“ TAQWA, “

 Oleh  : SULAIMAN.A.GANI

===========================

Lon puphoen kalam, Alhamdulillah

Lon pujoe Allah, Maha Kadiron

Segala pujoe, meuwoe keu Allah

Nikmat neulimpah, keunoe neupeutroen

Nikmat neupeutroen, keunoe di Allah

Han ek soe balah, han ek soe hitoeng

Ngoen Rahman rahim, sifuet di Allah

Bandum neulimpah, nikmat neupeutroen

Seulawuet saleum, keu Rasulullah

Utusan Allah, keu bandum kawoem

Rahmatan a’lamin, nyan Rasulullah

Peudoeng kalimah, Peusidroe Rabbon

Assalammua’laikom, warahmatullah

Jaroe dua blah, di atueh bubon

Saleum ulon bri, suoet beubagah

Hajat lon peugah, peu ingat kawoem

 Ciri  Taqwa, Hajat lon  peugah

Cara Halfiah, hajat lon susoen

Ka dari Lafadh, jinoe loen peugah

Neudeungoe beusah, Huruf loen susoen

Yang Phoen Huruf, Ta  dile lon peugah

Meu  Tawadhu' sah, ka wahai kawoem

Meureundah diri, tanyoe keu Allah

Taqwa geupeugah, cirri yang keu phoen

Dua huruf  Qaf, arti loen peugah

Lambang Qanaah, disinan muphoem

Ciri Taqwa, beuna  Qanaah

Syukur keu Allah, sidroe  ilahon

Qadha ngoen kada, neubri le Allah

Tanyoe Qanaah, nikmat  neupeutroen

Tanyoe teurimoeng, pue yang bri Allah

Hana meubantah, kheundak  ilahon

Teuma  huruf  Waw, keulhe  loen peugah

Lambang  Wara' sah, disinan muphoem
Ciri  Taqwa,  Wara’ geupeugah

Arti  Halfiah,  sinan tapeuphoem

Keupuet  huru Ya, jinoe lon peugah
Yakin keu Allah, Tanyoe hai kawoem

Ciri  Taqwa, meupuet ka sudah

Yakin keu Allah, hana  syoek  sangka

Meuka keuh habeh,  Arti  Halfiah

Taqwa loen peugah, huruf lon susoen

Meunyoe na salah, loen lake  meuah

Peu beutoi bagah, bek salah  muphoem

Sinoe bak hamba, loen lake meuah

Keudeh bak Allah, loen  lake  Ampon

Neubri Tuhanku, beujuet  Ibadah

Haba loen kisah, peu ingat  kawoem

Beujuet Amalan, neutueng le Allah

Juet keu Ibadah,  Amai  keu  uloen

Blang padang masya, sideh neubalah

Syurga neukeubah,  jatah keu  uloen

( Tgk Diyueb Bruek, 10/05/2013 )

Ciri2 orang bertaqwa sesuai lafadh taqwa,
===============================
lafadh taqwa terdiri :
dari huruf Ta, huruf Qaf, huruf Waw, huru Ya.
Huruf Ta melambangkan Tawadhu'
huruf Qaf melambangkan Qana'ah
huruf Waw melambangkan Wara'
huruf Ya melambangkan yakin. , Maka ciri2 orang bertaqwa itu:adalah,
1. Tawadhu', 2. Qana'ah, 3. Wara' , 4. Yakin