PISEUK ATEUNG BLANG / LAMPOEH

PISEUK  ATEUNG  BLANG / LAMPOEH

(Oleh :Tgk Diyueb Bruek/Sulaiman.A.Gani )

=================================================

Alhamdulillah, lon puphoen kalam

Lon pujoe Tuhan, Hajat lon beutroeh

Yang  Peutroen Rahmat, keu Bandum Insan

Yang peuna peutan, tanyoe  rakan beoh

Seulawuet saleum, akan janjongan

Pang ule alam, pahla neupeutroeh

Yang bri Syafaat, uroe komdian

Peubrat timbangan, seureuban geuboeh

Lhuehnyan saleum lon, keu bandum rakan

Baca karangan ,Gema lon peutroeh

Meunyan Majalah ,Bak Baiturrahman

Tiep tiep Jum’atan, teubiet  rakan beoh

Izin keu ulon, lon suson Nazam

Pisuek atueng blang,judul ulon beoh

Raya  that Dosa, Azueb bak tuhan

Meunyoe  lagenyan, Tapague lampoeh

Wahe saudara, umat  iseulam

neudeungon rijang , hukom lon peutroeh

Beurangkasoe coek,, tanoeh sijeungkai

Meu izin pih tan , wahe tungku boeh

Oh lheuh geumu `ue , ateung geubangkang

Tanoeh yang leukang, blah goeb geujak boeh

Urueng yang meu`u, peugoet lagenyan

Ta ue ateung blang, meu iku tikoeh

Saboeh macam truek, hai tungku apa

peugoet keunira, bak pague lampoeh

Tagloeng jeuneuraboeb, tasak lam banja

Na dua deupa,  atra goeb karoeh

Oh geupeuteupat, le urueng tuha

Tapeugah tanda, ka awai taboeh

Meuhan geupateh, lage kheun gata

Tapeuhu mata, tareugam boeh soeh

 

Bak buet lagenyan, bekroeh keurija

Ingat saudara,  Nuraka pajoeh

Uroe akherat, dalam nuraka

 Ateuk keupala, tanoehnyan geuboeh

Ban tujoeh lapeh, atueh keupala

ingat saudara, beutapeu jeuoh.

Meugoeh na izin, gadoeh taba ba,

Dalam Nuraka, sabe tan  piyoeh

( Tgk DIYUEB BRUEK )