“ DOSA RUMOEH KOST “

Oleh : SULAIMAN,A,GANI
=======================
Alhamdulillah, Lon puphon kalam
Lon pujoe tuhan, sidroe yang Esa
Yang bri raseuki, keu bandum insam
Yang peunan peutan, qadha ngoen kadha

Seulawuet saleum, akan janjongan
Utusan tuhan, atueh rhueng donya
Yang bri syafaat, uroe komdian
Wate di Mizan, Blang padang masya

Samboet saleum lon, yang tuleh nazam
Inoeng ngoen agam, tuha ngoen muda
Geulantoe lon bri, kupi sicawan
Nyoepat lon karang, saboeh mustika

Wate ta baca, haba lam Koran
Ile meugram gram, tijoeh ie mata
Dile jamuen kon, hantom lagenyan
Aceh lon sayang, tanoeh Aulia

Yoeh jameun Pre Seks, tadeungoe pih tan
Jinoe hai rakan, bebas lagoena
Rata rumoeh kost , rab bandum meunan
Pree seks disinan, meuraja lela

Jikeumpul keubo, tinggai disinan
Inoeng ngoen Agam, nikah gohlom na
Le that terjadi, lagenyan macam
Rumoh kost meunan, beugoet neujaga

Meuhoe ka keusyik, ngoen tungku imam
Ketua lingkungan , deungoen pemuda
Meuhoe tuhat puet, ngoen tuhan lapan
Meubuet lagenyan, han neutem jaga

Keu bandum pemimpin, yang mat jabatan
Yang phoen camatan, sampoe u desa
Atoe Rumoeh kost, peugoet aturan
Qanun yue rancang, bak wali kota

Meuhan neuceugah, mantoeng lagenyan
Preh kutoeh tuhan, neupeutroen bala
Kalhueh Tsunami, neubri saboeh jan
Pue tapreh pajan, geulungkop donya

Hanpue ta ujoe, meunyoe ngoen Tuhan
Meumantoeng meunan, taceugah hana
Puteing beuliong, bumoe geupeulham
Tamoeng u dalam, sireutoeh deupa

Meumada ohnoe, haba lon karang
Lake bak Tuhan, beujeuoh bala
Neubri peutunyoek, keu bandum insan
Yang larang Tuhan, bek roeh keurija
(Tgk Diyueb Bruek/Sulaiman.A.Gani )
Banda Aceh, Tgl 4 April 2013

Karya Tgk Diyueb Bruek, bak Majalah

Meunara Baiturrahman,Jumat tgl 5 April 2013