Pages


Minggu, 05 Mei 2013

HIKAYAT NABI MUSA (KEUNEUBAH AWAI ) BAGIAN ( 3 )



=======================================
Hingga teuma , dalam thoen nyan
Puteh bandum , aneuk dum na
Dua thoen nyan , meunan ulah
Neubri upah , akan Musa

Ka jeuet kameng,  dum barollah
Han peue peugah , laksin laksa
Hingga sampoe,  troeh siploh thon
Teutap sinan,  Nabi Musa

Geubeue kameng,  dalam padang
Neuduek sajan , ngoen tuan Ta
'Oh ka sampoe,  troeh siploeh thoen
Syuib neukheun , meunoe haba

Wahe aneuk,  nyang samlakoe
Deungoe lon kheun proe , u bak gata
Jinoe aneuk , ulon pulang
Sikalian , milek gata

Dum na kameng , ulon bri hak
Lon ngon si nyak , Siti Safura
Ho nyang suka , takeumeung jak
Hoe nyang galak,  jinoe taba

Meungna hajat , takeumeung woe
Ubak nanggroe,  ayah bunda
Ban nyangpike,  bak samlakoe
Ban suka droe , he aneukda

Meunyo aneuk,  taduek sinoe
Nibak lon nyoe,  di jeumala
Meunan sabda,  Nabi Syuib
Teuma marit , Nabi Musa

Neubri izin,  he ayah droe
Hajat lon woe , saweue bunda
Doa beule , keubajikan
He du badan , keu aneukda

Insya Allah,  he samlakoe
Jak aneuk droe , beu seujahtra
Hingga teuma,  wahe adoe
Peuhase droe,  Nabi Musa 
Deungon judo,  pih neupeuwoe
Nyang sambinoe,  Ti Safura
Bak masa,  nyan tuan Siti
Dalam hame , po jroeh rupa

'Oh ka hase,  seuleungkapan
Kheundak beurjalan , laju sigra
Nabi Syuib , yoehnyan neukheun
Tadeungo lon , he aneukda

Lakee doa,  ubak Tuhan
Keu lon tuan,  uleh gata
Mata ulon,  ka seupot klam
Neubri beutrang , uleh rabbana

Mudah-mudahan , cit trang leugat
Deungoen beureukat,  doa gata
Nabi Musa , seuot pantah
Bah le ayah , lakee doa

Lon kheun amin,  wahe ayah
Mohon pantah,  bak rabbana
Tatkala nyan , dua nabi
Neubeudoeh le , mohon pinta

Lakee doa,  ubak Tuhan
Seureuta neuleueng,  jaroe dua
Nabi Syuib , di hadapan
Di beulakang , neudoeng Musa

Mohon yoehnyan,  ubak Tuhan
Neubri beutrang , cahya mata
Masa nyan le , keundak Tuhan
Ka meuriwang , miseue nyang ka

Badan kuat , mata ka trang
Han ubah ban,  ureueng muda
Yoeh nyan sujud , dua nabi
U bak Rabbi , po Nyang Esa

Sujud syuko , pujoe Tuhan
Nyang peujeuet alam , dum sineuna
Nabi Syuib,  bak masa nyan
Deuh neukaloen,  Nabi Musa 
Nyang baroe kon,  wahe taulan
Goh neupandang,  deungon nyata
Sabab mata , ka seupot klam
Goh neu eu trang,  rupa Musa

'Oh ban neueu , that analan
Neudroeb rijang,  neucoem neuwa
Ka meucoem-coem,  keudeh keunoe
Ka meumoe-moe , geumeuwa-wa

Hingga teuma , singoeh uroe
Neumohon droe,  Nabi Musa
Neubri izin , wahe ayah
Lon meulangkah , jinoe sigra

Doa beu Ie , keubajikan
He du badan , keu kamoe dua
Tajak aneuk , beuseulamat
Beu jeuoh laknat,  jarak mara

Beu Tuhan bri , sampoe hajat
Beu troeh bak teumpat , ayah bunda
'Oh lheueh izin,  dum sinaroe
Beudoeh jinoe,  Nabi Musa

Bak masa nyan,  neubeurjalan
Deungon tuan , Siti Safura
Lom ngoen kameng , sikalian
Neuba sajan , uleh Musa

Neubloeh alue,  haroeng padang
Dalam hutan , rimba raya
Padum uroe , deungon malam
Neubeurjalan,  roet lam rimba

Hingga teuma,  bak si malam
Teukeudi Tuhan,  po nyang Esa
Yoh nyan saket,  tuan Siti
Heundak lahe , budak nyata

Teuka hujeuen , sangat leubat
Reudoek kilat,  su meutaga
Ngon geulanteue,  su raya that
seupoet pi that,  glap gulita 
Nabi Musa,  that teuceungang
Neukaloen nyan , dum sigala
Hingga teuma , tatkala nyan
Deuh neupandang , saboeh cahya

Han that jeuoh,  leumah neu eu
Sang  apui hu , meucuaca
Teuma neukheun , bak sambinoe
Deungoe kamoe,  he adekda

Taduek adek , gata sinoe
Lon jak coek nyoe , apui raya
Lon coek apui , saboeh tungoe
Bah le sinoe,  madeueng gata

Han peue salah,  tuanku droe
Rijang keunoe,  lom neugisa
Yoh nyan neujak,  Nabi yullah
Keunan pantah,  bak deuh cahya

Deungon kheundak,  nibak Allah
Lhee boeh langkah,  ka troeh Musa
Dua reutoeh peusangka,  jeuoh jalan
Ngoen grak Tuhan , troeh ngoen sigra

Ban troeh Musa , bak buket nyan
Neueu sinan , kayee raya
Sibak kayee , sangat hij o
Sang apui hu , meucuaca

Phoen di pucoek , troeh bak uram
Lang geumilang , hu meucahya
Nabi Musa , hireuen mandang
Neukalon nyan,  kayee raya

Teuma neucoek , on naleueng thoe
Ikat laju,  bak tungkatnya
Makeusud coek , nyan apui hu
Neungoe laju , yoehnyan teuma

Tatkala nyan,  peureuman Tuhan
Neungoe yoehnyan,  uleh Musa
Wahe Musa,  deungoe peureuman
Bahwa ulon , Tuhan gata 
Meunyang peujeuet , sigala alam
Jen ngoen insane,  dum sineuna
Keubah ceureupu,  nibak gaki
Teumpat suci,  tadoeng  gata

Musa deungoe,  peureuman Tuhan
Neuseuot yoehnyan , pantah sigra
Neusuet ceureupu,  le neukeubah
Kheundak Allah,  jadi kala

Nabi yullah , peuduek tungkat
Jafi  leugat,  uleue raya
Nabi Musa , ka teumakoet
Neukaloen jeuet,  uleue ngoen kala

Bak masa nyan,  teumakoet that
Peureuman hadharat , lom bak Musa
Wahe Musa,  bek teumakoet
Tacoek leugat,  tungkat gata

Musa deungoe,  peureuman Tuhan
Neumat rijang,  uleue raya
Sare neumat , deungoen tangan
Ka meuriwang , miseue nyang ka

Meuriwang loem,  jadi tungkat
Hireuen sangat , Nabi Musa
Lom peuereuman,  po Hadharat
Yoehnyan leugat,  u bak Musa

Wahe Musa , deungoe kamoe
Peue na jinoe , bak jaroe gata
Droe neu sidroe , nyang keutahui
He ya Rabbi , seumbah Musa

Yoehnyan Musa,  that teuceungang
Lom peureuman , Po Nyang Esa
Wahe Musa,  buang-buang
Jipeh  rijang , tungkat gata

Musa deungoe,  peureuman Tuhan
Tungkat yoehnyan , neusroem sigra
Deungon kheundak,  po Hadharat
Yoehnyan tungkat , jadi naga 
Sangat raya , lagi hebat
'Ajaib that , hana tara
Saboh nanggroe , ek peureulan
Dumna teelan , badan raya

Sangat bisa , lagi juah
Ta eu babah , sang kuala
Jiprueh bisa , dum meuhambo
Sang apui hu , ta eu rupa

Bukoen miseue,  naga laen
Hana bandeng , ngoen tapeusa
Tamse buket , takaloen pruet
Tujoeh ploeh sayeuep , bak anggeeta

Saboeh sayeuep , 'oh jiteueng rata
Saboeh nanggroe , teutoep rata
Tujoeh reutoeh , gaki jih le
Sang apui hu,  ta eu cula

Watee jijak,  leungoe bumoe
Hana bagoe,  hibat rupa
Panyang naga , han peue peugah
Peureuman Allah,  nibak Musa

Wahe Musa,  tacoek tungkat
Cuba tamat,  laju sigra
Musa deungoe,  peureuman Tuhan
Surung tangan , u bak naga

Sare Musa,  neuleueng jaroe
Tungkat meuwoe , miseue nyang ka
Meuriwang lom , jadi tungkat
ajaib that , buet rabbana

Lom peureuman , nibak rabbi
Ubak Nabi, yullah Musa
Wahe Musa,  balek lagi
Siblah kiri , tungkat gata

Cuba kipah , siblah ateueh
Pakri ban deuh,  taeu rupa
Musa deungoe,  peureuman Tuhan
Laju rijang , meukeurija 
Balek tungkat,  bak lhoeng kiri
Neukipah Ie,  u antara
Teubiet cahya,  sangat that trang
Peungeuh alam , meucuaca

Na tamse ban , cahya uroe
Peungeuh nangroe , jeueb-jeueb donya
Meunyoe makeusud,  Nabi yullah
Neukeumeung poeh , musoeh dum na

Ngoen cahya nyan,  bandum mate
Tutoeng sare , hangoeh sigra
Barangkadum,  rame musoeh
Bandum hangoeh , siklep mata

Meunan neubri , le hadharat
Mukjizat Nabi, yullah Musa
Nibak tungkat , siribee mukjizat
Karonya hadharat,  akan Musa

Lom peureuman , nibak rabbi
Ubak Nabi , nyang mulia
Wahe Musa , jak peureugi
Nanggroe Meuse,  jinoe gata

Raja Firaun , tajak lawan
Yue beuiman , Tuhan nyang Esa
Musa deungoe,  peureuman Allah
Peuek seumbah , yoehnyan sigra

YA ILAHI WA YA RABBI
Nyang keutahui , dum sigala
Droe neu sidroe , nyang na tukri
Akan siti judo , hamba

Ulon keubah , dalam padang
Kameng sajan , dum seureuta
Troen peureuman , nibak Allah
Bek tagundah , wahe Musa

Bek teumakoet , bek na susah
Kupeurintah,  dum sigala
Jinoe kuyue,  budiadari
Pangsan Siti,  judo gata 
Budiadari,  jadi bidan
Nyang peutimang,  Siti Safura
U bak rimueng,  jinoe kuyue
Jih nyang geubeue , kameng dumna

Musa deungoe,  peureuman Tuhan
Bak masa nyan,  mohon sigra
Ya Tuhanku,  po di kamoe
Neubri jinoe , akan hamba

Neubri mudah,  peukeurjaan
Neubri beutrang,  hate hamba
Neubri hilang , jinoe tilo
Lon meututoe,  jipham bahasa

Ngak jitupeue,  uleh kawoem
Mangat meuphoem,  lom beurkata
Neubri beujeued,  jinoe Harun
Meuntroe ulon , ya Rabbana

Nyang meunjaga , hate ulon
Lon prang Firaun,  ngon kawoemnya
Neubri nubuwwat , akan Harun
Miseue ulon , neukaronya

Kamoe ikot , ban nyang titah
Ban peurintah , nibak gata
Meunan seumbah , 'alaihissalam
Ubak Tuhan,  zat Nyang Esa

Troen peureuman , nibak Tuhan
Kupeutroeh ban , pinta gata
Ban talakee , ku nyang peutroeh
Harun kuboeh,  meuntroe gata

Tajak jinoe , u bak Firaun
Deungoen Harun,  gata dua
Yue beu iman , akan Allah
Tayue keubah,  darohaka

Meunyoe Firaun,  jimeu iman
Na lhee macam,  kukaronya
Nyang peurtama , keu jih kubri
Lon keumbali , meuwoe muda 
Nyang keudua , kujadikan
Keurajaan , nyang that raya
Dari masyrik , troeh u magrib
Jih nyang meuhat,  jadi raja

Keulhee kubri , umu panyang
Peuet reutoeh thoen , dum nan lama
Kutamah umu , peuet reutoeh thoen
Meunan takheun , u bak raja

Lheueh neudeungoe,  peureuman Tuhan
Beudoeh rijang , Nabi Musa
U nanggroe Meuse , neubeurjalan
Tinggai Tuan , Siti Safura

Siti Safura , dalam padang
Po ku Tuhan,  nyang peulara
Bak masa nyan,  suroeh Rabi
Budiadari , keunan teuka

Neuyue jaga,  tuan Siti
Disinan di , dalam rimba
Me ngon geuta,  keuleumbu sajan
Dum pakaian,  lam syureuga

Budiadari,  jadi bidan
Meunyang khadam,  Siti Safura
Alat syeureuga , geuba keunan
Sikalian,  indah rupa

Troeh lom rimueng,  teuka keunan
Jaga kameng , Nabi Musa
Rimueng kawai , dum kameng nyan
Suroeh Tuhan , po nyang Esa

Siti Safura,  teutap sinan
Lon karangan , Nabi Musa
Nabi Musa , neubeurjalan
Neubloeh padang,  ngoen beuluka

Neuharoeng gle,  lom deungon blang
Neubeurjalan , hana reuda
Padum lawet , neujak sabe
Nanggroe meuse , troeh neuhala 
Sinja uroe,  troeh u Meuse
Musa woe le,  u bak bunda
Ban sare troeh , nibak rinyuen
Geureuhem ,  pura-pura

Jantoeng pisang klat , putik pisang nu
Soe di leupu , rumoeh raya
Teuma seuot , Siti Maryam
Meunoe macam , meusuara

Soe bu saleh , meuhei kamoe
Lon ngo bunyoe,  mangat raya
Jaweueb Musa , neukheun meunoe
Ulon sidroe , jamee teuka

Maryam deungoe,  haba meunan
Neukheun yoehnyan,  u bak bunda
Wahe po ma , deungoe kamoe
Jamee sidroe,  keunoe teuka

Buka pinto , he sambinoe
Yue ek keunoe,  he aneukda
Yue duek sinan , di seuramoe
Leueng sambinoe,  laju tika

Panyoet pi ka , lheueh geupasang
Meuhei rijang , jameel teuka
Musa neu ek , pantah rijang
Neuduek sinan,  rab ngoen bunda

Teuma geubeuet,  le hidangan
Makeuen yoehnyan , Nabi Musa
'Oh lheueh makeuen , pinah hidang
Bunda tanyoeng,  meunoe haba

Pane teuka,  he samlakoe
Laen loem soe , na ngoen gata
Jaweueb Musa , cit loen sidroe
Tuhan kamoe , na seureuta

Teuma seuot , Siti Maryam
Pubuet tuan , keunoe teuka
Ubak rumoeh,  ureueng gasien
Nyang miseukin , dalam donya
Syeedara ulon , han meuho le
Nyang geurasi , nama Musa
Padum lawet , hana geuwoe
Saleh ho nanggroe , ka geubungka

Musa deungo , Maryam kheun
Khem teusinyom,  nyang mulia
Na sikeujab , troeh woe Harun
Nyan keuh aduen , Nabi Musa

U bak bunda , tanyoeng Harun
Pane ureueng , keunoe teuka
Ureueng jamee,  he aneuk droe
Ban troeh keunoe,  bunoe sinja

Bukon jamee , ma teungku droe
Nyan keuh adoe , ulon Musa
Hail deungoe,  meunan bagoe
Neudroeb le nyoe , neucoem neuwa

Neucoem le,  saboh badan
That sukaan , hana tara
Yoehnyan teuma,  ban sinaroe
Geumeumoe-moe , geumeuwa-wa

Gemeucoem-coem,  keudeh keunoe
Hana bagoe , suka cita
Lheueh nibak nyan , teuma dudoe
Neukheun meunoe , uleh Musa

Yoehnyan Musa,  le neupeugah
Masa neuweh , nibak raja
Neuplueng nibak , raja Firaun
Dalam huteuen,  meudiwana

Hingga troeh,  u nanggroe Madyan
Sikalian , neucalitra
Siti Safura , dalam padang
Kameng sajan , dum seurueta

Dalam hame, tuan Siti
Sama seukali , neucalitra
Hingga sampoe , keunan neuwoe
Neuhareutoe , seumuanya 
Ban geudeungoe,  dum haba nyan
Sikalian moe , meu'a-'a
Bandum yoehnyan,  ka meumoe-moe
Sang geumanoe , ro ie mata

Keureuna katreb , tan meuteumeung
Ka siploeh thoen , lama masa
Geumeucoem-coem,  keudeh keunoe
Geumeumoe-moe,  geumeuwa-wa

'Oh seb geumoe,  sikalian
Neukheun yoehnyan,  uleh Musa
Musa peugah,  ubak Harun
Neubri maklum,  haba nyang ka

Wahe Harun,  deungoe kamoe
Meuntroe kamoe,  jinoe gata
Suroeh Tuhan,  wahe Harun
Meuntroe ulon,  jinoe gata

Sare Musa,  meunan neukheun
Bak dhoe Harun,  ka na tanda
Bak masanyan , troeh nubuwwat
Keu Nabiyullah , Harun muda

Harun deungoe,  haba meunan
Beudoeh yoehnyan,  pantah sigra
Harun beudoeh , duek meunghadap
Neubri horeumat , akan Musa

'Oh lheueh Harun , neubri horeumat
Neuduek leugat , miseue nyang ka
Musa peugah , u bak Harun
Deungoe  lon kheun,  he kakanda

Tuhan peujeuet , nibak tungkat
Siribee mukjizat,  neukaronya
Ban nyang nafsu,  peue nyang hajat
Hase leugat , ban nyang pinta

Mukjizat , bak tangan kiri
Tuhan jadi,  saboeh cahya
'Oh kukipaih,  blah u ateueh
Cahya peungeuh , hana tara
Na tamse ban , cahya uroe
Peungeuh nanggore , jeueb-jeueb donya
Meunyoe hajat , tapoeh musoeh
Tutoeng hangoeh,  jeuet keu sira

Barangkadum, rame musoeh
Bandum hangoeh , deungoen sigra
Harun deungoe,  dum haba nyan
That sukaan,  hana tara

Musa peugah,  lom bak Harun
Neudeungoe lon,  he kakanda
Suroeh Tuhan, wahe Harun
Bak Firaun ,tajak sigra

Yue Meu iman , akan Tuhan
Nyang peujeuet alam , dum sineuna
Meunan Musa , kalamullah
Dum neupeugah , bak syeedara

Masa nyan keuh , wahe taulan
Keusukaan , akan teuka
Akan kawoem , Bani Israil
Wasiet nabi , dilee masa

Peusan Nabi, yullah Yusuf
Nyang ka makruf , indah rupa
U bak sigala,  Bani Israil
Manoek neubri , dilee tanda

Manoek ku'uek , bak masanyan
Tanda datang,  Nabi Musa
Hingga teuma,  bak siuroe
Neujak jinoe,  le ban dua

Nabi Musa , deungoen Harun
Bak Firaun , neujak sigra
Ubak pageue,  raja Firaun
Meu ikat dum , rimueng bangka

Keureuna seubab,  ji ikat rimueng
Bek rab ureueng , keunan teuka
Baranggasoe , keunan peurab
Jikab leugat , juah raya

Tujoeh uroe,  sigo bri ie
Deungoen rante , u krueng jiba
Nyang jipula , dum disinan
Dalam taman , bak kuruma

Sangat indah,  hana lawan
Nyan keuh rimueng,  sinan jaga
Lingka taman , le that rimueng
Jikab bandum , soe nyang teuka

Nabi Harun , troeh le keunan
Ubak taman,  deungoen Musa
Ban sare rab , deungoen rimueg
Sujud bandum , rimueng bangka

Ka jisujud , yoehnyan bandum
Ubak Harum , deungoen Musa
Nabi  yullah,  laju neujak
Hingga troeh bak , pinto kuta

Neueu pintoe,  yoehnyan teutoep
Musa beuet , le neubuka
Habeh meugrak,  dum sinaroe
Leungoe bumoe,  miseue geumpa

Pageue-pageue,  meugrak leugat
Sangat kuat,  Nabi Musa
Musa tamoeng , deungoen Harun
Seureuta neukheun,  meunoe haba

Bahwa uloen , peusuroeh Tuhan
Nyang peujeuet alam,  dum sineuna
Deuh jideungoe,  le Firaun
Jiyue ureueng , jak pareksa

Soe meututoe,  Ion deungoe su
Cuba jak eu , laju sigra
Teuma jijak , sidroe urueng
Jieu Harun , deungoen Musa

Bak masa nyan , raja laknat
Jihadap le,  rakyat dumna
Musa pih troeh , keunan leugat
Ka meuhadap,  deungoen raja

Ban jikaloen,  le Firaun
Laju jikheun , meunoe haba
Wahe Musa , aneuk uloen
Yoh manyak phoen,  Ion peulara

Bapak gâta , nyoe keuh ulon
Pakoen taplueng,  he aneukda
Sigala rakyat , nanggroe Meuse
Horeumat sare , akan gâta

Pakoen  aneuk,  taboeh nanggroe
He samlakoe , pue kareuna
Ka meuploeh thoen,  hana tawoe
Uloen sidroe , that beurcinta

Jinoe pih that,  rindu deundam
Wahe intan , Ion keu gâta
Pakoen aneuk,  tapoeh Kubti
Ngoen Samiri,  dilee masa

Lheuehnyan , taplueng han tawoe le
He boeh hate,  bak ayahda
Jaweueb Musa , kalamullah
Dum neupeugah,  u bak raja

Sabet beuna,  lagee takheun
Nyang jeuet Ion plueng,  nibak gata
Keureuna Ion poeh,  sidroe Kubti
Ngon Samiri , dilee masa

Nyang keuh sseubab,  Ion plueng leugat
Teumakoet that,  Ion keu gata
Teuma jinoe,  wahe duli
Loen neujadi , uleh rabbana

Ulon jinoe,  jadi nabi
Suroeh Rabbi,  po nyang Esa
Loen peusuroeh,  nibak Allah
Neuyue peugah,  dum bak gata

Tameu iman,  akan Tuhan
Nyang peujeuet alam,  dum sineuna
Jinoe takheun,  nyoe kalimah
He khalifah,  uleh gata 
LA ILAHA ILLALLAH WA ANA MUSA
KALIMULLAH WA NABIYYUHU WA RASULUHU
Seuot raja,  laknat Allah
Peu keu upah , wahe Musa

Beukit lon kheun,  nyan kalimah
Peue na upah , bak Tuhan gata
Jaweueb Musa , kalamullah
Deungoe lon peugah,  wahe raja

Meunyoe  gata,  tameu iman
Akan Tuhan , po nyang Esa
Nyang peujeuet , sigala alam
Na Ihee macam , neukaronya

Nyang peurtama , wahe duli
Tuhan jadi , gata muda
Meuwoe muda , lom keumbali
Karonya Rabbi,  akan gata

Nyang keudua,  he Solutan
Keurajaan , nyang that raya
Masyrik u magrib , takeurajeuen
He Firaun , uleh gata

Keulhee umu , neutamah lon
Peuet reutoeh thoen , lama masa
Hana saket , meusikeujab
Dalam sehat,  sabe gata

Hana peuneng , reuneng siat
Çit lam sehat,  lam tiep masa
Dalam donya , masyeuhu that
Di akhirat,  lam syureuga

Meunan neubri , uleh Tuhan
He Solutan,  akan gata
Meunyoe  gata , tameu iman
Keubajikan , takeureuja

Keureuna gata,  bapak kamoe
Ulon teu nyoe , aneuk gata
Loen ba gata,  he Firaun
Sajan uloen , lam syureuga 
Meunan sabda , Nabi  yullah
Dum neupeugah,  u bak raja
Musa marit,  mangat that su
Sang ie madu , mameh raya

Ngoen suara,  leumoeh leumboet
Teuma seuot , si ceulaka
Wahe Musa, beukit meunan
Tapreh Kaman,  sikutika

Lon krah wazi , deungoen meuntroe
Jinoe jak woe,  dilee gata
Uloen meukeusud,  meusyawarat
Dudoe meuhat,  loen bri haba

Meunan jikheun , le Firaun
Ubak Harun , deungoen Musa
Tatkala nyan,  Nabi  yullah
Neuwoe pantah,  le bam dua

Ubak bunda , neuwoe pantah
Piyoeh payah,  nyang mulia
Leupah Nabi,  ka neujak woe
Raja pindoe,  loen calitra

Jikrah yoehnyan , wazi meuntroe
Dum sinaroe , deungoen sigra
Troeh le keunan , dum meusapat
Jak meuhadap , deungoen raja

Troen le sabda , nibak daulat
Meusyawarat,  haba nyang ka
Ka jipeugah , awai akhe
Jideungoe le,  meuntroe dumna

Dudoe jikheun , le Firaun
Nyang suka loen , meuwoe muda
Meuwoe muda , ingin loen that
Nyang na hajat , nafsu hawa

Seuot Haman , meuntroe mal'un
Meunoe jikheun,  u bak raja
Deelat ampon , syahi alam
Jiyueb kadam , nyang mulia
Padum lawet,  nyang ka zaman
Droe neuyue kheun , Tuhan Esa
Gata Tuhan , kamoe bandum
Pakri takheun,  meunan haba

Meuwoe muda , buet mangat that
Ulon deelat , jeut keurija
Meunyo raja , na meuhajat
Deungoen siat , meuwoe muda

Nyan tuanku,  buet mangat that
Keubah leugat , dum peurmata
Nibak janggoet,  dum sinaroe
Ulon peuwoe,  jinoe muda

Meunan jikheun , meuntroe Haman
Keubah yoehnyan , dum peurmata
Nibak janggoet , raja Firaun
Jisuet bandum , yoehnyan sigra

Lheueh nibaknyan , jiboeh ubat
Laju jilhab , janggoet raja
Ngon ie arang,  laju jilhab
Ka hitam that,  miseue baja

Raja kaloen , janggoet' hitam
That sukaan,  hana tara
Bak jisangka , ka meuriwang
Bak masa nyan , meuwoe muda

Keureuna Firaun, 'sangat beubai
Hana akai , ngoen bicara
Sangat beubai,  raja laknat
Troeh that sisat , si ceulaka

Hingga na lheueng,  padum uroe
Troeh loem sampoe,  neujak Musa
Ban troeh Musa , deungoen Harun
Laju neukheun,  u bak raja

Wahe raja , seubut pantah
Nyoe kalimah uleh gâta
LA ILAHA ILLALLAH MUSA KALIMULLAH
WANA BIYYUHU WARASULUHU
Meunan takheun , nyoe kalimah 

Jinoe leupah , wahe raja
Sigala kawoem,  Bani Israil
Hana rab le , deungoen gata

Teuma tanyoeng , raja pimdoe
Jikheun meunoe,  u bak Musa
Lon eu gata,  gapiet jaroe
Cuba kheun proe,  peu bu makna

Jaweueb Musa , teuma leugat
Nyoe mukjizat, wahe raja
Neukaronya , uleh hadarat
Mukjizat bak,  jaroe hamba

Meunyoe kugrak , blah u bumoe
Teubiet sinoe , saboeh cahya'
Barangkadum , musoeh kamoe
Ngon cahya nyoe , tutoeng sigra

Meunyoe kugrak,  blah u ateueh
Cahya peungeuh , hana tara
Leubeh nibak,  cahya uroe
Peungeuh nanggroe,  jeueb-jeueb donya
Meungna hajat,  kupoeh musoeh
Tutoeng hangoeh, jeuet keusira
Loem jitanyoeng , Ie Firaun
Laen peue loem , mukjizat gata

Peue loem laen , na mukjizat
Seuot leugat,  Nabi Musa
Na loem laen , wahe deelat
Nibak tungkat,  jadi naga

Jadi naga , nyang raya that
Tujoeh ploeh sayeueb,  bak anggeeta
Tujoeh reutoeh , dua gaki
Hana sakri , hibat rupa

Saboeh nanggroe,  jipeureulan
Raya panyang,  hana nyang sa
Sangat bisa,  hana peue kheun
Mate naleueng,  jiprueh bisa 
Mate kayee , deungoen naleueng
Meunyoe ureueng , han jan jihei ma
Loem  jitanyoeng , le Firaun
Bit ban takheun,  wahe Musa

Kadang hana , ban tapeugah
Sang beurakah , haba gata
Musa deungoe,  meunan jikheun
Tungkat meutreung , neugeulawa

Jeuet Ie naga , nyang raya that
Sangat hibat , hana tara
Firaun kaloen , meunan ulah
Teuhah babah , si ceulaka

Ban nyang Musa,  dum neupeugah
Hana ubah , jieu rupa
Raja Firaun,  ka teumakoet
Leungoe  atoet , miseue geumpa

Yoeh nyan naga , jihah babah
Sangat luah,  hana tara
Sang jimeunguet , nanggroe Meuse
Hibat koen le,  ta eu rupa

Bak masa nyan , Bani Israil
U bak Nabi , jikheun sigra
Ya Nabi  yullah,  pakri meunoe
Meung poeh kamoe , dum sineuna

Neukeumeung poeh , bandum makhluk
Nyang sinoe duek , dalam donya
Atawa neupoeh,  raja Firaun
Meunan jikheun , u bak Musa

Musa deungoe,  meunan jikheun
Jaroe neuteueng , u bak naga
Sare Musa , suroeng tangan
Ka meuriwang , miseue nyang ka

Meuriwang loem , jadi tungkat
Ajaib that,  hana tara
Sabda Musa , bak Firaun
Tadeungoe  loen,  wahe raja 
Seubab gata,  bapak uloen
Ta peutimang,  loen le gata
Masa dilee , wahe Firaun
Yoeh ubit loen , ta peulara

That ta gaseh , deungoen sayang
Keu loen tuan , wahe raja
Sang kira koen , ku ingatnyan
Cit kuyue lhan , nibak naga

Jinoe laju,  jipeureulan
Seureuta deungoen,  meuligoe gata
Meunan sabda,  Nabi  yullah
Dum neupeugah,  u bak raja

Firaun deungoe,  meunan ulah
Laknat Allah , han le haba
Hana sapeue,  jeut  jipeugah
Teuhah babah , mantoeng nyangna

Teuma neuwoe,  Nabi  yullah
Laju pantah , le ban dua
Deungoen Harun,  woe bagah
Ubak umi, nyang mulia

Ureung le , Bani Israil
Hana sakri , rame raya
Sigala kawoem , Bani Israil
Meuhimpoen le , ubak Musa

Jak meuhadap , deungoen Nabi
Leubeh kati , ribee laksa
Singoeh uroe,  wahe akhi
Bani Israil,  hadap raja

Jak meunghadap,  raja Firaun
Teuma jikheun , meunoe haba
Nyan neukaloen,  wahe sultan
Pakri ban , mukjizat Musa

Teuma seuot , raja Firaun
Na loen kaloen,  sihe Musa
Nyan keuh seubab , jijak keunoe
Meung peureunoe , ureueng dumna
Meusamboeng ke bagian ……............................4

0 komentar:

Posting Komentar

Komentar FB :