“TA ATOE DONYA TABANGUN NANGGROE”

“TA ATOE DONYA TABANGUN NANGGROE”

   Oleh : Tgk Diyueb Bruek/Sulaiman.A.Gani

===================================================

Alhamdulilah, Rahmat Meukatoe

Allah Lon Pujoe ,Sidroe Yang Esa

Seulaweut Saleum, Oh Lheuhnyan Dudoe

Rasul Geutanyoe, Saidil Ambiya

Keu Bandum Kawoem, Agam Ngoen Binoe

Dua Blah Jaroe, Ateuh Jeumala

Meukru Seumangat, Rahmat Sinaroe

Ulon Hareutoe, Sabda Saidina

Sabda Janjongan, Nabi Geutanyoe

Neupeugah Meunoe ,Rasul Mustafa

Ta Atoe Donya, Tabangun Nanggroe

Nabi Hareutoe ,Ngoen Peut Peukara

Yang Phoen Beu Ade ,Peumimpin Nanggroe

Dua Eleume,  Para Ulama

Ulama Yang Na, di Dalam Nanggroe

Beugeuteim Pugoe ,Kawoem Juhala

Kawoem Yang Jahe ,Beugeupeurunoe

Yang Makroeh Geuyue ,Geutham Yang Mungka (r)

Uleh Peumimpin, Yang Ade Bunoe

Di Dalam Hal Nyoe, Ikoet Seureuta

Geupeudoeng Adat, Hukoem Lam Nanggroe

Geu ikat Buetnyoe ,Ngoen Bijaksana

Ureung Yang Langgar, Beuthat Beurangsoe

Bagi Ureungnyoe, Ganjaran Beuna

Geuhapus Judi, Kropsi Lam Nanggroe

Rakyat Han Phang Phoe, Aman Seujahtra

Bek Lage Jinoe ,Ta eu Jeut Sagoe

Kropsi Sang Bagoe, Saboeh Budaya

Bak Bagi Raskin, Neuci eu Keudroe

Bukoen Hai Adoe, Lon Peuna – Peuna

Jatah dhuafa,  Jipajoeh Keudroe

Konle Ban Bagoe ,Amanah Jiba

Tanle Amanah, Peumimpin Nanggroe

Maka legenyoe, Bala Tarasa

Janji kompaye, misue saboh roe

Neukalon jinoe, janji ka lupa

Kajuet keu tampoek, Awuek bak jaroe

Jipeukaya droe, rakyat ka lupa

Teuma Yang Keulhee, Nabi Hareutoe

Ngoen Murah Jaroe, Ureung Yang Kaya

Deungoen Murahan, Ureung Kaya Nyoe

Hase Jroeh Nanggroe ,Rakyat Bahgia

Hase Tabungan, Meumacam Bagoe

Meunasah Sagoe , Bale P K.K

Pageu Meuturap, Pancang Jih Beusoe

Kawat Meuduroe, Tarek Seulingka

Ie Dalam Kulah, Han Payah Pasoe

Ji Hisap Keudroe , le Meusien Pompa

Apeu Leseutrek, Jiplueng Lam Taloe

Rata Jeut Sagoe, Meugantung Bola

Ngoen Seubab Murah, Ureung Kaya Nyoe

Aman Lam Nanggroe, Makmu Seujahtra

Jinoe takaloen, ka laen bagoe

Ka maseng keudroe, di urueng kaya

Zakuet han jiboeh, seudeukah tan toe

Jimeungoen keudroe, si sabe  kaye

Teuma Yang Keupeut, Nabi Hareutoe

Doa Sinaroe, Bandum Fukhara

Han Geulhoem Kutoek, Le Tuhan Sidroe

Seubab Fakirnyoe, Sabe Meu Doa

Ka meunyoe Hana,  Alem Ulama

Sunggoeh Binasa, Bandum Sijahe

Sunggoeh Buet Maksiet, Meuraja lela

Kareuna Hana, Ureung Teugah Le

Meunyoe hana le, Murah Sikaya

Sunggoeh Binasa ,Bandum Sifakir

Hanle Soe Tuloeng, Beuthat Seungsara

Kurueng Belanja, tansoe peuduli

Sangkira Hana,  Doa Fukhara

Sunggoeh Binasa, Bandum si Jahe

Lam Tiep tiep  suntoek,  sabe troek bala

Sangkira hana,  doa sifakir nyoe

 Ka meunyoe hana,  ade  Umara

Sunggoeh binasa, bandum teuh sare

Sunggoeh jipajoeh,  le manusia

Akan bangsanya,  seuteungoeh lagi

Lage  jipajoeh, lon boeh umpama

Rimeueng ngoen singa,  kameng keubiri

Meunan muphoem lon,  Hadist saidina

Ban peut peukara kalheuh Ion peuri

Neukalon jinoe, pakriban nyata

Ulama Umara, ka maseng keudroe

Gapiet Proposal, juet kanto geuba

Ka meunan cara, geumade jinoe

Yoeh masa jameun, Iskandar muda

Bandum Ulama, ka geuhareutoe

Ka geubri peuran, kawoem ulama

Deungan Umara, yue atoe nanggroe

(Tgk Diyueb Bruek/Sulaiman.A.gani) 28-8-2012