Pages


Senin, 06 Mei 2013

“ RINTIHAN HATE “



=================================
Jitoeh ujeun,  bak teungoeh malam
Ban saboeh badan , teurasa leupi
Ngoen tiba-tiba,  bule meugram-gram
Hate di dalam , ka ji meurawi

Jikhen le hate , lam perasaan
Pakoen hai badan,  tan sadar diri
Sabe kapajoeh , nyan nikmat Tuhan
Ka syukur pihtan,  keupada Rabbi

Maksiet kapubuet , ka taubat pihtan
Seu akan-akan,  keukal dibumi
Yang na kapubuet , Cuma seumbahyang
Pue sep dengoen nyan , meunghadap rabbi

Ngoen wareh lingka,  katuri pihtan
Katuri rakan , Cuma famili
Sebab rhoet ayah , na keuturunan
Atau hai badan,  roet gareh ummi

Rame duem laen,  ureung iselam
Chiet saboeh jalan , pulang ngoen pergi
Saboeh gampoeng di kah,  ngoen goep nyan
Hantoem hai badan , silaturrahmi

Padahai nabi , pernah neupeusan
Geuyue jalan kan , silaturrahmi
Yang geukhen saudara,  sesama islam
Bukoen hai badan,  sitaloe wali

160 boeh rumoeh , wahe e badan
Kiri ngoen kanan , bena meuturi
Bak gata tinggai , depan belakang
Ta samboeng keunan , silaturrahmi

Pueloem di kota , meususah pih tan
Rumoeh e badan , rapat meuriti
Puechiet pegah droe , ureung iselam
Teutangga jiran,  hana ka turi

Tijoeh ie mata , jile berlinang
Pakoen ek menan , jikheun le hati
Wate teu ingat,  sabe teubayang
Ulon ngoen jiran,  goloem meturi

Sabe pegah droe , ureung iselam
Ureung blah deh jalan,  hana meuturi
Saboeh pague , kiri ngoen kana
Pakoen urueng nyan , tan tapadoli

Hoka anggota , groep panton nazam
Beudoeh hai rakan, silaturrahmi
Tabuka hate,  ta pinah dendam
Geutanyoe islam , contoeh bak nabi

Beukayem ta ikoet,  jama’ah seumbahyang
Di sinan awai , punca meuturi
Seumbahyang berjama’ah,  ikoet hai rakan
Hana alasan,  shalat sendiri

Keuculi ujen,  ngoen saket badan
Yang laen hai rakan , hana geu asi
Meunyoe na salah , haba lon karang
Kritik ngoen saran,  beubagah neubi
Top of Form
Sunggoh that indah, makna lam Nazam
Ulon hai rakan, terpana sendiri
Adoe lon turu, meunan kon mayang
Dalam tulisan, makna geu sudi

BeuLee tatuleh, hai adoe badan
Meunyoe tulesan, indak han sakri
Shilaturrahmi, asoe di dalam
Cukop lhok dalam, Nazam neurawi

Shilaturrahmi, Punca dari salam
Beukayem rakan, saleum gata bri
Hoe-hoe nyang tajak, sabee sebarkan
Supaya taulan, Yuep payoeng Rabbi
Bottom of Form

0 komentar:

Posting Komentar

Komentar FB :