Pages


Senin, 04 Maret 2013

HUKOEM CAMBOEK



HUKOEM CAMBOEK
Oleh : SULAIMAN.A.GANI
===========================================
DEUNGOEN BISMILLAH , LOEN PUPHOEN KALAM
LOEN PUJOE TUHAN, AZAWAJALLA
TUHAN YANG PEUJEUT, SIGALA ALAM
JEN DEUNGOEN INSAN, ASOE LAM DONYA

SEULAWEUT SALEUM ,AKAN JANJONGAN
PANG ULE ALAM, SAIDIL AMBIYA
AYAH NGOEN PO MA ,GURE LOEN SAJAN
JAROE LOEN LAYANG, DOA LOEN PINTA

NEUBRI YA ALLAH, HAJAT LOEN BEUTROEK
KEU HUKOEM CAMBOEK, KEUNEUK CALITRA
HUKOEM ISLAM, TUHAN YUE PEUTROEK
TANYOE BEK MABOEK, NGOEN HUKOEM DONYA

HUKOEN ISLAM , CUKOEP THAT LEUNGKAP
FIRMAN HADHARAT, NGOEN HADIS NABI
BANDUM ATURAN ,KEUNAN GEULIHAT
PUNCA MEUSAPAT, DALAM QURANI

CUKOEP SEUMPURNA HUKOEM ISLAM
KEU UNDANG UNDANG, TUHANKU NEUBRI
SIGALA HUKOEM, BANDUM NA SINAN
HUKOEM TIMBANGAN, BAK JUAL BELI

HUKOEM MEUKAWEN, TALEUK PIH MEURI
TALEUK RAJI I , NGOEN TALEUK TIGA
PISAH NGOEN RUJUK, SYARAT KEUMBALI
HUKOEM WARISI, DEUNGOEN PUSAKA

HUKOEM CEUMUCUE, DEUNGOEN TEUMAKI
HUKOEM MEUJUDI, DEUNGOEN MEUZINA
HUKOEM SEUMBAHYANG,DEUNGOEN MEUSUCI
HUKOEN EK HAJI, ZAKEUT NGOEN RIBA

UREUENG GEUTANYOE, SALAH PAHAMI
DALAM ISLAMI, GEUSANGKA HANA
SANG SANG ISLAM , MEUHAT UHRAWI
CUMA EK HAJI, SEUMBAHYANG PUASA

ACEH LHE SAGOE, JINOE TUHAN JOEK
NGOEN HUKOEM CAMBOEK , ATOE NEUGARA
SEURAMOE MEUKKAH, TUAH JIH KATROEK
TANYOE BEK DAWOEK, GADOEH MEUDAWA

PEUDOENG SYARIAT, HUKUMAN CAMBOEK
HUKUMAN GEUJOEK, MEUNYOE MEULANGGA
LAM QANUN SIBLAH, UMPAMA LOEN JOEK
GEU HUKOEM CAMBOEK, JEUMEU AT  HANA

WATE SEUMBAHYANG, LOEN BOEH KEU CONTO
MEUNYOE DI MOTO, JIPEUDOENG HANA
HAN JIBRI WATE, UREUENG SEUMBAHYANG
UNTUK PEUNUMPANG, PUJOE RABBANA

IZIN GEUCABOET, UNTUK ANGKUTAN
LAM QANUN MEUNAN, NEUCUBA BACA
MEUKAT BU NGOEN IE, BULEUN RAMADHAN
KEUNOENG HUKUMAN, SITHOEN PENJARA

NAM GOE GEUCAMBOEK, HUKOEM JIH MEUNAN
DAN LOEM HAI RAKAN , IZIN USAHA
GEU CABOET IZIN, HANJEUT  JUALAN
DEUNDA MAKSIMAL , NGOEN PENG  LHE  JUTA

MISEU WATE TROEK BULEUN RAMADHAN
UREUENG ISLAM, PUASA HANA
KA GEUSEUMAJOEH, DEUNGOEN MINUMAN
SINAN BAK JALAN, DIKEU RAKYAT BA

DUA GOE CAMBOEK, GEUHUKOEM BADAN
ATAU HAI RAKAN, TAMOENG PEUNJARA
TAMOENG PEUT BULEUN, DALAM KURUNGAN
HUKOEM JIH MEUNAN, WAHE SAUDARA

SOEK BAJE OBLONG, KEUTAT BAK BADAN
ATAU HAI RAKAN, JEULEUBAB HANA
HANA ISLAMI, CARA PAKAIAN
YANG MEUNAN MACAM, HUKUMAN PIH NA

SOAL PAKAIAN , UREUENG ISLAM
DALAM QURUAN, NEUCUBA BUKA
NIBAK SURAT NUR, NEUKALOEN KIBAN
LHE PLOEH  SA  RAKAN, AYAT NEUBACA

QANUN DUA BLAH, JINOE LOEN PEUTRANG
TEUTANG HUKUMAN, CAMBOEK NGOEN DEURA
SIBEURANGKASOE, YANG JIEP MINUMAN
KHAMAR HAI RAKAN, ES MENEN NAMA
 
GEU HUKOEM CAMBOEK, ATEUH UREUENG  NYAN
PEUT  PLOEH BILANGAN, DIKEU RAKYAT  BA
SIBEURANGKASOE,  PUBLOE MINUMAN
ANGKOET PIH MEUNAN, SIMPAN PIH SAMA

ASAI MEUNYANGKOET, DEUNGOEN MINUMAN
KEUNOENG HUKUMAN, TAMOENG PEUNJARA
MAKSIMAL SITHOEN, KURUNGAN BADAN
ATAU HAI RAKAN,  YUE BAYEU  DEUNDA

KEU QANUN LHE BLAH, BACUT LOEN BAYANG
ASOE DIDALAM, LOEN CUBA RIKA
URUENG MEUJUDI, NGOEN BRI LINDUNGAN
DAN LOEM HAI RAKAN, TEUMPAT SEUDIA

MEUNYANG BRI LAPAK, TEUMPAT JUDIAN
ATEUH URUENG NYAN, CAMBOEK DEUNGOEN DRA
GEUHUKOEM CAMBOEK ,LAM QANUN MEUNAN
DUA BLAH BILANGAN, GEUTAMAH DEUNDA

QANUN KEU PEUT BLAH, JINOE LOEN BAYANG
TEUNTANG HUKUMAN,CAMBOEK NGOEN DEUNDA
KEU URUENG MEUSUM,KHALWAT GEUPEUNAN
URUENG LAGENYAN, CAMBOEK NGOEN DEUNDA

GEUHUKOEM CAMBOEH, GEUBRI HUKUMAN
SIKUREUENG BILANGAN, ATAWA DEUNDA
DEUNDA MAKSIMAL ,NGOEN PENG HITUNGAN
SIPLOEH JUTAAN, DEUNGOEN RUPIA

URUENG BRI TEUMPAT, NGOEN BRI LINDUNGAN
TAMOENG KURUNGAN ,NGOEN BAYEU DEUNDA
LIMOENG BLAH JUTA, DEUNDA JIH DUM NAN
ATAU KURUNGAN ,NAM BULEUEN SAJA

KEU QANUN TUJOEH, DUA RIBE PEUT
DEUNGOE TUNGKU CUT, ULOEN CALITRA
SIBEURANGKASOE, HAN  BAYEU ZAKEUT
ATAU JIPEUNGUET, KOEN LAGE  KADA

TAZIR JIH MEUNOE, HAN BAYEU ZAKEUT
ATAU JIPEUNGEUT, DEUNGOEN SEUNGAJA
GEUHUKOEM DEUNDA, DUA GOE ZAKEUT
MEUNAN TUNGKU CUT, QANUN LOEN BACA
 
DAN LOEM BEURANGSOE, KA  JISEUMEUNGUET
SEURTA JIPUBUET, DEUNGOEN SEUNGAJA
JIPALSU SURAT, KEU BADAN ZAKEUT
SUPAYA NGAT JEUT, HUTANG BEKLE NA

ATAWA  LAEN,  BUET JISEUMEUNGUET
NGAT TROEK MEUKEUSUD, JITIPE DAYA
TAZIR HUKUMAN, URUENG YANG PUBUET
LHE GOE GEUSUNUT, ATAWA DEUNDA

SIJUTA SITEUNGOEH, KUREUENG  JIH  HANJEUT
ATAU TUNGKU CUT, TAMOENG PEUNJARA
HUKOEM NAM BULEUN, MEUSOE YANG PUBUET
TAGANTOE  PIH  JEUT, RUGOE BUET GATA

KEU URUENG  KROPSI, PAJOEH  PENG  ZAKEUT
KA  JISEUMEUNGUET, JIPEUTROEK HANA
HANA  JISEURAH ,  BAK BADAN ZAKEUT
KEUDROE JISUKUET, AMANAH  HANA

GEUHUKOEM CAMBOEK, LHE GOE GEUSUNUET
MEUNYOE MEUNAN BUET, GEUHUKOEM DEUNDA
BANDUM YUE GANTOE, YANGKA  JIPUBUET
TAPI TUNGKU CUT,  YUE LIPAT DUA

UNTUK PEUTUGAS , YANG  UROEH  ZAKEUT
DIJOEK HOE MEUHEUT, JIBRI HOE SUKA
HANA BAN HUKOEM, ATURAN ZAKEUT
KEU JIH GEUSUNUET, ATAWA DEUNDA

TAMOENG PEUNJARA, MEUNYOE  MEUNAN  BUET
MEUHAN ADOE CUT,  YUE BAYEU DEUNDA
KURUNGAN BADAN,  PEUNJARA PIH JEUT
PILEH TUNGKU CUT, MEUTOEH YANG SUKA

PILEH KURUNGAN,  LAPAN BULUEN  JEUT
GEUDEUNDA PIH  JEUT,  NGOEN DUA JUTA
MEUNAN HUKUMAN, PEUTUGAS  ZAKEUT
MEUNYOE  JIPUBUET, KIBAN YANG SUKA

SIBEURANGKASOE, YANG  KUMPUL  ZAKEUT
MEUNYOE  JIPUBUET, WEWENANG  HANA
MEUKOEN TUGAS DROE, AMIL BAK ZAKEUT
ATAU GEUSEUBOET, BAITUL  MAL  NAMA
 
BANDUM YUE PULANG ,YANGKA JIPUBUET
MEUSINEUK HANJEUT,  DIJIH  PEUGUNA
UNTUK MUZAKKI, BAITUL MAL PIH JEUT
MEUNAN MEUKEUSUD, QANUN LOEN BACA

MEUKA KEUH HABEH, QANUN LOEN SEUBOET
BUBE YANG PATOET, KALHEUH LOEN RIKA
LOEN LAKE  MEU AH, MEUNYOE  NA  KAROET
MEUNYOE  HAN  PATOET, NARIET  NA  GASA

NEUBRI  YA  ALLAH,  BAN  KADA  HAJAT
JEUT  KEU  IBADAT, TULEH  NASEUKAH
NEUTUENG  KEU  AMAI , OLEH  HADHARAT
UROE  AKHIRAT,  SIDEH  NEUBALAH
(TGK DIYUEB BRUEK ) 26 juli 2012


0 komentar:

Posting Komentar

Komentar FB :