¤ KALAM NABI DI AKHE HAYAT ¤

===============================
Deungoen Bismillah, lon puphoen Rawi
Puja ngon puji, keu Allah ta'ala
Seulaweut saleum, 'oh lheuh nyan lagi
Keupada Nabi, Rasul Musthafa

Dilee Meureudu, wilayah Sigli
'Oh lheuh dibagi, ka Pidie Jaya
Didalam nazam, ulon neuk rawi
Kalam di Nabi, seuneulheuh haba

Ash-shalah, nyan yang awwali
Aqimish shalati, gusamboeng teuma
Dirikan seumbahyang, meunan Areuti
Baci pahami, deungon seksama

Takalon jinoe, sihari-hari
Nyang jaga shalati, kadit lagoena
Padahai shalat, saboeh  pondasi
Wajeb dan mesti, tanyoe keurija

Ladoem wap dagang, 'oh watee maghribi
Luput hai akhi, bak takeurija
Ka tapeu utama, nyang kon kheun Nabi
Nuraka Wail-i, ka geuseudia

Contoe saboeh treuk, watee khanduri
Pesta si Nyak Ti, Leuhoe ka hana
Seubab dum jamee, siboek sikali
Meutan layani, nyan geu-anggap cupa

Kalam keudua, An-Nisa' kheun Nabi
Itqun nisa-i, geusambong haba
Jaga ureung inoeng, nahar ngon laili
Ulon ploeh rawi, neusimak Lanja

Kawom wanita, bak tangieng dali
Jumlah di ukhti, that jai ka teuma
Pulom lawet nyoe, ka emansipasi
Sosah kendali, meunyoe salah cara

Hingga troek sampoe, mengaku nabi
Lia Eden akhi, contoe nyata
Dalam masyarakat, bak tapeurahti
Bajee di ukhti, luar biasa

Bak meupakaian, pileh nyang Trendi
Dak kon Islami, teutap geu suka
Ladoem teutop ulee, paneuk bak gaki
Nyang ladoem lagi, leumah Be-Ha

Bukon lon fitnah, keu kawoem ukhti
Neukalon bukti, kon lon peusuna
Teuma nyang keu-3, akhe kheun Nabi
Nyang keuh Ummati, 3 goe geukata

Sunggoh geutanyoe, geumaseh Nabi
Teutap geu-zikri, yoh goeh geubungka
Teuma geutanyoe, keupada Nabi
Jai that hai akhi, tabalah hana

'Oh lheuh seumbahyang, oleh ummati
Sheulaweut Nabi, na yang tan baca
Dalae khairat, baca nan Nabi
Jinoe muda-mudi, jareung nyang suka

Kembang Tanjong, di nanggroe Pidie
Indra Puri, di Aceh Raya
Lon lakee meu'ah, serta koreksi
Nazam lon rawi, gohlom samporna

===========================================