“ ANEUK PUTOH SIKULA”

   Oleh : SULAIMAN.A.GANI

=============================================

Pajan sit masa boeh timoen taplah, meukoen wate grah oh uroe tutoeng

Pajan sit masa tanyoe meununtut, yoeh masa ubeut  na ureueng tuloeng

Alhamdulillah,  loen pujoe tuhan

Seulaweut saleum,  akan saidina

Salam alaikom,  jaroe loen layang

Keu bandum rakan,  dusoen ngoen banda

Meukru seumangat , rahmat meukalam

Neubri ya tuhan , ban hajat pinta

Hajat loen kisah,  bah peundidikan

Keu aneuk badan , putoeh sikula

Sikula tanle , yang cukop sayang

Jinoe bak jalan , meuminta minta

Kajeut peungeumis , rata jeut simpang

Uroe ngoen malam , saban kutika

Karoe ie mata , wate tapandang

Keu bungoeng keumang,  harapan bangsa

Sikula tanle, dijak beut pih tan

Jeut geulandangan , sampoe oh tuha

Ngoen baje beukah,  minta sumbangan

Jidoeng bak jalan,  dalam uroe kha

Meusupoe hate , han teuka sayang

Meunyoe lagenyan,  harapan bangsa

Mantoeng leupah cut,  sikula ka tan

Dijak beut pih han , bak dali rupa

Jeut keu peungeumis , ngoen geulandangan

Laloe bak  jalan,  mita deureuma

Padum na seudeh , neucuba bayang

Aleh pakriban,  oh wate tuha

Eleume donya , ka meuhat sit tan

Eleume tuhan,  ka meuhat hana

Pane jithe droe , peuneujeut tuhan

Pane jituban , balah guna ma

Pane jitukri , toeh keuwajiban

Pane diwaham,  bela neugara

 

Soe tanggoeng jaweub , meunyoe lage nyan

Lam undang undangan , neucuba baca

Pasai lhe ploeh sa , di wasiet kiban

Hak peundidikan , warga neugara

Pasai lhe ploeh peut,  kiban jipeusan

Keu geulandangan , aneuk neugara

Wahe pimpinan , yang mat jabatan

Beunan neusayang,  keu aneuk bangsa

Bek meuteung bayeung,  rata jeut simpang

Neujak coek rijang , neupadu bawa

Neubloe seupatu,  peusoek seuragam

Jak intat rijang,  tamoeng sikula

Keu aneuk asuh,  pante asuhan

Bekle bak jalan,  meuraba raba

Bek sampoe hancoe , putoeh harapan

Jeut geulandangan,  harapan bangsa

Beujeut geulantoe , dudoe keumudian

Beujeut awaknyan,  peunerus bangsa

Sikula ngoen beut , dua atranyan

Yang bek hai rakan,  bandua hana

Sikula pih jeut , bak beut pih meunan

Bandua jalan,  eleume beuna

Malem bak jak beut,  kitab jeut tapham

Muphoem aturan , hukoem agama

Malem sikula,  luwah wawasan

Muphoem aturan , eleume donya

Jeut keupeujabat,  pangkat yang manyang

Meusoe yang seunang,  neucuba kira

Teungoeh na wate,  tajak beut rijang

Atau hai rakan , tajak sikula

Riri yang suka,  dua atranyan

Meunoe ban macam , kheun ureung tuha

Pajan sit masa , boeh timoen taplah

Meukon wate grah , oh uroe tutoeng

Pajan sit masa , tanyoe meununtut

Yoeh masa ubeut,  na urueng tuloeng

Bukoen than sayang,  eungkot khan kapah

Ka apoeh apah , dalam ie racoen

Yoeh masa ubuet,  mantoeng ma ngoen yah

Mantoeng  soe papah,  na ureueng tuloeng

Bukoen that sayang , si jeumpa mirah

Cabeung ka patah , geumpa peu ayoen

Putoeh sikula , oh noe loen kisah

Singoh laen bah ,mdudoe tasamboeng

( Tgk Diyueb Bruek, 22/03/2011 )