““ ACEH LAM BALA.- III “

    Oleh “  SULAIMAN.A.GANI

==================================

Assalammua’laikom, Warahmatullah

Saleum  Ukuwah, bacut  lon sapa

Aceh  lam bala, hajat  lon  peugah

Juet keu Muidhah, kadang  meuguna

Aceh  lhe sagoe, hajat lon kisah

Pakon  le Allah, sabe  bri  bala

Seubab salah droe, sabe  buet  salah

Maka  le  Allah, Neupeutroen  Bala

Salah  yang  keuphoen(1), Seuramoe  Meukah

Sabe  roe darah,  tanyoe  sibangsa

Sabe  keu droe droe,  ka  tameureupah

Sabe  Fitnah, hana  toem  reuda

Bunuh  membunuh, konle  masalah

Tiep uroe  Allah, lam Koran tabaca

Sabe  iseulam, mantoeng  roe  darah

Maka  le Allah, Neupeutroen  bala

Salah keudua (2), Seuramoe  Meukah

Ingkar  keu sumpah, sabe  tiep  masa

Ingkar  keu janji, Tanyoe  ngoen Allah

Ka Tapeubeuah, hana  Takira

Ingkar keu Rakyat, Janji Taruwah

Dile  Tapeugah,  janji  Seutia

Janji  Peumakmu, Seuramoe  meukah

Jinoe  peubeuah,  Ingat  pih  Hana

DII / TII, miseu lon  peugah

Pakriban Sumpah, janji Seutia

Meunan sit  jinoe, biat  ngoen sumpah

Hoe ka jikeubah, peuduek  coeng  para

Salah yang keu lhee(3), seuramoe  Meukah

Peudoeng Syariah, keu mangat  Haba

Syariat  Iseulam, seucara  Kaffah

Keu  Mangat  peugah, peuleumak  Haba

Wate  Takaloen, seuramoe  Meukah

Lage  Eropah, Adat  Budaya

Hansep disinoe, meunyoe lon ruwah

Maka  le Allah, Neupeutroen  Bala

Salah yang keupuet(4), Seuramoe  Meukah

Sabe  buet  salah, jipajoeh  riba

Sabe  lam Kropsi, tiep  uroe  Allah

Seu  olah olah, kajuet  Budaya

Miseu  Proposal, nyan  dana  Hibbah

Alasan  jipeugah, Anuek  Syuhada

Keu  anuek  yatim,  sabe  jipeugah

Keu pruet droe jih sah, bandum jiseuba

Salah keu limoeng(5), Seuramoe  Meukah

Judi lon peugah, ka  deungan Zina

Sabe  lam Maksiet, tiep  uroe  Allah

Ka  jimeu ukah, Sabe  tiep  masa

Maka  lagenyoe, Seuramoe  Meukah

Sabe le Allah, Neupeutroen  Bala

Meumada  ohnoe, haba lon kisah

Jan laen sabah, tasamboeng  Teuma

(Tgk Diyueb Bruek/Sulaiman.A.Gani)

Tanggal  2  Nopember  2012