” HABA PEU INGAT-3 ”

” HABA PEU INGAT-3 ”

Oleh ” Tgk Diyueb Bruek/Sulaiman.A.Gani

Hukoem iseulam, cukoep that leungkap

Firman hadharat, ngoen hadis nabi

Bandum aturan, keunan geulihat

Punca meusapat,  dalam qur-ani

Ngoen undang-undang ,ureung iseulam

Dumna aturan ,udeup insani

Hak ber negara , laen loem macam

Ka hana saban,  ngoen hak pribadi

Nyan hak asasi, neubri le tuhan

Koen jeut barang ban,  tanyoe peunari

Koen jeut baranghoe,  atoe barang ban

Koen jeut ban seunang,  tanyoe peugoet kri

Bak pubuet maksiet,  tuhan geularang

Bekna pikeran,  nyan hak asasi

Hana toep ulee , di perempuan

Bukon hai intan,  nyan hak pribadi

Tapi meusalah,  ngoen hukoem tuhan

Ngoen undang-undang,  syariat islami

Meunyoe roeh meunan,  gata hai intan

Uroe kemudian,  neuraka geubri

Dan laen-laen,  meunan sit macam

Dalam iseulam,  leubeuh that rinci

Tungku pancuri , geuyoe koeh tangan

Yang pajoeh apam , rajam geuyoe bri

Tapi bek takheun , keujam iseulam

Na peuraturan , pandum droe saksi

Na keutentuan,  jumlah curian

Koen jak koeh tangan,  bandum pancuri

Kareuna ceumeucue,  peugoet pencuri

Uleh ilahi , sangat geularang

Seubab akibat,  dari pancuri

Didalam negeri,  jeut  keurusuhan

Han aman rumoeh , jiran ngoen wali

Payah awasi,  uroe ngoen malam

Sampoe weu leumoe,  payah boh gunci

Ngoen weu keubiri,  payah eh malam

Pancuri inoeng , pancuri agam

Geuyoe le tuhan,  hukoem koeh jaroe

Bekle di gisa,  bak buet yang meunan

Supaya aman , didalam nanggroe

Ngat jeut ke contoh , saboeh teuladan

Ngat keutakutan,  sibarang kasoe

Bek le meu ulang , bak buet lagee nyan

Supaya aman,  han karue nanggroe

(Tgk Diyueb Bruek/Sulaiman,A.Gani)26/02/2013