HIKAYAT NABI MUSA (KEUNEUBAH AWAI ) BAGIAN ( 2 )

=========================================
Bit teungku nyoe, teuga hansoe
Siblah jaroe , ek geubuka
Meunan pike , po sambinoe
Ban dua droe,  hireuen raya

Lheueh ie kameng , dum sinaroe
Laju geuwoe le,  ban dua
Tinggai Musa , sinan sidroe
Piyoh jinoe , yueb kayee raya

Di yueb kayee,  teuduek sinan
Pujoe tuhan , hana reuda
Padum lawet , neubeujalan
Neubloeh padang,  ngoen beuluka

Makeuen pih tan , minom pih han
Bak masa nyan , muhon pinta
YA ILAHI WA YA RABBI
Bri reuzeuki,  akan hamba

Hamba teuh nyoe,  keulaparan
Bri makanan , ya rabbana
Lheueh meulakee,  'alaihissalam
Troeh le datang , keunan teuka

Troeh makanan , ngon minuman
Karonya Tuhan , po Nyang Esa
Musa makeuen , dum makanan
Ngoen minuman,  lazat rasa

Teutap Musa,  piyoeh sinan
Lon karangan,  inoeng dua
Nyan keuh aneuk , Nabi Syuib
Meunan sabet,  lam calitra

Lheueh ie kameng,  laju geuwoe
Hingga sampoe , troh u tangga
Syuib 'tanyoeng , bak aneuk droe
Rijang tawoe,  he aneukda

Neu eu kameng,  pih sangat troe
Han toem puroe , dilee nyang ka
Pane ie nyoe,  he sambinoe
Kameng that troe,  dum sineuna 

Jaweueb Siti , nyang sambinoe
Deungoe kamoe , he ayahda
Bak teulaga,  he ayah droe
Teuka sidroe , ureueng muda

Baro teuka , goeb nyan keunoe
Ureueng lakoe,  muda bahlia
Rupa indah , that samlakoe
Tamse uroe , cahya muka

Geutanyoeng le , ubak kamoe
Peubuet sinoe , bak teulaga
Meujak bri ie , kameng dumnyoe
Seuot kamoe,  he ayahda

Ban geudeungoe,  meukheun meunan
Geujak rijang,  bak teulaga
Buka tutoep , teulaga nyan
Siblah tangan , beuot sigra

Geucrong ngon ie , laju yohnyan
Geubri minom , kameng dumna
Lheueh ie kameng , hingga ngon troe
Teuma meuwoe , kamoe dua

Ureueng muda , nyang samlakoe
Sideh jinoe , meuseuninya
Di yueb kayee,  piyoeh sinan
Pujoe Tuhan , hana reuda

Nabi Syuib,  deungoe meunan
Hireuen mandang , hana tara
Teutapi neuthee , Nabi  yullah
Ureueng meugah,  bak rabbana

Ureueng mulia,  nibak Allah
Neukheun pantah , bak aneukda
Beukit meunan,  he aneuk droe
Jak tueng keunoe,  ureueng muda

Meuhoi leugat , yuejak keunoe
Meukeusud kamoe , balah guna
Beudoeh Siti , nyang sambinoe
Jak tueng jinoe,  jamee teuka 

Rab bak kayee ,hingga ka troeh
Bak neupiyoh , Nabi Musa
Tuan Siti , doeng di jeuoh
Neupeugah troeh , meunoe haba

Wahe tuan , jamee ban troeh
Ulon suroeh,  bak ayahda
Jak tueng tuan , nyang seumeuloeh
Langkah beutroeh , ubak hamba

Nabi Syuib , ayah kamoe
Yue jak tueng nyoe , tuan hamba
Hajat meurumpoek , ngoen tunku droe
Keudeh jinoe,  u astana

Nabi Musa , deungoe  meunan
That sukaan , hana tara
Neungoe nama,  Nabi Syuib
Nyang jeuet sangat,  suka cita

Nabi Musa,  seuot bagah
Insya Allah , he adekda
Teuma beudoeh , Nabiyullah
Neucoek langkah,  neujak sigra

Tuan Siti , di hadapan
Di belakang , neujak Musa
Laju leugat,  neubeujalan
Tatkala nyan , angen teuka

Jipoet angen,  ija jimboeh
Leumah tuboh , Ti Safura
Meusilak bajee,  leumah tuboeh
That seumeuloh,  hana tara

Musa kaloen , leumah tuboeh
Neupeugah troewh,  meunoe haba
Wahe adek,  meuh sineupoeh
Jak beujeuoh,  dilee gata

Ikat bajee , bek angen boh
Bek deuh tuboeh , lon eu rupa
Nibak jalan,  batee taboeh
Nyan adek beh , jeuet keutanda 

Tuan Siti , deungoe meunan
Neujak yoehnyan , pantaih sigra
Hingga jeuoh , neubeujalan
Di likoet nyan , neujak Musa

'Oh ka jarak,  Siti utoeh
Batee jiboeh , akan tanda
Meunan keuh hai , geujak sunggoeh
Hingga ka troeh , u rumoh tangga

Ban sare troeh,  Musa langkah
Saleuem pantah,  Ie neumula
ASSALAMU'ALAIKUM YA NABI ALLAH
Ka troeh langkah , keunoe hamba

ALAIKUM SALAM WARAHMATULLAH
That meutuah , meu bahgia
Ka troeh aneuk , keunoe langkah
Saweue  ayah,  dalam rimba

Teuma neubri , le ngoen teumpat
Jroeh that adat , peumulia
Musa piyoh,  na sikeujab
Nabi Syuib , le pareksa

Wahe aneuk , nyang samlakoe
Siri nanggroe,  keunoe teuka
Siri bangsa , gata sidroe
Kheun samlakoe,  ubak hamba

Ulon kawom , Bani Israil
Jaweueb Nabi ,yullah Musa
Di nanggroe Meuse , Ion peureugi
Ka troeh kemari,  bak ayahda

Musa nama , ulon tuan
Aneuk Imran,  aneuk Lawa
Aneuk Ya'kub,  aneuk Ishak
Nyang that bijak,  indah rupa

Aneuk Nabi, yullah Ibrahim
Nabi karim,  hana tara
Nabi Syuib , deungoe meunan
Neudroeb yoehnyan , neucoem neuwa 

Ka neucoem le,  ban saboeh badan
Seureuta neukheun,  meunoe haba
Wahe aneuk , nyang samlakoe
Ulon teunyoe , kaom gata

Saboeh bangsa,  deungoen kamoe
Deungoe jinoe,  Ion calitra
Ulon Syuib , aneuk Madyan
Aneuk Qidan , nyang peurkasa

Aneuk Ismail , aneuk Ibrahim
Nabi karim,  hana tara
Nyan keuh bangsa,  kawom kamoe
Saboeh taloe,  deungon gata

Wahe aneuk , nyang meutuah
Gaseh Allah , that keu gata
Tuhan neubri , keubajikan
Gata intan , meubahgia

Keumuliaan , donya akhirat
Bri hadharat , akan gata
Meunan sabda , Nabi Syuib
Teuma marit,  Nabi Musa

Neupeugah hai,  dum sinaroe
Hingga sampoe , keunan teuka
Neu weh nibak,  raja Firaun
Tinggai mideuen,  deungoen kuta

Sabab neutumboek , raja Firaun
Nyang jeuet neuplueng,  nyang mulia
Neubloeh rimba,  padang huteuen
Neubri maklum , dum simua

Dari awai , hingga akhe
Habeh sare,  neucalitra
Teuma seuot,  Nabi Syuib
Saban nasib , Ion ngon gata

Nabi Syuib,  pih neupeugah
Nyang jeuet neuweh , bineh rimba
Seubab kawom , han ji iman
Akan Tuhan,  po Nyang Esa 

Han jipateh , ban nyang titah
Murka Allah,  neubri bala
Keu sigala , kawoem ‘asi
Nyang meu ungki , keu Rabbana

Ngoen suara , deumpek Jibrail
Habeh mate,  dum sineuna
Musa deungoe,  dum khabaran
Hireuen yoehnyan,  hana tara

Tatkala nyan,  'alaihissalam
Pujoe Tuhan , hana reuda
Tuan Siri , nibak dapu
Maguen laju , peue-peue nyangna

Hingga masak,  sekalian
Neuboeh dalam,  hidang raya
Ukeue Musa ,neubeuot rijang
Dua sajan , ngoen ayahda

Teuma marit , po sambinoe
Dua jaroe , di jeumala
Peusinget geupet .peubasah jaroe
Makeuen teungku droe, meubu ngoen sira

Eungkoet laot,  hana soe bloe
Han toem keunoe , na ureueng ba
Bek malee-malee , makeuen beutroe
Nibak adoe , dalam rimba

Kru seumangat , wahe adoe
Nibak Ion nyoe,  that mulia
Goeh Ion makeuen , rasa ka troe
Mangat asoe,  jeueb anggeta

Teuma makeuen,  Nabi yullah
Hate dasyah , dalam dada
'Oh lheueh makeuen,  pinah hidang
Troeh lom puan,  nyang meujeuntra

Pajoeh ranub,  na sigapu
Teuma meusu , nyang mulia
Nabi Syuib,  marit pantah
Dum neupeugah , ubakMusa 

Wahe aneuk , nyang samlakoe
Tadoeng sinoe,  jinoe gata
Bek le tajak , barang kahoe
Bahle sinoe,  sajan hamba

Lon peukawen,  gata jinoe
Aneuk kamoe , nyoe na dua
Aneuk ulon , na dua droe
Tangieng keudroe , ri nyang suka

Kalon keudroe,  ri nyang hajat
Nyang mupakat , nafsu hawa
Tageubeue kameng,  lapan seun haji
Jeunamee siti , aneuk hamba

Beukit geunap , siploeh seun haji
Nyan bakti , nibak gata
Troeh siploh thoen,  gata sinoe
Teuma sampoe,  akan gata

Akan datang , keubajikan
Nibak Tuhan , po Nyang Esa
Meunan sabda , Nabi yullah
Dum neupeugah , ubak Musa

Jaweueb Musa , insya Allah
Ban nyang titah,  nyang mulia
Hana dawa,  nibak ulon
Ulon junjoeng,  ban nyang sabda

Hingga teuma , wahe sahabat
Bek panyang that,  Ion calitra
Maksud mantoeng,  ulon peugah
Deungoen ringkah , he syeedara

Bak masanyan , neupeunikah
Siti indah , deungoen Musa
Judo Musa, deungo Ion peugah
Siti indah,  nan Safura

Rupa ilok,  hanpeu peugah
Siulah sang , bungoeng jeumpa
Tamse buleuen , reumbang peuet blah
Cahya limpah , hana tara 

Hingga teuma , wahe adoe
Teutap sinoe , Nabi Musa
Musa neu eh , lam meuligoe
Deungon putroe , Ti Safura

Teubiet faja , beungoeh uroe
Ban dua droe , lalu jaga
'Oh ban jaga,  troen jak manoe
Suci  asoe , pat nyang lata

Lheueh nyan , neu ek u meuligoe
Salen jinoe , bajee ija
Na sikeujab,  troeh hidangan
Makeuen yohnyan,  le bandua

'Oh lheueh makeuen,  pinah hidang
Neukheun yohnyan,  le ayahda
Nabi Syuib , marit rijang
U bak tuan,  Ti Safura

Ta ek aneuk,  u meuligoe
Tungkat keunoe , sikrak taba
Tacoek  aneuk , sikrak tungkat
Taba leugat,  u bak hamba

Siti deungoe,  suroeh ayah
Neu ek pantah , u istana
Sikrak tungkat,  neucoek bagah
U bak ayah , lalu neuba

Nabi Syuib , samboet tungkat
Neukheun leugat , meunoe haba
Tacoek laen , he sambinoe
Bek tungkat nyoe,  keunoe taba

Tuan siti , coek Ie bagah
Neujak keubah , bak soet nyang ka
Neukeumeung coek,  tungkat laen
Lom tungkat nyan,  keunan teuka

Siti seumpoem , laju leugat
Laen tungkat , loem neuraba
Sare neumat , deungoen tangan
Lom tungkat nyan,  ka meugisa 

Troeh lhee kali , Siti seumpoem
Meuriwang lom , bak tangannya
Siti kaloen , meunan ulah
Neuba pantah , bak ayahda

Katroeh lhee seun,  ulon keubah
Wahe ayah , lom meugisa
Nabi Syuib , deungoe meunan
Neucoek yohnyan,  tungkat sigra

Neumat tungkat , Nabi yullah
Neurhoem pantah , u bak donya
Neurhoem tungkat,  u bak bumoe
Neukheun meunoe,  u bak Musa

Wahe aneuk , nyang samlakoe
Coek tungkat nyoe,  akan gata
Akan gata,  Ion bri jinoe
He samlakoe,  nyan pusaka

Nyan keuh tungkat,  Nabi Adam
Nyang neupeutroen,  lam syureuga
Hingga troeh , bak Ibrahim Nabi
Bak Ismail,  lheueh nyan teuma

Lheueh nyan turoen,  u bak Qidan
Lom bak Madyan , ayah hamba
Hingga sampoe,  bak lon tuan
Lon nyang simpan,  tungkat mulia

Teuma jinoe , wahe intan
Ulon pulang , akan gata
Kheundak Allah , keu gata geupulang
Beugoet intan , ta peulara

Musa deungoe,  haba meunan
Tungkat yoehnyan,  neucoek sigra
Musa kaloen , that sukaan
Indah han ban,  neu eu rupa

'Oh lheueh Musa,  neucoek tungkat
Yoehnyan leugat,  jak geumbala
Kubeue kameng,  dalam padang
Teuma neukheun , Ie tuan tuha 

Wahe aneuk , deungoe kamoe
Bek sungoe , kameng taba
Bek taba rabe , bineh krueng nyan
Sabab sinan , le that naga

Habeh kameng , jipeureulan
Naga sinan , raya raya
Seu ot Musa , insya Allah
Kiban titah , nyang mulia

Musa paroeh , kameng yoehnyan
Dalam padang , laju neuba
'Oh troeh neuba,  dalam padang
Bineh krueng,  nyan cit jihala

Bandum kameng , jijak keunan
Han ek neutham,  uleh Musa
Musa paroeh,  dalam padang
Kameng keunan , sit jiteuka

Bak bineh krueng , cit jikarat
Nibak teumpat,  nyang Ie naga
Bandum kameng,  jijak keunan
Han ek meutham , uleh Musa

Hingga teuma,  'alaihissalam
Neuduek sinan , Ie neujaga
Di yueb kayee,  bineh buket
Neugloeng tungkat,  u bak donya

U bak bumoe,  neugloeng tungkat
Istirahat,  nyang mulia
Jipoet angen , dirui mangat
Yoehnyan teungeut , Nabi Musa

Tatkala nyan , Musa teungeut
Sinan diyueb,  kayee raya
Tungkat neugloeng , di geunireng
Dumna kameng,  meuroet sigra

Nabi Musa , teungeut pangsan
Bak masanyan , teubiet naga
Teungoeh naga , di dalam krueng
Han teubileueng,  jai lagoena 

Ladoem raya , miseue bak u
Sulu-sulu , ta eu rupa
Ladoem ta eu , sang bak sagee
Jangak ulee , teungoeh lanja

Jijak laju , dalam padang
Meung peureulan , kameng dumna
Takdi Tuhan,  po hadarat
Yoehnyan , tungkat jadi naga

Jeuet le naga,  nyang raya that
Sangat hebat , hana tara
Naga lam krueng,  jipoeh leugat
Han teukhimat,  jai lagoena

Habeh mate,  sikalian
Jihantam le , naga raya
Naga lam krueng , bandum mate
Teutiek bangke , dum meukeuba

Lheueh nibaknyan,  wahe sahbat
Jeuet loem tungkat , mise nyang ka
Rab ngoen Musa,  teugloeng meuhat
'Ajaeb that,  hana tara

Hingga teuma , na sikeujab
Jaga leugat , Nabi Musa
'Oh ban jaga,  teukeujoet that
Kameng leugat,  neupareksa

Neungieng kameng , dum seulamat
Hate mangat , hana tara
Loem neukalon,  naga le that
Habeh teupat , sinan fana

Dum meukeuba,  teutiek bangke
Habeh mate , dum sineuna
Nabi Musa , mangat hate
Musoeh hanle , ka binasa

Ucap syuko , 'alaihissalam
Pujoe Tuhan,  sidroe Esa
Hingga teuma,  wahe taulan
Teutap sinan,  Nabi Musa 

Geubeue kameng,  dalam padang
Ban surohan , bak tuan ta
Beungoeh neujak,  seupoet neuwoe
U bak putroe,  Ti Safura

'Oh ban sare , Musa neuwoe
Beudoeh putroe,  peumuüa
Neupeuindah,  jroeh han bagoe
Uleh putroe , Ti Safura

Seunang hate,  ban dua droe
Teuduek 'oh noe , seumeuntara
Bermula Nabi , bangsa Arab
Wahe sahbat , limoeng jua

Nyang peurtama , Nabiyullah Hud
Dua teuseubut,  Saleh nama
Keulhee Ismail , keupeuet Syuib
Meunan sabet,  lam calitra

Nyang keulimoeng , wahe sahbat
Nabi Muhammad , panghulee kita
Meunan teuseubut,  lam riwayat
Pham he sahbat , dum beurata

Adapun , Nabiyullah Syuib
Nyan keuh khatib,  dum anbia
Keureuna Syuib , paseh sangat
Nibak Arab , ngoen Ajam dumna

Sabda Syuib,  u bak kawom
Neuyue iman , Tuhan Nyang Esa
Nama kawom,  Ashabul Ikah
Meunan geupeugah , lam calitra

Han jipateh,  bandum kawoem
Syuib jikheun,  that duseuta
Nabi Syuib,  jipeusalah
Murka Allah , neubri bala

Ateueh kawoem , Ashabul Ikah
Siksa Allah,  keunan teuka
Deungon suara,  deumpek Jibrail
Habeh mate , dum sineuna 

Peureuman Tuhan,  saboeh ayat
Nyoe Ion surat , saboeh banja
WA ILA MADYAN AKAHUM SYUAIB
QALA YA QAUMU 'BUDULLAHA

Sabda Syuib , Nabiyullah
Neupeugah,  bak kawoem dumna
U bak sigala,  ahli madinah
Seumbah Allah , bandum gata

Tabeu iman , akan Tuhan
Nyang peujeued alam,  dum sineuna
Langet bumoe , buleuen bintang
Dum sibarang , Tuhan peuna

Tapeubeutoi , dum timbangan
Ngoen sukatan , bandum gata
Tapeubuet , nyang keubajikan
Tabeu iman , Tuhan nyang Esa

Keujahatan , bek tapeubuet
Bek tareuboet,  manusia
Bahwa ulon,  bri nasihat
Nyang manfaat,  akan gata

Supaya bek,  murka Allah
Supaya leupah,  bak neuraka
Han tapike , nikmat Allah
Neubri mudah , dum sigala

Bak jameun nyan,  jameun murah
Neubri mudah , raseuki gata
Bak masa nyan,  siribee apam
Saboeh dirham,  nyan hareuga

Dumnan keuhthat,  keumudahan
Karonya Tuhan,  yoehnyan masa
Bak masa nyan , dumnan nikmat
Buet khianat , jikeurija

Jipeusalah , dum timbangan
Ngoen sukatan,  dum sineuna
Jikeurija , buet nyang jeuheut
Jimeureuboet , dum sigala 

Sabda Nabi , han jipateh
Kawoem paleh , that ceulaka
Meunoe jikheun , kawoem 'asi
U bak Nabi , nyang mulia

Wahe Syuib , hareuta kamoe
Ban galak droe,  meukeurija
Peue nyang suka , peubuet jinoe
Hareuta kamoe , jai lagoena

Hoe nyang suka , meuba jinoe
Gata sidroe,  pakoen subra
Teuma seuot,  Nabi yullah
Neupeugah,  bak kawoem dumna

Akan teuka , seksa Tuhan
Meunyoe meunan,  bicara gata
Ingat -ingat , wahe kawoem
Meunyoe ulon,  gata dakwa

Bahwa ulon , peusuroeh Allah
Neuyue peugah , dum bak gata
Buet nyang larang,  neuyue teugah
Neuyue peugah,  nikmat syureuga

Lam syureuga , nikmat limpah
Karonya Allah , keu mukmin dum na
Barangsoe peubuet,  keubajikan
Balah Tuhan , nikmat syureuga

Neuyue peugah , sigala azeueb
Soe nyang peubuet,  darohaka
Soe nyang maksiet,  lam donya nyoe
Pakri dudoe,  lam neuraka

Neubri azeueb,  macam-macam
Uroe malam , hana reuda
Han tadeungoe,  wahe kawoem
Tuhan peutroen , dum na bala

Miseue karam,  kawoem Nabi Noh
Kawoem Nabi Saleh , ngoen suara
Ngoen suara , deumpek Jibrail
Habeh mate , dum sineuna 

Neupeutroen angen,  keu kawoem Hud
Kawoem Nabi Lut,  neubalek donya
Goeh lom jeuoh,  ngon kawoem Lut
Han taingat,  bandum gata

Lakee ampon , bak Tuhan makbud
Bek Ie peubuet , darohaka
Bek Ie jinoe,  dalam sisat
Paleng leugat , bandum gata

Supaya gata , dum seulamat
Donya akhirat,  beu sijahtra
Meunan sabda , Nabi yullah
Neupeugah , bak kawoem dumna

Seuot kawoem , Ashabul Aikah
Ahli madinah,  dum sineuna
Wahe Syuib , bek Ie tutoe
Han meudeungoe,  haba gata

Bandum kamoe , han meupateh
Le that rinteh , tabicara
Lon eu gata , pi that daif
Nyang goet taweh,  sinoe gata

Lom ngon mata , pih seupoet that
Kamoe lihat , hana daya
Nyang goet minah,  laju sinoe
Sayang kamoe,  meupoeh gata

Minah leugat,  lam nanggroe nyoe
Bek ngoen kamoe le bicara
Meunan jikheun,  kawoem 'asi
Seuot Nabi,  nyang mulia

Wahe kawoem,  ingat keudroe
Akan sampoe , keunoe bala
Meuhan tapateh , ban lon peugah
Siksa Allah , skeunoe teuka

Nibak masanyan,  meutroen Jibrail
ka nibak Nabi , nyan that mulia
Oh ban sare troeh,  saleuem ka neubri
Seuot Nabi,  pantah le sigra

Ya Nabi yullah,  meukheun Jibrail
Suroeh rabbi , akan gata
Minah leugat , sinoe Nabi
Siksa rabbi , akan teuka

Nabi Syuib , deungoe meunan
Fireuman Tuhan,  po Nyang Esa
Minah laju , bak masa nyan
U bak padang,  bineh rimba

Neuweh dalam , nanggroe Madyan
Dalam padang , meuseuninya
Aneuk cucoe,  neuba sajan
Sekalian , hamba sahya

Leupah Nabi , ka neuminah
Pó teu Allah , peutroen bala
Ateueh kawoem , Ashabul Aikah
Ahli madinah,  lom seureuta

Meuhat deuk,  masa nyan phon
Sigala kawoem,  that seungsara
Bandum kawoem , bak masa nyan
Keulaparan,  seumuanya

Han meuteumeung,  makanan le
Jinoe meusueke , hana nyang sa
Teuma troeh lom , seksa Tuhan
Katroeh awan , keunan teuka

Rakyat kaloen , teuka awan
Akan hujan , bak jisangka
Sangka reudoek , hujeuen datang
Seupeurti ban,  nyang biasa

Awan jitroen , troeh u bumoe
Hingga rab sampoe , bak keupala
Ateueh bumoe , awan ka rab
Jeuet keu asap,  apui pi na

Rhoet le keunan,  ateueh kawoem
Habeh tutoeng , seumuanya
Habeh hangoeh , sikalian
Ban teureundang,  ta eu rupa

Na nyang tinggai , hana tutoeng
Jibrail troen , keunan sigra
Troeh Jibrail , neuduempek le
Habeh mate , dum sineuna

Hana tinggai , meusidroe le
Nanggroe sunyi,  ureueng hana
Habeh mate,  kawoem 'asi
Nyang meu ungki,  keu rabbana

Nabi Syuib,  teutap sinan
Nibak padang,  bineh rimba
Sinan neuduek , 'alaihissalam
Pujoe Tuhan,  roek-roek masa

Seuntoek sabe,  lam ibadat
Peubuet taat , keu rabbana
Padum lawet,  Syuib sinan
Bak masa nyan , datang Musa

Troeh dua thoen , Musa sinan
Neukheun yoehnyan , le tuan Ta
Wahe aneuk , deungoe kamoe
Lon hareutoe,  u bak gata

Meung na aneuk , kameng dum nyoe
Dalam thoen nyoe,  he aneukda
Sigala nyang,  bulee hitam
Sikalian,  milek gata

Nyan keuh upah , gata intan
Meunan neukheun,  le tuan Ta
Hingga teuma , keuheundak Tuhan
Bandum hitam , neukaronya

Aneuk kameng , dalam thoen nyan
Bulee hitam , seumuanya
Bak thoen laen,  Nabi Syuib
Lom neumarit , ubak Musa

Wahe aneuk , dalam thoen nyoe
Lon hareutoe , jeumba gata
Nyang na aneuk , bulee puteh
Tueng beuhabeh,  milek gata

Meusamboeng ke Bagian …3