"MALAM LAHE NABI"

"MALAM LAHE NABI"

Oleh : Tgk Diyueb Bruek/Sulaiman.A.Gani

============================================
Nabi Muhammad, Geunaseh Tuhan
Janjongan alam, nyang that mulia
Malam phon Nabi ,donya geupandang
Ban saboh alam, meucahya cahya

Oh fajar beukah, malam seunanyan
Pang ulee alam, lahe u donya
Nibak thon fill, lam tarekh islam
Lahee janjongan ,Saidil Ambiya

Masa abrahah, mekkah diseurang
Rakyat ditawan, duson ngon kuta
Teutapi hantrok, kasat tujuan
Sampoe bantuan, Allah Ta'ala

Burong ababil, masanyan datang
Ka diteureubang, bencana jiba
Ngon aneuk bate, ulee dihantam
Gajah meukuyan, sinan binasa

Nyan keuh dum, rahmat kuasa Tuhan
Tuah janjongan ,Rasul Ambiya
Dum asoe langet, nibak wate nyan
Sideh di manyang, sujud u donya

Budiadari, putri rupawan
Hate meunawan, rindu lam dada
Adak jeut ditron ,keunoe u alam
Meuheut meupandang, wajah saidina

Roe ie mata iblih, ngon syaithan
Wate janjongan ,lahe u donya
Patong lam ka'bah, rubah meukuyan
Barang sembahan, bandum binasa

Geu intat nikmat, rahmat limpahan
Keupada insane, di dalam donya
Geuba suloh, seumeuloh nyang trang
Ban saboh alam, keu ummat dumna

( Tgk Diyueb Bruek/Sulaiman.A.Gani )