Pages


Jumat, 03 Mei 2013

¤ KISAH HAROET - MAROET ¤



Oleh : Akhbar Al-Mutawassila
===============­========
Alhamdulillah, haba mulaan
Lon pujoe Tuhan, 'Azza wajalla
Nyang peujeut bumoe, hana meutiang
Beuseurta insan, lat batat dumna

Seulaweut saleum, akan janjongan
Pang ulee 'alam, rasul Musthafa
Ateuh sahabat, juga ikotan
Teuma khususan, keluarga maulana

Neubri Ya Allah, hatee lon lapang
Teunang pikiran, mangat anggota
Beu ek mampu, ulon keumarang
Kisah lam Qur an, lon suet ulua

Sigohlom Bireuen, adalah Peusangan
'Oh lheuh nibak nyan, baroe Peudada
Kisah Haroet-Maroet, ulon neuk karang
Seubagoe peringatan, tacoek seumpeuna

Nibak siuroe, geu calitrakan
Malaikat Tuhan, meukumpoi seumua
Mandum ka sibok, geutanyoeng bak Tuhan
Pakon bersalahan, dum buet manusia

Nibak malaikat, Allah meu Firman
Memang lagee nyan, awakkah meubeuda
Gata malaikat, cuma na iman
Sedangkan insan, nafsu juga na

Ci tapileh, 2 droe kheun Tuhan
Ulon neuk paban, lagee bak manusia
Nak takalon, kiban awak nyan
Peu kelakuan, saban lagee mereka

Lheuh geupileh, 2 droe pilihan
Geutamah lee Tuhan, jeut 3 hai saudara
Haroet-Maroet, ta'at that keu Tuhan
Ban 3 ureung nyan, nafsu geubri seukeutika

Singkat calitra, ureung nyan Geutugaskan
Dalam kehidupan, khalayak manusia
Jeut meu-ubat, ahli ubat-ubatan
Ilme pengetahuan, pih hebat lagoina

Uroe meutugas, malam woe bak Tuhan
Juga ureung nyan, jeut peuputoh peukahra (hakim)
Trep bak trep, berkelanjutan
Hingga troek datang, masa geucoba

Teuka sidroe putroe, ceudah hanaban
Nyang teungoh goyang, dalam rumoh Tangga
Rupa that ceudah, nibak masa nyan
Sampoe teukeunang, meubayang lam mata

Seubab nafsu, kana lam badan
Kalaen pemikiran, malaikat nyan dua
Beujeut miliki, hajat digobnyan
Putroe Zuhra nyan, bek goeb lee poe jeumba

Meunyoe awai, geubri putusan
Lagee garesan, hana meutuka
Teuma jinoe, laen that pertimbangan
seubab peurasaan, meuleumpah gura

Akhe bak buet, laju geu ungkapkan
Bandua malaikat nyan, ka jatoh cinta
Bek lee neutueng, wahee nyak intan
Kamoe gantoekan, jeut lakoe gata

Putroe Zuhra, bri 4 persyaratan
Keu ujian, pembuktian cinta
Nyang pertama, lakukan pembunuhan
Dudoe taubatan, nibak Allah ta'ala

Nyang keu dua, ajak perzinahan
Keu 3 rakan, jep arak teuma
Nyang teurakher, peureunoe ajian
Ismul A'dham, phoe u angkasa

Lheuh geubri, 4 boeh persyaratan
Geuyu timang-timang, lee Putroe Zuhra
3 uroe ukeu, lakukan pertemuan
Seubagoe pembuktian, cinta malaikat nyan 2

Bak pikee-pikee, lheuh geutimang
Toeh pilihan, nyang ubit dausa
Jep arak, han that bersalahan
Seubab atra nyan, sidroe tatanggong dausa

 Peureunoe cara phoe, pih kemudahan
Jeut ta ajarkan, seucara rahsia
Maka bulat, bandua pikiran
Meurumpoek gaseh sayang, cut putroe Zuhra

Lheuh negoisasi, ban 3 ureung nyan
2 geu laksanakan, 2 han geukeurija
Teuma akhe, kana persetujuan
Kana perjanjian, MoU bersama

Peureunoe laju, nyan Ismul A'dham
Hingga jeut teureubang, putroe ngon siklep mata
Geujep arak, nyang ka geusiapkan
Mabok disinan, malaikat mandua

'Oh ka mabok, kachoe pikiran
Ka macam-macam, hatee ji hawa
Hingga han kontrol, na keinginan
Meuheut per"campur"an, nirahi ka nyata

Teungoh geurayu, putroe didalam
Katroek keunan, sidroe pemuda
Bak geukalon, haroet-maroet meunan
Teukeujot badan, sang han peucaya

Daripada malee, nibak masa nyan
Geupoeh hai rakan, meunyan pemuda
Laju geurupah, dan pelampiasan
Hancoe disinan, mahkota putroe zuhra

Ban sadar, dudoe 'oh lheuh nyan
Laju peunyesalan, malaikat dua
Geumoe ba-e, lakee amponan
Namun Tuhan, laen rencana

Putroe zuhra, pih malee hanaban
Ngon ismul A'dham, geuphoe u angkasa
Teuma banna, diteungoh jalan
Hana lee jalan, lanjot ka hana

Geuneuk riwang, troen u daratan
Ismul A'dham, pih han bekerja
Maka dilanget, na saboh bintang
Yang keindahan, nan bintang Zuhra
 
Haroet-Maroet, hadap pengadilan Tuhan
Lee pelanggaran, ka geukeurija
Geuyu pileh, 2 hukuman
Untuk penebusan, dahsya geukeurija

Geuhukom laju, nibak masa nyan
Qiamat teuman, bebas lagee biasa
Atau geuhukom, uroe pembalasan
Nibak masa nyan, hukuman hana

Hukom jinoe, geukheun bak Tuhan
Seubagoe pembalasan, kamoe pubuet dahsya
Bak langet keu 3, geu gantungkan
Sijeungkai ukuran, dari laot raya

Teuma sidroe treuk, malaikat pilihan Tuhan
'Oh nafsu kasajan, maken ta'at keu Rabbana
Teuma dilon, katuwoe soe nan
Baci neu sampornakan, nyoe calitra???

¤¤¤¤¤¤¤ HABEH ¤¤¤¤¤¤¤¤



0 komentar:

Posting Komentar

Komentar FB :