Pages


Sabtu, 04 Mei 2013

“ RAJA PEUNAWA “



   Oleh : SULAIMAN.A.GANI.
================================
Alhamdulillah, wabihamdihi
Lon pujoe rabbi, azawajlla
Yang peunan peutan, yang bri raseuki
Bandum buet rabbi, yang that Kuasa

Seulawuet saleum, akan Rasuli
Pang ule Nabi, bandum Ambiya
Yang ba risilah, utusan  rabbi
Di Atueh bumi, ban sigoem donya

Samboet saleum lon, tangloeng kudangdi
Hajat lon rawi, saboeh Mustika
Geulantoe lon joek, sicawan kupi
Geulantoe lon bri, roti ngoen bada

Nyoe pat na bacut, Nasehat lon bri
Ayah ngoen ummi, putri  ngoen putra
Peu ingat kawoem, ngat bek terjadi
Putra ngoen putri, harapan  bangsa

Neucoek keu ubat, peulita  hati
Mustika lon bri, Raja  peunawa
Kadang mustajueb, Tuhanku neubri
Wasiet ngoen janji, ngat bek meutuka

 Wasiet amanah,  hanjeuet meu'ungki
Harap ngoen janji , hanjeuet binasa
Beurangsoë ureueng , ji-ubah janji
Kon umat Nabi, han bèe sjeuruga

Tajak u Haji , talingka Ka'bah,
Tajak ziarah , kubu aulia,
Keureuna janji , bukon buet mudah
Meungnyoe ta-ubah,  raya that dèesya

Beu ingat-ingat , ka wahee kawom,
Adat ngon hukom,  beuna bak gata,
Hukom Agama , hanjeuet takheun höm,
Wajéb tapuphöem , tadjak paréksa.

Takalon  jinoe, le that  terjadi
Sumpah ngoen janji, bandum jituka
Biat ngoen sumpah, bandum di ungki
Disangka pakri, hana meudosa

Ranub bineh glee , meuputi krang,
Ranub bineh blang,  meu puti tangkee
Utang ngoen ka oi , peuglah beurijang,
Ngat glah ngoen tuhan,  'oeh uroe pagee

Mirah ôn jambe , meugantoe Musèm
Mirah ôn lapèng , Buleun purnama
Janji ngoen sumpah, ta  ucap kayem
Tapi han tatem, peuglah le gata

Mirah oen seutui, Musem Peungeurèng
Mirah jambe kleng , beut kilat Sama
Biat ngoen sumpah, kalhueh tapateng
Jinoe tapaleng, tapeugah hana

Mirah boh campli,  oen ka jeut panen
Mirah oen limeng,  duroeh meukeuba
Janji ngoen sumpah, ta ucap  enteng
Maka meuren ren, tapeuglah hana
====================================


0 komentar:

Posting Komentar

Komentar FB :