Pages


Minggu, 03 Maret 2013

DEKADENSI MORAL “



“ DEKADENSI  MORAL “
Oleh : Tgl Diyueb Bruek/Sulaiman.A.Gani
========================================
Donya ka  akhe, lahe tapandang
Meu macam macam, buet manusia
Tanda donya nyoe ,karap geusimpan
Dekadensi  moral,  dum  manusia

Bak pubuet maksiet, galak koen wayang
Yang  suroh tuhan,  han  jikira
Ka gadoeh laloe ,uroe ngen malam
Peuturoet  syaithan, ban  nafsu hawa

Beuthat  di Aceh ,syariat  islam
Wate  tapandang,  tijoh  ie  mata
Pergaulan  bebas, inoeng  ngoen  agam
Ji soek  pakaian, aurat   u lua

Iman  hana  le,  di dalam badan
Dekandensi moral, dum  anuek  muda
Budaya  kafe,  kajuet  panutan
Yoeh  valitine  day,  kiban  barosa

Bebas  bergaul, inoeng  ngoen  agam
Meugaseh  sayang,  alasan  jiba
Nyan misi kafe, peuhancoe iseulam
Peuhancoe moral, mudi ngoen muda

Boh  pane na mie, yang tulak  panggang
Pane  na bubrang, han galak  paya
Kon  Muda mudi, meuhat  lagenya
Cucoe ka lapan, pih sama  saja

Tuha  ka utoek, katoe  kuburan
Mantoeng buet meunan, harok  meuzina
Iman  hanale, kareule  moral
Lage binatang, hana  agama

Miseu  Peujabat, yang mat  jabatan
Keudeh u medan, dijak  meuzina
Peugah  dirumoh, rapat  di medan
Ladom  alasan, rapat  jakarta

Oh woe Aceh, malem  hanaban
Wate  seumbahyang, bak saf  pertama
Ta eu kupiah, mayang  hana  ban
Ta eu seureuban, sang sang  ulama


Cukop that parah, jinoe  hai rakan
Dekadensi  moral, Aceh  Mulia
Tapeh  geulungkop, Donya le Tuhan
Atau hai rakan, Tsunami  dua

Ohnoe  meumada, haba lon karang
Bukon hai rakan, lon peuna peuna
Neukalon  keudroe, tiep  uroe Tuhan
Neubaca koran, juet juet  medya
Banda Aceh, 20 pebuari 2013(Gema )

0 komentar:

Posting Komentar

Komentar FB :