutroeh
Sinan tungku beh, yang na seudia

Asoe hikayat, rawi syeh ahmad
Yang jaga teumpat, makam mulia
Yang jaga kubu, nabi muhammad
Tanda kiamat, wasiet saidina

Siploh yang rayeuk tanda qiamat
Nabi muhammad, ka neumeusabda
Watee katrok had, katoe qiamat
Neubi alamat, siploh boh tanda

Disinoe hana, ulon riwayat
Seubab panyang tat, siploh boh tanda
Neubaca keudroe, yang leupah mangat
Museum meuhat, jeuet neujak mita

Aulia tujoh, pih na hikayat
Pemuda taat, yoh masa raja
Raja dakasyus, si zalem laknat
Keudroe jinobat, tuhan yang esa

Jikeuneuk bunuh, pemuda taat
Hingga beurangkat, meusoem lam guha
Deungon tulong po, sidroe hadharat
Makanan mangat, keunantroek teuka

Teukeudi tuhan, sidroe yang ahad
Teungeuet ka teupat, sinan lam guha
Na lhee reuntoeh thon dalam riwayat
Oh jaga meuhat, ka laen raja

Ngon isem tujoh sama riwayat
Pemuda taat, teungeut lam guha
Mungken na beda, cara riwayat
Meukusud meuhat, hakikat sama

Darratul manzhu,kitab teusawoh
Asoe tungku beh, ulon calitra
Buleuen rmadhan, taubat beusunggoeh
Allah neupeutron, pue gata pinta

Pue gata lakee, tuhan neupeutroh
Hana meutanggoh, meisikleb mata
Uroe asyura, puasa beutroh
Atawa teungku boeh, siploh muharram

Tabi seudeukah, leupah le pahla
Tujoh ploh ganda, tuhan neu peue-ek
Pue lom hai rakan, neutem puasa
Asoe syuruga, gata po milek

Sidumnan tuhan, pulang keu gata
Keupada hamba, yang pubeuet baek
Di dalam kitab meunan calitra
Jeuet neujak baca deungon seulidek

Khutbah jummuat na sboh kitab
Bahasa arab naseukah lama
Asoe di dalam, na dua boh bab
Neuci hai sahbat, neujak peunyata

Asoe bab phon, baij keuwajiban
Wajeb seumbahyang, keu para nabi
Seumbahyang limoeng teuman oh lheuehnyan
Supo jeumba nyan, geubangsa bagi

Seubahyang suboh, keu nabi adam
Ibrahim lheuhnyan, dhuhur po jeumba
Seumbahyang ashar, keu nabi yunoh
Meugrebtungku jroh, keu nabi isa

Seumbahyang inya, musa ruhullah
Witir neupeugah, rasul mustafa
Limong boh wate, habeh geupeugah
Meunankeuh ulah, habeh geupeugah
Meunan keuh ulah, geubagi jeumba

Sibeurangkasooe, hamba di allah
Seumbahyang jikeubah, han jikeurija
Dosa raya that, azeueb bak allah
Teumpat geukeubah, asoe nuraka

Asoe bab dua, pristiwa wafeuet
Watee troek sukreuet, nabi mustafa
Arasy kurusi, loh deungon kalam
Bandum masanyan, meugeumpa-geumpa

Trok malaikat, neujak amat rijang
Bek reuloh alam, langet ngon donya
Sidharatul muntaha, sang – sang ka reubah
Meunan geupeugah, dalam calitra

Sireutoh uroe dum malaikat
Sabe lam neumat, reungagang hana bla
Seungkir hana neujak meumat –mat
Alam dum seungab , ka safan safa

Wafeut  di nabi, meuguncang aras
Wafeuet fatimah, meuguncang donya
Meunan keu bagoe, asoe geu peugah
Neuci seuleuah, neucuba baca

Hikayat mawot, jinoe lon kisah
Dan lon hikayah, haba nuraka
Malek izrail, mawot geupeugah
Droe jeut geu ubah, kiban yang suka

Kiban galak droe, geupeugeot bagah
Peurintah allah, nyawoeng yue hila
Pakriban amay, dihamba allah
Meunan keu ulah, droe geupeurupa

Haba nuraka, ulon riwayat
Asoe lam kitab, ulon calitra
Meuhan neupateh, neubuka kitab
Museum meuhat, sideh  neubuka

Neulakee laju, saboh hikayat
Judul jih meuhat, haba nuraka
Sibeurang kasoe, yang pubuet jahat
Nuraka teumpat, meunurot kada

Nama neuraka, sinan pih leungkap
Deungo hai sahbat, uloen bileueng sa
Neuraka jahnam, yang phon phon meuhat
Dua hai sahbat, ka mukhbar nama

Neuraka dhallah, deungon khatimah
Dan lom hawiyah, limong boh kanan
neuth meuhat, haba nuraka
Sibeurang kasoe, yang pubuet jahat
Nuraka teumpat, meunurot kada

Nama neuraka, sinan pih leungkap
Deungo hai sahbat, uloen bileueng sa
Neuraka jahnam, yang phon phon meuhat
Dua hai sahbat, ka mukhbar nama

Neuraka dhallah, deungon khatimah
Dan lom hawiyah, limong boh kanan
Neuraka syairi keu nam geupeugah
Jahim ka sudah, tujuh boh kana

Lethat dum laen, buku ngon kitab
Hana lon surat, bahle jan laen
Neubaca keudroe, meunyo na hajat
Museum jeh pat jeuet neujak baca

Keubit le asoe, buku ngon kitab
Hana lon surat, bahle jan laen
Neubaca keudroe, meunyoe na hajat
Museum jeh pat, jeuet neujak baca

Keubit le asoe, buku ngo kitab
Ileumee le that, meunyoe teungku tem
Ileumee donya, deungon akhirat
Sinan meusapat, wahe e cut lem

Dan lom hikayat yang penteng-penteng
Serta hai cut lem, kumpulan do’a
Buku tan judul, karangan peuteng
Hana pat cut lem, jeuet neujak mita

Museum aceh, keubit that peuteng
Neujak tungku ben, neuci pariksa
Baca naseukah dan laen-laen
Miseue hai polem, seujarah bangsa




Peutik jambee ie, hitam ban gadeng
Putik jambee kleng, hitam ban baja
Asoe pustaka oh noe lon bareng
Jinoe ho laen, tapuwoe haba

SALEUEM PEUNEUTOP
Alhamdulillah, syukur keu rabbi
Yang maha suci, sit  sidroe tuhan
Seulaweut saleum akan rasuli
Pangulee nabi, saidil anam

Deungon tulong po illahen rabbi
Katamat rawi, haba lon karang
Jinoe lon pulang, keu yah ngon ummi
Museum neugri, kalheuh lon peutrang

Museum aceh kalheuh lon rawi
Sampoe bak isi, asoe di dalam
Trok nan naseukah, keuneubah lawi,
Habeh lon rawi, keu bandum rakan

Miseue hikayat, teuntang prang sabi
Seuruta lagi, bah cakradonya
Meunyo meukeusud, neuneuk ketahui
Museum neugri, jeuet neujak baca

Le that naseukah, keuneubah lawi
Rincong ngon bari, peudeueng pusaka
Meu macam bagoe, seujarah lawi
Hikayat nabi, ngon qatron nida

Dan laen –laen kaleuh lon rawi
Barang koleksi, subang meucintra
Miseue cupeng meueh, deungon gleueng  gaki
Miseue ceuradi, bate ceurana

Trok cap sikureueng, ulon peuturi
Yoh masa lawi, yoh mantong raja
Yoh masa aceh, rame gob tari
Yoh mantong doli, iskandar muda




Meu’ah lon lakee, meuribee kali
Meu’ah hai ummi, sigala dosa
Beujeuet ibadat, haba lon rawi
Beujeuet keu gunci, tamong syuruga

Beujeuet keu amai, le allah neubi
Beujeuet bukti, saboh pusaka
Beujeuet hiburan, keutika sunyi
Beujeuet keu nyanyi, seni budaya

Beujeuet seujarah, haba lon rawi
Beujeuet bukti, adat budaya
Beujeuet keubahan, museum neugri
Beujeuet keu saksi, mangat bek dakwa

Saleuem peunutop, ‘oh noe lon rawi
Saleuem  ulon bi, bandum pembaca
Saleuem horeumat keu yah ngon ummi
Museum negri, saleuem lon hanta

Saleuem berpisah, tameumat janji
Saleuem bertemu, tamue’a dosa
Minyo na umu, mantong tuhan bri
Jeuet laen kali, meureumpok muka
Wassalam : Tgk Diyueb Bruek/Sulaiman.A.Gani










0 komentar:

Poskan Komentar

Komentar FB :