“SEURAMOE MEKKAH, SAYANG KALAYEE “

======================================
Manyang meuhalak, pucak Seulawah
Leubeh lom ceudah ,Gunoeng Geureutee
Wahe kawoem lon , kawoem meutuwah
Taubat bak Allah,  meubek le lale

Nanggroe Aceh nyoe, jinoe meutuwah
Rata daerah, neukaloen lagee
Meuseujid kale,  rata daerah
Meunyoe meunasah,  geutamah bale

Meuseujid ubit, jinoe kaluwah
Meutamah tamah,  keu binteh batee
Teutapi ureueng, kureueng geulangkah
Aleh pue salah,  na saket ulee ?

Meugreb ngon insya ,hana pue peugah
Lale sileupah,  bak jamboe keude
Nibak jamboe soeh, meupoeh beurakah
Meutham tham kisah, ngoen inoeng balee

Nibak meuseujid,  hai  Ya'Alassalah
Bak keude Lem lah,  geu adu batee
Nyoe dum keuh bagoe , adoe meutuwah
Seuramoe Mekkah , sang sang kalayee

Umpama buleuen,  kon le limong blah
Ka seupot leupah , atawa reudee
Nanggroe bit peungeuh,  deuh taeu leumah
Nyang seupoet leupah,  nyang tan eleumee

Ka habeh laloe,  adoe meutuwah
Aneuk ngoen ayah,  jinoe kalalee
Ibadat hanle,  jahe meutamah
Rata daerah , laot deungon glee

Dak na Peusantren, dum luwah luwah
Jareueng soe langkah , meuhadap guree
Hanle soe kira,  jinoe dum kasah
Meupoeh beurakah,  nyang na tiep watee

Haleu ngon hareuen,  bandum jireumpah
Hanle soe teugah , jinoe kateuntee
Di aneuk dara ,peuloem loen peugah
Keuma ngon ayah , hanle jimalee

Dikeu yah ngoen ma,  hana pue peugah
Dada jipeuhah,  rab deuh boeh meunjee
Boeh pha uluwa,  rata kaleumah
Sileuweu meuklah, leumah urat lhee

E Ya Ilahi,  pakriban ulah
Seuramoe Mekkah , jinoe han le bee
Koen bangsa aseng, kayem jilangkah
Jak peugoet ulah , meulagee lagee

Ureueng droe droe,  nyang meunoe ulah
Pubuet nyang salah,  rata  juet wate
Meunyoe hana jeut,  bak ma ngoen ayah
Dicari ilah , meulagee lagee

Kadeuh takaloen,  rakan meutuwah
Sayang sileupah,  Aceh kalayee
Layee deungon bak,  rusak ngoen patah
Rakan meutuwah hana le meubee

Padum na saying, rakan meutuwah
Ingat ube drah,  hai bungong keumbee
Jaga nama droe, adoe meutuwah
Seuramoe Mekkah,  bek tabri malee

Peusantren kale , rata daerah
Le Peumerintah , geuyue meuguree
Beudoeh wareh loen,  jak beut beubagah
Jalan kaluwah , meubek le  lale

Meunan cit bagoe,  nibak meunasah
Beuna kuliah,  lam tiep tiep watee
Peureunoe laju,  ibu ngon ayah
Bek dudoe teulah , hana eleumee

Meutan eleumee,  rakan meutuwah
Sayang sileupah,  geutanyoe malee
Malee didongnya , atra tan be drah
Malee bak Allah,  hana eleumee

Rakan boeh hate,  kande meutuwah
Bek raya peugah , bak lampe keude
Bek le meu ato , ek nam dua blah
Meubek doek leupah,  peu lumpoe dikee

 

Hai adoe payoeng,  kawoem saudara
Bak buet tan laba,  bekle ta seudee
Bek le adoe cut , bak buet tan laba
Sayang lageena , oh gob eu malee

Adat istiadat,  beuthat tajaga
Horeumat beuna,  keu guree guree
Ayah hai aneuk,  tapeumeulïa
Meunan cit keuma,  bek tabri malee

Meunyoe kageutham,  le ayah ngon ma
Pateh digata , bek le that lagee
Tapubuet suroeh,  peujeuoh mungka
Gata saudara,  le ureueng malee

Sabab payah that,  poma peulara
Bak geu meu jaga,  hana pre watee
Dalam kandongan , sinan phon mula
Phoen phoen dipoma,  saket lam ulee

Umu sibuleuen , geukandong gata
Buleuen kedua , sampoe troh baklhee
Bak buleun keu peut,  hanjeuet takira
Poma digata,  teu lape lape

Bak buleuen limoeng , bingoeng tiep masa
Tuboeh anggota , sang sang ka layee
Bak buleuen keunan,  meunan cit pula
Ta eu dipoma , han ek boet  ulee

Bak buleuen tujoeh,  layoeh anggota
Campli ngon sira,  gelhap boeh jambee
Bak buleuen lapan , ba dan meugeunta
Poma digata,  han ek grak ulee

Buleuen sikureueng,  meulheueng bak kira
Laju dipoma,  tuboeh geuh layee
Poma pih saket , menyak karab na
Nyaweung keluwa,  rasa kateuntee

Seupoet ngon seupeut,  di aneuk mata
Bak lehe gata , nyawoeng sang padee
Oh ban kalahe,  gata  u luwa
Bidan keurija,  geurah ngon ulee

 Lheuh geupeusuci,  badan digata
ngoen sigra sigra , baloet lam tumpee
Dijamoek pih geulet,  pijet geujaga
Wahe aneukda,  hana pre watee

Mulai manyak,  poma useuha
Poma meujaga,  hai bungoeng keumbee
Oh watee rayoek,  geujoek sikula
Lagi sireuta,  geujoek bak guree

Geuyue meununtut,  geuyue beuet sigra
Supaya gata,  ngat na eleumee
Oh watee rayoek,  teuma digata
Bek seuot  poma,  meukeutee keutee

Manyang meuhalak,  Puncak gle Judah
Leubeh loem ceudah, gunoeng Geureutee
Oleh seubab nyoe , adoe meutuwah
Jaga Daerah,  bek tabri layee

Tapubuet suroeh , peujeuoh teugah
Nyang larang Allah,  bek tapeureuelee
Nanggroe geutanyoe,  jinoe that meugah
Nanggroe meutuwah , leupah mangat bee

Nanggroe ube ok,  wase le leupah
Bukoen beurakah,  haba lon bri thee
Maka deungon nyoe,  jinoe lon peugah
Nanggroe nyang meugah , bek tabri layee

Meunan cit didroe , hai kawon ayah
Aneuk neupapah , neujoek bak guree
Nue  intat bak beuet. Laju  beu bagah
Keudeh bak Dayah,  yue jak u balee

Meu bek le lale,  adoe meutuwah
Laju takeubah,  aci ngon boh lhee
Ek lhee ngon ek peut,  kajeuet takeubah
Taboeh beubagah , bek meuho euntee

Bek sayang adoe,  seuramoe Mekkah
Oh trh goeb langkah,  tanyoe bek malee
Oh di eu le goeb,  malee si leupah
Seuramoe Mekkah,  meugah goeb teubee

 

Oh ta eu ureueng, jareueng si leupah
Suroeh ngon teugah,  pih hana meu bee
Di ureueng inoeng , pih saboeh ulah
Ya Masya Allah , meu asek ulee

Ulee tan meutoep,  teu ot dum leumah
Sayang sileupah , hana le malee
Malee hana le,  aneuk ngoen ayah
Seuramoe Mekkah,  sayang kalayee

Allah E Tuhanku,  sayang sileupah
Aceh bek sosah,  rakyat bek lale
Di ureueng agam,  pih meunan ulah
Ubak meunasah,  hana le meu bee

Mugreb ngoen Insya,  hana pue peugah
Lale geupeugah , haba prang dilee
Wahe Wareh lon,  kawoem meutuwah
Seuramoe Mekkah,  jaga tiep  watee

Meukon droe keudroe,  adoe tapapah
Goeb laen payah,  tanyoe dipangkee
Seumbahyang limoeng,  habeh takeubah
Peu cit tapeugah,  droe teuh le eleumee

Pakoen cit yang jroh,  rot teh nyang ceudah
Bak buet nyang salah,  taboeh lam abee
Oh noe wasiet lon,  sion lon peugah
Pateh amanah , haba lon dungee

 ( Cutlem Kabikuraba )19/04/2013