“ Cukoep that sayang"

 “ Cukoep that sayang"

 Oleh : Tgk Diyueb Bruek/Sulaiman.A.Gani
═══════════════════════════════════════
Na sibak kayee, cukoep that rindang,,
Teumpat meuayang, cicem meudoda,,

Meumacam wareuna, bungoeng tapandang,,
Diboeh kayee nyan, mameh that rasa,,

Teupana mata, watee tapandang,,
Bak kayee rindang, leupie lam jiwa,,
Get that meuguna, bagi yang datang,,
Ureung jeumeurang, dalam uroe kha,,

Bak peucok dheun, cabeung teureupang,,
Cicem meu ayang, meu suka ria,,
Keunan troeh teuka, rata dum kumbang,,
Mandum binatang, seunang dirasa,,

meugantoe masa, meuleumpah sayang,,
Kayee jiteubang, oleh manusia,,
Meutan dikira, tan teuka sayang,,
Ditem jak teubang, dipisah dua,,

Jinoe di cicem, hudep meulang2,,
meunan chit kumbang, reusah lam dada,,
Seudeh teurasa, mandum binatang,,
Hana le rangkang, teumpat meu ria,,

'Oh ta pike, ulee jeut meumang,,
hana teubayang, lagee nyan rupa,,
Watee peudoda, masa peu ayang,,
Yang that tasayang, mandum nyan sirna,,

Teungoeh get lazzat, hudep teuh teunang,,
Pasti troeh datang, geulisah teuka,,
Awai ie mata, dudoe ka seunang,,
Man2dum leukang, yang meusifeut fana,,

Dari phoen cut2, poma peutimang,,
'Oh leuh nyan keumang, sampoe reumaja,,
Lanjut dewasa, dang bak kadang,,
Troeh watee datang, nyan masa tuaa,,

Hana treb masa, mandum nyan reumbang,,
Keudeh lam liang, asoe keureunda,,
Hudep meutuka, dilee koen seunang,,
Jinoe meu lang2, hana saboh na,,

Rasa ka habeh, gaseh ka leukang,,
Cinta ngoen sayang, tinggai lam donya,,
Dalam keureunda, tan soe le keunang,,
Meutan soe datang, jak baca do'a,,

Kata peunutoep, haba loen karang,,
Meu'ah beu reujang, pat yang na cupa,,
Maklum di hamba, mantoeng goh matang,,
Gohlom meulabang, ilmee lam dada,,
( Tgk Diyueb Bruek )